གཅོད་ཀྱི་མན་ངག་གཅིག་ཆོག་ཟབ་མོ།

ཕཊཿ རང་སྣང་རྣམ་དག་དོན་གྱི་འོག་མིན་ན༔ སྐུ་དང་ཡེ་ཤེས་རབ་རྫོགས་བླ་མ་རྗེ༔ དོན་དམ་མི་ཤིགས་ངོ་བོ་ཐིག་ལེའི་སྐུ༔ སྨིན་གྲོལ་དབང་དང་གདམས་པའི་མཛོད་དུ་ཤར༔ ཕཊཿ གསོལ་བ་འདེབས་སོ་སྐུ་བཞིའི་བདག་ཉིད་དཔལ༔ དད་མོས་གདུང་ཤུགས་དྲག་པོས་ཐུགས་རྒྱུད་བསྐུལ༔ མ་རིག་སྒོང་རྒྱར་དུབ་པའི་སེམས་སེམས་བྱུང༔ ཡེ་གཞི་ཀ་དག་ཀློང་ཆེན་དགོངས་པར་རོལ༔ ཞེས་བརྗོད་ཅིང་རང་གཞན་གྱི་རིག་པ་བླ་མའི་ཐུགས་རྣམ་པར་མི་རྟོག་པའི་ཡེ་ཤེས་དང་རོ་གཅིག་ཏུ་འདྲེས་ནས་སྐུ་གསུམ་གྱི་དགོངས་ཀློང་ཡངས་པོར་སད་ནས་བདེ་ཆེན་འཕོ་འགྱུར་མེད་པའི་གདེང་ཆེན་ཐོབ་པར་བསམ་ལ་ཕཊཿདང་པོས་བསྲེ༔ ཕཊཿགཉིས་པས་སྒྲིབ་པ་དག༔ ཕཊཿགསུམ་པས་དབང་བཞི་ཡོངས་སུ་རྫོགས་ཏེ་སྐུ་གསུམ་གྱི་གདེང་ཆེན་ཐོབ་པར་བསམ༔ ཐུགས་ཡིད་བསྲེ་བ་འདི་ནད་དང་གནོད་པ་རྐྱེན་དང་བར་ཆད་སེལ་བའི་མཆོག་ཡིན༔ མཆོག་ཐུན་མོང་གི་དངོས་གྲུབ་ཐམས་ཅད་འབྱུང་བའི་གནད་འདི་ཁོ་ནའོ༔ དེ་ནས་རིག་པ་དབྱིངས་སུ་སྤར་བ་ནམ་མཁའ་གོ་འབྱེད་ནི༔ རང་ལུས་ཆེ་ཚོ་རབ་བརྗིད་དབུས་རྩའི་སྦུབས༔ བླ་ཚེ་བསོད་ནམས་རིག་པ་གཅིག་དྲིལ་བའི༔ དྭངས་མའི་ཐིག་ལེ་དཔག་ཆེན་མདའ་ལྟར་འཕང༔ ཤེས་རབ་དབྱིངས་སུ་ཐབས་ཀྱི་ཕྱག་རྒྱར་བཞེངས༔ ཞེས་བརྗོད་པའི་དུས་སུ་རང་གི་ལུས་ཆེ་བ་ཚོ་བ་སྣུམ་པ་ཤིན་ཏུ་བརྗིད་པའི་དབུས་སུ་རྩ་དབུ་མ་སྟོང་གསལ་མདའ་སྨྱུག་འབྲིང་པོ་ཙམ་པ་ཡར་སྣེ་ཚངས་པའི་བུ་གར་ཟུག་པ༔ མར་སྣེ་ལྟེ་བའི་འོག་ཏུ་འགགས་པའི་ནང་སྙིང་གི་ཐད་དུ་བླ་ཚེ་བསོད་ནམས་ཐམས་ཅད་འདུས་པའི་ངོ་བོ་ཐིག་ལེ་ཁ་དོག་ལྔ་དང་ལྡན་པ་བྱ་མ་སར་གྱི་སྒོ་ང་ཙམ་པ༔ གསལ་ལ་འཚེར་བ་སྣུམ་ལ་འདྲིལ་བར་གསལ་བ་དེ་དཔག་ཆེན་གྱིས་མདའ་འཕང་བ་ལྟར་སྟེང་གི་ནམ་མཁར་ཐོགས་པ་མེད་པར་བསམ༔ ཕཊཿདང་པོས་སྤར༔ གཉིས་པས་དབྱིངས་ལས་བཞེངས༔ གསུམ་པས་མ་ཅིག་ཁྲོས་མ་ནག་མོའི་སྐུར་བཞེངས་པར་བསམ་ལ༔ ཕཊཿ ཕཊཿ ཕཊཿ སྐུ་གསུམ་ལྷུན་གྲུབ་ཁྲོས་མ་ནག་མོའི་སྐུ༔ ཕྱག་གཉིས་གྲི་ཐོད་སྤྱན་གསུམ་ནམ་མཁར་གཟིགས༔ ཞབས་གཉིས་འདོར་སྟབས་རུས་རྒྱན་མེ་དཔུང་འབར༔ ཁ་ཊཱྃ་ཀ་བཀལ་སྤྱི་བོར་ཕག་ཞལ་ངུར༔ ཕཊཿབརྗོད་པས་སྐུ་གསུམ་ལྷུན་གྲུབ་ཀྱི་རང་ངོ་རིག་སྟེ༔ ཕྱག་གཡས་གྲི་ཁུག་བམ་གྱི་ཐོད་པ་བྲེག༔ རང་བྱུང་ལྷུན་གྲུབ་ཐོད་སྒྱེད་སྟེང་དུ་བབས༔ དེ་ནང་གཟུགས་ཕུང་བདུད་རྩིའི་རྒྱ་མཚོར་ཞུ༔ ལྦུ་བ་ཕྱིར་ལུད་ཞིང་ཆེན་ས་གཞིའི་སྟེང༔ ཤ་རི་ཁྲག་མཚོ་རུས་གྲམ་ཞག་གི་བཀྲག༔ འདོད་ཡོན་མི་ཟད་ནམ་མཁའི་མཛོད་དུ་སྤེལ༔ ཨོཾ་ཨཱཿཧཱུྃ་ཧ་ཧོ་ཧྲི༔ ལན་གསུམ་བརྗོད༔ དམིགས་པ་ནི༔ རང་ཉིད་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་སྐུར་གསལ་བའི་ཕྱག་གཡས་གྲི་ཁུག་ཚད་པ་ཙམ་གྱིས་ཐོད་པ་རྒར་གྱིས་འཕར་བ་ཐོད་པ་ར་རི་གསུམ་གྱི་སྒྱེད་པུར་བབ་པས་བྷན་དྷ་ལྕང་ལོ་ཅན་ཡངས་ཤིང་རྒྱ་ཆེ་བ་རྒྱ་ཁྱོན་ཆོས་ཀྱི་དབྱིངས་དང་མཉམ་པ་ཞིག་ཏུ་གྱུར་བར་བསམ༔ སླར་ཡང་གྲི་ཁུག་ཚད་པ་ཙམ་གྱིས་ལུས་ཀྱི་པགས་པ་དབང་ཆེན་གསེར་གྱི་ས་གཞི་ཁེབ་པར་ཁྱབ་པར་གྱུར༔ གཟུགས་ཕུང་མགོ་མེད་པ་དེ་བྷནྡྷའི་ནང་དུ་འཕང་བའི་འོག་ནས་མེ་རླུང་འཐབ་པས་ཐོད་པ་དྲོས༔ གཟུགས་ཀྱི་ཕུང་པོ་ལྟེམ་གྱིས་ཞུ་ནས་རབ་ཏུ་ཁོལ་ཞིང༔ ལུད་པའི་ལྦུ་བ་ཞིང་ལྤགས་ཀྱི་གཞི་ལ་བབ་པས་བཟའ་བ་ཤ་ཡི་རི་བོ༔ བཏུང་བ་ཁྲག་གི་རྒྱ་མཚོ༔ བཅའ་བ་རུས་པའི་གྲམ་ཁྲོད༔ ལྡག་པ་ཚིལ་ཞུན་གྱི་རྒྱ་མཚོ༔ གཞིབ་པ་རྐང་དང་ལྷ་བ༔ གཞན་ཡང་འཁོར་འདས་གཉིས་ཀྱི་མགྲོན་རིགས་ཐམས་ཅད་ལ་རང་རང་གི་སྤྱོད་ཡུལ་དང༔ མཐུན་པའི་འདོད་ཡོན་མི་ཟད་ལོངས་སྤྱོད་རྒྱན་གྱི་འཁོར་ལོ་ནམ་མཁའ་མཐའ་དང་མཉམ་པར་བསམ༔ ཕཊཿདང་པོས་སངས་རྒྱས་ཆོས་དང་དགེ་འདུན༔ བླ་མ་ཡི་དམ་མཁའ་འགྲོ༔ ཆོས་སྐུ་ལོངས་སྐུ་སྤྲུལ་སྐུ་སོགས་དཀོན་མཆོག་སྲིད་ཞུའི་མགྲོན་དང༔ ལྷ་བརྒྱད་ཀླུ་བརྒྱད་གཟའ་བརྒྱད་ཕྱོགས་སྐྱོང་བཅུ༔ འཇིགས་བྱེད་དགུ༔ རྒྱལ་ཆེན་བཞི༔ རྒྱུ་སྐར་ཉེར་བརྒྱད་སོགས་མགོན་པོ་ཡོན་ཏན་གྱི་མགྲོན་དང༔ དམྱལ་བ་ཡི་དྭགས་དུད་འགྲོ་ལྷ་དང་ལྷ་མིན་མི་སོགས་རིགས་དྲུག་སྙིང་རྗེའི་མགྲོན་རྣམས་ཐམས་ཅད་ཀྱིས་ཐོས༔ ཕཊཿགཉིས་པས་གནས་ནས་ཆས༔ ཕཊཿགསུམ་པས་ནམ་མཁའ་བར་སྣང་ས་གཞིའི་ཁམས་ཐམས་ཅད་གང་ནས་ཐིབ་ཀྱིས་འདུས་ཤིང་འཁོད་པར་བསམ༔ སླར་ཡང་ཕཊཿཀྱིས་ལས་བྱེད་སྤྲུལ་པའི་མཁའ་འགྲོ་མ་དཔག་ཏུ་མེད་པ་འཕྲོས་ནས་འགྱེད་ལས་བྱེད་པར་བསམ་ལ༔ ཕཊཿ སངས་རྒྱས་ཆོས་དང་དགེ་འདུན་དང༔ བླ་མ་ཡི་དམ་མཁའ་འགྲོ་དང༔ ཆོས་སྐུ་ལོངས་སྐུ་སྤྲུལ་སྐུ་སོགས༔ དཀོན་མཆོག་སྲིད་ཞུའི་མགྲོན་རྣམས་ལ༔ མཆོད་སྤྲིན་མི་ཟད་རྒྱན་འཁོར་འབུལ༔ ཚོགས་རྫོགས་དོན་གཉིས་ལྷུན་གྲུབ་ཤོག༔ ཕཊཿདང་པོས་ཐོབ༔ ཕཊཿགཉིས་པས་བདེ་སྟོང་གི་རོས་ཚིམ༔ ཕཊཿགསུམ་པས་ཐུགས་རྣམ་པར་མི་རྟོག་པའི་ཡེ་ཤེས་བདག་ལ་འཕོ་བར་བསམ༔ གནས་མཆོག་ཉེར་བཞི་ཡུལ་སོ་གཉིས༔ ཧེ་རུའི་གནས་བཅུ་དུར་ཁྲོད་བརྒྱད༔ རྡོ་རྗེ་ཕུང་པོའི་གྲོང་ཁྱེར་དང༔ འབྲེལ་བའི་དཔའ་བོ་མཁའ་འགྲོ་མཆོད༔ བརྟུལ་ཞུགས་སྤྱོད་པ་མཐར་ཕྱིན་ནས༔ ལྷ་འདྲེའི་འགྲོ་དོན་ནུས་པར་ཤོག༔ ཕཊཿ ཕཊཿ ཕཊཿ དང་པོས་མཆོད༔ གཉིས་པས་ཐོབ༔ གསུམ་པས་ཐུགས་བདེ་སྟོང་གི་རོས་ཚིམས་པར་བསམ༔ ཕཊཿ ལྷ་བརྒྱད་ཀླུ་བརྒྱད་གཟའ་ཆེན་བརྒྱད༔ ཕྱོགས་སྐྱོང་བཅུ་དང་རྒྱལ་ཆེན་བཞི༔ རྒྱུ་སྐར་ཉེར་བརྒྱད་འཇིགས་བྱེད་དགུ༔ མགོན་པོ་ཡོན་ཏན་མགྲོན་རྣམས་ལ༔ གཙང་མ་འདོད་ཡོན་ཚོགས་ཀྱིས་མཆོད༔ ཐུགས་དམ་གཉན་པོ་བསྐང་གྱུར་ཅིག༔ ཕཊཿ ཕཊཿ ཕཊཿ དང་པོས་མཆོད༔ གཉིས་པས་ཐོབ༔ གསུམ་པས་ཐུགས་ཟག་མེད་ཀྱི་བདེ་བས་ཚིམས་པར་བསམ༔ དམྱལ་བ་ཡི་དྭགས་དུད་འགྲོ་དང༔ མི་དང་ལྷ་དང་ལྷ་མིན་སོགས༔ ཁམས་གསུམ་སེམས་ཅན་ཐམས་ཅད་ལ༔ གང་ལ་གང་མཁོའི་འདོད་ཡོན་བསྔོ༔ ཐམས་ཅད་ངོམ་ཞིང་ཚིམ་གྱུར་ནས༔ འབྲེལ་བ་ཐོབ་ཚད་སངས་རྒྱས་ཤོག༔ ཕཊཿ ཕཊཿ ཕཊཿ དང་པོས་མཆོད༔ གཉིས་པས་ཐོབ༔ གསུམ་པས་གྲོལ་བར་བསམ༔ ཕཊཿ སྟོང་གསུམ་བརྡལ་ཁྱབ་ཞིང་ལྤགས་གཞིར༔ ཤ་རི་ཁྲག་མཚོ་རུས་གྲམ་ཁྲོད༔ རྐང་ཚིལ་ལྷ་བ་མར་ཁུར་འཁྱིལ༔ འདོད་ཡོན་ནམ་མཁའ་མཉམ་པར་བརྡལ༔ འབྲུ་གསུམ་ནུས་པས་བདུད་རྩིར་བསྒྱུར༔ མགྲོན་རྣམས་སྐད་ཅིག་སྤྱན་དྲངས་གྱུར༔ ཨོཾ་ཨཱཿཧཱུྃ༔ཧ་ཧོ་ཧྲཱིཿ ལན་གསུམ༔ ཕཊཿ ཕཊཿ ཕཊཿ དང་པོས་སྡེ་བརྒྱད་ལྷ་རྣམས་ཀྱིས་ཐོབ༔ གཉིས་པས་གནས་ནས་ཆས༔ གསུམ་པས་ཐིབས་ཀྱིས་འདུས་པར་བསམ༔ ཡ་ཀི་སྲིད་རྩེ་མན་ཆད་ནས༔ མ་ཀི་དམྱལ་ཁམས་ཡན་ཆད་ཀྱི༔ བཀའ་ཡི་ལྷ་སྲིན་སྡེ་བརྒྱད་དང༔ སྣང་ཞིང་སྲིད་པའི་ལྷ་འདྲེ་རྣམས༔ ཤ་ཁྲག་སྟོན་འགྱེད་མགྲོན་ལ་ཤོག༔ ནམ་མཁའི་སྐར་ལྟར་འཁྲིགས་ལ་ཤོག༔ བར་སྣང་སྤྲིན་ལྟར་གཏིབ་ལ་ཤོག༔ ས་གཞིར་རླུང་ལྟར་འཚུབས་ལ་ཤོག༔ མ་འགྱང་མ་ཕྱི་མྱུར་དུ་གཤེགས༔ གཏན་གྱི་ལོངས་སྤྱོད་འདི་ལ་འདུས༔ ཕཊཿ ཕཊཿ ཕཊཿ དེ་རིང་དོན་གྱི་དཔའ་བོ་ངས༔ འཁོར་འདས་རོ་སྙོམ་བརྟུལ་ཞུགས་ཀྱིས༔ གཅེས་འཛིན་ཕུང་པོ་ཚོགས་སུ་བཤམས༔ ཕ་མ་ལྷ་འདྲེ་མགྲོན་དུ་དྲངས༔ ཕཊཿ ལྷ་དང་གཤིན་རྗེ་མ་མོ་བདུད༔ སྲིན་པོ་བཙན་དང་གནོད་སྦྱིན་དང༔ ཀླུ་དང་ཐེའུ་རང་རྒྱལ་པོ་གཟའ༔ བཀའ་ཡི་ལྷ་སྲིན་སྡེ་བརྒྱད་ལ༔ གང་ལ་གང་མཁོའི་འདོད་ཡོན་སྦྱིན༔ ལྷག་མ་མེད་པར་ཧབ་ཐོབ་རོལ༔ ཕཊཿ ཕཊཿ ཕཊཿ དང་པོས་ཆེ་དགུ་མཆོད༔ གཉིས་པས་འབྲིང་དགུ༔ གསུམ་པས་ཆུང་དགུ་ཐམས་ཅད་ལ་ཐོབ་པར་བསམ༔ ཕཊཿཀྱིས་ངོམ་ཤིང་ཚིམ་པར་བསམ༔ རྒྱལ་པོ་བེ་དཀར་བེར་ནག་དང༔ ཙི་དམར་འགོང་པོ་སྤུན་དགུ་སོགས༔ ཞེ་སྡང་ཕོ་གདོན་ཐམས་ཅད་ལ༔ འདོད་ཡོན་ནམ་མཁའ་མཛོད་དུ་འབུལ༔ ཐམས་ཅད་ངོམས་ཤིང་ཚིམ་གྱུར་ནས༔ འཁྲུལ་མེད་རང་ངོ་མཐོང་བར་ཤོག༔ ཕཊཿ ཕཊཿ ཕཊཿ བསེན་མོ་མི་ཟན་ཁྲག་རལ་མ༔ འཕྲོག་མ་ཆེན་མོ་ཁ་འབར་མ༔ མ་བདུད་རྒྱལ་མོ་སྤུན་དགུ་སོགས༔ འདོད་ཆགས་མོ་གདོན་འདྲེ་མོ་ལ༔ འདོད་ཡོན་མི་ཟད་གཏེར་དུ་བསྔོ༔ དགའ་མགུ་ཡི་རང་ཚིམ་གྱུར་ཅིག༔ ཕཊཿ ཕཊཿ ཕཊཿ ཀླུ་བདུད་ནཱ་ག་ར་ཛ་དང༔ རྒྱལ་རིགས་རྗེ་རིགས་བྲམ་ཟེ་དང༔ གདོལ་བ་ནག་པོ་ལ་སོགས་པའི༔ གཏི་མུག་ཀླུ་གདོན་ས་བདག་ལ༔ འདོད་ཡོན་མི་ཟད་གཏེར་དུ་བསྔོ༔ ཐམས་ཅད་ཕྱམ་གཅིག་སངས་རྒྱས་ཤོག༔ ཕཊཿ ཕཊཿ ཕཊཿ ཉོན་མོངས་དུག་ལྔ་དུག་གསུམ་དང༔ རྟེན་དང་བརྟེན་པའི་ལྷ་འདྲེ་ནི༔ བགེགས་རིགས་སྟོང་ཕྲག་བརྒྱད་ཅུ་དང༔ བྱིས་པའི་གདོན་ཆེན་བཅོ་ལྔ་དང༔ འཕྲོག་མ་མ་བུ་ལྔ་བརྒྱ་སོགས༔ གཉུག་མར་གནས་པའི་ལྷ་འདྲེ་ལ༔ གང་ལ་གང་མཁོའི་འདོད་ཡོན་བསྔོ༔ དགའ་མགུ་ཡི་རང་ཚིམ་གྱུར་ནས༔ ཕྱམ་གཅིག་རྫོགས་སངས་རྒྱས་གྱུར་ཅིག༔ ཤ་འཁོན་ལན་ཆགས་བྱང་གྱུར་ཅིག༔ ཕཊཿ ཕཊཿ ཕཊཿ གྲི་བཙན་གྲོང་རྒྱུག་མོ་འདྲེ་དང༔ དམ་སྲི་འགབ་འདྲེ་ཆུང་སྲི་དང༔ ཟ་འདྲེ་ཤི་གཤེད་ཕོ་མོ་སོགས༔ ཤ་འཁོན་བུ་ལོན་ལན་ཆགས་བདག༔ གློ་བུར་ལྷག་པའི་ལྷ་འདྲེ་ཡན༔ གནོད་བྱེད་མ་ལུས་འཁོར་བཅས་ལ༔ འདོད་ཡོན་ནམ་མཁའ་མཛོད་དུ་བསྔོ༔ རྗེས་ཤུལ་ཙམ་ཡང་མ་བཞག་པར༔ བཞེས་ཤིག་རོལ་ཅིག་གང་དགར་སྤྱོད༔ སྟེར་མི་ནུས་ན་ང་ཞན་ཏེ༔ སྤྱོད་མི་ནུས་པར་ཁྱོད་རེ་ངན༔ ང་ཡི་ལུས་ཀྱི་ཐ་མ་ཡིན༔ སྦྱིན་པའི་ཕ་རོལ་ཕྱིན་པར་བྱེད༔ ལན་ཆགས་བུ་ལོན་ད་སོད་ཟིན༔ བདེ་ཆེན་དག་པའི་ས་རུ་ཕྱིན༔ འཁོར་བར་མི་ལྡོག་གདེང་ཐོབ་པོ༔ ཕཊཿ ཕཊཿ ཕཊཿ དེ་ལྟར་ལུས་ཀྱི་སྟོན་འགྱེད་བྱེད་པའི་དུས་སུ༔ ཕཊཿདང་པོས་ཐོབ༔ གཉིས་པས་ཚིམ༔ གསུམ་པས་གྲོལ་བ་ཐོབ་པར་བསམ༔ སྣང་སྲིད་དང་མཉམ་བྷན་སྣོད་དུ༔ ལྷག་མ་མྱོང་གྲོལ་འདོད་ཡོན་གཏེར༔ མི་ཟད་རྒྱན་གྱི་འཁོར་ལོའི་སྤྲིན༔ ལྷག་མགྲོན་ཉམ་ཐག་སྤྱན་དྲངས་གྱུར༔ ཕཊཿ ཕཊཿ ཕཊཿ རང་བྱས་ལས་ཀྱིས་མནར་བ་ཡི༔ ཁས་ཞན་དབང་ཆུང་ཉམ་ཐག་པའི༔ ཞ་ལོང་འོན་ལྐུགས་ཟུག་རྔུ་ཅན༔ མ་ལུས་ལུས་པ་མེད་པ་ལ༔ སྡུག་བསྔལ་ཀུན་སེལ་ཟས་སྨན་རྩི༔ འདོད་ཡོན་ལོངས་སྤྱོད་ཕུན་ཚོགས་བསྔོ༔ དགའ་མགུ་ཡི་རང་བདེ་ཆེན་ཐོབ༔ ཡེ་ཤེས་ཆེན་པོར་དབང་ཐོབ་ཤོག༔ ཕཊཿ ཕཊཿ ཕཊཿ དང་པོས་ཐོབ༔ གཉིས་པས་ཚིམ༔ གསུམ་པས་ཟག་མེད་བདེ་བ་ཆེན་པོའི་ངང་དུ་སད་པར་བསམ༔ སླར་ཡང་འཁོར་གསུམ་ཡོངས་དག་ཆེན་པོར་རྒྱས་འདེབས་ནི༔ ཕཊཿ ཆོས་ཉིད་སྒྱུ་མ་ལྟ་བུའི་ཏིང་འཛིན་གྱིས༔ ཐོག་མེད་སྦྱིན་སོགས་དུས་གསུམ་བསོད་ནམས་རྒྱུ༔ ཟག་མེད་སྤྲོས་མཐའ་བྲལ་བའི་ངང་དུ་བསྔོ༔ སྐུ་དང་ཡེ་ཤེས་ཆེན་པོས་སྨིན་གྲོལ་ཤོག༔ ཕཊཿ ང་མེད་ངར་འཛིན་བཏང་བའི་བརྟུལ་ཞུགས་གིས༔ རྒྱུ་དྲུག་འཁོར་བར་འཕྱན་པའི་སྐྱེ་འགྲོ་ཀུན༔ མ་འབད་ཡེ་གཞིའི་ཀློང་དུ་གདེང་རྙེད་ནས༔ འཇིགས་མེད་རྡོ་རྗེ་འཛིན་པའི་ས་ཐོབ་ཤོག༔ ཕཊཿ སེམས་དང་སེམས་བྱུང་སྣང་བ་སྣང་ཆར་བཅས༔ ཀུན་ཁྱབ་ཡེ་ཤེས་ཆེན་པོའི་ངང་དུ་བཞག༔ གསལ་བ་འགགས་མེད་ཡེ་ཤེས་ལྷུམས་སུ་ཞུགས༔ ཡེ་གཞི་ཀ་དག་ཆོས་དབྱིངས་ཆེན་པོར་སངས༔ འཁོར་འདས་མེད་ཅིང་རྒྱུ་དང་འབྲས་བུ་མེད༔ བདེ་སྡུག་རེ་དོགས་རོ་སྙོམ་ངང་དུ་དག༔ དབྱིངས་དང་ཡེ་ཤེས་འདུ་འབྲལ་མེད་པར་ཨཱ༔ ཕཊཿ ཕཊཿ ཕཊཿ ཅེས་བདག་དང་ཡུལ་སྣང་ཐམས་ཅད་གཉིས་སུ་མེད་པར་ངོ་བོ་སྟོང་པ་ཉིད་ཀྱི་ངང་དུ་ཞིག༔ ཡེ་གཞི་གདོད་མའི་མགོན་པོའི་ལྷུམས་སུ་གཞིག་པར་བཞག༔ དེ་ནི་དུས་དང་རྣམ་པ་ཐམས་ཅད་དུ་ཉམས་སུ་ལེན་པའི་མན་ངག་གཅིག་ཆོག་ཟབ་མོ་ཡིན༔