གཏོར་ཟོར་རེག་པ་ཚར་གཅོད་སྤུ་གྲིའི་འཁོར་ལོ།
ཡང་གསང་ཌཱཀྐིའི་ཐུགས་ཐིག་ཆ་ལག་ཏུ༔ གཏོར་ཟོར་རེག་པ་ཚར་གཅོད་སྤུ་གྲིའི་འཁོར་ལོ་བཞུགས༔ ཕཊཿ ཕཊཿ ཕཊཿ དུར་ཁྲོད་གསང་ཆེན་རོལ་པའི་དབུས་ཕྱོགས་ནས༔ རྒྱལ་ཀུན་སྐུ་ཡི་ངོ་བོ་ཁྲོས་མ་ནག༔ ཆོས་དབྱིངས་ཡེ་ཤེས་བརྟུལ་ཞུགས་ཤིགས་སེ་ཤིག༔ ཕྱག་ན་དམར་ཆེན་གཏོར་ཟོར་ཤ་ར་ར༔ ཐུན་རྫས་དྲག་པོ་སྣ་ཚོགས་ཐོ་རོ་རོ༔ མི་ལྤགས་ཁྲག་འཛག་གཡང་གཞི་ལྷབས་སེ་ལྷབ༔ མི་རྐང་གླིང་བུའི་ངར་སྐད་ལྷངས་སེ་ལྷང༔ གཏི་མུག་ཤི་འདྲེ་འདི་དང་ད་ཕྲོལ་ཅིག༔ ནད་ཡམས་གཅོང་སྲི་འདི་དང་ད་ཕྲོལ་ཅིག༔ མི་ནད་ཕྱུགས་ནད་འདི་དང་ད་ཕྲོལ་ཅིག༔ རྐྱེན་ངན་བར་ཆད་འདི་དང་ད་ཕྲོལ་ཅིག༔ བདག་འཛིན་ཤི་འདྲེའི་མགོ་ལ་ད་རྒྱོབ་ཅིག༔ རྣལ་འབྱོར་བཅོལ་བའི་ཕྲིན་ལས་གྲུབ་པར་མཛོད༔ ཕཊཿ ཕཊཿ ཕཊཿ དུར་ཁྲོད་གསང་ཆེན་རོལ་པའི་ཤར་ངོས་སུ༔ རྒྱལ་ཀུན་ཐུགས་ཀྱི་ངོ་བོ་ཁྲོས་མ་ནག༔ མེ་ལོང་ཡེ་ཤེས་བརྟུལ་ཞུགས་ཤིགས་སེ་ཤིག༔ ཕྱག་ན་དམར་ཆེན་གཏོར་ཟོར་ཤ་ར་ར༔ ཐུན་རྫས་དྲག་པོ་སྣ་ཚོགས་ཐོ་རོ་རོ༔ མི་ལྤགས་ཁྲག་འཛག་གཡང་གཞི་ལྷབས་སེ་ལྷབ༔ མི་རྐང་གླིང་བུའི་ངར་སྐད་ལྷངས་སེ་ལྷང༔ ཞེ་སྡང་རྒྱལ་པོ་འདི་དང་ད་ཕྲོལ་ཅིག༔ ནད་ཡམས་གཅོང་སྲི་འདི་དང་ད་ཕྲོལ་ཅིག༔ མི་ནད་ཕྱུགས་ནད་འདི་དང་ད་ཕྲོལ་ཅིག༔ རྐྱེན་ངན་བར་ཆད་འདི་དང་ད་ཕྲོལ་ཅིག༔ བདག་འཛིན་རྒྱལ་པོའི་མགོ་ལ་ད་རྒྱོབ་ཅིག༔ རྣལ་འབྱོར་བཅོལ་བའི་ཕྲིན་ལས་གྲུབ་པར་མཛོད༔ ཕཊཿ ཕཊཿ ཕཊཿ དུར་ཁྲོད་གསང་ཆེན་རོལ་པའི་ལྷོ་ངོས་སུ༔ རྒྱལ་ཀུན་རཏྣའི་ངོ་བོ་ཁྲོས་མ་ནག༔ མཉམ་ཉིད་ཡེ་ཤེས་བརྟུལ་ཞུགས་ཤིགས་སེ་ཤིག༔ ཕྱག་ན་དམར་ཆེན་གཏོར་ཟོར་ཤ་ར་ར༔ ཐུན་རྫས་དྲག་པོ་སྣ་ཚོགས་ཐོ་རོ་རོ༔ མི་ལྤགས་ཁྲག་འཛག་གཡང་གཞི་ལྷབས་སེ་ལྷབ༔ མི་རྐང་གླིང་བུའི་ངར་སྐད་ལྷངས་སེ་ལྷང༔ ང་རྒྱལ་གཤིན་རྗེ་འདི་དང་ད་ཕྲོལ་ཅིག༔ ནད་ཡམས་གཅོང་སྲི་འདི་དང་ད་ཕྲོལ་ཅིག༔ མི་ནད་ཕྱུགས་ནད་འདི་དང་ད་ཕྲོལ་ཅིག༔ རྐྱེན་ངན་བར་ཆད་འདི་དང་ད་ཕྲོལ་ཅིག༔ བདག་འཛིན་གཤིན་རྗེའི་མགོ་ལ་ད་རྒྱོབ་ཅིག༔ རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད༔ ཕཊཿ ཕཊཿ ཕཊཿ དུར་ཁྲོད་གསང་ཆེན་རོལ་པའི་ནུབ་ངོས་སུ༔ རྒྱལ་ཀུན་གསུང་གི་ངོ་བོ་ཁྲོས་མ་ནག༔ སོར་རྟོག་ཡེ་ཤེས་བརྟུལ་ཞུགས་ཤིགས་སེ་ཤིག༔ ཕྱག་ན་དམར་ཆེན་གཏོར་ཟོར་ཤ་ར་ར༔ ཐུན་རྫས་དྲག་པོ་སྣ་ཚོགས་ཐོ་རོ་རོ༔ མི་ལྤགས་ཁྲག་འཛག་གཡང་གཞི་ལྷབས་སེ་ལྷབ༔ མི་རྐང་གླིང་བུའི་ངར་སྐད་ལྷངས་སེ་ལྷང༔ འདོད་ཆགས་སྲིན་མོ་འདི་དང་ད་ཕྲོལ་ཅིག༔ ནད་ཡམས་གཅོང་སྲི་འདི་དང་ད་ཕྲོལ་ཅིག༔ མི་ནད་ཕྱུགས་ནད་འདི་དང་ད་ཕྲོལ་ཅིག༔ རྐྱེན་ངན་བར་ཆད་འདི་དང་ད་ཕྲོལ་ཅིག༔ བདག་འཛིན་འདྲེ་མོའི་མགོ་ལ་ད་རྒྱོབ་ཅིག༔ རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད༔ ཕཊཿ ཕཊཿ ཕཊཿ དུར་ཁྲོད་གསང་ཆེན་རོལ་པའི་བྱང་ངོས་སུ༔ རྒྱལ་ཀུན་ཕྲིན་ལས་ངོ་བོ་ཁྲོས་མ་ནག༔ བྱ་གྲུབ་ཡེ་ཤེས་བརྟུལ་ཞུགས་ཤིགས་སེ་ཤིག༔ ཕྱག་ན་དམར་ཆེན་གཏོར་ཟོར་ཤ་ར་ར༔ ཐུན་རྫས་དྲག་པོ་སྣ་ཚོགས་ཐོ་རོ་རོ༔ མི་ལྤགས་ཁྲག་འཛག་གཡང་གཞི་ལྷབས་སེ་ལྷབ༔ མི་རྐང་གླིང་བུའི་ངར་སྐད་ལྷངས་སེ་ལྷང་༔ ཕྲག་དོག་དམ་སྲི་འདི་དང་ད་ཕྲོལ་ཅིག༔ ནད་ཡམས་གཅོང་སྲི་འདི་དང་ད་ཕྲོལ་ཅིག༔ མི་ནད་ཕྱུགས་ནད་འདི་དང་ད་ཕྲོལ་ཅིག༔ རྐྱེན་ངན་བར་ཆད་འདི་དང་ད་ཕྲོལ་ཅིག༔ བདག་འཛིན་དམ་སྲིའི་མགོ་ལ་ད་རྒྱོབ་ཅིག༔ རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད༔ ཕཊཿ ཕཊཿ ཕཊཿ ཅེས་གཏོར་ཟོར་མི་མངོན་དབྱིངས་སུ་བསྐྱལ༔ སྟོང་ཉིད་སྙིང་རྗེ་ཐུན་གཅིག་བསྒོམ༔ དེ་ནས་ལྟ་བའི་ངང་ནས་བྲོ་རྒྱས་གདབ༔ རས་མིང་བདག་ལ་མཁོ་བའི་ཕྱིར་དུ་བྲིས༔ གཟུང་འཛིན་མ་ལུས་དབྱིངས་སུ་གྲོལ་བར་ཤོག༔ ཤུ་བྷཾ༔