རྒྱུ་ལུས་མཆོད་སྦྱིན་ཚོགས་གཉིས་གཏེར་བུམ་རྒྱ་སྤྲུལ་གསུང་།
༄༅། སྒྱུ་ལུས་མཆོད་སྦྱིན་ཚོགས་གཉིས་གཏེར་བུམ་བཞུགས༔ ཕཊཿ ཚེ་འདིར་བདེ་དང་གྲགས་ལ་རེ་བ་དང༔ སྡུག་བསྔལ་ན་ཚ་གཏམ་ངན་བྱུང་དོགས་སྡུག༔ དེ་ཀུན་འཁོར་བའི་བདག་འཛིན་འདྲེ་བོ་ཆེ༔ རོ་སྙོམ་སྟོང་པའི་དབྱིངས་སུ་དབང་བསྡུས་ནས༔ རང་བྱུང་བདེ་ཆེན་ཀློང་དུ་ཟིལ་གྱིས་གནོན༔ ཕཊཿ མདུན་མཁར་སྐྱབས་ཀུན་བདག་ཉིད་བླ་མ་དང༔ མ་ཅིག་ལབ་སྒྲོན་དབྱེར་མེད་རྣམ་པར་བཞུགས༔ སྐྱབས་གནས་མཆོག་གསུམ་རྩ་གསུམ་རྒྱ་མཚོའི་ཚོགས༔ སྤྲིན་ཕུང་འཐིབ་བཞིན་བཞུགས་པར་གསལ་བ་ལ༔ བདག་གཞན་བྱང་ཆུབ་བར་དུ་སྐྱབས་སུ་མཆི༔ ཕཊཿ འགྲོ་ཀུན་འཁོར་བའི་སྡུག་བསྔལ་ལས་བསྒྲལ་ནས༔ ཡང་དག་རྫོགས་པའི་བྱང་ཆུབ་འཐོབ་བྱའི་ཕྱིར༔ ཚོགས་གཉིས་ཟུང་འཇུག་མཆོད་སྦྱིན་ཉམས་བླངས་ནས༔ རྣམ་རྟོག་ཐོག་བརྫིས་འཁོར་འདས་མཉམ་ཉིད་ངང༔ ལྟ་སྤྱོད་མ་ནོར་ཆོས་སྤྱོད་རྒྱུན་ཁྱེར་བྱ༔ ཕཊཿ བདག་གི་རྐང་མཐིལ་གཉིས་སུ་ཕ་མ་ལས༔ ཐོབ་པའི་ཐིག་ལེ་དཀར་དམར་གསང་བར་འདྲེས༔ ཕཊཿཅེས་ལྟེ་བ་སྙིང་མགྲིན་སྤྱི་བོ་ནས༔ ཚངས་བུག་མཁའ་ལ་ཐོན་ཏེ་དབྱིངས་རིག་བསྲེས༔ སྟོང་ཆེན་ནམ་མཁའ་བརྡལ་བའི་ངང་དུ་བཞག༔ ཕཊཿ སླར་ཡང་དབྱིངས་ལས་རིག་པ་རྣལ་འབྱོར་མ༔ གྲི་གུག་ཐོད་འཛིན་གཟུགས་ཕུང་ས་ལ་འགྱེལ༔ ཆེ་ཚོ་སྣུམ་ལྡན་དེ་ཡི་ཐོད་པ་བྲེག༔ སྟོང་ཁམས་ཁྱབ་པའི་ནང་དུ་རང་ལུས་བཞག༔ ཨོཾ་ཨཱཿཧཱུྃ་གིས་སྦྱང་སྤེལ་བདུད་རྩིར་བསྒྱུར༔ ཨོཾ་ཨཱཿཧཱུྃ༔ གྲངས་མང་མཐར་ནི་མགྲོན་བཞི་དམིགས་པར་བསྔོ༔ ཕཊཿ དཀོན་མཆོག་སྲིད་ཞི་མགོན་པོ་ཡོན་ཏན་མགྲོན༔ མཆོད་སྦྱིན་མགྲོན་བཞི་འདིར་གཤེགས་མཆོད་སྦྱིན་བཞེས༔ བདག་གཞན་ལས་ངན་སྡིག་སྒྲིབ་ལན་ཆགས་བྱང༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཕཊཿ བདག་ལུས་ཀུན་ཏུ་བཟང་པོའི་མཆོད་པའི་སྤྲིན༔ མེ་ཏོག་སྤོས་མེ་དྲི་ཆབ་ཞལ་ཟས་སྒྲ༔ རྒྱལ་སྲིད་བདུན་དང་བཀྲ་ཤིས་རྫས་རྟགས་སོགས༔ དཀོན་མཆོག་སྲིད་ཞུའི་མགྲོན་ལ་མཆོད་པ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ ཕཊཿ བདག་ལུས་སྐྱེད་ཚལ་ཟས་གོས་ན་བའི་སྨན༔ དཀོར་ནོར་རྟ་གླང་འདོད་འཇོའི་བ་ལ་སོགས༔ གང་འདོད་ལོངས་སྤྱོད་ནམ་མཁའ་མཛོད་ལྟར་དམིགས༔ མགོན་པོ་ཡོན་ཏན་མགྲོན་རིགས་རྣམས་ལ་བསྔོ༔ བཞེས་ནས་མཐུན་རྐྱེན་སྒྲུབ་ལ་འགལ་རྐྱེན་སོལ༔ བདག་ལུས་ཟག་མེད་ཆོས་སྒྲས་ཁམས་གསུམ་གང༔ རིགས་དྲུག་འགྲོ་བའི་སེམས་ཅན་ཀུན་གྱིས་ཐོས༔ ངན་སོང་གསུམ་གྱི་ཚ་གྲང་བཀྲེས་སྐོམ་དང༔ བཀོལ་སྤྱོད་ལ་སོགས་སྡུག་བསྔལ་མ་ལུས་ཞི༔ ཀུན་ཀྱང་རྣམ་མཁྱེན་ཡེ་ཤེས་མྱུར་ཐོབ་ཤོག༔ ཕཊཿ བདག་ལུས་ཤ་ཁྲག་རུས་གསུམ་ས་གཞི་ཁྱབ༔ ཕོ་གདོན་རྒྱལ་པོ་མོ་གདོན་བསེན་མོ་དང༔ ཀླུ་གདོན་ས་བདག་བགེགས་རིགས་ཚོགས་ལ་བསྔོ༔ ཀུན་ཀྱང་དགྱེས་བཞེས་བུ་ལོན་ལན་ཆགས་སྦྱངས༔ ངན་སོང་འཁོར་བའི་སྐྱེ་སྒོ་ཆོད་པར་ཤོག༔ རྗེས་ལ་དགེ་རྩ་བྱང་ཆུབ་ཆེན་པོ་རུ༔ བསྔོ་བའི་ཚིག་ནི་གཞན་ཕན་བློ་དང་བཅས༔ ཕཊཿ སྐྱབས་ཡུལ་ཐམས་ཅད་འོད་ཀྱི་ཕུང་པོ་རུ༔ གྱུར་ནས་བླ་མ་ལ་ཐིམ་སྤྲོས་བྲལ་ངང༔ སླར་ཡང་བླ་མ་འོད་ཞུ་རང་ལ་ཐིམ༔ གཉིས་འཛིན་བྲལ་བའི་སྐྱེ་མེད་ཡུམ་ཆེན་ཀློང༔ ཕཊཿ དེ་ལྟར་སྒྱུ་ལུས་ཆོས་དང་ཟང་ཟིང་གི༔ མཆོད་སྦྱིན་འཁོར་གསུམ་ཡོངས་དག་རྒྱས་བཏབ་ནས༔ སྲིད་ཞི་མཉམ་ཉིད་ཀ་དག་གཉུག་མའི་ཀློང༔ ལྷུན་གྲུབ་གཞོན་ནུ་བུམ་སྐུའི་བཀྲ་ཤིས་ཤོག༔ བསོད་ནམས་འདི་ཡིས་སོགས༔ ཞེས་པའང་རྒྱ་སྤྲུལ་བླུན་རྒན་ཟོག་པོས་བླ་མའི་བཀའ་བཞིན་ཐོལ་བྱུང་དུ་སྨྲས་པའོ༔