རིགས་བཞིའི་འགྲེས་བྱང་བསྡུས་པ།
༄༅། རིགས་བཞིའི་འགྲེས་བྱང་བསྡུས་པ་ནི༔ ཀྱེ༔ མ་མི་མིན་ཡེ་ཤེས་མཁའ་འགྲོ་མ༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཀུན་གྱི་རྒྱུད་གྲོལ་མ༔ བྱིན་གྱིས་བརླབ་ཕྱིར་གཤེགས་སུ་གསོལ༔ བཅོམ་ལྡན་བཛྲ་རཏྣ་དང༔ པདྨ་ཀརྨ་ཌཱཀྐི་མ༔ མ་དབྱིངས་ལ་གཤེགས་བཞུད་མི་མངའ་ཡང༔ དོན་འགགས་མེད་ཤུགས་འབྱུང་ཐུགས་རྗེ་ཡིས༔ རྫུ་འཕྲུལ་མྱུར་བར་འདིར་གཤེགས་གསོལ༔ བདག་ཅག་ཁྱེད་ཀྱི་རྗེས་འཇུག་དང༔ མ་རིག་འཁྲུལ་བའི་སེམས་ཅན་རྣམས༔ མས་ངེས་པར་ཐུགས་རྗེས་གཟུང་དུ་གསོལ༔ དོན་ངེས་པར་བྱིན་གྱིས་བརླབ་དུ་གསོལ༔ མ་ཆོས་དབྱིངས་ནམ་མཁའི་ཀློང་ཡངས་ནས༔ ཐུགས་རྗེའི་སྤྲིན་ཕུང་ཐིབས་སེ་ཐིབ༔ དངོས་གྲུབ་ཆར་རྒྱུུན་སི་ལི་ལི༔ གཉན་ས་འདི་རུ་བྱིན་ཕོབ་ལ༔ འདིར་འདུས་སྣང་སྲིད་ལྷ་འདྲེ་དང༔ ཁམས་གསུམ་འཁོར་བའི་སེམས་ཅན་རྣམས༔ ཐུགས་རྗེས་བྱིན་གྱིས་བརླབ་ཏུ་གསོལ༔ མོས་པའི་བུ་ལ་དངོས་གྲུབ་སྩོལ༔ སྤྱི་གཙུག་རྒྱན་དུ་བཞུགས་སུ་གསོལ༔ བཞུགས་ནས་བྱིན་གྱིས་བརླབ་ཏུ་གསོལ༔ མ་ཁྱོད་དང་དགོངས་པ་མཉམ་པར་ཤོག༔ ཕཊཿ ཕཊཿ ཕཊཿ ཅེས་སོ།