རྗེ་བཙུན་མའི་བསྐང་བ་མཁའ་དབྱིངས་སྤྲིན་གྱི་རོལ་མོ།
རྗེ་བཙུན་མའི་བསྐང་བ་མཁའ་དབྱིངས་སྤྲིན་གྱི་རོལ་མོ་བཞུགས༔ བསྐང་རྫས་རྣམས་ཀུན་ཏུ་བཟང་པོའི་རྣམ་པར་འཕྲུལ་བཞིན་ནམ་མཁའ་མཛོད་ཀྱི་སྔགས་རྒྱས་བརླབས་ལ༔ ཨོཾ་ཨཱཿཧཱུྃ༔ རྒྱལ་ཀུན་ངོ་བོ་ཀུན་བཟང་རྡོ་རྗེ་འཆང༔ དགའ་རབ་ཤྲཱི་སེང་པད་འབྱུང་བཱི་མ་ལ༔ བརྒྱུད་གསུམ་བླ་མ་ལུང་རིག་གཏེར་མཛོད་སོགས༔ ཡོངས་འཛིན་དྲིན་ཐོབ་དམ་པའི་ཐུགས་དམ་བསྐང༔ ཞི་བ་བཞི་བཅུ་འབར་བ་ཁྲག་འཐུང་དང༔ དག་པ་རིག་འཛིན་ཡི་དམ་རྒྱུད་སྡེ་དྲུག༔ ཞི་ཁྲོ་བཀའ་བརྒྱད་མ་ཡ་དུས་འཁོར་སོགས༔ ཡི་དམ་རྒྱུད་སྡེ་སྒྲུབ་སྡེའི་ཐུགས་དམ་བསྐང༔ རྗེ་བཙུན་སྒྲོལ་མ་དབྱངས་ཅན་འོད་ཟེར་ཅན༔ རིག་བྱེད་ལྷ་མོ་ནོར་གྱི་རྒྱུན་མ་སོགས༔ ཏཱ་རེ་ཉེར་གཅིག་བཀའ་ གཏེར་སྲུང 
་མའི་ཚོགས༔ རབ་འབྱམས་དཀྱིལ་འཁོར་རྒྱ་མཚོའི་ཐུགས་དམ་བསྐང༔ གཞན་ཡང་ཐུགས་དམ་བསྐང་བའི་དམ་རྫས་ནི༔ ཕྱི་ནང་གསང་བ་ཡང་གསང་མཆོད་པ་འབུལ༔ ལྟ་སྒོམ་སྤྱོད་གསུམ་ཇི་བཞིན་རྟོགས་པས་མཆོད༔ སྐུ་གསུམ་འདུ་འབྲལ་བྲལ་བའི་རིག་པས་བསྐང༔ མཆོད་བྱ་མཆོད་བྱེད་སྤང་བླངས་བྲལ་བས་བསྐང༔ རྩ་གསུམ་སྲུང་མའི་གསང་གསུམ་དམ་འགལ་ལས༔ བཤག་བྱ་བཤགས་བྱེད་བྲལ་བའི་རིག་སྟོང་ཀློང༔ གཉིས་མེད་མཉམ་པ་ཆེན་པོའི་དབྱིངས་སུ་བཤགས༔ ཨ་ལ་ལ་ཧོ༔ ཡི་གེ་བརྒྱ་པ་བཟླས་ཤིང་མི་དམིགས་གཤིས་ལ་ཀློད༔ ས་མ་ཡཱ༔ བསྐང་བ་འདི་དད་དང་དམ་ཚིག་ལྡན་པའི་བཙུན་པ་ཀུན་བཟང་ནས་བསྐུལ་ངོར༔ དག་སྣང་ལས་ས་ར་ཧི་ཏས་སྤེལ་པ་དགེའོ༔