འགྱེད་བཞི།

གཅོད་ཀྱི་གདམས་ངག་རྒྱུན་དུ་ཉམས་ལེན་བྱེད་པའི་རྣལ་འབྱོར་པ་རྣམས་ཀྱིས་སྡིག་སྒྲིབ་སྦྱང་ཕྱིར་ཐོ་རངས་ནག་འགྱེད་བྱེད་པའི་ཐབས་ནི༔ ཕཊཿ རང་ལུས་ཚོ་སྣུམ་ཆེ་བརྗིད་དབུས་རྩ་ནས༔ རིག་པ་དྭངས་མའི་ཐིག་ལེ་ནམ་མཁར་སྤར༔ དབྱིངས་དང་ཡེ་ཤེས་གཉིས་མེད་ཁྲོས་མར་བཞེངས༔ མཐིང་ནག་གྲི་ཐོད་གར་སྟབས་རུས་རྒྱན་གསོལ༔ ཕཊཿ ཁམས་གསུམ་འཁོར་བའི་བག་ཆགས་སྡུག་བསྔལ་ཀུན༔ འོད་ནག་རྣམ་པར་བསྡུས་ཏེ་བེམ་པོར་ཐིམ༔ སྟོང་གསུམ་ཀུན་ཏུ་འགེང་བའི་མི་རོ་ནི༔ སོལ་ཕུང་ལྟ་བུར་ལྷ་འདྲེའི་ཡིད་འཕྲོག་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་བརྗོད༔ ཕཊཿ ཕཊཿ ཕཊཿ ཀླུ་གདོན་རྒྱལ་པོ་ཕག་གི་མགོ་ཅན་ལ༔ གཏི་མུག་ལས་བྱུང་ལྷ་འདྲེའི་འཁོར་གྱིས་བསྐོར༔ ཞེ་སྡང་རྒྱལ་པོ་སྦྲུལ་གྱི་མགོ་ཅན་ལ༔ ཞེ་སྡང་ལས་བྱུང་གདོན་བགེགས་འབྱུང་པོས་བསྐོར༔ འདོད་ཆགས་མོ་གདོན་བྱ་ཡི་གདོང་ཅན་ལ༔ འདོད་ཆགས་ལས་བྱུང་གདོན་བགེགས་ལྷ་འདྲེས་བསྐོར༔ འཁོར་འདས་དབང་མོ་རེ་ཏི་ནག་མོ་ཆེ༔ བུད་མེད་ནག་མོ་རལ་བསིགས་བྱེ་བས་བསྐོར༔ དུར་ཁྲོད་མི་རོ་བམ་གྱི་ཚོགས་ལ་འདུས༔ མ་ཐོགས་མ་འགྱངས་མགྲོན་དུ་གཤེགས་སུ་གསོལ༔ ཕཊཿ ཕཊཿ ཕཊཿ ཐོག་མེད་དུས་ནས་གཅེས་པར་བསྐྱངས་བ་ཡི༔ ང་མེད་ངར་འཛིན་འཁྲུལ་པའི་ཕུང་པོ་འདི༔ དེ་རིང་སྦྱིན་པ་ཆེན་པོའི་ཐབས་སུ་གཏོང༔ ཕཊཿ སྦྱིན་ཡུལ་མ་རིག་འཁྲུལ་པའི་ལྷ་འདྲེ་ནི༔ གཏི་མུག་ཀླུ་གདོན་ས་བདག་སྡེ་ཚོགས་དང༔ ཞེ་སྡང་རྒྱལ་པོ་ཕོ་གདོན་ཐམས་ཅད་དང༔ འདོད་ཆགས་མོ་གདོན་བསེན་མོའི་སྡེ་ཚོགས་བཅས༔ དེ་དང་དེར་བྱུང་ལྷ་འདྲེ་ཆེ་འབྲིང་ཆུང༔ མ་ལུས་ལུས་པ་མེད་པ་ཐམས་ཅད་ལ༔ དུར་ཁྲོད་མི་རོ་བམ་གྱི་ཚོགས་མཆོད་འབུལ༔ རྗེས་ཤུལ་ལྷག་མ་མེད་པར་ཧབ་ཐོབ་རོལ༔ ཕཊཿ ཕཊཿ ཕཊཿ དེ་ལྟར་སྦྱིན་ཡུལ་ལྷ་འདྲེ་ཐམས་ཅད་ཀྱིས༔ ཧབ་ཐོབ་རོལ་པས་སོལ་ཕུང་བཞིན་དུ་སོང༔ ཆེ་བས་ཆུང་ཟོས་གཙོ་བོ་གསུམ་གྱིས་ཟོས༔ རྒྱལ་པོས་མོ་ཟོས་ས་བདག་ཆེན་པོས་ཟོས༔ དེ་ཡང་ནག་པོ་ཆེན་པོས་ཁྱུར་མིད་ཟོས༔ འཁོར་དང་དཔུང་ཟོས་ཆོས་སྐུའི་ཀློང་དུ་ཡལ༔ ཕཊཿ ཕཊཿ ཕཊཿ བདག་དང་ཡུལ་སྣང་རྨི་ལམ་སད་པ་ལྟར༔ ཡེ་རིག་དོན་གྱི་ཧེ་རུའི་ངང་དུ་འདུས༔ ལྷ་མེད་འདྲེ་མེད་སངས་རྒྱས་སེམས་ཅན་མེད༔ བདག་མེད་ཡུལ་མེད་གནོད་བྱ་གནོད་བྱེད་མེད༔ ཕྱོགས་མེད་ཀ་དག་ལྷུན་འབྱམས་ཆེན་པོའི་ངང༔ མ་བཅོས་དེ་བཞིན་ཉིད་དུ་སྙོམ་པར་བརྡལ༔ ཕཊཿ ཕཊཿ ཕཊཿ ༈ ནང་པར་དཀར་འགྱེད་བྱ་བ་ནི༔ ཕཊ༔ ངར་འཛིན་བག་ཆགས་སྒྱུ་ལུས་ཕུང་པོ་ནས༔ དྭངས་མའི་ཤེས་རིག་གདོད་མའི་གཞི་རུ་འཕོས༔ ཆོས་ཉིད་དབྱིངས་ལས་ཡེ་ཤེས་སྒྱུ་འཕྲུལ་ལངས༔ རང་ཉིད་རྡོ་རྗེ་རྣལ་འབྱོར་དཀར་མོ་ཡིས༔ ཕྱག་གཡས་རལ་གྲིས་གཟུགས་ཀྱི་ཕུང་པོ་གཏུབ༔ རྡུལ་ཕབ་གཡོན་པས་རླུང་གི་བ་དན་གཡབ༔ ཤ་ཁྲག་རུས་པ་ཕྱོགས་མཚམས་ཀུན་ཏུ་གཏོར༔ ཕྱི་འབྱུང་སྣང་བའི་ཡུལ་དང་མཉམ་པར་བརྡལ༔ འོད་ཟེར་དཀར་དམར་མཐིང་གསུམ་གྱིས་སྦག་པས༔ གཞན་འཕྲུལ་ལྷ་ཡི་བཀོད་པ་འཕྲུལ་བཞིན་དུ༔ སྣང་སྲིད་འདོད་ཡོན་དཀར་མཆོད་སྤྲིན་དུ་བསྒྱུར༔ ངོ་བོ་བདེ་སྟོང་མྱོང་གྲོལ་བདུད་རྩི་ལ༔ རྣམ་པ་དཀར་གསུམ་མཚོ་དང་རི་བོ་ཐང༔ མངར་གསུམ་བྲག་རི་འདོད་དགུའི་སྤྲིན་ཕུང་གཡོ༔ ནམ་མཁའ་མཛོད་ཀྱི་དཔལ་ཡོན་བླ་ན་མེད༔ སྣོད་བཅུད་འདོད་ཡོན་མཆོད་པའི་རྒྱན་དུ་སྤེལ༔ ཨོཾ་ཨཱཿཧཱུྃ༔ ལན་གསུམ༔ ཕཊ༔ ཕཊ༔ ཕཊ༔ ཌཱ་དྲིལ་འུར་ཆེམ་མཐར༔ ཨེ་མ༔ སངས་རྒྱས་ང་ལ་སེམས་ཅན་ང༔ སྣོད་བཅུད་འདོད་ཡོན་སྣང་བ་ང༔ ཐམས་ཅད་ང་ཡི་ཆོ་འཕྲུལ་ཡིན༔ ཐམས་ཅད་ང་ཡི་རྟེན་འབྲེལ་ཆོས༔ ཐམས་ཅད་སྒྱུ་འཕྲུལ་ང་ལས་འཕྲུལ༔ ཐམས་ཅད་བསྡུ་ཡང་ང་ལ་འདུ༔ ཕཊ༔ ང་དབུ་མ་ཆེན་པོའི་རྣལ་འབྱོར་པས༔ ཆོས་ཐམས་ཅད་སྟོང་ཉིད་ཆེན་པོར་རྟོགས༔ ཡུལ་བཟང་ངན་མེད་པའི་དགའ་སྟོན་འགྱེད༔ ད་བདག་འཛིན་གཅོད་པའི་བརྟུལ་ཞུགས་སྤྱོད༔ ང་ཕྱག་རྒྱ་ཆེན་པོའི་རྣལ་འབྱོར་པས༔ ཆོས་སྒྱུ་མ་ལྟ་བུའི་ཏིང་འཛིན་གྱིས༔ དེང་མཆོད་སྦྱིན་དངོས་ཡུལ་རོལ་གར་བསྒྱུར༔ ཡུལ་དངོས་ཞེན་གཅོད་པའི་བརྟུལ་ཞུགས་སྤྱོད༔ ང་རྫོགས་པ་ཆེན་པོའི་རྣལ་འབྱོར་གྱིས༔ ཆོས་ཐམས་ཅད་རིག་པ་རྗེན་པར་རྟོགས༔ ད་འཁོར་གསུམ་རྣམ་དག་བརྟུལ་ཞུགས་ཀྱིས༔ དབྱིངས་དག་མཉམ་ཆེན་པོ་མངོན་དུ་བྱ༔ ཕཊ༔ ཕཊ༔ ཕཊ༔ གཞི་བདེ་གཤེགས་སྙིང་པོ་མཆོག་གསུམ་ལྷ༔ ལམ་རིག་རྩལ་རོལ་པ་ཡོན་ཏན་མགྲོན༔ དོན་ཟག་མེད་བདེ་བ་ཆེན་པོས་མཆོད༔ གདེང་ཀ་དག་དབྱིངས་སུ་བྱང་ཆུབ་བོ༔ ཕཊ༔ ཕཊ༔ ཕཊ༔ སེམས་དུག་གསུམ་ཁམས་གསུམ་འཁོར་བའི་ཡུལ༔ རྩལ་རྣམ་པར་རྟོག་པའི་ལྷ་འདྲེ་བགེགས༔ དོན་གཉིས་མེད་རོལ་པའི་ཆོས་ཀྱིས་བཅོས༔ དབྱིངས་ནམ་མཁའ་མཛོད་ཀྱི་ལོངས་སྤྱོད་སྟེར༔ ཕཊ༔ ཕཊ༔ ཕཊ༔ ཕྱི་གཟུང་བ་ཡུལ་གྱི་ལྷ་འདྲེ་ལ༔ འཕྲུལ་སྣ་ཚོགས་སྣང་བའི་འདོད་ཡོན་འབུལ༔ ཡུལ་དངོས་ཞེན་བག་ཆགས་རྣམ་དག་ནས༔ དོན་ཡུལ་མེད་ཟང་ཐལ་མཆོད་པ་བཞེས༔ ཕཊ༔ ཕཊ༔ ཕཊ༔ ནང་འཛིན་པ་སེམས་ཀྱི་ལྷ་འདྲེ་ལ༔ འཕྲུལ་མེད་བཞིན་སྣང་བའི་འདོད་ཡོན་སྟེར༔ ཡུལ་མངོན་ཞེན་ཨ་འཐས་འཕྱང་གྲོལ་ནས༔ དོན་གཞི་མེད་རྩ་བྲལ་མཆོད་པ་བཞེས༔ ཕཊ༔ ཕཊ༔ ཕཊ༔ བར་གཟུང་འཛིན་འབྲེལ་བའི་ལྷ་འདྲེ་ལ༔ འཕྲུལ་འཁོར་བ་ལུགས་འབྱུང་ཆོས་རྣམས་སྟེར༔ ཡུལ་སྤང་ལེན་མེད་པར་རང་ཞིག་ནས༔ གཞི་ཀ་དག་བརྡལ་ཁྱབ་མཆོད་པ་འབུལ༔ ཕཊ༔ ཕཊ༔ ཕཊ༔ ཡུལ་ཁམས་གསུམ་འཁོར་བའི་སེམས་སྣང་ཆོས༔ དཔེ་སྒྱུ་མའི་འཁྲུལ་འཁོར་ཞིག་པ་བཞིན༔ དབྱིངས་རྣམ་ཐར་གསུམ་ལྡན་བཙུན་མོའི་མཁར༔ ད་འཁོར་འདས་དག་མཉམ་ཨ་ལ་ལ༔ ཕཊ༔ ཕཊ༔ ཕཊ༔ ༈ ཉིན་གུང་ཁྲ་བོར་འགྱེད་པ་ལ༔ ཕཊཿ རང་ལུས་ལང་ཚོ་དཔལ་ཡོན་ཕུན་ཚོགས་དབུས༔ ཨ་ཝ་དྷུ་ཏི་ཤེལ་གྱི་སྦུ་གུ་ནས༔ རྣམ་པར་ཤེས་པ་ནམ་མཁར་མདའ་ལྟར་འཕང༔ དབྱིངས་ལས་ཁྲོས་མ་མཐིང་ནག་གྲི་ཐོད་ཅན༔ ཕྱག་གཡས་གྲི་ཁུག་བེམ་པོར་ཚད་ཙམ་གྱིས༔ ཚེ་རབས་ལུས་དང་ལོངས་སྤྱོད་བསྡུས་ཏེ་བསྟིམ༔ ཞིང་ལྤགས་གཞི་ལ་ཤ་རི་ཁྲག་མཚོ་བསྐྱིལ༔ བྷན་དྷར་ཟག་མེད་ཡེ་ཤེས་བདུད་རྩིར་འཁྱིལ༔ སྟོང་གསུམ་ས་གཞི་ཁོད་སྙོམ་ཡངས་པ་རུ༔ དཀར་མངར་སྐྱུར་དང་དྲི་སྨན་འབྲུ་ཟས་རིགས༔ གསེར་དངུལ་ཟངས་ལྕགས་ནོར་བུ་རིན་ཆེན་དཀོར༔ གོས་དར་རས་འཇམ་མཛེས་ལྡན་རེག་བྱའི་རིགས༔ སྦྲ་ཁང་གནས་མལ་ལ་སོགས་རྟེན་རྣམས་དང༔ རི་དྭགས་གཡུང་དྭགས་ཆུ་གནས་བྱ་རིགས་སོགས༔ འདོད་ཡོན་མི་ཟད་རྒྱན་གྱི་འཁོར་ལོར་ཤར༔ འབྲུ་གསུམ་ནུས་པས་མྱོང་གྲོལ་བཅུད་ལྡན་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ༔ ཕཊཿ ཕཊཿ ཕཊཿ གཏན་གྱི་མགོན་པོ་དཀོན་མཆོག་རིན་པོ་ཆེ༔ དཀར་ཕྱོགས་སྐྱོང་མཛད་མགོན་པོ་ཡོན་ཏན་མགྲོན༔ མ་ཐོགས་མཆོད་ཡུལ་མགྲོན་དུ་གཤེགས་སུ་གསོལ༔ འགྲོ་བ་རིགས་དྲུག་བར་དོའི་སེམས་ཅན་སྤྱི༔ བགེགས་རིགས་ལན་ཆགས་སྦྱིན་ཡུལ་འདྲེ་གདོན་ཡན༔ མ་ལུས་བྱ་རྒོད་ཤ་ལ་འཐིབས་པ་བཞིན༔ སྐད་ཅིག་ཉིད་ལ་སྤྱན་འདྲེན་གཤེགས་སུ་གསོལ༔ ཕཊཿ ཕཊཿ ཕཊཿ སྐྱབས་གནས་དཀོན་མཆོག་རྩ་གསུམ་སྐུ་གསུམ་མཆོད༔ མགོན་པོ་ཡོན་ཏན་མགྲོན་གྱུར་ཀུན་ལ་མཆོད༔ རིགས་དྲུག་བར་དོའི་སེམས་ཅན་ཡོངས་ལ་བསྔོ༔ སྣང་སྲིད་ལྷ་འདྲེ་ལན་ཆགས་མགྲོན་ལ་བསྔོ༔ ཁས་ཞན་དབང་ཆུང་ཉམ་ཐག་ཀུན་ལ་བསྔོ༔ གང་ལ་གང་མཁོའི་འདོད་ཡོན་ཕུན་ཚོགས་གཏེར༔ མི་ཟད་ནམ་མཁའ་མཛོད་དུ་སྤྲུལ་ཏེ་འབུལ༔ ཡས་མགྲོན་ཐམས་ཅད་བདེ་སྟོང་རོས་ཚིམས་ནས༔ བདག་སོགས་འགྲོ་བའི་ཚོགས་གཉིས་རྫོགས་གྱུར་ཅིག༔ ཕཊཿ ཕཊཿ ཕཊཿ མས་མགྲོན་ཐམས་ཅད་དགའ་མགུ་བདེ་ལྡན་ཅིང༔ སྡིག་སྒྲིབ་བག་ཆགས་རྒྱུ་འབྲས་དང་བྲལ་ནས༔ གཏན་བདེ་ཕུན་ཚོགས་དཔལ་དང་རྟག་ལྡན་ཏེ༔ མི་འགྱུར་རྡོ་རྗེའི་གཏན་སྲིད་ཐོབ་གྱུར་ཅིག༔ ཕཊཿ ཕཊཿ ཕཊཿ དགེ་འདིས་འགྲོ་ཀུན་ངོ་བོ་ཉིད་དུ་སད༔ ཕྱམ་གཅིག་གདོད་མའི་གཞི་ལ་སངས་རྒྱས་ཤོག༔ མཆོད་སྦྱིན་གནས་ཡུལ་གཉིས་མེད་རོལ་པའི་ངང༔ སྐུ་གསུམ་ལྷུན་གྲུབ་ཆེན་པོར་ལྷུན་ཞུགས་ནས༔ དང་པོའི་སངས་རྒྱས་དགོངས་པ་མཉམ་བརྡལ་ཀླས༔ ཕཊཿ ཕཊཿ ཕཊཿ ༈ དགོང་མོར་དམར་འགྱེད་བྱ་བ་ལ༔ འབྱུང་བ་སྙིགས་མར་ལས་ཀྱིས་འཐས་པ་ཡི༔ མི་གཙང་བག་ཆགས་སྒྱུ་མའི་གནས་ཁང་ནས༔ དྭངས་མའི་ཤེས་རིག་གདོད་མའི་གཞི་རུ་བསྡུ༔ སླར་ཡང་ཡེ་ཤེས་མཁའ་འགྲོའི་རྣམ་པར་བཞེངས༔ ཕཊཿ ཕཊཿ ཕཊཿ སྙིགས་མའི་ལུས་ཀྱི་ལྤགས་པ་གཞི་ཡངས་བརྡལ༔ ཤ་ཁྲག་རུས་པ་ཐར་གྱིས་ཞིག་པ་ཡིས༔ ཤ་རི་ཁྲག་མཚོ་རུས་པའི་གྲམ་ཁྲོད་བརྡལ༔ རྐང་ཚིལ་ལྷ་བ་མར་ཁུའི་རྒྱ་མཚོ་འཁྱིལ༔ ལྦུ་བ་ངད་རླངས་འདོད་ཡོན་སྤྲིན་ཕུང་འཁྲིགས༔ འབྲུ་གསུམ་ནུས་པས་མྱོང་གྲོལ་བཅུད་ལྡན་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་མཐར༔ རང་ཉིད་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་མཚམས་སྟེང་འོག་ཐམས་ཅད་ནས་ཆོས་ཉིད་མི་འགྱུར་བའི་ངོ་བོ་ལས་ཡེ་ཤེས་མཁའ་འགྲོ་བཅུ་གཅིག་ལ་སྒྱུ་འཕྲུལ་རོལ་པ་རྩལ་རྫོགས་ཀྱི་ཚུལ་དུ་མཁའ་འགྲོ་མ་བྱེ་བ་འབུམ་སྡེ་སྣང་སྲིད་ལྷ་འདྲེས་བསྐོར་བ་དང་བཅས་སྤྱན་དྲངས༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ དབུས་སངས་རྒྱས་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ ཤར་རྡོ་རྗེ་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ ལྷོ་རིན་ཆེན་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ ནུབ་པདྨ་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ བྱང་ལས་ཀྱི་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ སྟེང་མཁའ་སྤྱོད་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ མཚམས་ལས་ཀྱི་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ འོག་ས་སྤྱོད་རིགས་ཀྱི་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿཕཊཿཕཊཿམ་ཡེ་ཤེས་དབྱིངས་ལས་གར་སྒྱུར་མ༔ བར་དམ་ཚིག་ཤ་ཟ་མཁའ་འགྲོ་མ༔ ཁྱོད་སྤྲུལ་པ་བྱེ་བ་འབུམ་དང་བཅས༔ འཁོར་སྣང་སྲིད་ལྷ་འདྲེའི་ཚོགས་དང་བཅས༔ ད་འདིར་གཤེགས་ཤ་ཁྲག་རུས་རྐང་རོལ༔ རྐྱེན་བར་ཆད་གཡུལ་ངོ་དབྱིངས་སུ་སོལ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་མཁའ་འགྲོ་མ༔ ཁྱོད་རྣམ་འཕྲུལ་མ་ངེས་ཅིར་ཡང་བསྒྱུར༔ མ་ཁྱེད་ལ་འགྲོ་བའི་དོན་ལས་མེད༔ ངས་ཤ་ཁྲག་རུས་རྐང་མགྲོན་དུ་འགྱེད༔ རྐྱེན་ནད་གདོན་སྡུག་བསྔལ་རྒྱུ་འབྲས་བཅས༔ དབྱིངས་ཡུལ་མེད་ཟང་ཐལ་ངང་དུ་རོལ༔ སེམས་འཁྲུལ་བ་གཟུང་དང་འཛིན་པས་འཕྱང༔ དབྱིངས་སྤྲོས་བྲལ་ངང་དུ་བཤིག་ཏུ་གསོལ༔ རྒྱུ་བག་ཆགས་ཡུལ་དང་ཡུལ་བྱེད་བདག༔ གཞི་ཀ་དག་སྐྱེ་མེད་ངང་དུ་རོལ༔ ཕྱོགས་མཐའ་འཛིན་པའི་གཉིས་འཛིན་སེམས༔ དབྱིངས་ཡུམ་ཆེན་དགོངས་པས་གཅད་དུ་གསོལ༔ ཕཊཿ ཕཊཿ ཕཊཿ ཡུལ་བཟང་ངན་མེད་པར་རང་གི་གཤིས༔ རྒྱུ་དགེ་སྡིག་མེད་པ་དང་པོའི་གཞི༔ རྐྱེན་ཕན་གནོད་མེད་པ་ཟང་མ་ཐལ༔ རྒྱུད་འཁོར་འདས་མེད་པ་འུབ་ཆུབ་ཀློང༔ ལམ་སྦྱང་བསྒྲོད་མེད་པའི་རྫོགས་པ་ཆེ༔ ཚེ་འདི་ཕྱི་མེད་པ་ཀ་དག་དུས༔ ད་ཐོག་མའི་སངས་རྒྱས་རང་ལ་སད༔ དོན་བསྒོམ་བཞག་བློ་བྲལ་ཆེན་པོ་ནི༔ ཡེ་རྣམ་ཐར་གསུམ་ལྡན་བཙུན་མོའི་མཁའ༔ ངང་མི་ཤིགས་ངོ་བོར་བྱང་ཆུབ་བོ༔ ཕཊཿ ཕཊཿ ཕཊཿ དེ་ལྟར་དུས་བཞིར་སྦྱར་ནས་རྟག་ཏུ་བརྩོན་པར་བྱའོ༔ ལར་གཉན་སར་མཚན་མོ་མི་འབུད༔ མར་མེ་དང་གསལ་སྒྲོན་མི་སྦར༔ རྐང་རྗེན་དུ་མི་འགྲོ༔ དྲག་སྔགས་མི་བཟླ༔ རྟོག་པའི་བསྐྱེད་བསྒོམ་མི་བྱ༔ གཤང་གཅི་དང་དྲི་ཆུ་ཕྱོགས་གཅིག་ལས་མི་འདོར༔ ཀྭིའི་མི་བཏབ༔ ལྷྭམ་སྔས་སུ་བཅུག༔ ཞྭ་རྟེན་མར་བཞག༔ གཞོག་གཡས་སར་གཏད༔ བརླ་དང་དཔུང་པ་སྟན་དུ་བཏིང༔ ལག་གཡས་མཐིལ་གྱིས་མགོ་གདན་བྱ༔ ལྟད་མོ་དང་འདུ་འཛི་སྤང་པ་རྣམས་ལག་ལེན་ནོ༔ འཇིགས་སྐྲག་ཇི་ལྟར་བྱུང་ཡང་བྲོས་པ་དང་གསོལ་འདེབས་སྐྱབས་འཚོལ་གང་ཡང་མི་བྱ་བ་གནད་ཡིན་ཏེ༔ གལ་ཏེ་བྲོས་ན་ཡང་སླར་ཡང་གནས་དེ་ནས་མ་ཆོད་ཀྱི་བར་དུ་དེ་ཉིད་དུ་འདུག་གོ༔ ལན་དགུར་བྲོས་ཕན་ཆོད་གཉན་ལོག་ཡིན་པས་གཞན་དུ་ཡང་འགྲོ་མི་རུང༔ དེ་རུ་ཡང་འོང་བར་མི་བྱ༔ གནས་གཅིག་པུ་དེ་ཉིད་ལ་ལན་དགུར་འཁོར་བའི་རྗེས་ཆོད་ཀྱང་ཆོག་པ་ཡིན༔ ལྷོང་ཚད་ཀྱི་རྗེས་སུ་ཚར་ཚད་ཡོད་པས་དེ་བྱུང་ཕན་ཆད་གནས་འཕོ་བ་ལས་སྡོད་མི་རུང༔ ཚར་ཚད་ནི་དངོས་ཉམས་རྨི་ལམ་གང་རུང་ལ་མི་མང་པོས་ཕྱག་འཚལ་བ༔ མཆོད་པ་འབུལ་བ༔ ནོར་ཟས་ཕུལ་བ༔ སྐྱབས་འཚོལ་བ༔ བཀའ་ཉན་པ༔ ཁས་ལེན་པ༔ བསྟོད་ཅིང་བསྔགས་པ་བརྗོད་པ༔ རོལ་མོ་སྒྲོག་པ༔ ཉི་ཟླ་ཤར་བ༔ མེ་ཏོག་སྣ་ཚོགས་སྐྱེས་པ༔ སྟོན་མོ་བྱེད་པ་སོགས་མདོར་ན་ཅི་བྱུང་ཅི་ཤར་ཅི་སྣང་ཡང་སེམས་བདེ་བ༔ ཉམས་རྟོགས་སྐྱེ་བ་ལུས་ངག་ཐམས་ཅད་བདེ་ལྷང་ངེ་ཡོད་པ་ན་བཟང་ངན་ཅི་བྱུང་ཡང་ཚར་ཚད་ཡིན་པས་གནས་འཕོ་བའི་རྟགས་ཚད་ཡིན༔ བཟང་པོའི་ལྟས་ཤར་ཡང་སེམས་ལ་རེ་དོགས་འཁུ་འཕྲིག་དགའ་སྡུག་འཇིགས་སྐྲག་ལ་སོགས་ལུས་ངག་ཡིད་གསུམ་མི་བདེ་དུང་ངེ་ཡོད་ན་ནི་ཚར་ཚད་འདྲ་ཡང་ལྷོང་ཚད་དུ་ངེས་སོ༔ བཟང་ངན་ཅི་བྱུང་ཡང་བཟང་ངན་མེད་པར་རོ་སྙོམ་པ་ནི་གནད་ཀྱི་ཡང་གཅེས་དམ་པ་ཡིན༔ དང་པོས་འཕོ་ཚད་ནི་སྐྱེ་བོའི་མགོ་དང་ཡན་ལག༔ དོན་སྙིང་བཅད་ནས་རང་ལ་སྟེར་བ༔ རྒྱན་དང་ལོངས་སྤྱོད༔ དཀོར་གནས་འབུལ་བ༔ ཤིང་རྩ་དང༔ བྲག་གདུག་པ་ཅན་རྣམས་བཅོམ་པ༔ མཚོ་སྐེམ་པ༔ ཉམ་ཐག་པའི་སེམས་ཅན་མང་པོ་ལ་སྟོབས་དང༔ བདེ་བ་སྟེར་བ་རྣམས་འབྱུང་བ་ནི་དང་པོ་ཆོད་པའི་ཚད་ཡིན་པས༔ འུར་རྡོའི་གང་ཚུན་ཆད་ལ་མི་གནས་པར་སྤོ༔ ཐ་མའི་ཆོད་ཚད་ནི་སྡེ་བརྒྱད་ལྷ་འདྲེ་རྣམས་ཀྱིས་བྲན་ཁས་ལེན་ནས་མནའ་ཐོ་བྱ་བ༔ སྲོག་སྙིང་ཕུལ་བ༔ སྐྱེ་འགྲོ་མང་པོའི་གཙུག་རྒྱན་དུ་བསྔགས་པ༔ ཁྲི་རུ་མངའ་གསོལ་ནས་མི་དཔོན་བླ་ཆེན་རྣམས་ཀྱིས་དབང་ཞུས་ཏེ་འཁོར་འབངས་སུ་ཁས་ལེན་པ༔ གོས་དང༔ གོ་ཁྲབ་གྱོན་ནས༔ ཁྲི་ཆེན་དུ་འཁོད་དེ༔ སྡེ་ཆེན་གྱི་སྡེ་དཔོན་དུ་འགྱུར་བ༔ དམག་དཔུང་དང་འགྲོགས་ནས་ཡུལ་མང་པོ་ཁ་ལོ་བསྒྱུར་བ༔ འབྲུག་སེང༔ སྟག་གཟིག༔ འབྲོང་གཡག༔ བྱ་རིགས་ལ་སོགས་སྐྱེ་འགྲོ་ཞོན་པ་འདུལ་བར་བཀོལ་བ༔ ཉི་ཟླ་གདན་དུ་བཏིང་བ༔ རི་རྒྱལ་ཀུན་ལས་མཐོ་བའི་རི་ཆེན་གྱི་རྩེ་རུ་འདུག་པ༔ ས་དང་ཡུལ་མང་པོ་དབང་དུ་བསྒྱུར་བ་རྣམས་ཞི་མཐའ་མ་ཆོད་པའི་ཚད་དུ་ངེས་པས་ལུང་པ་དེ་རུ་སླན་ཆད་གཉན་ས་མི་གཅོད་པ་ལག་ལེན་ནོ༔ དཔེར་ན་འབངས་སུ་གྱུར་ཕྱིན་ཆད་ཡང་ཡང་བཅོམ་དྲག་ན་མཐར་རྗེའི་སྲོག་འབངས་ཀྱིས་བསྡོ་བ་ལས་འོས་མེད་པ་ལྟ་བུ་ཡིན་པས་ཤེས་པར་བྱའོ༔