ཕུང་པོའི་མཆོད་སྦྱིན་ཚོགས་གཉིས་རྒྱ་མཚོ།

ཡང་གསང་མཁའ་འགྲོའི་ཐུགས་ཐིག་ལས༔ ཕུང་པོའི་མཆོད་སྦྱིན་ཚོགས་གཉིས་རྒྱ་མཚོ་བཞུགས༔ སྤྲོ་བྱ་སྤྲོས་མེད་རིག་རྩལ་ངང༔ དང་པོ་དབང་སྡུད་ཟིལ་གནོན་ནི༔ ཕཊཿ བག་མེད་ལེ་ལོས་གཡེང་བ་ལྷའི་བུའི་བདུད༔ སྒྱུ་ལུས་གཅེས་པར་འཛིན་པ་ཕུང་པོའི་བདུད༔ རེ་དོགས་མཚན་མར་སྣང་བ་དགའ་བྲོད་བདུད༔ རྟག་འཛིན་ཐོག་བབས་བྱུང་བ་འཆི་བདག་བདུད༔ མ་དག་འཁྲུལ་རྟོག་སྒྱུ་མ་ཕྱིར་ཤར་བ༔ གང་ཤར་རོ་སྙོམ་ངང་དུ་དབང་བསྡུས་ནས༔ རྟོག་མེད་ཡེ་གདེང་ཆེན་པོས་ཟིལ་གྱིས་གནོན༔ ཕཊཿ ཕཊཿ ཕཊཿ ཕཊཿ རང་བྱུང་རང་ཤར་བླ་མ་ལ༔ རང་ངོ་ཤེས་པས་སྐྱབས་སུ་མཆི༔ འགྲོ་ཀུན་ཡུམ་ཆེན་སར་འགོད་ཕྱིར༔ སྦྱིན་པའི་ཕར་ཕྱིན་ཡང་དག་སྤྱོད༔ ཕཊཿ བདག་མེད་ཤེས་རབ་རྣལ་འབྱོར་མ༔ བདག་རྟོག་བསྒྲལ་བའི་ཕུང་པོ་དེ༔ སྣང་སྲིད་ཁེབ་པའི་ཞིང་ལྤགས་སྟེང༔ ཤ་ཁྲག་རུས་པ་ཞག་རྐང་ཚིལ༔ དམར་ཆར་བཤམས་ནས་འབྲུ་གསུམ་གྱིས༔ བཅུད་ལྡན་རྣམ་རོལ་རོ་བརྒྱའི་ཟས༔ ཟག་མེད་བདུད་རྩིའི་ངོ་བོར་བསྒྱུར༔ ཨོཾ་ཨཱཿཧཱུྃ༔ ལན་གསུམ༔ ཕཊཿ མཆོད་ཡུལ་རྩ་གསུམ་རྒྱལ་སྲས་བཅས༔ མཁའ་དབྱིངས་ཁྱབ་པར་བཞུགས་དམིགས་ལ༔ ཕུན་ཚོགས་བདུད་རྩིའི་མཆོད་པ་འབུལ༔ ཚོགས་རྫོགས་སྒྲིབ་གཉིས་དྲི་མ་དག༔ ཡུམ་ཆེན་ཆོས་སྐུའི་རྒྱལ་སྲིད་ལ༔ ཚེ་འདིར་གཏན་སྲིད་ཟིན་པར་རློབས༔ ཕཊཿ ཕཊཿ ཕཊཿ སྦྱིན་ཡུལ་རིགས་དྲུག་སྙིང་རྗེའི་མགྲོན༔ གསེར་འཛིན་དགའ་མའི་ཁྱོན་འགེང་ལ༔ འདོད་རྒུའི་རྣམ་འཕྲུལ་སྒྱུ་མའི་ལུས༔ ལྟོས་མེད་ཅི་དགར་ལོངས་སུ་སྤྱོད༔ བུ་ལོན་འཁོར་ཞིང་ལན་ཆགས་བྱང༔ ཤ་འཁོན་སྒྲིབ་པ་དག་པར་ཤོག༔ ཁྱེད་ཅག་བདེ་ལྡན་སྡུག་བསྔལ་བྲལ༔ བདེ་དང་རྟག་ཏུ་མི་འབྲལ་ཞིང༔ འཁོར་འདས་དག་མཉམ་ཆེན་པོར་གྱུར༔ ཕཊཿ ཕཊཿ ཕཊཿ བདག་ལུས་ཟག་བཅས་ཕུང་པོ་འདི༔ སྟོང་གསུམ་གང་བའི་ཤ་ཁྲག་རུས༔ གདུག་སེམས་གོམས་པའི་མི་མིན་བགེགས༔ འབྱུང་པོའི་ཚོགས་ལ་ཚིམ་པར་བསྔོ༔ གནོད་སེམས་གདུག་པ་དང་བྲལ་ནས༔ གཞན་ཕན་ལྷག་བསམ་བྱུང་ནས་ནི༔ བླ་མེད་བྱང་ཆུབ་ཐོབ་པར་སྨོན༔ དེ་རིང་སེམས་ནི་ཡོངས་བསྐྱེད་མཐུས༔ མཐའ་ཡས་འགྲོ་བ་སྒྲོལ་བར་ཤོག༔ ཕཊཿ ཕཊཿ ཕཊཿ ལྷག་མ་མྱོང་གྲོལ་བདུད་རྩི་ཡིས༔ འོན་ལོང་ལྐུགས་པ་ཞ་བོ་དང༔ ཁས་ཞན་དབང་ཆུང་ཐམས་ཅད་མཆོད༔ སྡུག་བསྔལ་རྒྱུ་འབྲས་དང་བྲལ་ནས༔ བདེ་ཆེན་དག་པའི་ཀློང་དུ་འཕོས༔ སྐད་ཅིག་རྫོགས་སངས་རྒྱས་གྱུར་ཅིག༔ ཕཊཿ ཕཊཿ ཕཊཿ དགེ་སྡིག་འཛིན་པའི་རྟོག་ཚོགས་རང་རྩལ་ལས༔ རེ་དོགས་གཉིས་ཀྱི་ཡུལ་ལས་ཡེ་ནས་འདས༔ སྟོང་དང་རྟེན་འབྱུང་བསླུ་མེད་རྣམ་དཀར་དགེ༔ སྒྱུ་མ་ལྟ་བུའི་འགྲོ་བ་ཡོངས་ལ་བསྔོ༔ ཀུན་ཀྱང་ཀུན་ནས་ཀུན་བཟང་ཉིད་ཐོབ་ཤོག༔ ཕཊཿ དེ་ནས་བདེ་སྡུག་གཏོང་ལེན་དང༔ ཆོས་དང་མི་འཇིགས་བྱམས་སྦྱིན་བྱ༔ ན་མོ་ཕན་བདེ་མ་ལུས་གཞན་ལ་འབུལ༔ ཕན་བདེས་ནམ་མཁའ་གང་བར་ཤོག༔ སྡུག་བསྔལ་མ་ལུས་བདག་ལ་འདུས༔ སྡུག་བསྔལ་གྱི་རྒྱ་མཚོ་སྐེམ་པར་ཤོག༔ ཕཊཿ ཕཊཿ རང་ཉིད་བསྟན་པའི་མངའ་བདག་པོ༔ ཐུབ་པའི་དབང་པོའི་སྐུར་གསལ་བའི༔ མདུན་དུ་ལྷ་འདྲེ་གནོད་བྱེད་ཚོགས༔ ཉི་ཟེར་རྡུལ་འཁྲིགས་ལྟ་བུར་བསམ༔ ཀུན་གྱིས་དད་གུས་དུང་ངེ་ཉན༔ ཕཊཿ ན་མོ་ཆོས་རྣམས་ཐམས་ཅད་རྒྱུ་ལས་བྱུང༔ དེ་རྒྱུ་སོགས་ལ་སོགས༔ མཐར་ནི་ཡུལ་དང་ཡུལ་ཅན་ཀུན༔ མི་དམིགས་དོན་གྱི་གཤིས་ལ་ཀློད༔ ཨ་ཨཱཿ ཕཊཿ གཅོད་བྱ་འཁྲུལ་རྟོག་གཅོད་བྱེད་རིག་གྲོལ་ཏེ༔ གཉིས་མེད་དག་ཆེན་དབྱིངས་ཡུམ་ཕ་རོལ་ཕྱིན༔ མི་ཤིགས་དྭངས་མ་ཐིག་ལེའི་འོད་ཀློང་དུ༔ འཕོ་ཆེན་འཇའ་སྐུར་གཞིག་པའི་བཀྲ་ཤིས་ཤོག༔ ས་མ་ཡཱ༔ ཞེས་པའང་བླ་མ་ལ་སངས་རྒྱས་དངོས་སུ་མཐོང་བའི་མོས་གུས་ཅན༔ བཙུན་པ་ཨ་གཾ་བིདྱས་བསྐུལ་ངོར༔ དུས་བབས་ཀྱི་གཏེར་སྟོན་བསམ་གཏན་ཡེ་ཤེས་གླིང་པས་དབྱིངས་རིག་སྟོང་པའི་སྒྲོམ་ནས་ཐོགས་མེད་དུ་བྲིས་པས་འགྲོ་རྣམས་སྐུ་གསུམ་རང་གྲོལ་ཌཱཀྐིའི་དབང་ཐོབ་ཅིག༔ ཤུ་བྷཾ༔ ཨེ་མ་ཧོ༔ སྐུ་གསུམ་བདག་ཉིད་མཚོ་སྐྱེས་རྡོ་རྗེ་དང༔ གསང་ཡུམ་རིག་མ་མཚོ་རྒྱལ་ཟུང་གི་འཕྲུལ༔ རྒྱལ་བའི་གདུང་འཚོབ་བསམ་གཏན་གླིང་པ་ཡིས༔ འཛད་མེད་གཏེར་གྱི་སྒོ་ཡངས་འབྱེད་པའི་དུས༔ ཡང་གསང་མཁའ་འགྲོའི་ཐུགས་ཀྱི་ཆ་ལག་གི༔ ཕུང་པོའི་མཆོད་སྦྱིན་ཚོགས་གཉིས་རྒྱ་མཚོ་ལ༔ དུས་སྙིགས་ཟོག་པོ་འགྲོ་བའི་མགོ་བསྐོར་མཁན༔ རས་པའི་མིང་བཏགས་འཆོལ་སྤྱོད་གསལ་སྟོང་གིས༔ ཨོ་རྒྱན་ཡབ་ཡུམ་སྤྲུལ་པའི་ཟློས་གར་བ༔ གཏེར་ཆེན་ཟུང་བདུད་འཇོམས་རྡོ་རྗེ། གསང་སྔགས་གླིང་པ། མཆན།གི་གཏེར་ཆོས་ཁ་བསྐང་བས༔ ནོངས་པ་མཆིས་ན་ཌཱཀྐིའི་ཚོགས་ལ་བཤགས༔ ཅུང་ཟད་རྒྱས་སུ་བཀོད་པའི་རྣམ་དཀར་དགེ༔ བདག་གཞན་མཁའ་མཉམ་སེམས་ཅན་མ་ལུས་ཀུན༔ སྐུ་གསུམ་ཌཱཀྐིའི་ས་ཐོབ་དབུགས་དབྱུང་ཤོག༔ སརྦ་མངྒ་ལཾ༔