གཡང་གཞི་བརྡབ་ཆོག་ནད་གདོན་མཐར་བྱེད།
ཡོངས་རྫོགས་ཐུགས་ཀྱི་གཏེར་ཁའི་ཟུར་རྒྱན་ལས༔ གཡང་གཞི་བརྡབ་ཆོག་ནད་གདོན་མཐར་བྱེད་ཞེས་བྱ་བ་བཞུགས༔ མ་ཅིག་ཡུམ་ཆེན་ལྷ་ལ་ཕྱག་འཚལ་ལོ༔ གཅོད་བརྡུང་ནད་གདོན་གནས་སྤར་སྟོན༔ ཌཱ་དྲིལ་མི་རྐང་གཡང་གཞི་དང༔ བརྟུལ་ཞུགས་སྤྱོད་པ་ལམ་སློང་བྱ༔ སྣང་བ་ཐོག་བརྫིས་མི་བྱ་ཞིང༔ ཆོས་བརྒྱད་བསམ་པ་མ་ཡིན་པས༔ སྟོང་ཉིད་སྙིང་རྗེའི་ངང་ཉིད་ལས༔ རྡོ་རྗེ་ཕག་གདོང་ཁྲོས་མར་བསྐྱེད༔ ནད་པ་མདུན་དུ་བསྙལ་བྱས་ལ༔ ཕཊཿ ཕཊཿ ཕཊཿ སྐུ་གསུམ་དོན་མཚོན་ཕྱིར༔ མ་སྐུ་སྤྲུལ་བདེ་ཆེན་དཀར་མོ་ཡིས༔ ཕྱག་གཡས་པས་མི་ལྤགས་གཡང་གཞི་རྡེབ༔ ལུས་གདོན་རིག་པ་སྐུ་གསུམ་དབྱིངས་སུ་སྤར༔ ནད་ཀྱི་འདུ་བྱེད་བདག་མེད་ཟང་ཐལ་ཐོངས༔ ཧཱུྃ་ཧཱུྃ་ཧཱུྃ༔ དང་པོས་དབང་དུ་བསྡུས༔ གཉིས་པས་ཟིལ་གྱིས་མནན༔ གསུམ་པས་བཀའ་བསྒོ༔ ཕཊཿ ཕཊཿ ཕཊཿ དང་པོས་མཐའ་ལྕགས་རི་དང༔ གཉིས་པས་ཟངས་རི་དང༔ གསུམ་པས་རྒྱ་མཚོའི་མཐའ་འམ་མཐའ་གྲོལ་ཆེན་པོའི་ཀློང་དུ་སྤར་བར་བསམ༔ ཕཊཿ མ་ཐུགས་སྤྲུལ་རྡོ་རྗེ་མཁའ་འགྲོ་མས༔ ཕྱག་གཡས་པས་མི་ལྤགས་གཡང་གཞི་རྡེབ༔ གདོན་རྒྱལ་འགོང་ཆོས་ཀྱི་དབྱིངས་སུ་སྤོར༔ སེམས་སྨྱོ་འབོགས་ནད་རྣམས་ཟང་ཐལ་ཐོངས༔ ཧཱུྃ་ཧཱུྃ་ཧཱུྃ༔ ཕཊཿ ཕཊཿ ཕཊཿ མ་ཡོན་ཏན་རིན་ཆེན་མཁའ་འགྲོ་མས༔ ཕྱག་གཡས་པས་མི་ལྤགས་གཡང་གཞི་རྡེབ༔ གདོན་གཤིན་རྗེ་མཉམ་ཉིད་གཤིས་སུ་བསྟིམ༔ ནད་ལྡན་འདུས་གཟིར་བ་ཟང་ཐལ་ཐོངས༔ ཧཱུྃ་ཧཱུྃ་ཧཱུྃ༔ ཕཊཿ ཕཊཿ ཕཊཿ མ་གསུང་སྤྲུལ་པདྨ་མཁའ་འགྲོ་མས༔ ཕྱག་གཡས་པས་མི་ལྤགས་གཡང་གཞི་རྡེབ༔ གདོན་ཀླུ་གཉན་མོ་འདྲེ་རྟོག་མེད་བཞག༔ ནད་རླུང་མཁྲིས་བད་ཀན་ཟང་ཐལ་ཐོངས༔ ཧཱུྃ་ཧཱུྃ་ཧཱུྃ༔ ཕཊཿ ཕཊཿ ཕཊཿ མ་ལས་ཀྱི་སྤྲུལ་པའི་མཁའ་འགྲོ་མས༔ ཕྱག་གཡས་པས་མི་ལྤགས་གཡང་གཞི་རྡེབ༔ གདོན་དམ་སྲི་དྲི་བོ་དབྱིངས་ཀློང་ངོར༔ ནད་བཞི་བརྒྱ་རྩ་བཞི་ཟང་ཐལ་ཐོངས༔ ཧཱུྃ་ཧཱུྃ་ཧཱུྃ༔ ཕཊཿ ཕཊཿ ཕཊཿ མ་ཡེ་ཤེས་དབྱིངས་ལས་གར་བསྒྱུར་མ༔ གདོན་གནོད་བྱ་གནོད་བྱེད་མཐའ་ལས་གྲོལ༔ ནད་འདུ་བྱ་འདུ་བྱེད་སྒྲོག་མདུད་ཞིག༔ ང་ཁྱོད་དང་རེ་དོགས་དབྱིངས་སུ་དག༔ འཁོར་འདས་ཀྱི་དག་མཉམ་ཨ་ལ་ལ༔ འཁོར་གསུམ་གྱི་དམིགས་མཐའ་ཆོས་སྐུར་དག༔ ཕཊཿདང་པོས་གཅོད༔ ཕཊཿགཉིས་པས་གཤིས་ལ་བསྟིམ༔ ཕཊཿགསུམ་པས་རང་གཞིའི་ཞལ་མཐོང༔ དེ་ལ་གདོན་འབོད་སོགས་ཀྱི་ཁ་བསྐངས་ཏེ་གཅོད་གཞུང་གི་དམར་འགྱེད་ལ་འཇུག་པར་བྱ༔ འདི་ནི་རིགས་སྲས་གཅོད་པ་མགོན་གྱིས་བསྐུལ་ངོ་མི་ལྡོག་ཙམ་དུ་རྟེན་འབྲེལ་གྱི་ཆོས་སུ་རྣལ་འབྱོར་པ་ས་ར་ཧི་ཏས་སྤེལ་བ་དགེའོ༔