དམར་འགྱེད་སོགས།

མ་ཅིག་ཡུམ་ཆེན་ཕག་མོ་ལ་ཕྱག་འཚལ༔ ཕུང་པོའི་མཆོད་སྦྱིན་དམར་འགྱེད་ནི༔ སེམས་བསྐྱེད་ལྡན་པའི་གང་ཟག་གིས༔ རྣམ་པར་རྟོག་གསུམ་བྲལ་བ་ཡིས༔ ཕཊཿབརྗོད་པས༔ རང་ལུས་ཆེ་ཚོའི་དཔལ་ཡོན་ཕུན་སུམ་ཚོགས༔ དབུ་མའི་ལམ་ནས་སེམས་ཉིད་མཁའ་ལ་ཐོན༔ སྟོང་གསུམ་ཁྱབ་པའི་བཾ་རོ་སྣུམ་བརྗིད་མཛེས༔ མཐོང་བ་ཙམ་གྱིས་ལྷ་འདྲེའི་ཡིད་འཕྲོག་ནུས༔ མདུན་དེར་རྣམ་པར་ཤེས་པའི་ངོ་བོའི་འཕྲུལ༔ གཤིན་རྗེ་ཨ་བ་གླང་དང་ཞེ་སྡང་སྦྲུལ༔ འདོད་ཆགས་བྱ་དང་གཏི་མུག་འཁོར་ལོའི་སྣ༔ ང་རྒྱལ་རྔམ་པ་དྲེད་ཀྱི་མགོ་ཅན་ལྔ༔ གཞན་ཡང་གཅན་ཟན་སྣ་ཚོགས་མགོ་བརྙན་ཅན༔ མཚོན་ཆ་སྣ་ཚོགས་ཐོགས་པས་རོ་གཏུབ་བསམ༔ ཕཊཿ གཏི་མུག་ཤ་རི་འདོད་ཆགས་ཁྲག་གི་མཚོ༔ ཞེ་སྡང་རུས་པ་ལྷ་བ་རྐང་མར་ཞག༔ དྲི་དང་རོ་ནུས་ཕུན་ཚོགས་འཇིག་རྟེན་གང༔ ཕཊཿ གཤིན་རྗེ་རྣམ་ལྔས་སྐད་གདངས་མཐོན་པོ་ཡིས༔ སྟོང་གསུམ་སྲིད་པའི་ལྷ་འདྲེ་ཀུན་བོས་པས༔ རང་དབང་མེད་པར་འུབ་ཀྱིས་འདུས་པར་བསམ༔ དེ་ནས་གདོན་འབོད་ལ་རྐང་དུང་ལན་གསུམ་འབུད་ཅིང་གཡང་གཞི་ལན་གསུམ་བཏབ་པས། འཻ༔ བགེགས་ཀྱི་གཙོ་བོ་གདོན་ཆེན་བཅོ་རྒྱད་དང༔ བྱིས་པའི་གདོན་ཆེན་བཅོ་ལྔ་ལ་སོགས་པའི༔ རྒྱལ་བསེན་གཟའ་ཀླུ་རྒྱུ་སྐར་ས་བདག་བཙན༔ བདུད་གཤེད་འགོང་ཐེའུ་གྲི་བོ་གྲི་མོ་བཅས༔ སྲིད་པའི་རྩེ་མན་ན་རག་དམྱལ་བ་ཡན༔ ནམ་མཁའི་ལྷ་མན་ས་འོག་ལྟོ་ཕྱེ་ཡན༔ མཐོ་བ་བེ་ཧར་རྒྱལ་པོ་མན་ཆད་ནས༔ དམའ་བ་ཡུལ་འདྲེ་ས་སྲིན་ཡན་ཆད་ཀྱི༔ སྣང་སྲིད་ལྷ་འདྲེ་ཐམས་ཅད་འདིར་འདུས་ཤིག༔ ཕཊཿ ཀྱཻ༔ ཁྱད་པར་གཉན་ཁྲོད་འདིར་གནས་ལྷ་འདྲེའི་རིགས༔ ལྷ་བདུད་བཙན་དང་གཟའ་ཀླུ་གཉན་དང་སྲིན༔ ཕོ་མོ་མ་ནིང་ཚོགས་ཀུན་འདིར་འདུས་ཤིག༔ ཁྱད་པར་བསྲུང་བྱ་འདི་ལ་གནོད་བྱེད་པའི༔ རྒྱལ་བསེན་གྲི་བོ་གྲི་མོ་ཤི་གསོན་འདྲེ༔ དུས་གསུམ་འདྲེ་གྱུར་ཟ་འདྲེ་ཤི་གཤེད་དང༔ ཁ་ཡི་དབུགས་འཕྲོག་ཁོག་པའི་སྲོག་གཅོད་པའི༔ བདུད་དང་ལོག་འདྲེན་མ་ལུས་འདིར་འདུས་ཤིག༔ ཅེས་པའི་འབོད་སྐད་དྲག་པོས་འབོད་ཙམ་གྱིས༔ མདུན་དེར་ཁྲོམ་འཚོགས་ཇི་བཞིན་འདུས་པར་བསམ༔ ཕཊཿ ཁྱད་པར་བྱེ་བྲག་འབོད་པ་འདི་ལྟར་གྱེར༔ ཕཊཿ སྟེང་འཇའ་ཚོན་ལས་གྲུབ་གུར་ཁང་ནས༔ གཟའ་ཁྱབ་འཇུག་མགོ་དགུ་བྱ་རོག་ཏོག༔ འཁོར་གདོང་མོ་བཞི་དང་གཟའ་ཆེན་བརྒྱད༔ ལྷ་སྲིན་དང་སྡེ་བརྒྱད་རྒྱུ་སྐར་ཚོགས༔ སྟེང་གཟའ་ཡི་གདོན་ཚོགས་ཐམས་ཅད་ཀྱིས༔ བདག་ཤ་ཁྲག་རུས་པའི་ཕུང་པོ་འདི༔ ཟོ་འཐུང་ཞིག་ལྷག་མ་མེད་པར་རོལ༔ ཁྱེད་དགྱེས་པས་འདོད་དོན་ལྷུན་གྲུབ་སྩོལ༔ ཕཊཿ བར་ལྷ་ཁང་བྱ་འདབས་སུམ་རིམ་ནང༔ གདོན་རྒྱལ་འགོང་བེ་དཀར་གསེར་ཐུལ་ཅན༔ གླང་ཞོན་ཅིང་ལྷུང་བཟེད་གསེག་ཤིང་བསྣམས༔ འཁོར་བན་ཆེན་བརྒྱ་དང་བོན་ཆེན་སྟོང༔ ལས་བྱེད་པ་ཤན་པ་གྲི་ཐོགས་བརྒྱ༔ པ་དྲ་དང་པུ་ཏྲ་ཕྱི་ནང་བློན༔ ཕྱག་བརྙན་དང་བེ་ཧར་རྣམ་པ་གསུམ༔ སྲིན་མོ་དང་དམ་སྲི་གྲོང་རྒྱུག་འདྲེ༔ བར་རྒྱལ་འགོང་གདོན་གྱི་སྡེ་ཚོགས་རྣམས༔ བདག་ཤ་ཁྲག་རུས་པའི་ཕུང་པོ་འདི༔ ཟོ་འཐུང་ཞིག་ལྷག་མ་མེད་པར་རོལ༔ ཁྱེད་དགྱེས་པས་འདོད་དོན་ལྷུན་གྲུབ་སྩོལ༔ ཕཊཿ འོག་རྒྱ་མཚོ་མེར་བའི་ནང་ཤེད་དུ༔ གདོན་ཀླུ་བདུད་གདོལ་བ་མགོ་དགུ་པ༔ ཕྱག་གཉིས་ན་ཆུ་གྲི་འབར་བ་ཐོགས༔ སྨད་སྦྲུལ་མཇུག་ཆུ་གླང་སྟེང་དུ་འཁྱིལ༔ འཁོར་ཀླུ་ཆེན་བརྒྱད་དང་ཀླུ་ཕྲན་སྟོང༔ སྦྲུལ་སྦལ་བ་ཉ་ལྕོང་སྡོམ་སྡིག་འཕྲོ༔ འོག་ཀླུ་གདོན་སྡེ་ཚོགས་ཐམས་ཅད་ཀྱིས༔ བདག་ཤ་ཁྲག་རུས་པའི་ཕུང་པོ་འདི༔ ཟོ་འཐུང་ཞིག་ལྷག་མ་མེད་པར་རོལ༔ ཁྱེད་དགྱེས་པས་འདོད་དོན་ལྷུན་གྲུབ་སྩོལ༔ ཕཊཿ སྒོས་གཉན་ས་འདི་ལ་གནས་པ་ཡི༔ བཙན་མ་མོ་ཐེའུ་རང་དྲི་ཟའི་སྡེ༔ བདུད་གཤིན་རྗེ་ཉུ་ལེ་རེ་ལྡེ་གདོན༔ ནད་ཡམས་བདག་ཕོ་མོ་ལན་ཆགས་བདག༔ འཕྲོག་མ་བུ་ལྔ་བརྒྱའི་སྡེ་ཚོགས་ཀུན༔ ལུས་ཤ་ཁྲག་རུས་པའི་ཕུང་པོ་འདི༔ ཟོ་འཐུང་ཞིག་ལྷག་མ་མེད་པར་རོལ༔ ཁྱེད་དགྱེས་པས་འདོད་དོན་ལྷུན་གྲུབ་སྩོལ༔ ཕཊཿ ཕཊཿ ཕཊཿ བདག་ལུས་ཆེ་ཚོ་བཀྲག་མདངས་དར་རྒྱས་པའི༔ སྤྱི་གཙུག་ནས་བཟུང་རྐང་མཐིལ་ཡན་ཆད་ཀྱི༔ དབང་ལྔ་སྣོད་དྲུག་ཕྱི་ཤ་གཟུགས་ཀྱི་ལུས༔ ནང་ཆ་བུ་དགུ་ཚིལ་བུ་ཞག་དང་རྐང༔ ཤ་ཁྲག་རུས་གསུམ་ཆུ་སེར་སོ་སེན་སྐྲ༔ ཚེ་སྲོག་བཀྲག་མདངས་ཁམས་དང་སྐྱེ་མཆེད་སོགས༔ ལྷ་འདྲེ་ཁྱེད་རང་རྣམས་ལ་ཕང་མེད་བློས༔ སྟེར་བ་ཡིན་པས་དགའ་བདེའི་ངང་གིས་ལོངས༔ ཟོ་ཞིག་ཁྱེར་ཅིག་ལྷག་མ་མེད་པར་བཞེས༔ སྦྱིན་དུ་མ་སྟེར་རྣལ་འབྱོར་ང་ཞན་ཅིང༔ སྤྱོད་དུ་མ་ནུས་ལྷ་འདྲེ་ཁྱེད་རྣམས་ལྷོད༔ སྤྱིར་འགྲོ་དྲུག་སེམས་ཅན་གླུད་དུ་གཏོང༔ སྒོས་དྲིན་ཆེན་ཕ་མའི་གླུད་དུ་གཏོང༔ བྱེ་བྲག་ཏུ་བླ་མའི་སྐུ་གླུད་གཏོང༔ གྲྭ་རོགས་དང་གྲོགས་མཆེད་ཀྱི་གླུད་དུ་གཏོང༔ འཁོར་འབངས་དང་ཁལ་གྱི་གླུད་དུ་གཏོང༔ ལན་ཆགས་དང་ཤ་འཁོན་བྱང་ཕྱིར་བསྔོ༔ དོན་དེ་ཕྱིར་སྐད་ཅིག་ཡུད་ཙམ་ལ༔ ཁྱེད་ལྟོག་པ་རྣམས་ཀྱིས་ཤ་ལ་ཟོ༔ སྐོམ་པ་རྣམས་ཀྱིས་ཁྲག་ལ་འཐུང༔ འཁྱག་པ་རྣམས་ཀྱིས་ལྤགས་པ་གྱོན༔ བཀྲེན་པ་རྣམས་ཀྱིས་འདོད་ཡོན་ཚོགས༔ མཁོ་དགུའི་གཏེར་དུ་འབུལ་བས་བཞེས༔ བྲམ་ཟེ་སྐྱེ་བདུན་ཤ་ཁྲག་རུས༔ བྱིན་གྱིས་རླབས་ནས་ཕུལ་བའི་མཐུས༔ མ་བསྒྲལ་བ་རྣམས་བསྒྲལ་བ་དང༔ མ་གྲོལ་བ་རྣམས་དགྲོལ་བ་དང༔ དབུགས་མ་དབྱུང་རྣམས་དབུགས་འབྱུང་ཞིང༔ མྱང་འདས་མ་ཐོབ་འཐོབ་བྱའི་ཕྱིར༔ མཆོད་སྦྱིན་བདུད་རྩིའི་གཏེར་བསྔོས་པས༔ ཁྱེད་རྣམས་འཁོར་མཚོ་ལས་ཐར་ནས༔ རྣམ་མཁྱེན་གོ་འཕང་འཐོབ་པར་ཤོག༔ ཕཊཿ ཕཊཿ ཕཊཿ ལྷག་ལ་དབང་བའི་ཁས་ཞན་དབང་ཆུང་རིགས༔ ཉམས་ཆུང་ཅེར་ལྟ་འབྱུང་པོ་དུང་ངེ་རྒྱུག༔ དེ་ཀུན་ཀྱང་ཟོ་ཞིག་ཚིམ་ཏུ་ཁྱེར༔ དགེ་བ་འདི་སེམས་ཅན་གྱི་དོན་དུ་བསྔོ༔ ཡུམ་ཆེན་གྱི་གོ་འཕང་མངོན་གྱུར་ཤོག༔ ཕཊཿ མཐར་མཆོད་བྱ་མཆོད་བྱེད་མ་ལུས་ཀུན༔ དོན་འཁོར་གསུམ་བྲལ་བའི་གཤིས་ལ་ཀློད༔ སླར་གདོད་མའི་དེ་ཉིད་མངོན་གཟིགས་པའི༔ ལུས་འཇའ་སྐུར་གཞིག་པའི་ཤིས་པ་སྩོལ༔ ཕཊཿ ས་མ་ཡཱ༔ ནག་འགྱེད་དམིགས་པ་འདོན་སྒོམ་སྦྲགས་པ་ནི༔ ཕཊཿ རང་བྱུང་བྷནྡྷ་སྟོང་གསུམ་ཁྱབ་པའི་ནང༔ རང་དང་བསྲུང་བྱ་གནས་པའི་མདུན་མཁའ་རུ༔ གྲུབ་ཐོབ་གཅོད་རྒྱུད་མ་ཅིག་ལྷ་ལྔ་དང༔ དམ་པ་རྒྱ་གར་ཡུམ་ཆེན་ཕག་ཁྲོས་མ༔ ལྷ་ཚོགས་སྐུ་ལས་ཟག་མེད་བདུད་རྩིའི་རྒྱུན༔ བབས་པས་སྤྱི་བོ་ནས་ཞུགས་ཕྱི་ནང་ཀུན༔ རབ་ཏུ་བཀྲུས་ཤིང་བཤལ་བས་ནད་དང་གདོན༔ ཉམས་ཆགས་ཉེས་ལྟུང་དྲི་མའི་ཚོགས་བཅས་ཀུན༔ དུད་ཁུ་སོལ་བའི་རང་བཞིན་ཐོད་པར་འཁྱིལ༔ དྲི་ཞིམ་རོ་བརྒྱ་ནུས་པ་ཕུན་སུམ་ཚོགས༔ ལྷ་འདྲེ་ཀུན་གྱིས་འཐུང་བས་ངོམས་ཤིང་ཚིམ༔ ཀུན་ཀྱང་བཻཌཱུཪ་མདོག་ལྟར་གཟི་བརྗིད་འབར༔ ཕཊཿ ཕཊཿ ཕཊཿཅེས་མང་བརྗོད་དམིགས་པ་མ་གསལ་བར༔ ཕཊཿ ཕཊཿ ཕཊཿ བདག་གཞན་ལ་སྡང་འཕྲོག་སོགས་གནོད་འཚེའི་བགེགས༔ ནད་གདོན་སྡིག་སྒྲིབ་བཀྲུས་པའི་ཁུ་བ་འདི༔ ལྷག་མེད་འཐུང་བས་ངོམས་ཤིང་ཚིམ་པ་ཡིས༔ ལུས་སེམས་དབང་པོ་བདེ་བའི་མཆོག་ཐོབ་ནས༔ མཐོང་ཐོས་དྲན་རེག་འགྲོ་ལ་སྨན་ནུས་ཤོག༔ དམིགས་པ་མང་བསྐྱར་ཕཊ་སྒྲ་སྒྲོགས༔ ཕཊཿ མཐར་ནི་གཏོང་ལེན་དམིགས་པ་འདི་ལྟར་རོ༔ བདག་གཞན་དུས་གསུམ་བསགས་པའི་དགེ་བའི་ཚོགས༔ གཅིག་བསྡུས་ནང་འབྱུང་རླུང་གི་རྒྱུ་བ་དང༔ འགྲོགས་ཏེ་གཞན་གྱི་རྒྱུད་ལ་ཐིམ་གྱུར་ནས༔ སྡུག་བསྔལ་ཀུན་བྲལ་བདེ་ཆེན་ཡེ་ཤེས་ཐོབ༔ ཕཊཿ རང་གི་བདེ་དགེ་གཞན་ལ་བཏང༔ ཕཊཿ གཞན་གྱི་དུས་གསུམ་མི་དགེ་སྡིག་པའི་ལས༔ ངན་སོང་འཁོར་བའི་རྒྱུ་འབྲས་ས་བོན་རྣམས༔ ལས་རླུང་ནག་ལྡོག་དང་འགྲོགས་རང་ཉིད་ཀྱི༔ སྒོ་གསུམ་ལ་ཐིམ་འགྲོ་བ་དུཿཁ་བྲལ༔ ལུས་སེམས་བདེ་བའི་དབང་པོ་མཆོག་ཐོབ་བསམ༔ ཕཊཿཅེས་བརྗོད་སྨྲ་བསམ་བརྗོད་པ་བྲལ༔ མི་དམིགས་སྟོང་ཆེན་བློ་ལས་འདས་པར་བྱ༔ ས་མ་ཡཱ༔ དེ་ནས་བྱིན་རླབས་བསྡུས་པ་ནི༔ ཕཊཿ གནས་འོག་མིན་དབྱིངས་ཀྱི་ད་ལ་ནས༔ རྗེ་གཅོད་ཡུལ་བརྒྱུད་པའི་བླ་མ་རྣམས༔ མ་ཡུམ་ཆེན་སྟོན་པ་ཤཱཀྱ་ཐུབ༔ རྗེ་སྨྲ་བའི་སེང་གེ་འཕགས་མ་སྒྲོལ༔ ཨཱརྱ་དེ་ཝ་དམ་པ་སངས་རྒྱས་རྗེ༔ སྐྱོ་སྟོན་ཁུ་དབོན་གྲྭ་བ་མངོན་ཤེས་ཅན༔ ཨ་མ་ལབ་སྒྲོན་ཐོད་པ་བྷ་ཏྲ་དང༔ རྒྱལ་བ་དོན་གྲུབ་ཁུ་སྒོམ་ཆོས་སེང་བ༔ དོལ་བ་ཟང་ཐལ་རྒྱ་ནག་གཅེར་བུ་པ༔ སངས་རྒྱས་རབ་སྟོན་རྟོགས་ལྡན་དགེ་སློང་ཞབས༔ ཞེན་མེད་རས་པ་བྷུདྡྷ་རབ་སྟོན་པ༔ ཆོས་རྗེ་བཀྲ་ཤིས་བཀྲ་ཤིས་དབང་ཕྱུག་གྲགས༔ ཀུན་དགའ་རྒྱལ་མཚན་རོལ་པའི་རྡོ་རྗེའི་ཞབས༔ མཁའ་སྤྱོད་དབང་པོ་རཏྣ་དྷྭ་ཛ་དང༔ ཀརྨ་པཀྵི་ར་ག་ཨ་སྱཱས་མཚན༔ ཀུན་བཟང་གཞན་ཕན་ལུང་རིག་མྱུ་གུ་རྩལ༔ བསམ་གཏན་ཡེ་ཤེས་གླིང་པ་གཅོད་བརྒྱུད་ཚོགས༔ དྲིན་ཆེན་བླ་མའི་ངོ་བོར་ཡོངས་ཤར་བཞིན༔ བདག་སོགས་གསོལ་བ་འདེབས་སོ་ཐུགས་རྗེས་དགོངས༔ གཅོད་ཡུལ་མཐའ་རུ་ཕྱིན་པར་བྱིན་གྱིས་རློབས༔ བདག་འཛིན་དབྱིངས་སུ་གྲོལ་བར་བྱིན་གྱིས་རློབས༔ དངོས་སྣང་སེམས་སུ་ཞིག་པར་བྱིན་གྱིས་རློབས༔ གཉིས་འཛིན་རང་སར་གྲོལ་བར་བྱིན་གྱིས་རློབས༔ སྙེམ་རྟོག་ནང་ནས་ཆོད་པར་བྱིན་གྱིས་རློབས༔ བདུད་བཞི་ཅིག་ཆར་ཆོད་པར་བྱིན་གྱི་རློབས༔ སྐྱེ་མེད་རང་བྱུང་རང་གཞིའི་ཞལ་མཐོང་ནས༔ ཁྱབ་བརྡལ་འུབ་ཆུབ་ཀ་དག་རང་གྲོལ་ཤོག༔ ཕཊཿཅེས་བརྗོད་པ་ཚོགས་ཞིང་གི༔ དགོངས་ཀློང་མཁའ་དང་རང་སེམས་བསྲེས༔ བསྲེ་བྱ་བསྲེ་བྱེད་མེད་མོད་ཀྱང༔ གཉིས་མེད་དུ་བྲལ་རིག་པའི་གཤིས༔ གཞོན་ནུ་བུམ་སྐུ་ཨ་ལ་ལ༔ ས་མ་ཡཱ༔ དེ་ནས་སྐྱབས་ཡུལ་གསོལ་འདེབས་ནི༔ སྐྱབས་ཡུལ་མདུན་གྱི་ནམ་མཁར་ཉི་ཟླ་པདྨའི་གདན་ལ༔ ཆོས་སྐུ་ཡུམ་ཆེན་མོ་དང་མ་ཅིག་ལབ་ཀྱི་སྒྲོལ་མ་ལ་ཟབ་མོ་གཅོད་ཡུལ་བརྒྱུད་པའི་གྲུབ་ཐོབ༔ བཀའ་བརྒྱུད་ཉམས་བརྒྱུད་ཕ་བརྒྱུད་མ་བརྒྱུད་བླ་མ་མཆོག་གསུམ་རྩ་གསུམ་རྒྱལ་བ་རྒྱ་མཚོ་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པ་སྤྲིན་དཔུང་གཏིབ་པ་བཞིན་མངོན་སུམ་དུ་བཞུགས་པར་དམིགས་ལ༔ ཡེ་ཤེས་པ་བསྟིམས༔ བཛྲ་ས་མ་ཡཱ་ཛ༔ ཛཿཧཱུྃ་བཾ་ཧོ༔ གཉིས་སུ་མེད་པར་གྱུར༔ ཕཊཿ ན་མོ་གུ་རུ༔ གཏན་གྱི་སྐྱབས་གནས་བླ་མ་མཆོག་གསུམ་དང༔ སྐུ་གསུམ་རྩ་གསུམ་རབ་འབྱམས་རྒྱལ་སྲས་ཚོགས༔ ཀུན་འདུས་ངོ་བོ་མ་ཅིག་ཡུམ་ཆེན་ཆེན་མོ༔ འགྲོ་རྣམས་བྱང་ཆུབ་བར་དུ་སྐྱབས་སུ་མཆི༔ ཕཊཿ བདག་གིས་སྦྱིན་སོགས་བགྱིས་པའི་བསོད་ནམས་འདིས༔ སེམས་ཅན་བདེ་ལྡན་སྡུག་བསྔལ་ཀུན་དང་བྲལ༔ ཆགས་སྡང་མེད་པའི་སྟོང་ཆེན་བློ་འདས་དབྱིངས༔ བླ་མེད་རྫོགས་པའི་བྱང་ཆུབ་ཐོབ་པར་ཤོག༔ ཕཊཿ རང་རིག་མཁའ་ལ་ཐོན་ཏེ་མཁའ་འགྲོར་གྱུར༔ རང་ལུས་ས་ལ་འགྱེལ་བས་ས་གཞི་ཁྱབ༔ རི་རབ་གླིང་བཞི་ཁོ་ར་ཁོར་ཡུག་བསྐོར༔ ལྷ་མིའི་དཔལ་འབྱོར་བཀོད་རབ་རྒྱ་མཚོའི་སྤྲིན༔ མ་ཅིག་ཡུམ་ཆེན་རྒྱལ་བ་རྒྱ་མཚོ་དང༔ གྲུབ་ཐོབ་གཅོད་ཡུལ་བརྒྱུད་པའི་བླ་མ་ལ༔ མཉེས་བྱེད་མཎྜལ་བཟང་པོ་འདི་འབུལ་བས༔ བྱང་ཆུབ་ལམ་ལ་བར་ཆད་མེད་པ་དང༔ གཉིས་འཛིན་བྲལ་ནས་ཚོགས་གཉིས་རྫོགས་གྱུར་ཅིག༔ ཕཊཿ གུས་པས་ཕྱག་འཚལ་ལོངས་སྤྱོད་དགེ་ཚོགས་མཆོད༔ ཉམས་ཆགས་མཐོལ་བཤགས་དགེ་ལ་རྗེ་ཡི་རང༔ ཆོས་འཁོར་བསྐོར་བསྐུལ་མྱ་ངན་མི་འདའ་བཞུགས༔ མ་ལུས་ཕྱམ་གཅིག་བྱང་ཆུབ་ཐོབ་ཕྱིར་བསྔོ༔ ཕཊཿ ཕཊཿ དེ་ནས་བཀའ་བསྒོ་བ་ནི༔ སྣང་ཞིང་སྲིད་པའི་ལྷ་མ་སྲིན་སྡེ་བརྒྱད་ཟ་འདྲེ་ཤི་གཤེད་བུག་རལ་འཁྱམས་གསུམ་འཇབ་རྒྱུག་ལོག་གསུམ་བྱེད་པའི་གཟུགས་ཅན་གཟུགས་མེད་ཐམས་ཅད་བདུད་འདུལ་ཁྲོས་མ་ནག་མོའི་ཏིང་ངེ་འཛིན་གྱིས་དབང་དུ་བསྡུས་ཤིང་ཟིལ་གྱིས་མནན་པར་བསམ༔ ཕཊཿ ཀྱཻ༔ གཉན་ཁྲོད་ཆེན་པོ་འདི་ན་གནས་པའི་ལྷ་མ་སྲིན་སྡེ་བརྒྱད་ཐམས་ཅད་ཉོན་ཅིག༔ ཁྱེད་རྣམས་ལས་དང་ཉོན་མོངས་པའི་དབང་དུ་གྱུར་ནས་འཁོར་བ་སྡུག་བསྔལ་གྱི་རྒྱ་མཚོར་དབང་མེད་འཁོར་ཡུག་ཏུ་འཁོར་ཞིང་སྡུག་བསྔལ་གྱི་རང་བཞིན་བསམ་གྱིས་མི་ཁྱབ་པས་མནར་བ་འདི་ལ༔ ཟབ་མོ་གཅོད་ཀྱི་རྣལ་འབྱོར་བ་བདག་གིས་ལྷག་བསམ་རྣམ་པར་དཀར་བའི་བྱང་ཆུབ་སེམས་མཆོག་རིན་པོ་ཆེ་བསྐྱེད་ནས་ལྷ་འདྲེ་ཁྱེད་རྣམས་ལ་གནས་སྐབས་སུ་བདེ་སྐྱིད་ཕུན་སུམ་ཚོགས་པ་དང་༔ མཐར་ཐུག་སངས་རྒྱས་ཀྱི་གོ་འཕང་རླབས་པོ་ཆེ་ཐོབ་པའི་ཆེད་དུ་ཟབ་མོ་གཅོད་ཀྱི་འབྲེལ་བ་བྱེད་པ་དང༔ དམ་པའི་ཆོས་ཀྱི་འཁོར་ལོ་བསྐོར་བ་དང༔ གཅེས་འཛིན་གྱི་ཕུང་པོ་མཆོད་སྦྱིན་གཏོང་བ་ཡིན་པས་ལྷ་འདྲེ་ཁྱེད་རྣམས་དགའ་བ་དང་སྤྲོ་བའི་སེམས་ཀྱིས་རང་རང་གི་ཡིད་མཐུན་པའི་གྲལ་དུ་འཁོད་ལ༔ ཞེ་སྡང་དང་ཁོང་ཁྲོ་ཕྲག་དོག་དང་གནོད་འཚེའི་བསམ་པ་སྤོང་ལ་ཞི་བ་དུལ་བ་བྱང་ཆུབ་ཀྱི་སེམས་དང་ལྡན་པར་མཛོད་ལ་བདག་གིས་བཀའ་བསྒོ་བ་དང་དམ་ཚིག་ལ་གནས་པར་གྱིས་ཤིག༔ བདག་གི་བཀའ་དང་དམ་ལ་མི་ཉན་ཚེ་ཡུལ་འདིར་མཛེ་ཤའི་རི་བོ་བརྩེགས༔ མཛེ་ཁྲག་གི་རྒྱ་མཚོ་བསྐྱིལ༔ མཛེ་རྐང་གི་ཀ་བ་བཙུག༔ མཛེ་ལྤགས་ཀྱིས་ཐོག་ཕུབ་བྱས༔ རྒྱ་མཚོ་ཁ་ལུད་གནམ་ས་སྟེང་ཞབས་བསྒྱུར་ནས་ལྷ་འདྲེ་ཁྱེད་རང་རྣམས་དང་དབྱེར་མེད་ལྷན་ཅིག་སྡོད་པ་ཡིན་པས་ཕྲིན་ལས་འདི་མྱུར་དུ་སྒྲུབས་ཤིག༔ ཕཊཿ ཕཊཿ ཕཊཿ ཅེས་དམིགས་པ་བརྟན་པོས་བཀའ་བསྒོ་བར་བྱའོ༔ ས་མ་ཡཱ༔ དེ་དང་དེ་ཡི་རྗེས་འབྲེལ་དུ༔ ཁ་ཆར་འབེབས་པ་གཅོད་པ་སོགས༔ དམིགས་པ་ཟབ་མོས་ཆོག་པ་འདི༔ ཨ་མ་ཇོ་མོའི་ཁྱད་ཆོས་ཡིན༔ དང་པོ་ཟིལ་གནོན་དམིགས་པ་འཕེན༔ ཕཊཿ རང་ཉིད་སྐད་ཅིག་གིས་མ་ཅིག་ཁྲོས་མ་ནག་མོར་གསལ་བའི་ཐུགས་ཀའི་ཧཱུྃ་ལས་གནམ་ལྕགས་ཀྱི་རྡོ་རྗེ་གྲངས་མེད་པར་འཕྲོས་པས་མཚོ་འམ་ཆུ་མིག་དེ་ལ་ར་བ་སུམ་རིམ་བསྐོར་ཞིང༔ ཀླུ་གཉན་ས་བདག་ཐམས་ཅད་བྲོས་དབང་མེད་པར་བསམ༔ བདག་གི་བཀའ་ཉན་གསུང་སྡོད་དུ་གནས་པར་གྱུར༔ ཕཊཿ ཕཊཿ ཕཊཿ དམིགས་པ་མ་ཟིན་བར་དུ་བརྗོད༔ དེ་ནས་བདག་ཉིད་ཁྲོས་མ་ནག་མོའི་ཕྱག་གཡས་མི་ལྤགས་བརྡེབ་ཅིང་གཡོན་མི་རྐང་འབུད་པས་ལྷ་མ་སྲིན་སྡེ་བརྒྱད་ས་བདག་ཀླུ་གཉན་ཐམས་ཅད་ར་ལུག་སེར་བས་དེད་པ་བཞིན་གནས་བདག་གི་གླུད་དང་དབྱེར་མེད་དུ་བསྟིམས་པར་བསམ༔ མཐུ་རྩལ་སྟོབས་དང་ནུས་པ་རྫོགས་པར་བསམ༔ ཅོག་པུ་ཕུབ་ཅིང་དབང་སྡུད་ཟིལ་གནོན་གཅོད་གཞུང་བཞིན་བྱ༔ དེ་ནས་ལུས་སྦྱིན་དཀར་འགྱེད་དམར་འགྱེད་བཏང༔ གཡང་གཞི་ས་གཞི་ཁྱབ་པའི་སྟེང་དུ་ས་བདག་ཀླུ་གཉན་སྡེ་བརྒྱད་ཡུལ་ལྷ་ཐམས་ཅད་འུབ་ཀྱིས་བསྡུས་ནས་ཆར་ལ་བསྐུར༔ ཀུན་གྱི་བུ་ག་ཐམས་ཅད་ནས་རླངས་པ་ཕྱུར་ཞིང་ཆར་བབས་པར་བསམ་ལ༔ བཀའ་བསྒོ་བ་ནི༔ ཕཊཿ ན་མོ་སྐྱབས་ཀྱི་དམ་པ་དཀོན་མཆོག་གསུམ༔ གྲུབ་ཐོབ་གཅོད་བརྒྱུད་བླ་མ་ཡི་དམ་ལྷ༔ མ་ཅིག་ཡུམ་ཆེན་མཁའ་འགྲོའི་བདེན་པའི་མཐུས༔ སྟོང་གསུམ་ཁམས་ཀྱི་ཀླུ་གཉན་ས་བདག་དང༔ ཆར་ལ་དབང་བའི་སྣང་སྲིད་ལྷ་འདྲེ་ཀུན༔ གནས་འདིར་ཁུག་ལ་བདག་གི་དབང་དུ་སྡུད༔ ཆར་ལ་བར་ཆད་བྱེད་པའི་དམ་སྲི་དང༔ རླུང་དང་རླུང་བདག་ཡུལ་ལྷ་འདྲེ་ངན་རྣམས༔ རང་འོག་ལྕགས་ཁང་སྒོ་མེད་ནང་དུ་ཁུག༔ མི་ལྤགས་གཡང་གཞིས་བཀབ་ཅིང་སྦྲུལ་གྱིས་བཅིང༔ མ་ཅིག་ཁྲོས་མ་མཁའ་འགྲོའི་ཚོགས་ཀྱིས་ནོན༔ ཕཊཿ ཕཊཿ ཕཊཿ རྐང་དུང་དྲག་འབུད་ལན་གསུམ་བྱས་པས་ཆར་འབོད་བྱའོ༔ རང་ཉིད་རྡོ་རྗེ་ཕག་མོ་མེ་འབར་བ༔ ནམ་མཁར་གཟིགས་ནས་ཕུ་བཏབ་སྤྲིན་རྙིང་གཏོར༔ སྟོང་གསུམ་འཇིག་རྟེན་ལྕགས་བསྲེག་བྱེ་ཚན་གླིང༔ ཕཊ་སྒྲ་མང་བསྒྲགས་ས་གཞི་ཐམས་ཅད་གས༔ དེ་རྣམས་ཤུལ་དུ་རྒྱ་མཚོ་སྔོ་མེར་བ༔ རླུང་ཆར་སྤྲིན་དང་བཅས་པ་མཁའ་ལ་འཕྱུར༔ དེ་ནས་ཀླུ་དང་འབྲུག་སོགས་མང་པོ་ཡིས༔ ཆུ་ཡི་རྐྱལ་པ་སྟོང་ཕྲག་དུ་མ་ཐོགས༔ ནམ་མཁའི་ཁམས་ནས་ཆར་ཆེན་འབེབས་པར་དམིགས༔ ཕཊཿཞེས་དམིགས་པ་ཡང་ཡང་བསྐྱར༔ དཀར་གསུམ་ཀླུ་སྨན་ཆུ་མིག་གི༔ ནང་ངམ་མཚོ་ཡི་དཀྱིལ་དུ་སྦ༔ སྔགས་འདི་བརྒྱ་སྟོང་ཁྲི་སོགས་འདོན༔ ཨོཾ་བཛྲ་བཻ་རོ་ཙ་ན་ཡེ་ཧ་རི་ནི་ས་ཧཱུྃ་ཧཱུྃ་ཕཊ༔ ནཱ་ག་ཀ་ལ་ཧཱུྃ༔ ནཱ་ག་ལི་ལེ་ནཱ་ག་ར་ཛ༔ བྷ་རི་ཤ་ཡཱ༔ བྷ་རི་ཤ་ཡ་སྭཱ་ཧཱ༔ སླར་ཡང་རང་ཉིད་ཁྲོས་མ་ནག་མོའི་སྤྲུལ་པས་ཀླུ་རྣམས་ཆར་གྱི་ལས་ལ་བསྐུལ༔ འབྲུག་དང་གློག་འོད་འུར་སྒྲ་དང་བཅས་ཆར་ཆེན་འབེབས་པར་བསམ༔ སྔགས་འདི་ལོང་བའི་སྐབས་དང་བསྟུན༔ ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་ཧ་རི་ནི་ས་ཛྙཱ་ན་ཆར་ཕོབ་ཕོབ༔ ཧཱུྃ་ཧཱུྃ་ཧཱུྃ་བྷ་རི་ཤ་ཡ་ཕོབ་ཕོབ༔ དེ་ཡན་ཞི་འབབ་མ་ཅིག་ལུགས༔ རྗེས་སུ་ལུས་སྦྱིན་དགེ་བསྔོ་བྱ༔ མི་དམིགས་གཤིས་སུ་ཀློད་ལ་བཞག༔ ས་མ་ཡཱ༔ སློབ་བུ་ཀླུ་སྐྱབས་བཞེད་སྐོང་དུ༔ ས་ར་ཧི་ཏས་བསྒྱུར་དགེའོ༔