ལུས་སྦྱིན་ཡེ་ཤེས་མངོན་གྱུར་པདྨ་དྲག་རྩལ་གླིང་པས་མཛད་པ།
ཟབ་ཆོས་ལས༔ ལུས་སྦྱིན་ཡེ་ཤེས་མངོན་གྱུར་བཞུགས་སོ༔ ཕཊ༔ རང་སྣང་བདག་མེད་ཀློང་དུ་བསྡུས༔ རང་རིག་ཀ་དག་རྣལ་འབྱོར་མ༔ སྟོང་གསུམ་མཉམ་པའི་ཀ་པ་ལ༔ བམ་ཆེན་བདུད་རྩིའི་མཆོད་པ་བཤམས༔ ཨོཾ་ཨཿཧཱུྃ༔ ཕཊ༔ ཕཊ༔ ཕཊ༔ བླ་མ་ཡི་དམ་མཁའ་འགྲོ་དང༔ ཆོས་སྐྱོང་ནོར་ལྷ་སྡེ་བརྒྱད་ཚོགས༔ འགྲོ་བ་རིགས་དྲུག་སེམས་ཅན་དང༔ ཁས་ཞན་ཉམས་ཆུང་མ་ལུས་པ༔ སྟོན་ཆེན་མགྲོན་ལ་གཤེགས་སུ་གསོལ༔ ཕཊ༔ ཕཊ༔ ཕཊ༔ ཡར་མཆོད་དཀོན་མཆོག་མགྲོན་ལ་མཆོད༔ མར་མཆོད་རིགས་དྲུག་ལན་ཆགས་བྱང༔ གནོད་བྱ་དང་གནོད་བྱེད་ལྷ་འདྲེ་ལ༔ མི་ཟད་ཀྱི་འདོད་ཡོན་སྤྲུལ་ཏེ་འབུལ༔ ཕཊ༔ ཕཊ༔ ཕཊ༔ རང་སེམས་ཀྱི་འཁོན་ནས་ལྷ་འདྲེ་ཀུན༔ བདག་མེད་ཀྱི་ཀློང་དུ་འུབ་ཆུབ་རོལ༔ རང་རིག་གི་ངོ་བོ་རྗེན་པར་བུད༔ ཀ་དག་གི་རིག་པའི་གཤིས་སུ་ཨཱ༔ ཕཊ༔ ཕཊ༔ ཕཊ༔ ཅེས་བརྗོད་ས་ལམ་བར་ཆད་སེལ༔ ཚོགས་རྫོགས་སྒྲིབ་སྦྱོང་བདུད་བཞི་འཇོམས༔ ཟབ་པའི་མཐར་ཐུག་ཨེ་མ་ཧོ༔ གང་ནས་བརྗོད་ཀྱང་འགྲན་ཟླ་བྲལ༔ ས་མ་ཡཱ༔ རྒྱ་རྒྱ་རྒྱ༔ ཞེས་པའང་གཅོད་ཀྱི་ཆོས་སྐོར་ལ་དབང་བའི་བླ་མ་དམ་པ་ཆོས་གྲགས་ཀྱི་དུས་རིང་པོ་ནས་བསྐུལ་ངོར༔ བདག་པདྨ་དྲག་རྩལ་གླིང་པས་བྲིས་པས་ཕྱོགས་ཀུན་ཏུ་དར་ཞིང་རྒྱས་པར་གྱུར་ཅིག༔