ལུས་སྦྱིན་བསྡུས་པ།
དེ་ནས་གཟུང་འཛིན་སྣང་ཆ་ཡི༔ འཁྲུལ་རྟོག་དབྱིངས་སུ་གཅོད་པ་དང༔ རང་ལུས་ཚོགས་སུ་བསྒྱུར་ནས་ཀྱང༔ རྒྱལ་བ་མཆོད་དང་འགྲོ་སྒྲིབ་སྦྱངས༔ ཚེ་སྔོན་ལན་ཆགས་སྦྱོང་བའི་ཐབས༔ ཚོགས་བསགས་ཡང་སྙིང་འདི་ལ་བརྩོན༔ ཕཊཿ བག་མེད་ལེ་ལོས་གཡེང་བ་ལྷ་བུའི་བདུད༔ སྒྱུ་ལུས་གཅེས་པར་འཛིན་པ་ཕུང་པོའི་བདུད༔ རེ་དོགས་མཚན་མར་སྣང་བ་དགའ་བྲོད་བདུད༔ རྟག་འཛིན་ཐོག་བབས་འབྱུང་བ་འཆི་བདག་བདུད༔ མ་དག་འཁྲུལ་རྟོག་སྒྱུ་མ་ཕྱིར་ཤར་བ༔ གང་ཤར་རོ་སྙོམ་ངང་དུ་དབང་བསྡུས་ནས༔ རྟོག་མེད་ཡེ་གདེང་ཆེན་པོར་ཟིལ་གྱིས་གནོན༔ ཏིང་འཛིན་དམིགས་པའི་གཟེར་ལྡན་པས༔ གང་ཤར་གཅིག་ཆོད་སྟེང་དུ་བསྐྱལ༔ ཕཊཿ ཨོཾ་ཨཱཿཧཱུྃ་བརྗོད་རང་ལུས་ཆེ་བརྗིད་ཚོ༔ སྙིང་གར་དྭངས་མའི་རིག་པ་ཧཱུྃ་མཐིང་ཀ༔ ཕཊཿཅེས་བརྗོད་པས་དབུ་མའི་ལམ་ནས་བརྒྱུད༔ མཁའ་དབྱིངས་དབྱེར་མེད་གྱུར་ཏེ་དེའི་ངང་ལས༔ སྐད་ཅིག་དྲན་རྫོགས་ཁྲོས་མའི་སྐུར་གྱུར་ཏེ༔ གྲི་གུག་གདངས་བས་བེམ་པོའི་ཐོད་པ་བྲེག༔ སྟོང་གསུམ་ཁྱབ་པའི་མི་མགོའི་སྒྱེད་པུའི་ཁར༔ བྷནྡྷ་དམར་གྱིས་བསྐྱིལ་ཏེ་བདུད་རྩིར་བསྒྱུར༔ ཧ་ཧོ་ཧྲཱིཿཡིས་སྤེལ་ཏེ་འཛད་མེད་གྱུར༔ དེ་ལྟར་བསམ་བཞིན་བཟླས་པར་བྱ༔ ཨོཾ་ཨཱཿཧཱུྃ་ཧ་ཧོ་ཧྲཱིཿ དེ་ནས་མཆོད་སྦྱིན་མགྲོན་བཀུགས་ནས༔ ཟག་མེད་བདུད་རྩིའི་མཆོད་སྦྱིན་གཏོང༔ ཕཊཿ མཆོད་ཡུལ་རྒྱལ་བ་རྒྱ་མཚོའི་ལྷ་ཚོགས་གཤེགས༔ རང་ལུས་ཟག་མེད་བདུད་རྩིའི་མཆོད་པ་འདི༔ འབུལ་ལོ་བཞེས་ནས་ཚོགས་གཉིས་རབ་རྫོགས་ནས༔ སྐུ་བཞིའི་གོ་འཕང་མྱུར་དུ་ཐོབ་པར་ཤོག༔ ཕཊཿ སྦྱིན་ཡུལ་འགྲོ་དྲུག་བགེགས་རིགས་འབྱུང་པོ་འདུས༔ ཕུང་པོ་ཟག་མེད་བདུད་རྩིའི་རྒྱ་མཚོ་འདི༔ སྦྱིན་པ་བཏང་ངོ་རང་རང་ཅི་དགར་སྤྱོད༔ རྣམ་མཁྱེན་རྫོགས་པའི་བྱང་ཆུབ་ཐོབ་པར་ཤོག༔ དེ་ནས་གཅོད་བྱ་གཅོད་བྱེད་ཀུན༔ གཉིས་མེད་གཅིག་ཏུ་སྡུད་པ་ནི༔ ཕཊཿ རང་རིག་གདོད་ནས་ཆོས་སྐུའི་རོལ་པ་ལས༔ སྨྲ་བསམ་བརྗོད་བྲལ་སྒྱུ་མའི་དེ་བཞིན་ཉིད༔ གཅོད་བྱ་འཁྲུལ་རྟོག་གཅོད་བྱེད་རིག་གྲོལ་ཏེ༔ གཉིས་མེད་ཐིག་ལེ་ཆེན་པོའི་ཀློང་དུ་ཨ༔ ཞེས་པའི་དོན་ལ་མཉམ་བཞག་ཅིང༔ མི་བསམ་མི་བསྒོམ་ཡེང་མེད་དུ༔ བཅོས་བསླད་མེད་པར་ལྷོད་ལ་བཞག༔ ཚོགས་གཉིས་བསགས་ཐབས་གྲངས་མང་ཡང༔ འདི་ལས་ཕན་ཡོན་ཟབ་པ་མེད༔ བསོད་ནམས་ཚོགས་ཆེན་རྫོགས་པ་དང༔ བདག་འཛིན་རྣམ་རྟོག་སེམས་ཀྱི་བདུད༔ གང་ཤར་དབྱིངས་སུ་གཅོད་པ་ནི༔ དཔེར་ན་མེ་ཏོག་ཆུ་བཞིན་འཇོམས༔ རིག་པའི་ཡེ་ཤེས་མངོན་དུ་འགྱུར༔ ས་མ་ཡཱ༔