ཕུང་པོའི་མཆོད་སྦྱིན་ཚོགས་གཉིས་བང་མཛོད།

ཕུང་པོའི་མཆོད་སྦྱིན་ཚོགས་གཉིས་བང་མཛོད་བཞུགས༔ ཧེ་རུ་ཀ་ལ་ཕྱག་འཚལ་ལོ༔ ཟབ་དོན་བརྟུལ་ཞུགས་འཛིན་པའི་མཆོག༔ རང་བྱུང་ཤེས་རབ་ཕ་རོལ་ཕྱིན༔ མ་སྐྱེས་འགགས་མེད་ནམ་མཁའི་དབྱིངས༔ སྟོང་གསལ་འཛིན་མེད་ངང་ཉིད་ལས༔ རིག་པ་སྐད་ཅིག་དྲན་རྫོགས་སུ༔ ཕཊཿ རང་ཉིད་སྐད་ཅིག་གིས་ཡུམ་ཆེན་མོ་གསེར་མདོག་རྒྱན་ཆ་ལུགས་ཡོངས་སུ་རྫོགས་པ་ཞལ་གཅིག་ཕྱག་བཞི་གཡས་གཉིས་རྡོ་རྗེ་དང་སྐྱབས་སྦྱིན༔ གཡོན་གཉིས་པོ་ཏི་དང་མཉམ་བཞག་མཛད་པའི་ཐུགས་སྟོང་ཉིད་སྙིང་རྗེའི་བདག་ཉིད་ཅན་དུ་གྱུར༔ འོ་སྣང་ཞིང་སྲིད་པའི་ལྷ་མཐུ་བོ་ཆེ༔ ཀླུ་མཐུ་བོ་ཆེ༔ བདུད་མཐུ་བོ་ཆེ༔ བཙན་མཐུ་བོ་ཆེ༔ རྒྱལ་པོ་མཐུ་བོ་ཆེ༔ མ་མོ་མཐུ་བོ་ཆེ༔ གཉན་མཐུ་བོ་ཆེ༔ མི་མ་ཡིན་མཐུ་བོ་ཆེ༔ ཁྱེད་རྣམས་ལེགས་པར་ཉོན༔ བདག་གིས་ཁྱེད་རྣམས་འཁོར་བ་དང་ངན་སོང་ནས་བསྒྲལ་ཏེ་རྣམ་མཁྱེན་སངས་རྒྱས་ཀྱི་ས་ལ་འགོད་པའི་ཕྱིར་བསམ་པ་བྱང་ཆུབ་མཆོག་ཏུ་སེམས་བསྐྱེད་ནས་འདིར་འོང་བ་ཡིན་པས་བདག་གི་ཕྲིན་ལས་འདི་མྱུར་དུ་སྒྲུབས་ཤིག༔ བདག་གི་ཕྲིན་ལས་འདི་མྱུར་དུ་མ་བསྒྲུབ་ན་གནམ་ས་སྟེང་འོག་བསྒྱུར་ནས་ཡུལ་འདིར་མཛེ་ཤའི་རི་བོ་བརྩེགས༔ མཛེ་ཁྲག་གི་རྒྱ་མཚོ་བསྐྱིལ༔ མཛེ་རྐང་གི་ཀ་བ་བཙུགས༔ མཛེ་ལྤགས་ཀྱིས་ཐོག་ཕུབ༔ མཛེ་རུས་ཀྱི་ཐང་ཆེན་བརྡལ་ནས༔ ཇི་སྲིད་འཁོར་བ་མ་སྟོང་གི་བར་དུ༔ ལྷ་འདྲེ་ཁྱེད་རྣམས་དང་དབྱེར་མེད་ལྷན་ཅིག་ཏུ་སྡོད་པ་ཡིན་པས༔ དེའི་ཕྱིར་མྱུར་བ་ཉིད་དུ་བདག་གིས་ཕྲིན་ལས་གང་བཅོལ་སྒྲུབས་ཤིག༔ ལྷ་འདྲེ་ཁྱེད་རྣམས་ཀྱིས་བཟང་ལན་ངན་དུ་མ་བསྒྱུར༔ ངན་ལན་བཟང་དུ་མ་བསྒྱུར༔ བདག་གི་བཀའ་ལ་ཉོན་ཅིག༔ དམ་ཚིག་ལ་གནས་པར་གྱིས་ཤིག༔ ཕཊ་ཕཊ་ཕཊ༔ རྐང་དུང་དྲག་འབུད་གསུམ་དང༔ ཞིང་ཆེན་ལྤགས་པའི་གཡང་གཞི་ལན་གསུམ་ས་ལ་བརྡབ༔ ཕཊཿ ཡེ་གཞི་སྟོང་ཆེན་དག་པ་ནམ་མཁའི་དབྱིངས༔ ཡེ་ཤེས་རང་རྩལ་སྒྱུ་འཕྲུལ་ལབ་ཀྱི་སྒྲོན༔ མ་ཅིག་ཁྲོས་མ་དམར་མོ་གཏུམ་རྔམ་འབར༔ ཕྱག་གཡས་མི་ལྤགས་གཡང་གཞིས་ཁམས་གསུམ་སྡུད༔ ཕྱག་གཡོན་མི་རྐང་གླིང་བུས་སྲིད་གསུམ་གནོན༔ སྐུ་ཡི་དཔའ་ཟིལ་མེ་རིས་རིགས་དྲུག་གི༔ སྐྱེ་འགྲོ་ལྷ་འདྲེ་དྲེགས་པ་ཆམ་ཆམ་འདུས༔ བཀའ་ཉན་གསུང་སྡོད་ཚུལ་དུ་མདུན་དེར་འཁོད༔ ཕཊཿདང་པོས་ཐམས་ཅད་ཀྱིས་ཐོབ༔ ཕཊཿགཉིས་པས་ཐམས་ཅད་འདུས༔ ཕཊཿགསུམ་པས་བཀའ་ཉན་གསུང་སྡོད་གྱུར༔ རང་ཉིད་རང་བྱུང་རིག་པ་ཁྲོས་མར་གྱུར༔ རང་ལུས་ནས་ཐོན་མདུན་གྱི་མཁའ་ལ་འཕགས༔ ཕྱག་གཡས་གྲི་གུག་བེམ་པོ་ཁྲག་མཚོར་གྱུར༔ སྟོང་གསུམ་ཁྱབ་པའི་ཞིང་ལྤགས་སྟེང་དུ་བསྒྱུར༔ ལྷ་ལ་བདུད་རྩི་ཀླུ་ལ་སྐྱེད་མོས་ཚལ༔ བཙན་ལ་རང་ཆས་ཡུལ་འདྲེ་རྒྱལ་བཙན་བདུད༔ ཀུན་ལ་ཤ་ཁྲག་ཅི་འདོད་འདོད་ཡོན་བསྔོ༔ ནད་བདག་ཡམས་བདག་སྡོང་ཟླ་རྒྱབ་རྟེན་ཚོགས༔ ཤ་ཁྲག་རུས་པ་སླ་བ་ཞག་རྐང་ཚིལ༔ གང་ལ་གང་མཁོ་ཅི་ལ་ཅི་འདོད་ཚོགས༔ མ་ཚང་མེད་པའི་འདོད་རྫས་དཀོར་ནོར་འབུལ༔ གནོད་སེམས་གདུག་སེམས་ཞི་ནས་བྱམས་སེམས་ལྡན༔ རྣམ་མཁྱེན་བྱང་ཆུབ་བདུད་རྩི་བརྙེས་པར་ཤོག༔ ཕཊ་ཕཊ་ཕཊ༔ སྐྱབས་གནས་མཆོག་གྱུར་དཀོན་མཆོག་རིན་པོ་ཆེ༔ བླ་མ་ཡི་དམ་མཁའ་འགྲོ་རྩ་གསུམ་ལྷ༔ དཔལ་མགོན་ཕོ་རྒྱུད་མོ་རྒྱུད་མ་ནིང་རྒྱུད༔ གཅོད་ཡུལ་བཀའ་སྲུང་དཀར་ཕྱོགས་སྐྱོང་བའི་ལྷ༔ ཟངས་རི་མཆེད་གཉིས་དྲེགས་པ་སྡེ་བརྒྱད་ལ༔ བདག་ལུས་བདུད་རྩི་ཀུན་བཟང་མཆོད་སྤྲིན་འབུལ༔ གནས་སྐབས་རྐྱེན་སོལ་ས་ལམ་བར་ཆད་སྲུང༔ མཐར་ཐུག་སངས་རྒྱས་འཐོབ་པའི་དངོས་གྲུབ་ཞུ༔ ཕཊ་ཕཊ་ཕཊ༔ ཕུང་པོའི་མཆོད་སྦྱིན་གྱི་ལྷག་མ་ཅུང་ཟད་ལུས་པ་ལས་ལྷག་མའི་འབྱུང་པོ་ཁས་ཞན་པ༔ དབང་ཆུང་བ༔ ཞ་བོ༔ ལོང་བ༔ འོན་པ༔ ལྐུགས་པ༔ མི་ཁོམ་པ༔ མ་ཐེམ་པ༔ བང་བུལ་བ༔ འབྱུང་པོ་ལྷག་སྡུད་རྣམས་ཀྱི་ཞལ་དུ་འབུལ་ལོ༔ ཁར་རེག་པ་དང་དྲི་ཚོར་བ་ཙམ་གྱིས་ཚིམ་པར་གྱུར་ཅིག༔ ཕཊ་ཕཊ་ཕཊ༔ དགེ་སྡིག་གཏོང་ལེན་དང་འཁོན་སྦྱང་གི་ཆོས་ཀྱི་སྦྱིན་པ་སོགས་ལེགས་པར་གྲུབ་རྗེས༔ ཕཊཿ དགེ་འདིས་མཁའ་མཉམ་ཡིད་ཅན་འགྲོ་བ་རྣམས༔ དགའ་མགུ་ཡི་རང་རྣམ་མཁྱེན་སངས་རྒྱས་ཤོག༔ འཁོར་གསུམ་ཡོངས་དག་ཆེན་པོར་རྒྱས་གདབ་ནས༔ དག་ཆེན་ཡེ་ཤེས་ཁྱབ་བརྡལ་ཆེན་པོར་ཤོག༔ ས་མ་ཡཱ༔ རང་བྱུང་ཡེ་ཤེས་སྒྱུ་མའི་འཕྲུལ༔ རྩོད་མེད་མཁའ་འགྲོའི་བརྡ་གླུ་ལས༔ ཐོལ་བྱུང་ཐོགས་མེད་ཚུལ་དུ་སྨྲས༔ སྔོན་སྦྱངས་ལས་ཀྱི་འཕྲོ་ལྡན་པའི༔ ཨ་ཙརྱ་སྤྲུལ་ཕན་པའི་མིང༔ འཆོལ་སྤྱོད་གང་གི་ཐུགས་བཅུད་ཆོས༔ སྐལ་ལྡན་འགྲོ་བའི་དོན་ལ་སྤེལ༔ གུ་ཧྱ༔ ཞེས་འགྲོ་བའི་དེད་དཔོན་མཆོག་གྱུར་བླ་མ་ཤེས་རབ་བཟང་པོ་དང་ཉེ་བའི་བཀའ་ཉན་ཡུལ་མིས་སྤྱི་སྲུང་སྒྲུབ་པའི་ཚེ་རྟོགས་ལྡན་སྐྱེས་བུ་དམ་པ་ཚེ་དབང་ལྷུན་གྲུབ་ལ་ཟབ་མོའི་ཆོས་ཀྱི་སྐལ་བར་ལེགས་པར་ཕུལ་བ་བདག་ཉིད་གཞན་ཕན་གྱིས་བྲིས་པ་དུས་གསུམ་དུ་དགེ་བར་གྱུར་ཅིག