ཟབ་མོ་གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་ལེན་ཚུལ་ཤེར་ཕྱིན་དགོངས་པའི་ཆུན་འཕྱངས།

ཡང་གསང་ཌཱཀྐིའི་ཐུགས་ཐིག་ལས༔ ཟབ་མོ་གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་ལེན་ཚུལ་ཤེར་ཕྱིན་དགོངས་པའི་ཆུན་འཕྱངས་བཞུགས༔

བླ་མ་མ་ཅིག་མཁའ་འགྲོ་ལ༔ གུས་པས་འདུད་དོ་ཤིས་པ་སྩོལ༔ ས་མ་ཡཱ༔ དང་པོ་ཟིལ་གནོན་སྐོར་གསུམ་དང༔ དབང་སྡུད་མཁའ་འགྲོའི་བྲོ་ར་སོགས༔ རང་གཞུང་བཞིན་དུ་ལེགས་པར་གྲུབ༔ དེ་ནས་དངོས་གཞིའི་རིམ་པ་ནི༔ ཚོགས་ཞིང་གསལ་འདེབས་འདི་བཞིན་གྱེར༔ ཕཊ༔ བདག་ཉིད་ཐ་མལ་སྤྱི་བོ་ཡི༔ ཐད་ཀྱི་ནམ་མཁར་འོག་མིན་ཞིང༔ ཕོ་བྲང་རྒྱན་བཀོད་ཕུན་ཚོགས་དབུས༔ པད་སྡོང་ཡལ་ག་ལྔ་ལྡན་དབུས༔ སེང་ཁྲི་པདྨ་ཉི་ཟླའི་སྟེང༔ ཏི་ར་བམ་སྟེང་བཾ་ཡིག་གསལ༔ སྐད་ཅིག་སྟོང་གསལ་བམ་ཡིག་ནི༔ མ་ཅིག་ལབ་སྒྲོན་ཁྲོས་མའི་སྐུ༔ མཐིང་ནག་དར་དང་རུས་རྒྱན་ཅན༔ མགོ་ཕྲེང་ཁྲོ་མོའི་ཆས་ཀྱིས་སྤུད༔ ཞལ་བསྒྲད་མཆེ་གཙིགས་སྤྱན་གསུམ་ཟླུམ༔ ཕག་ཞལ་རྣ་ལྟག་གཡས་སུ་ངུར༔ ཕྱག་གཡས་གྲི་གུག་ནམ་མཁར་ཕྱར༔ ཕྱག་གཡོན་ཐོད་ཁྲག་ཐུགས་ཀར་བསྐྱིལ༔ ཁ་ཊཱཾ་མཆན་བརྟེན་རུས་རྒྱན་གསོལ༔ ཞབས་གཉིས་བརྐྱང་བསྐུམ་སྒེག་ཅིང་དཔའ༔ ཤར་དུ་བདེ་ཆེན་ཞི་བའི་ཉམས༔ ལྷོ་རུ་དོན་གྲུབ་རྒྱས་པའི་མདངས༔ ནུབ་ཏུ་སྒྲ་སྒྲོག་ཆགས་ཤིང་བཞད༔ བྱང་དུ་བི་ཤྭ་མཐར་ཕྱིན་ཁྲོས༔ མཁའ་འགྲོ་སྡེ་བཞི་ལས་བཞིའི་མདོག༔ ཕྱག་མཚན་ཆ་ལུགས་གཙོ་མོར་མཐུན༔ རང་འཁོར་འབུམ་ཕྲག་ཡངས་པ་ཡི༔ མཁའ་འགྲོ་རྒྱ་མཚོའི་དབུས་ན་བཞུགས༔ དབུ་ཐོག་ཉི་ཟླ་པདྨའི་སྟེང༔ ཡུམ་ཆེན་ཆོས་སྐུ་གསེར་མདོག་འཛུམ༔ ཕྱག་བཞི་དང་པོ་མཉམ་བཞག་དང༔ འོག་གཉིས་གསེར་རྡོར་གླེགས་བམ་བསྣམས༔ སངས་རྒྱས་བྱང་སེམས་དཔག་མེད་བསྐོར༔ པད་སྡོང་མདུན་སྟེང་ལྷག་པའི་ལྷ༔ ཡི་དམ་རྒྱུད་སྡེ་དྲུག་གི་ལྷ༔ པད་སྡོང་གཡས་སྟེང་འཇའ་འོད་ཀློང༔ དམ་པ་སངས་རྒྱས་ནག་སྣུམ་སྨུག༔ ཕྱག་གཉིས་ཌཱ་རུ་མི་རྐང་འབུད༔ ཞབས་གཉིས་བརྐྱང་བསྐུམ་སྒོམ་ཐག་མཛེས༔ གྲུབ་ཐོབ་རྒྱ་མཚོའི་དབུས་ཉིད་དུ༔ རྡོ་རྗེའི་བརྡ་ཚིག་ཕཊཿསྒྲ་སྒྲོག༔ པད་སྡོང་རྒྱབ་སྟེང་རྒྱལ་བ་ནི༔ བཅོམ་ལྡན་ཤཱཀྱའི་དབང་པོ་བཞུགས༔ བསྐལ་བཟང་སངས་རྒྱས་སྟོང་རྩ་དང༔ བྱང་སེམས་ཉན་རང་ཚོགས་ཀྱིས་བསྐོར༔ པད་སྡོང་གཡོན་སྟེང་ཟེའུ་འབྲུའི་དབུས༔ རྒྱལ་བ་ཀུན་གྱི་ཕྲིན་ལས་མ༔ སེང་ལྡིང་ནགས་ཀྱི་སྒྲོལ་མ་ལ༔ ཏཱ་རེ་ཉེར་གཅིག་མཁའ་འགྲོས་བསྐོར༔ བར་མཚམས་དཔའ་བོ་རྣལ་འབྱོར་མ༔ ཆོས་སྐྱོང་ཕོ་རྒྱུད་མོ་རྒྱུད་དང༔ དཀར་ཕྱོགས་སྐྱོང་བའི་སྡེ་བརྒྱད་གསལ༔ གདན་མཐར་བགེགས་རིགས་ལན་ཆགས་དང༔ རིགས་དྲུག་སྙིང་རྗེའི་མགྲོན་གྱི་ཚོགས༔ མཁའ་དབྱིངས་ཆུ་འཛིན་འཁྲིགས་བཞིན་གསལ༔ ཚོགས་ཞིང་གསལ་འདེབས་སྐྱབས་འགྲོ་བྱ༔ ཕཊཿ ན་མོ་གཉན་སའི་ལྷ་འདྲེ་དང༔ མཁའ་མཉམ་འགྲོ་བ་མ་ལུས་ཀུན༔ རང་གྲོལ་ཡེ་ཤེས་རྟོགས་བྱའི་ཕྱིར༔ མཆོག་གསུམ་རྩ་གསུམ་མ་ཅིག་མ༔ ཆོས་སྐྱོང་དམ་ཅན་སྲུང་མ་ལ༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ༔ ཕཊཿ སྨོན་འཇུག་བྱང་ཆུབ་སེམས་བསྐྱེད་ནི༔ གཟུང་འཛིན་ཨ་འཐས་འཁྲུལ་བའི་འགྲོ༔ སྡུག་བསྔལ་རྒྱ་མཚོར་བྱིང་བ་ཡི༔ ཡུམ་ཆེན་གོ་འཕང་ལ་འགོད་ཕྱིར༔ ཕར་ཕྱིན་དྲུག་གི་གཞུང་ལམ་ལ༔ བརྟེན་ནས་བྱང་ཆུབ་སེམས་བསྐྱེད་འཚལ༔ ལན་གསུམ༔ ཕཊཿ ཚོགས་བསགས་ཡན་ལག་བདུན་འབུལ་ནི༔ ན་མོ༔ གཉན་ས་འདིར་གནས་ཀྱི་ལྷ་འདྲེ་དང༔ གནས་གདོན་ལུས་གདོན་གྱིས་གཙོར་བྱས་པའི༔ མཁའ་མཉམ་འགྲོ་བ་སེམས་ཅན་ཀུན༔ རང་རིག་ཡེ་ཤེས་སྟོན་མཛད་པའི༔ རྩ་བའི་བླ་མར་ཕྱག་འཚལ་ལོ༔ སྤངས་རྟོགས་ཕུན་སུམ་ཚོགས་པ་ཡི༔ སངས་རྒྱས་རྣམས་ལ་ཕྱག་འཚལ་ལོ༔ ཞི་གྱུར་འདོད་ཆགས་བྲལ་བ་ཡི༔ དམ་པའི་ཆོས་ལ་ཕྱག་འཚལ་ལོ༔ གང་ལ་ཕུལ་ན་དོན་ཆེ་བ༔ དགེ་འདུན་རྣམས་ལ་ཕྱག་འཚལ་ལོ༔ སྣང་སྲིད་ཟིལ་གནོན་ཐུགས་རྗེ་ཅན༔ ཕ་དམ་པ་ནག་པོར་ཕྱག་འཚལ་ལོ༔ མ་མི་མིན་ཡེ་ཤེས་མཁའ་འགྲོ་མ༔ ལབ་སྒྲོན་ཁྱོད་ལ་ཕྱག་འཚལ་ལོ༔ ལྟ་སྒོམ་ཐུགས་སུ་ཆུད་པ་ཡི༔ རྩ་བརྒྱུད་བླ་མར་ཕྱག་འཚལ་ལོ༔ དངོས་གྲུབ་ངེས་པར་སྟེར་མཛད་པའི༔ ཡི་དམ་ལྷ་ལ་ཕྱག་འཚལ་ལོ༔ བརྩེ་གདུང་དམ་ཚིག་ལྡན་པ་ཡི༔ མཁའ་འགྲོའི་ཚོགས་ལ་ཕྱག་འཚལ་ལོ༔ བཀའ་དང་དམ་ཚིག་ལ་གནས་པའི༔ ཆོས་སྐྱོང་རྣམ་ལ་ཕྱག་འཚལ་ལོ༔ ཇི་སྲིད་སྙིང་པོའི་བྱང་ཆུབ་བར༔ ཁྱེད་རྣམས་ལ་ནི་གསོལ་བ་འདེབས༔ ཁྱེད་རྣམས་ལ་ནི་རྟེན་བཅའ་འོ༔ སྟོང་གསུམ་རབ་འབྱམས་འཇིག་རྟེན་གྱི༔ གཟུགས་སྒྲ་དྲི་རོ་རེག་བྱའི་ཚོགས༔ ཡིད་ཀྱི་དྲན་བསམ་བདེ་སྡུག་ཀུན༔ སྐུ་གསུང་ཐུགས་ལ་མཆོད་པ་འབུལ༔ ཕན་བདེས་ནམ་མཁའ་གང་བར་ཤོག༔ ཐོག་མེད་ནས་བཟུང་ད་ལྟའི་བར༔ མ་རིག་དབང་གིས་བསགས་པ་ཡིས༔ སྐུ་གསུང་ཐུགས་དང་འགལ་བ་ཡི༔ ཁ་ན་མ་ཐོ་བཅས་པའི་ལས༔ སྡིག་པ་མི་དགེ་སོ་སོར་བཤགས༔ འགྲོ་ཀུན་དགེ་རྩ་རྗེས་ཡི་རང༔ ཆོས་ཀྱི་འཁོར་ལོ་བསྐོར་དུ་གསོལ༔ མྱ་ངན་མི་འདའ་བཞུགས་གསོལ་འདེབས༔ དགེ་རྣམས་སེམས་ཅན་དོན་དུ་བསྔོ༔ སྡུག་བསྔལ་རྒྱ་མཚོ་བསྐམས་ནས་ཀྱང༔ སེམས་ཅན་སངས་རྒྱས་ཐོབ་པར་ཤོག༔ ཅེས་བརྗོད་མི་དམིགས་ངང་ལ་བཞག༔ འཕོ་བ་ནམ་མཁའ་སྒོ་འབྱེད་ལ༔ རྣམ་སྣང་ཆོས་བདུན་དང་བཅས་ངང༔ ཕཊཿ རང་ཉིད་ཐ་མལ་དུ་གནས་པའི་ལུས་སྟོང་གསལ་ཕྲུ་མ་ཕུས་བཏབ་པ་ལྟ་བུའི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ༔ ངོ་བོ་སྟོང་ལ་རང་བཞིན་གསལ་བ་སྦ་ལྕག་འབྲིང་པོ་ཙམ་ཡར་སྣེ་ཚངས་བུག་ཏུ་ཟུག་པ་རྒྱ་སྐར་ཁ་ཕྱེ་བ་ལྟ་བུ༔ མར་སྣེ་ལྟེ་འོག་ཏུ་ཟུག་པ་གསལ་བར་གྱུར༔ ཕཊཿ རྐང་མཐིལ་གཡས་གཡོན་ཐབས་ཤེས་ཀྱི་ཐིག་ལེ་དཀར་དམར་སྲན་མའི་རྡོག་པོ་ཙམ་རེ་གསལ་བར་བསམ༔ ཕཊཿ དེ་གཉིས་ཡར་འཕར་གསང་གནས་སུ་གཅིག་ཏུ་འདྲེས་པའི་ཐིག་ལེ་དཀར་ལ་དམར་བའི་མདངས་ཆགས་པ་བྱ་མ་སར་གྱི་སྒོ་ང་ཙམ་ཉི་མའི་སྙིང་པོ་དང་མཚུངས་པ་འཕར་འདར་ལིང་ངེ་བ་གཅིག་ཏུ་གྱུར༔ ཕཊཿ དེ་ཉིད་ཡར་འཕར་ལྟེ་བར་སླེབས༔ ཕཊཿ ཡར་འཕར་སྙིང་ཀར་སླེབས་པས་ཚེ་བསོད་ནམས་བཀྲག་མདངས་ཐམས་ཅད་འདུས་པའི་ངོ་བོ་རླུང་སེམས་དབྱེར་མེད་འོད་ཀྱི་ཐིག་ལེ་ཁ་དོག་ལྔ་ལྡན་དུ་གྱུར༔ ཕཊཿ ཡར་འཕར་མགྲིན་པར་སླེབས༔ ཕཊཿ ཡར་འཕར་སྤྱི་བོར་སླེབས༔ ཕཊཿ ཚངས་བུག་ནས་ཐོན་ནམ་མཁར་སླེབས་ནམ་མཁའ་དང་རིག་པ་དབྱེར་མེད་དུ་གྱུར༔ ཕཊཿ ནམ་མཁས་གར་ཁྱབ་ཐིག་ལེས་ཁྱབ༔ ཐིག་ལེས་གར་ཁྱབ་ཆོས་སྐུས་ཁྱབ༔ ནམ་མཁའ་དང་སེམས་ཉིད་ཆོས་སྐུ་ཁྱབ་བརྡལ་ཆེན་པོར་རོ་གཅིག་ཏུ་གྱུར༔ ཕཊཿ ཁྲོས་མའི་ཐུགས་ལས་རང་རིག་པ༔ ཧྲཱིཿཡིག་རྣམ་པར་ཕྱིར་འཕྲོས་པས༔ རྣལ་འབྱོར་དམར་མོ་གྲི་ཐོད་ཅན༔ དེ་ཡིས་ལྤགས་པ་བཤས་གྱུར་པས༔ ལྤགས་པ་དབང་ཆེན་ས་གཞི་ལ༔ ཟོ་ཁོག་རི་རྒྱལ་མཆོག་རབ་ཉིད༔ མགོ་བོ་རྣམ་རྒྱལ་ཁང་བཟང་མཆོག༔ མིག་གཉིས་ཉི་ཟླ་སོ་རྒྱུ་སྐར༔ སྙིང་ནི་ཡིད་བཞིན་རིན་པོ་ཆེ༔ ཁྲག་ནི་སྤོས་ཆུ་རྩ་རྒྱུས་དང༔ ལྕགས་རི་ཡན་ལག་གླིང་ཆེན་བཞི༔ ཉིང་ལག་གླིང་ཕྲན་བརྒྱད་དང་ནི༔ རྒྱུ་མ་རི་བདུན་དོན་སྣོད་ལྔ༔ ལྷ་མིའི་ལོངས་སྤྱོད་དཔག་ཏུ་མེད༔ ཚོགས་བརྒྱད་འདོད་ཡོན་ལྷ་མོར་སྤྲུལ༔ རང་ལུས་མཎྜལ་ཡོངས་སུ་རྫོགས༔ ཡུམ་ཆེན་ཆོས་ཀྱི་སྐུ་ལ་འབུལ༔ མ་ཅིག་ཁྲོས་མ་ལྔ་ལ་འབུལ༔ སྐྱབས་གནས་དཀོན་མཆོག་གསུམ་ལ་འབུལ༔ གཅོད་བརྒྱུད་བླ་མ་རྣམས་ལ་འབུལ༔ ཡི་དམ་རྒྱུད་སྡེའི་ཚོགས་ལ་འབུལ༔ མཁའ་འགྲོ་ཏཱ་རེ་མ་ལ་འབུལ༔ སངས་རྒྱས་བྱང་སེམས་ལྷ་ལ་འབུལ༔ བཀའ་སྲུང་གཏེར་བདག་རྒྱ་མཚོར་འབུལ༔ ཐུགས་རྗེས་འགྲོ་བའི་དོན་དུ་བཞེས༔ བདག་ཅག་ཚོགས་གཉིས་རབ་རྫོགས་ནས༔ སྒྲིབ་གཉིས་དྲི་མ་དག་གྱུར་ཅིག༔ ཡུམ་ཆེན་གོ་འཕང་མྱུར་ཐོབ་ཤོག༔ ཕཊཿ ཕཊཿ ཕཊཿ ཅེས་འཁོར་གསུམ་དག་པས་རྒྱས་གདབ་བྱ༔ ཕཊཿ མདུན་མཁར་ཡུམ་ཆེན་ཕ་རོལ་ཕྱིན༔ ཐུགས་ཀར་པད་ཟླའི་སྟེང་དུ་ཨཱ༔ མཐའ་མར་ག་ཏེའི་ཕྲེང་བས་བསྐོར༔ འོད་འཕྲོས་འཕགས་མཆོད་བྱིན་ནུས་བཀུག༔ འབྲུ་གསུམ་རྣམ་པས་ཐུགས་ཀར་བསྟིམ༔ སྐུ་ལས་བདུད་རྩིའི་རྒྱུན་བབས་པས༔ རང་དང་ལྷ་འདྲེའི་སྤྱི་བོར་ཞུགས༔ སྒོ་གསུམ་ཆག་ཉམས་སྡིག་སྒྲིབ་ཀུན༔ འོག་སྒོ་རྐང་མཐིལ་བུ་ག་ནས༔ ཕྱིར་ཐོན་འཆི་བདག་གཤིན་རྗེ་དང༔ ལན་ཆགས་གྲིབ་བདག་ཕོ་མོ་ཡི༔ ཁར་སོང་དུས་མིན་འཆི་བ་བསླུ༔ བུ་ལོན་ཤ་འཁོན་དག་པར་བསམ༔ ཏདྱ་ཐཱ༔ ག་ཏེ་ག་ཏེ་པ་ར་ག་ཏེ་པ་ར་སཾ་ག་ཏེ་བྷོ་དྷི་སྭཱ་ཧཱ༔ ཅི་ནུས་བཟླས༔ མཐར་ལུས་ཀྱི་སྒྲིབ་པ་དག་པས་ཤེལ་གོང་ལྟར་གྱུར་ཅིང་སྣང་བ་ཡུམ་གྱི་སྐུར་དག་ཅིང༔ མི་དམིགས་དོན་གྱི་གཤིས་སུ་ཀློད་པར་བྱ༔ ཕཊཿ དེ་ནས་མ་ཅིག་རྒྱུད་བསྐུལ་གྱི་བཟླས་པ་ནི༔ ཕཊཿ ཕག་ཁྲོས་ལྷ་ལྔའི་ཐུགས་ཀར་པད་ཉིའི་སྟེང༔ བཾ་དང་ཧ་རི་ནི་ས་ཡིག་འབྲུ་ལྔ༔ དེ་ལས་འོད་འཕྲོས་རྒྱལ་བ་སྲས་བཅས་དང༔ རྩ་གསུམ་དམ་ཅན་རྒྱ་མཚོའི་ཐུགས་རྒྱུད་བསྐུལ༔ བྱིན་རླབས་ཡིག་འབྲུ་རིགས་ལྔའི་ཐུགས་ཀར་བསྟིམ༔ འོད་ཟེར་ཁ་དོག་ལྔ་ལྡན་རང་ཉིད་ཀྱི༔ གནས་ལྔར་ཐིམ་པས་སྒྲིབ་བཞི་དག་ནས་ཀྱང༔ དབང་བཞི་མཆོག་ཐུན་དངོས་གྲུབ་ཀུན་ཐོབ་གྱུར༔ བཾ་ཧ་རི་ནི་ས་ཛྙཱ་ན་ཌཱཀྐི་ནི་སིདྡྷི་ཕ་ལ་ཧཱུྃ༔ ཞེས་བཟླས་མཐར༔ གསོལ་འདེབས་མོས་གུས་དྲག་པོས་ཌཱ་དྲིལ་རྐང་དུང་རོལ་མོས་སྣ་དྲངས་ཏེ་གདུང་ཤུགས་མོས་པ་བརྟན་པོས་འདི་སྐད་དོ༔ ཕཊཿ ན་མོ་གུ་རུ་ཝེ༔ གནས་འོག་མིན་ཆོས་དབྱིངས་ཞིང་ཁམས་ནས༔ ཡུམ་ཆེན་ཤེར་ཕྱིན་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་བྱ་རྒོད་ཕུང་པོའི་རི་བོ་ནས༔ ཡང་དག་རྫོགས་པའི་སངས་རྒྱས་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་སེང་ཆེན་བསྣོལ་བའི་ཁྲི་སྟེང་ནས༔ འཇམ་དཔལ་སྨྲ་སེང་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ དཔལ་གཡུ་ལོ་བཀོད་པའི་ཞིང་ཁམས་ནས༔ རྗེ་བཙུན་སྒྲོལ་མ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ མཁའ་སྤྱོད་མཁའ་འགྲོའི་ཞིང་ཁམས་ནས༔ སུ་ཁ་སིདྡྷི་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་རྒྱ་གར་འཇག་མའི་སྤྱིལ་བུ་ནས༔ ཨཱརྱ་དྷེ་ཝ་བྱིན་རླབས་ཅན༔ བྱིན་རླབས་ཅན་ལ་གསོལ་འདེབས༔ བླ་མ་ལ་གསོལ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱི་རློབས༔ གནས་ལ་སྟོད་དིང་རིའི་དགོན་པ་ནས༔ དམ་པ་རྒྱ་གར་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་ར་ས་སྤ་ལུང་དགོན་པ་ནས༔ སྐྱོ་སྟོན་ཁུ་དབོན་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་ཟངས་རི་མཁར་དམར་ཀྱི་དགོན་པ་ནས༔ མ་ཅིག་ལབ་སྒྲོན་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་གཡེར་ཆུང་གླིང་ལུང་དགོན་པ་ནས༔ རྒྱལ་བ་དོན་གྲུབ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་ཤམ་པོ་གངས་ཀྱི་དབེན་གནས་ནས༔ ཐོད་སྨྱོན་བསམ་གྲུབ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་འཇའ་འོད་འཁྱིལ་བའི་གཞལ་ཡས་ནས༔ ལ་འདུལ་སྒྲོན་མ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་གཉན་ས་རི་ཁྲོད་དགོན་པ་ནས༔ བརྒྱུད་གསུམ་བླ་མ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་ཕྱོགས་མེད་གདུལ་བྱའི་མགོན་གཅིག་པུ༔ བྱང་ཆུབ་གླིང་པ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་སྣང་སྲིད་དག་པ་རབ་འབྱམས་ནས༔ ལུང་རིག་གླིང་པ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་མ་ངེས་བརྟུལ་ཞུགས་ལམ་སློང་བ༔ བསམ་གཏན་ཛྙཱ་ན་དྭཱི་པ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་དགའ་བཞིའི་ཡེ་ཤེས་མཛའ་ན་མོ༔ སྐལ་བཟང་ཌཱཀྐི་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་སྔོན་སྨོན་ལས་འབྲེལ་ཞིང་ཁམས་ནས༔ ཆོས་བདག་སྐྱེས་བུ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གནས་སྤྱི་གཙུག་ཉི་ཟླའི་གདན་སྟེང་ནས༔ རྩ་བའི་བླ་མ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ ལྷུན་གྲུབ་རྩ་ཡི་ཕོ་བྲང་ནས༔ ཡི་དམ་ཞི་ཁྲོ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ གསང་གནས་བདེ་བ་ཆེན་པོའི་ཕོ་བྲང་ནས༔ མ་ཚོགས་མཁའ་འགྲོ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ དུར་ཁྲོད་ཆེན་པོའི་གནས་བརྒྱད་ནས༔ མ་མགོན་ཆོས་སྐྱོང་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ བརྩེ་གདུང་འདུ་འབྲལ་མེད་ཀློང་ནས༔ མཆེད་དང་ལྕམ་དྲལ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ བརྟུལ་ཞུགས་ལམ་དུ་སློང་བའི་གྲོགས༔ སྣང་སྲིད་ལྷ་འདྲེ་བྱིན་རླབས་ཅན༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ ཐོག་མེད་དྲིན་གྱིས་སྐྱོང་བའི་མ༔ རིགས་དྲུག་ཕ་མ་བྱིན་རླབས་ཅན༔ བྱིན་རླབས་ཅན་ལ་གསོལ་བ་འདེབས༔ བླ་མ་ལ་གསོལ་བ་འདེབས༔ མ་ཅིག་ལ་གསོལ་བ་འདེབས༔ ཡུམ་ཆེན་མོས་བྱིན་གྱིས་རློབས༔ དེ་ལྟར་གསོལ་བ་བཏབ་པས་ཚོགས་ཞིང་གི༔ དཔྲལ་བ་མགྲིན་པ་ཐུགས་ཀ་སོ་སོ་ནས༔ ཨོཾ་དཀར་ཨཱཿདམར་ཧཱུྂ་སྔོན་དཔག་མེད་བྱུང༔ བདག་དང་བསྲུང་བྱའི་ལུས་ངག་ཡིད་ལ་ཐིམ༔ སྐུ་གསུང་ཐུགས་ཀྱི་བྱིན་གྱིས་བརླབ་ཏུ་གསོལ༔ ཕཊཿ ཕཊཿ ཕཊཿ གཅོད་ཡུལ་ཚོགས་ཞིང་བླ་མ་ཡི་དམ་དང༔ མཁའ་འགྲོ་ཆོས་སྐྱོང་སྲུང་མ་ཐམས་ཅད་ལ༔ སྙིང་ཁོང་རུས་པའི་གཏིང་ནས་གསོལ་བ་འདེབས༔ བྱིན་གྱིས་རློབས་ཤིག་གཅོད་ཡུལ་བརྒྱུད་པའི་ཚོགས༔ དངོས་གྲུབ་སྩོལ་ཅིག་ཨ་མ་ལབ་ཀྱི་སྒྲོན༔ གསོལ་བ་འདེབས་སོ་དམ་པ་རྒྱ་གར་བ༔ དངོས་གྲུབ་སྩོལ་ཅིག་བདུད་འདུལ་ཁྲོས་མའི་ཚོགས༔ གསོལ་བ་འདེབས་སོ་རྗེ་བཙུན་གླིང་ལུང་བ༔ དངོས་གྲུབ་སྩོལ་ཅིག་གནས་གསུམ་མཁའ་འགྲོའི་ཚོགས༔ ལུས་ལ་སྐུ་ཡི་བྱིན་གྱིས་བརླབ་ཏུ་གསོལ༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ངག་ལ་གསུང་གི་བྱིན་གྱིས་བརླབ་ཏུ་གསོལ༔ ནུས་མཐུ་ཆོས་ཀྱི་དངོས་གྲུབ་བསྩལ་དུ་གསོལ༔ སེམས་ལ་ཐུགས་ཀྱི་བྱིན་གྱིས་བརླབ་ཏུ་གསོལ༔ ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ༔ གསོལ་བ་འདེབས་སོ་སྣང་སྲིད་བྱིན་གྱིས་རློབས༔ དལ་འབྱོར་དོན་དང་ལྡན་པར་བྱིན་གྱིས་རློབས༔ འཆི་བ་སྙིང་ནས་དྲན་པར་བྱིན་གྱིས་རློབས༔ བླང་དོར་གནས་ལ་མཁས་པར་བྱིན་གྱིས་རློབས༔ འཁོར་བར་ཞེན་པ་ལོག་པར་བྱིན་གྱིས་རློབས༔ དགོས་མེད་རྒྱུད་ལ་སྐྱེ་བར་བྱིན་གྱིས་རློབས༔ ཟོལ་མེད་རང་རྒྱུད་ཐུལ་བར་བྱིན་གྱིས་རློབས༔ ཆགས་མེད་འགྲོ་དོན་ནུས་པར་བྱིན་གྱིས་རློབས༔ གྲོགས་མེད་བློ་བདེ་དྲན་པར་བྱིན་གྱིས་རློབས༔ ངེས་མེད་གཉན་ཁྲོད་ཟིན་པར་བྱིན་གྱིས་རློབས༔ ཕྱོགས་མེད་རི་ཁྲོད་ཐུབ་པར་བྱིན་གྱིས་རློབས༔ འཕྱུགས་མེད་ཆོས་ཚུགས་ཟིན་པར་བྱིན་གྱིས་རློབས༔ འགྱུར་མེད་མོས་གུས་བརྟན་པར་བྱིན་གྱིས་རློབས༔ ཉམས་མེད་ངེས་འབྱུང་སྐྱེ་བར་བྱིན་གྱིས་རློབས༔ འབྲལ་མེད་བླ་མ་དྲན་པར་བྱིན་གྱིས་རློབས༔ གཞོམ་མེད་དངོས་གྲུབ་ཐོབ་པར་བྱིན་གྱིས་རློབས༔ འཇིགས་མེད་གདེང་ཆེན་འཐོབ་པར་བྱིན་གྱིས་རློབས༔ སྣང་བ་བདེན་མེད་རྟོགས་པར་བྱིན་གྱིས་རློབས༔ བདག་མེད་ཤེས་རབ་རྟོགས་པར་བྱིན་གྱིས་རློབས༔ ཡུལ་མེད་ཟང་ཐལ་མཐོང་བར་བྱིན་གྱིས་རློབས༔ འཁྲུལ་མེད་བཙན་ས་ཟིན་པར་བྱིན་གྱིས་རློབས༔ ཡེང་མེད་ཁོར་ཡུག་འདྲེས་པར་བྱིན་གྱིས་རློབས༔ བསྒོམ་མེད་རྫོགས་ཆེན་རྟོགས་པར་བྱིན་གྱིས་རློབས༔ བཅོས་མེད་གནས་ལུགས་རང་གཞིའི་ཞལ་མཐོང་ནས༔ སྐུ་བཞིའི་བདག་ཉིད་མངོན་དུ་འགྱུར་བར་ཤོག༔ ཕཊཿ ཕཊཿ ཕཊཿ ཕཊཿ མ་ཅིག་ཁྲོས་མ་ལྷ་ལྔའི་སྐུ་གར་སྟབས་ཤིག་ཤིགཿ ཕྱག་ཌཱ་དྲིལ་ཁྲོལ་ཁྲོལཿ གསུང་སྙན་པའི་གླུ་དབྱངསཿ ཐུགས་ཆོས་ཉིད་ཀྱི་ངང་ནས་བདག་ལ་བརྩེ་བའི་ཐུགས་རྗེས་འོད་ཁྱུག་ཁྱུག་བྱོན་པར་དམིགས་ལ༔ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་ཡེ་ཤེས་ཕག་མོ་རྗེ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་རྡོ་རྗེ་མཁའ་འགྲོ་མ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་རིན་ཆེན་མཁའ་འགྲོ་མ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་པདྨ་མཁའ་འགྲོ་མ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་ཀརྨ་མཁའ་འགྲོ་མ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཕཊཿ སླར་ཡང་མ་ཅིག་རིགས་ལྔའི་གསང་གསུམ་དང་རང་གི་སྒོ་གསུམ་དབྱེར་མེད་དུ་གྱུར་ལ་སྣང་བའི་རྫུན་ཕུག་བརྡིབས་ཤིང༔ ཆོས་ཉིད་དེ་བཞིན་ཉིད་ཀྱི་སྣང་བ་རབ་ཏུ་འུར་བར་བསམཿ ཕཊཿ རྣམ་རྟོག་གང་ཤར་རང་སར་གྲོལ་བའི་ཕཊ་སྒྲ་བསྒྲག་པར་བྱའོ༔ ཕཊཿ དེ་ནས་ཁྲ་འགྱེད་གཏོང་བ་ལ༔ རིག་པ་དབྱིངས་ནས་ཁྲོས་མར་བཞེངས༔ ཕཊཿ ལྷུན་གྲུབ་རིག་པ་ཁྲོས་མའི་སྐུ༔ ཕྱག་གཉིས་གྲི་ཐོད་སྤྱན་གསུམ་ལྡན༔ ཞབས་གཉིས་གར་སྟབས་རུས་རྒྱན་དང༔ མེ་དཔུང་ཀློང་བཞུགས་ཁ་ཊཱཾ་བཀལ༔ སྤྱི་བོར་ཕག་ཞལ་ངུར་བའི་སྒྲས༔ ས་གསུམ་དཔའ་བོ་མཁའ་འགྲོ་དང༔ སྣང་སྲིད་ལྷ་སྲིན་དམ་ལ་འདུས༔ ཕཊཿ ཕྱག་གཡས་གྲི་ཁུག་བམ་ཐོད་ཁྲག༔ རང་བྱུང་ཐོད་སྒྱེད་གསུམ་སྟེང་བབས༔ དེ་ནང་ཕུང་པོ་བདུད་རྩིར་འཁྱིལ༔ ལྦུ་བ་ཕྱིར་ལུད་ཞིང་ལྤགས་སྟེང༔ ཤ་རི་ཁྲག་མཚོ་རུས་ཞགས་བཀྲ༔ འདོད་ཡོན་ནམ་མཁའ་མཛོད་དུ་སྤེལ༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ཅི་ནུས་བཟླས༔ ཕཊཿ བདག་ལུས་ཡེ་ཤེས་བདུད་རྩི་འདི༔ མཆོད་པའི་སྤྲིན་འཕྲོ་ཟག་མེད་གཏོར༔ བཀའ་དྲིན་གསུམ་ལྡན་བླ་མ་དང༔ གྲུབ་ཐོབ་གཅོད་བརྒྱུད་བླ་མའི་ཚོགས༔ སངས་རྒྱས་བྱང་སེམས་ཉན་རང་སོགས༔ སྐྱབས་གནས་དཀོན་མཆོག་ཞལ་དུ་འབུལ༔ ཚོགས་རྫོགས་དོན་གཉིས་ལྷུན་གྲུབ་ཤོག༔ ཕཊཿ ཕཊཿ ཕཊཿ བདག་ལུས་ཡེ་ཤེས་བདུད་རྩི་ལ༔ ཕྱི་ནང་གསང་བའི་མཆོད་པའི་རྫས༔ ཟག་མེད་ཤ་ལྔ་བདུད་རྩི་ལྔ༔ རྒྱུད་སྡེ་བཞི་དྲུག་ཐེག་རིམ་དགུའི༔ ཡི་དམ་ཞི་ཁྲོའི་དཀྱིལ་འཁོར་ལྷ༔ གནས་གསུམ་མཁའ་འགྲོ་རྣལ་འབྱོར་སོགས༔ ཡེ་ཤེས་འཇིག་རྟེན་ཌཱཀྐིའི་ཚོགས༔ མ་ལུས་འཁོར་བཅས་རྣམས་ལ་མཆོད༔ བརྟུལ་ཞུགས་སྤྱོད་པ་མཐར་ཕྱིན་ནས༔ ལྷ་འདྲེའི་འགྲོ་དོན་ནུས་པར་ཤོག༔ ཕཊཿ ཕཊཿ ཕཊཿ དཔལ་ལྡན་མ་མགོན་ལྕམ་དྲལ་དང༔ དྲང་སྲོང་གཟའ་བརྒྱད་རྒྱུ་སྐར་དང༔ བདུད་བཙན་ཀླུ་གཤིན་གནོད་སྦྱིན་སྡེ༔ ཕྱི་ནང་ཆོས་སྐྱོང་སྲུང་མ་ལ༔ བདག་ལུས་ཡེ་ཤེས་བདུད་རྩི་འདི༔ སོ་སོར་དགྱེས་སྐོང་འདོད་རྒུའི་རྫས༔ ཤ་ཁྲག་སྨན་གཏོར་མཆོད་པ་འབུལ༔ ཐུགས་དམ་བསྐང་ལ་ཉམས་ཆག་བཤགས༔ འདོད་དོན་སྒྲུབ་ལ་བར་ཆད་སྲུང༔ ཕྲིན་ལས་རྣམ་བཞི་འགྲུབ་པ་དང༔ བསྟན་དགྲ་རྩད་ནས་གཅོད་པར་མཛོད༔ ཕཊཿ ཕཊཿ ཕཊཿ བདག་ལུས་བདུད་རྩིའི་རྒྱ་མཚོ་འདི༔ དམྱལ་བ་ཡི་དྭགས་དུད་འགྲོ་དང༔ མི་དང་མི་མིན་སྡོང་ཟླ་བགེགས༔ ཁམས་གསུམ་སེམས་ཅན་ཐམས་ཅད་ལ༔ གང་ལ་གང་མཁོའི་འདོད་ཡོན་བསྔོ༔ ཐམས་ཅད་ངོམས་ཤིང་ཚིམ་གྱུར་ནས༔ འབྲེལ་བ་ཐོབ་ཚད་སངས་རྒྱས་ཤོག༔ ཕཊཿ ཕཊཿ ཕཊཿ བདག་ལུས་བདུད་རྩིའི་གཏེར་ཁ་ཕྱེ༔ དཀར་གསུམ་མངར་གསུམ་སྨན་གྱི་ཚོགས༔ དར་ཟབ་དང་ནི་རིན་པོ་ཆེ༔ འབྲུ་སྣ་རྟ་མཆོག་གླང་ཆེན་དང༔ མ་ཧེ་བ་གླང་དཀོར་ནོར་མཛོད༔ མེ་ཏོག་རྩི་ཤིང་ནགས་ཚལ་སོགས༔ གཞི་བདག་རྣམས་ལ་བདག་གིས་སྦྱིན༔ ལྷག་མ་མེད་པར་བཞེས་ནས་ཀྱང༔ དགའ་མགུ་ཡི་རང་སེམས་བརྩེ་ཞིང༔ གདུག་རྩུབ་བསམ་ངན་ཀུན་ཞི་ཞིང༔ བྱང་ཆུབ་སེམས་དང་རབ་ལྡན་པ༔ མཐར་ཐུག་སངས་རྒྱས་ཐོབ་པར་ཤོག༔ ཕཊཿ ཕཊཿ ཕཊཿ བདག་ལུས་བདུད་རྩིའི་དཀར་དམར་མདངས༔ རླངས་པ་སྨན་དང་རོ་བརྒྱའི་ཟས༔ མཚོ་རྫིང་ལྟེང་ཀ་དཔག་བསམ་ཤིང༔ ནེའུ་གསིང་སྐྱེད་ཚལ་ཁང་བཟང་རི༔ ཡིད་བཞིན་ནོར་བུ་ཀླུ་སྨན་དྲི༔ གཟུགས་སྒྲ་དྲི་རོ་རེག་བྱ་ཆོས༔ ཀླུ་རིགས་རྣམས་ལ་མཆོད་པ་འབུལ༔ དགའ་མགུ་ཡི་རང་སེམས་ལྡན་ཞིང༔ གདུག་རྩུབ་གནོད་པ་དང་བྲལ་ནས༔ བྱང་ཆུབ་སེམས་དང་ལྡན་གྱུར་ཅིག༔ ཀླུ་གཡང་དངོས་གྲུབ་བདག་ལ་སྩོལ༔ བཙན་ཕྱུག་འཕན་དར་འཛོམས་པ་དང༔ ཕན་བདེའི་ལོ་འབྲས་སྨིན་པར་མཛོད༔ ཀུན་ཀྱང་སངས་རྒྱས་ས་ཐོབ་ཤོག༔ ཕཊཿ ཕཊཿ ཕཊཿ བདག་ལུས་ཕུང་པོས་སྟོང་གསུམ་ཁྱབ༔ ཡ་ཀི་སྲིད་རྩེ་མན་ཆད་ནས༔ མ་ཀི་དམྱལ་ཁམས་ཡན་ཆད་ཀྱི༔ བཀའ་ཡི་ལྷ་སྲིན་སྡེ་བརྒྱད་དང༔ སྣང་ཞིང་སྲིད་པའི་ལྷ་འདྲེ་རྣམས༔ ཤ་ཁྲག་སྟོན་འགྱེད་མགྲོན་ལ་ཤོག༔ ནམ་མཁའི་སྐར་ལྟར་འཁྲིགས་ལ་ཤོག༔ བར་སྣང་སྤྲིན་ལྟར་གཏིབ་ལ་ཤོག༔ ས་གཞིར་རླུང་ལྟར་འཚུབ་ལ་ཤོག༔ མ་འགྱང་མ་འཕྱི་མྱུར་དུ་གཤེགས༔ གཏན་གྱི་ལོངས་སྤྱོད་འདི་ལ་འདུས༔ ཕཊཿ ཕཊཿ ཕཊཿ ཡེ་ཐོག་ནས་བཟུང་ད་ལྟའི་བར༔ བདག་འཛིན་གཅེས་པས་བསྐྱངས་པ་ཡི༔ སྒྱུ་མ་ལུས་ཀྱི་ཕུང་པོ་འདི༔ དོན་མེད་འཁོར་བར་ཆུད་གསན་ནས༔ མི་རྟག་འཇིག་པའི་ཆོས་ཅན་ཏེ༔ ལྷ་འདྲེའི་ཚོགས་ལ་སྟོན་མོར་འགྱེད༔ ཁྱེད་རྣམས་སུ་དགོས་ཁྱེར་ལ་སོང༔ ཁོག་སྟོད་ཡ་བདུད་རྒྱལ་པོས་ཁྱེར༔ ཁོག་སྨད་མ་བདུད་རྒྱལ་མོས་ཁྱེར༔ རྐེད་པ་གདོལ་བ་ནག་པོས་ཁྱེར༔ ནང་རོལ་ལྷ་སྲིན་སྡེ་བརྒྱད་ཁྱེར༔ དོན་སྣོད་རྒྱལ་བསེན་ཐེའུ་རང་ཁྱེར༔ ཕྱི་ཤ་ཕྱི་ཡི་ལྷ་འདྲེས་ཁྱེར༔ ནང་ཤ་ནང་གི་ལྷ་འདྲེས་ཁྱེར༔ བར་ཤ་བར་གྱི་ལྷ་འདྲེས་ཁྱེར༔ སྤྱི་ཤ་ས་བདག་རྣམས་ཀྱིས་ཁྱེར༔ རུས་པ་གཉན་དང་ཚིགས་རྣམས་བཙན༔ བཀྲག་མདངས་རྒྱལ་འགོང་རྣམས་ཀྱིས་ཁྱེར༔ དྲོད་དབུགས་རླངས་པ་བསེན་མོས་ཁྱེར༔ གློ་བ་བན་ཆེན་བརྒྱ་དང་བོན་ཆེན་སྟོང༔ ཤན་པ་མི་རིང་འབུམ་གྱིས་ཁྱེར༔ གློ་ཚིལ་བྱད་མ་རྦོད་གཏོང་ཁྱེར༔ རྩ་རྒྱུས་དྲི་བོ་དྲི་མོས་ཁྱེར༔ སྐྲ་སྤུ་སོ་སེན་པགས་པ་རྣམས༔ དམ་སྲི་བསེ་རག་རྒབ་འདྲེས་ཁྱེརཿ སྤྱིར་སྣང་ཞིང་སྲིད་པའི་ལྷ་འདྲེའི་རིགས༔ སྒོས་གནས་གདོན་གཉན་ས་འདིར་གནས་དང༔ བྱེ་བྲག་ཏུ་བདག་ལ་གནོད་བྱེད་པའི༔ ལྷ་འདྲེ་ཀུན་ངོམས་ཤིང་ཚིམ་གྱུར་ཅིག༔ དགེ་བ་འདི་སེམས་ཅན་གྱི་དོན་དུ་བསྔོ༔ ཕཊཿ གཙོ་བོ་རྣམས་ཀྱི་རྗེས་འབྲང་བ༔ འབྱུང་པོ་ལྷག་སྡུད་འདིར་འདུས་ཚོགས༔ འདོད་ཡོན་ལྷག་མ་འདི་བཞེས་ལ༔ རང་བྱས་ལས་ཀྱིས་མནར་བ་ཡི༔ ཞ་ལོང་འོན་པ་ལྐུགས་པ་དང༔ ཁས་ཞན་དབང་ཆུང་ཟུག་རྔུ་ཅན༔ མ་ལུས་ལུས་པ་མེད་པ་ལ༔ བསྔོ་འོ་སྦྱིན་ནོ་ཚིམ་གྱུར་ཅིག༔ སྡུག་བསྔལ་ཀུན་བྲལ་བདེ་ཆེན་ཐོབ༔ ཡེ་ཤེས་ཆེན་པོར་དབང་ཐོབ་ཤོག༔ ཕཊཿ ཕཊཿ ཕཊཿ རྗེས་ལ་བསྔོ་སྨོན་རྒྱས་འདེབས་ནི༔ ཕཊཿ བདག་ལུས་མཆོད་སྦྱིན་འདི་བསྔོས་པས༔ འཁོར་ཚེ་ཐོག་མ་མེད་པ་ནས༔ བུ་ལོན་འབྲེལ་ཐག་ཆོད་གྱུར་ཅིག༔ སྡིག་སྒྲིབ་འཁོན་འཛིན་དག་གྱུར་ཅིག༔ སེམས་འགྱུ་བ་དངོས་པོ་མེད་པ་ཉིད༔ བདག་དང་ལྷ་འདྲེ་སུས་མི་མཐོང༔ དུས་གསུམ་རྒྱལ་བས་ཀྱང་མི་གཟིགས༔ མཐོང་ཆོས་དངོས་སྣང་གཅེས་པའི་ལུས༔ ཤ་ཁྲག་སྟོན་འགྱེད་ཚོགས་གསོག་འདིས༔ དཀོན་མཆོག་རྣམ་གསུམ་མཉེས་གྱུར་ཅིག༔ དམ་ཅན་ཐུགས་དམ་བསྐང་གྱུར་ཅིག༔ རིགས་དྲུག་འདོད་པ་ཚིམ་གྱུར་ཅིག༔ བགེགས་རིགས་ལན་ཆགས་བྱང་གྱུར་ཅིག༔ རྣམ་བཞི་མགྲོན་གྱི་ཚོགས་རྣམས་ལ༔ ཚད་མེད་མཆོད་སྦྱིན་འདི་བསྔོས་པས༔ ཁམས་གསུམ་སེམས་ཅན་ཐམས་ཅད་ཀུན༔ རྫོགས་པའི་སངས་རྒྱས་མྱུར་ཐོབ་ཤོག༔ ཕཊཿ ཕཊཿ ཕཊཿ ཆོས་ཀྱི་སྦྱིན་པ་དང་སྨོན་ལམ་སོགས་རིག་པས་འཕྲུལ་ཤེས་པར་བྱའོ༔ ཕཊཿ ལན་ཆགས་གདོན་བགེགས་འབྱུང་པོ་དང༔ རིགས་དྲུག་ཕ་མ་སྙིང་རྗེའི་མགྲོན༔ མགུ་བར་གྱིས་ལ་རང་གནས་སུ༔ ཐམས་ཅད་མ་ལུས་འགྲོ་བར་གྱིས༔ སརྦ་བྷུ་ཏ་གཙྪ་སྭ་བྷ་ཝ༔ དམིགས་རྡེའུ་ཕྱོགས་བཞིར་འཕངས་ནས་འདི་བཞིན་གྱེར༔ ཕཊཿ འབྱུང་པོ་ས་འོག་རྒྱུ་བ་དང༔ གང་ཡང་ས་སྟེང་འཁོད་པ་དང༔ ས་བླར་རྒྱུ་བ་གང་ཡིན་པ༔ མགུ་བར་གྱིས་ལ་རང་གནས་སུ༔ ཐམས་ཅད་ཐ་དད་འགྲོ་བར་གྱིས༔ སརྦ་བྷུ་ཏ་གཙྪ༔ བདག་གི་བསམ་པའི་སྟོབས་དག་དང༔ དེ་བཞིན་གཤེགས་པའི་སྦྱིན་སྟོབས་ཀྱིས༔ ཆོས་ཀྱི་དབྱིངས་ཀྱི་སྟོབས་རྣམས་ཀྱིས༔ འཕགས་པ་རྣམས་ལ་མཆོད་པ་དང༔ སེམས་ཅན་ཀུན་ལ་ཕན་གདགས་སླད༔ དོན་རྣམས་གང་དག་བསམ་པ་ཀུན༔ དེ་དག་ཐམས་ཅད་ཅི་རིགས་པ༔ ཐོགས་པ་མེད་པ་འབྱུང་འགྱུར་ཅིག༔ ཕཊཿ དགེ་འདིའི་མཐུ་ཡིས་སྔོན་ཚེ་རྒྱལ་པོའི་བུ༔ སྙིང་སྟོབས་ཆེན་པོས་སྟག་མོ་མ་བུ་དང༔ བྱམས་པའི་སྟོབས་ཀྱིས་ཤ་ཟ་སྤུན་ལྔ་ལ༔ སྐུ་ལུས་བཏང་བས་དོན་འབྲས་བརྙེས་པ་བཞིན༔ མ་འོངས་བདག་ནི་མངོན་སངས་རྒྱས་པའི་ཚེ༔ འདུས་པ་དང་པོའི་འཁོར་དུ་སྐྱེ་བར་ཤོག༔ ཕཊཿ གཅོད་ཡུལ་ཉམས་སུ་ལེན་པའི་གང་ཟག་ལ༔ རང་སེམས་བདུད་དུ་མི་བལྟ་བར༔ སྙེམས་ཐག་མ་ལུས་ཆོད་པར་ཤོག༔ བཟང་པོའི་ཡོན་ཏན་ཅི་བྱུང་ཡང༔ དེ་ལ་རློམ་སེམས་མི་བྱ་འོ༔ ངན་པའི་རྣམ་རྟོག་ཅི་ཤར་ཡང༔ དེ་ལ་སྙེམས་ཐག་ཆོད་པར་ཤོག༔ དམ་ཆོས་བདུད་ཀྱི་གཅོད་ཡུལ་འདི༔ མཁའ་ལ་ཉི་མ་ཤར་བ་བཞིན༔ ཐ་གྲུ་ཀུན་ཏུ་ཁྱབ་པར་ཤོག༔ ཕཊཿ ཡེ་ཤེས་ལས་གྲུབ་རྫུ་འཕྲུལ་བདག༔ དམ་ཚིག་ཤ་ཟ་མཁའ་འགྲོ་དང༔ འཇིག་རྟེན་རང་རྒྱུད་སྲུང་མ་རྣམས༔ ཁྱེད་ཀྱིས་སེམས་ཅན་དོན་ཀུན་མཛད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས་ཀྱང༔ སླར་ཡང་ཐུགས་རྗེས་འབྱོན་པར་ཞུ༔ ཕཊཿ ཁྲོས་མའི་ཐུགས་ནས་འོད་འཕྲོས་ཡུམ་ཆེན་བསྐུལ༔ དེ་ཉིད་ཐུགས་ནས་འོད་འཕྲོས་ཕྱོགས་བཞི་ཡི༔ ཚོགས་ཞིང་བཞི་པོ་འོད་ཞུ་ཡུམ་ཆེན་ལ༔ ཐིམ་པས་ཆུ་ལ་ཆུ་བཞག་ཅི་བཞིན་གྱུར༔ ཡུམ་ཆེན་ཨ་ཡིག་རྣམ་པས་ཁྲོས་མར་ཐིམ༔ ཕཊཿ ཁྲོས་མའི་ཐུགས་ནས་བདག་གི་རྣམ་ཤེས་ཏེ༔ ཨ་ཎི་ཧཱུྃ་གི་རྣམ་པར་ཚངས་བུག་ནས༔ ཞུགས་ཤིང་ཚེ་བཅུད་གཟི་བཀྲག་རྒྱས་པར་བསམ༔ ཕཊཿ ཕཊཿ ཕཊཿ ཅེས་བརྗོད་ཅིངཿ མ་ཅིག་རིགས་ལྔས་གར་སྟབས་མཛད་ཅིང་བདག་དང་བསྲུང་བྱ་ལ་རིམ་བཞིན་ཐིམ་པར་བསམ་ལ་དངོས་གྲུབ་ཞུ༔ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཤར་ནས་གོམ་གསུམ་བྱོན་ཙ་ན༔ སྐུ་ཤ་ཆུང་ལ་སྐུ་མདོག་དཀར༔ རྡོ་རྗེ་མཁའ་འགྲོ་འབུམ་གྱིས་བསྐོར༔ ཆོས་ཉིད་ནམ་མཁའི་ཀློང་ཡངས་ནས༔ ཐུགས་རྗེ་སྤྲིན་ཕུང་ཐིབས་སེ་ཐིབ༔ བྱིན་རླབས་ཆར་རྒྱུན་སི་ལི་ལི༔ མ་སྤྱི་གཙུག་རྒྱན་དེར་བཞུགས་སུ་གསོལཿ སྤྱི་གཙུག་རྒྱན་དེར་བཞུགས་ནས་ཀྱང༔ མས་བྱིན་གྱིས་བརླབ་པར་མཛད་དུ་གསོལ༔ བྱིན་གྱིས་རློབས་ཤིག་མ་ཅིག་མ༔ བར་ཆད་སོལ་ཅིག་མ་ཅིག་མ༔ རྟོགས་པ་སྐྱེད་ཅིག་མ་ཅིག་མ༔ དབང་མཆོག་སྐུར་ཅིག་མ་ཅིག་མ༔ ཐུགས་རྗེས་ཟུངས་ཤིག་མ་ཅིག་མ༔ ལབ་ཀྱི་སྒྲོན་མར་གསོལ་བ་འདེབས༔ འོག་མིན་གནས་སུ་ལམ་སྣ་དྲོངས༔ ཨོ་རྒྱན་གནས་སུ་ལམ་སྣ་དྲོངས༔ མ་ཁྱོད་དང་དགོངས་པ་རོ་གཅིག་གྱུར༔ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ལྷོ་ནས་གོམ་གསུམ་བྱོན་པའི་ཚེ༔ སྐུ་ཤ་ཆུང་ལ་སྐུ་མདོག་སེར༔ རིན་ཆེན་མཁའ་འགྲོ་འབུམ་གྱིས་བསྐོར༔ ཆོས་ཉིད་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ བྱིན་རླབས་ཆར་རྒྱུན་སི་ལི་ལི༔ མ་སྤྱི་གཙུག་རྒྱན་དེར་བཞུགས་སུ་གསོལ༔ སྤྱི་གཙུག་རྒྱན་དེར་བཞུགས་ནས་ཀྱང༔ མས་བྱིན་གྱིས་བརླབ་པར་མཛད་དུ་གསོལ༔ བྱིན་གྱིས་རློབས་ཤིག་མ་ཅིག་མ༔ བར་ཆད་སོལ་ཅིག་མ་ཅིག་མ༔ རྟོགས་པ་སྐྱེད་ཅིག་མ་ཅིག་མ༔ དབང་མཆོག་སྐུར་ཅིག་མ་ཅིག་མ༔ ཐུགས་རྗེས་ཟུངས་ཤིག་མ་ཅིག་མ༔ ལབ་ཀྱི་སྒྲོན་མར་གསོལ་བ་འདེབས༔ འོག་མིན་གནས་སུ་ལམ་སྣ་དྲོངས༔ ཨོ་རྒྱན་གནས་སུ་ལམ་སྣ་དྲོངས༔ མ་ཁྱོད་དང་དགོངས་པ་རོ་གཅིག་གྱུར༔ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ ཕཊཿ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ནུབ་ནས་གོམ་གསུམ་བྱོན་པའི་ཚེ༔ སྐུ་ཤ་ཆུང་ལ་སྐུ་མདོག་དམར༔ པདྨ་མཁའ་འགྲོ་འབུམ་གྱིས་བསྐོར༔ ཆོས་ཉིད་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ བྱིན་རླབས་ཆར་རྒྱུན་སི་ལི་ལི༔ མ་སྤྱི་གཙུག་རྒྱན་དེར་བཞུགས་སུ་གསོལ༔ སྤྱི་གཙུག་རྒྱན་དེར་བཞུགས་ནས་ཀྱང༔ མས་བྱིན་གྱིས་བརླབ་པར་མཛད་དུ་གསོལ༔ བྱིན་གྱིས་རློབས་ཤིག་མ་ཅིག་མ༔ བར་ཆད་སོལ་ཅིག་མ་ཅིག་མ༔ རྟོགས་པ་སྐྱེད་ཅིག་མ་ཅིག་མ༔ དབང་མཆོག་སྐུར་ཅིག་མ་ཅིག་མ༔ ཐུགས་རྗེས་ཟུངས་ཤིག་མ་ཅིག་མ༔ ལབ་ཀྱི་སྒྲོན་མར་གསོལ་བ་འདེབས༔ འོག་མིན་གནས་སུ་ལམ་སྣ་དྲོངས༔ ཨོ་རྒྱན་གནས་སུ་ལམ་སྣ་དྲོངས༔ མ་ཁྱོད་དང་དགོངས་པ་རོ་གཅིག་གྱུར༔ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་བྱང་ནས་གོམ་གསུམ་བྱོན་པའི་ཚེ༔ སྐུ་ཤ་ཆུང་ལ་སྐུ་མདོག་ལྗང༔ ལས་ཀྱི་མཁའ་འགྲོ་འབུམ་གྱིས་བསྐོར༔ ཆོས་ཉིད་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ བྱིན་རླབས་ཆར་རྒྱུན་སི་ལི་ལི༔ མ་སྤྱི་གཙུག་རྒྱན་དེར་བཞུགས་སུ་གསོལ༔ སྤྱི་གཙུག་རྒྱན་དེར་བཞུགས་ནས་ཀྱང༔ མས་བྱིན་གྱིས་བརླབ་པར་མཛད་དུ་གསོལ༔ བྱིན་གྱིས་རློབས་ཤིག་མ་ཅིག་མ༔ བར་ཆད་སོལ་ཅིག་མ་ཅིག་མ༔ རྟོགས་པ་སྐྱེད་ཅིག་མ་ཅིག་མ༔ དབང་མཆོག་སྐུར་ཅིག་མ་ཅིག་མ༔ ཐུགས་རྗེས་ཟུངས་ཤིག་མ་ཅིག་མ༔ ལབ་ཀྱི་སྒྲོན་མར་གསོལ་བ་འདེབས༔ འོག་མིན་གནས་སུ་ལམ་སྣ་དྲོངས༔ ཨོ་རྒྱན་གནས་སུ་ལམ་སྣ་དྲོངས༔ མ་ཁྱོད་དང་དགོངས་པ་རོ་གཅིག་གྱུར༔ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་དབུས་ནས་གོམ་གསུམ་བྱོན་པའི་ཚེ༔ སྐུ་ཤ་ཆུང་ལ་སྐུ་མདོག་ནག༔ སངས་རྒྱས་མཁའ་འགྲོ་འབུམ་གྱིས་བསྐོར༔ ཆོས་ཉིད་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ བྱིན་རླབས་ཆར་རྒྱུན་སི་ལི་ལི༔ མ་སྤྱི་གཙུག་རྒྱན་དེར་བཞུགས་སུ་གསོལ༔ སྤྱི་གཙུག་རྒྱན་དེར་བཞུགས་ནས་ཀྱང༔ མས་བྱིན་གྱིས་བརླབ་པར་མཛད་དུ་གསོལ༔ བྱིན་གྱིས་རློབས་ཤིག་མ་ཅིག་མ༔ བར་ཆད་སོལ་ཅིག་མ་ཅིག་མ༔ རྟོགས་པ་སྐྱེད་ཅིག་མ་ཅིག་མ༔ ལབ་ཀྱི་སྒྲོན་མར་གསོལ་བ་འདེབས༔ འོག་མིན་གནས་སུ་ལམ་སྣ་དྲོངས༔ ཨོ་རྒྱན་གནས་སུ་ལམ་སྣ་དྲོངས༔ མ་ཁྱེད་དང་དགོངས་པ་རོ་གཅིག་གྱུར༔ ཕཊཿ ཅེས་མ་ཅིག་ལྷ་ལྔ་འོད་དུ་ཞུ་ནས་བདག་དང་བསྲུང་བྱ་ལ་ཐིམ་པས་སྐུ་གསུང་ཐུགས་དང་ལུས་ངག་ཡིད་གསུམ་དབྱེར་མེད་ཆོས་སྐུར་ལམ་གྱིས་སོང་བར་བསམ༔ བསྲུང་བ་དང་སྨོན་ཚིག་བརྒྱུད་པའི་མཚན་དོན་སྦྱར་བ་འདི་སྐད་དོ༔ ཨོཾ་ཨཱཿཧཱུྃ༔ ཆོས་སྐུ་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ༔ བཅོམ་ལྡན་འདས་རྒྱལ་བ་ཤཱཀྱ་ཐུབ་པ༔ འཇམ་དཔལ་སྨྲ་བའི་སེང་གེ༔ རྗེ་བཙུན་འཕགས་མ་སྒྲོལ་མ༔ མཁའ་འགྲོ་སུ་ཁ་སིདྡྷི༔ བྲམ་ཟེ་ཨརྱ་དེ་ཝ༔ ཕ་ཅིག་དམ་པ་སངས་རྒྱས༔ སྐྱོ་སྟོན་བསོད་ནམས་བླ་མ༔ མ་ཅིག་ལབ་ཀྱི་སྒྲོན་མ༔ ཡབ་ཐོད་པ་བྷ་དྲ༔ སྲས་མཆོག་རྒྱལ་བ་དོན་འགྲུབ༔ རིགས་སྲས་ཐོད་སྨྱོན་བསམ་འགྲུབ༔ ལ་འདུལ་རྡོ་རྗེ་སྒྲོན་མ༔ ཁུ་སྒོམ་ཆོས་ཀྱི་སེང་གེ༔ ཕ་དོལ་བ་ཟང་ཐལ༔ རྗེ་བཙུན་རྒྱ་ནག་གཅེར་བུ༔ སངས་རྒྱས་རབ་སྟོན༔ རྟོགས་ལྡན་དགེ་སློང༔ ཞེན་མེད་རས་པ༔ རས་པ་ཆོས་ཀྱི་སིང་ཧ༔ སྟོན་པ་བཛྲ་སིང་ཧ༔ རྗེ་བཙུན་དཔལ་འབར་བ༔ གྲུབ་ཆེན་ཀརྨ་པཀྴི༔ མཁས་གྲུབ་རཱ་ག་ཨ་སྱ༔ གྲུབ་དབང་ཀུན་བཟང་གཞན་ཕན༔ རིག་འཛིན་ལུང་རིག་གླིང་པ༔ གཏེར་སྟོན་བསམ་གཏན་གླིང་པ༔ བརྒྱུད་འཛིན་ཆོས་ཀྱི་བདག་པོ་ལ་སོགས་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་ཐམས་ཅད་ཀྱིས་བྱིན་གྱིས་རློབས་ཤིག༔ རྒྱུ་འདོད་ཆགས་ཞེ་སྡང་གཏི་མུག་གསུམ༔ དུག་གསུམ་རང་སར་ཞི་བར་བྱིན་གྱིས་རློབས་ཤིག༔ ནད་རླུང་དང་མཁྲིས་པ་བད་ཀན་གསུམ༔ ནད་དེ་གསུམ་རང་སར་ཞི་བར་བྱིན་གྱིས་རློབས་ཤིག༔ གདོན་ཕོ་གདོན་མོ་གདོན་ཀླུ་གདོན་གསུམ༔ གདོན་གསུམ་རང་སར་ཞི་བར་བྱིན་གྱིས་རློབས་ཤིག༔ ཕུང་པོ་ཟན་དུ་བསྒྱུར་བར་བྱིན་གྱིས་རློབས་ཤིག༔ ཟན་སྐྱུར་ལམ་དུ་འགྲོ་བར་བྱིན་གྱིས་རློབས་ཤིག༔ ཉག་གཅིག་རྩད་ནས་ཆོད་པར་བྱིན་གྱི་རློབས་ཤིག༔ ལུས་ཤ་ཁྲག་གི་མཆོད་སྦྱིན་གནད་དུ་འགྲོ་བར་བྱིན་གྱིས་རློབས་ཤིག༔ དངོས་མེད་ལྷ་འདྲེའི་འགྲོ་དོན་ནུས་པར་བྱིན་གྱིས་རློབས་ཤིག༔ མཆོག་ཐུན་མོང་གི་དངོས་གྲུབ་ཐོབ་པར་བྱིན་གྱིས་རློབས་ཤིག༔ འཆི་མེད་ཚེའི་རིག་འཛིན་ཐོབ་པར་བྱིན་གྱིས་རློབས་ཤིག༔ ནད་མེད་བདེ་བའི་ལང་ཚོ་ཐོབ་པར་བྱིན་གྱིས་རློབས་ཤིག༔ ཕཊཿ ཕཊཿ ཕཊཿ དེ་ནས་བསྔོ་བ་ནི༔ ལུས་ཤ་ཁྲག་གི་མཆོད་སྦྱིན་འདི་ཁར་རེག་པ་ཙམ་དང་དྲི་ཚོར་བ་ཙམ་གྱིས་ན་བ་ཕན༔ ཤི་བ་སོས༔ རྒས་པ་དར༔ ཕོ་ཐམས་ཅད་སྤྱན་རས་གཟིགས་ཀྱི་གོ་འཕང་ཐོབ་པར་གྱུར་ཅིག༔ མོ་ཐམས་ཅད་རྗེ་བཙུན་སྒྲོལ་མའི་གོ་འཕང་ཐོབ་པར་གྱུར་ཅིག༔ དམ་ཆོས་བདུད་ཀྱི་གཅོད་ཡུལ་འདི༔ མཁའ་ལ་ཉི་མ་ཤར་བ་བཞིན༔ ཕྱོགས་རྣམས་ཀུན་དུ་ཁྱབ་པར་ཤོག༔ ཕཊཿ ཕཊཿ ཕཊཿ ཅེས་པ་འདིའང་བྱ་བཏང་རྣལ་འབྱོར་གཅོད་ཀྱི་དབང་ཕྱུག་འཇམ་དབྱངས་ཉི་མས་བསྐུལ་ངོར་ས་ར་ཧི་ཏས་སྨྲས་པ་དགེ་ལེགས་འཕེལཿ