གཅོད་ཀྱི་གཤེད་འདུལ་གདུག་པ་དམ་འདོགས་ཟ་འདྲེ་ཁ་ཕྲོལ་རས་པ་གསལ་སྟོབས་ཀྱིས་བྲིས་པ།

ཡང་གསང་ཌཱཀྐིའི་ཐུགས་ཐིག་ལས༔ གཅོད་ཀྱི་གཤེད་འདུལ་གདུག་པ་དམ་འདོགས་ཟ་འདྲེ་ཁ་ཕྲོལ་བཞུགསཿ

བླ་མ་ཡི་དམ་མཁའ་འགྲོ་དང༔ ཆོས་སྐྱོང་དམ་ཅན་སྡེ་ཚོགས་ལ༔ བྱང་ཆུབ་བར་དུ་སྐྱབས་སུ་མཆི༔ ཡུམ་ཆེན་མཁའ་འགྲོས་རྗེས་སུ་ཟུངས༔ དེ་ལ་འདིར་གཅོད་ཀྱི་ཟ་འདྲེ་འདུལ་བའི་རིམ་པ་ནི༔ གཤེད་འདུལ་མཆོད་གཏོར་གཞུང་བཞིན་བཅའ༔ རང་གི་མདུན་དུ་ཧོམ་ཁུང་གཅིག་བཅའ་ལ༔ ཧོམ་ཁུང་འགོམ་མི་རུང༔ འགོམ་སྡུད་བྱས་ན་མི་རབས་རྩད་ནས་འཆད་གསུངས་སོ༔ མདུན་དུ་གཞི་མ་ནག་པོའི་སྟེང་དུ་རི་གསུམ་གྱི་རྡོ་སྒྱེད་པུའི་ཚུལ་དུ་བྱས་པའི་སྟེང་སླ་ང་བཙུགས༔ སླ་ངའི་ནང་དུ་ཁྲག་གིས་གྲུ་གསུམ་བྲིས༔ སླ་ངའི་ཁ་རུ་གྲི་གསུམ་གྲུ་གསུམ་གྲི་སོ་ནང་དུ་བཞག༔ གཤེད་འབྲེང༔ གཤེད་སྒྲོ༔ གཤེད་ཟོར༔ གཤེད་སྟྭ༔ གཤེད་ཤ་ལག་གཡས༔ གཤེད་རྡེའུ་དཀར་ནག་བདུན་རེའམ་གསུམ་རེ་གཅིག་རེ༔ ཕུར་པ་གཅིག༔ ཕུར་གདན་ནས་སྡེར་གང་ཅན༔ དེ་ནས་ལིངྒ་བྲི་བ་ནི༔ ནྲི་ཏྲི་ཛ་ཏྲི༔ ཆུང་སྲི་བྱི་ལའི་མགོ་ཅན་གྱི་ལྟོ་བར༔ ཛ་ལ་ཏྲི་ཛ་ནན་ཏྲི་དུ་སྤེལ་མར་ལྟོ་བར༔ རཀྴ་དུན་ནྲི་བྷྱོ་ཛ༔ ཕོ་སྲི་ཤ་བའི་མགོ་ཅན་གྱི་ལྟོ་བར་ཏྲི༔ མོ་སྲི་དྲེད་མོང་མགོ་ཅན་ལྟོ་བར་ནྲི༔ ཐམས་ཅད་ཀྱི་ས་བོན་མཐར་གནོད་བྱེད་ཟ་འདྲེ་ཤི་གཤེད་འདིར་ཁུག་ཅིག༔ ཅེས་བྲིས་པའི་ས་བོན་ཡིན་ནོ༔ དེ་རྒྱབ་མུ་ཁྱུད་ལ༔ ཨོཾ་ན་མོ་རཏྣ་ཙི་ཏྲ་ཙི་ཏྲ་དུན་དུ་རྦད་རྦད་ཛ་ཛ་དུར་སྲི་ཐུམ་ཐུམ་ཉོག་ཉོག་རྦད་ཆོད་ནན་ཟ་འདྲེ་ཤི་གཤེད་ཁུག་ཅེས་བྲི༔ དེ་རྒྱབ་མུ་ཁྱུད་ལ༔ གནོད་བྱེད་ཟ་འདྲེ་ཤི་གཤེད་གར་གནས་ཀྱང་འདིར་ཁུག་ཅིག༔ ཟུངས་ཤིག་ཆིངས་ཤིག་སྡོམས་ཤིག་ཅེས་བྲི༔ དེ་ནས་ལིངྒའི་ཕྱིའི་མུ་ཁྱུད་ལ༔ ཙིཏྟ་ར་ཙའི་སྲོག་ནན༔ ཏྲི་ཐུམ་མྱོག་རྦད་སོད་དུམ་བུ་དུམ་བུ་རྦད་སོད་སོད་ཛ་ཛ་ཏྲིག་ཁ་ཛ༔ ར་ཙ་རྦད་ནན་ནན༔ ཟ་འདྲེ་ཤི་གཤེད་ཁུག་ནན༔ ཅེས་བྲི༔ ལིངྒའི་སྙིང་གར་ནྲི་ཏྲི་ཛ་བྲིས༔ ལྟེ་བར་དུ་ཏྲི་ཛ༔ མིག་གཉིས་ལ་ཞར༔ རྣ་བ་གཉིས་ལ་འོན་འོན༔ ཡན་ལག་བཞི་ལ་ཛ་ཧཱུྃ་བཾ་ཧོ་དང་ཞ་བཞི༔ རྐང་ཞབས་གཉིས་སུ་ཡཾ་གཉིས༔ འདོམས་བར་དུ་རཾ༔ སྤྱི་བོར་ནན༔ གཟུགས་སྔོ་སྐྱ་ཡན་ལག་ཕྲ་བ༔ ཉམ་ཐག་པ་ཅན་ཞིག་བྲིས་ཏེ༔ དེ་ཡང་གཟའ་ཡིས་ཤི་ན་གཟའ་ཡི་གཟུགས༔ མིག་དུར་པུ་ཤུད་གཟུགས༔ རྨུག་དུར་བྲ་བ༔ རྦབ་སྲི་སྲེག་བྱ༔ རང་མལ་དུ་ཤི་བ་གཡག༔ མ་བུ་སྣྲེལ་གྲིར་ཤི་བ་རི་བོང༔ བང་གྲིར་ཤི་བ་ཤ་བ༔ ཤིང་གྲི་མཛོ་མོ༔ ཆུ་གྲིར་ཤི་བ་ཆུ་བྱ༔ རབ་ཆད་མཛོ་མོ༔ རྒན་སྲི་སྤྲེལ་རྣམས་ཀྱི་གཟུགས་སུ་བྲིས༔ སྔགས་མགོ་ནི་ཕོ་ལིང་ཕྲག་པ་གཡས་ནས་བྲིས༔ མོ་ལིང་ཕྲག་པ་གཡོན་ནས་བྲིས༔ ཆུང་ལིང་སྤྱི་བོ་ནས་བྲིས༔ དགྲ་ལིང་རྐང་མཐིལ་བསྐོར་ནས་བྲིས༔ ལིང་ག་མེ་ཁར་གཡུག༔ རླུང་ལ་ཕྱར་ནས༔ ཚོན་སྐུད་ཀྱིས་བཅིང་ལ་བཞག༔ ཕོ་ལ་ཕོ་ཤིང་ཤུག་པ༔ སྟག་པ༔ སྐྱེར་བ༔ མོ་ལ་མོ་ཤིང་གླང་མ༔ ལྕང་མ༔ སྤེན་མ༔ བྱིས་པ་ལོ་བདུན་ནས་ཉི་ཤུའི་བར་ལ་བུ་ཤིང་ཚལ་བུ་ལ་བྱང་བུ་དགུ་བྱས་ལ༔ ཁྲག་གིས་ཡི་གེ་བྲིས་ཏེ་གཅིག་ལ་ཟ་འདྲེ་ཁུག༔ གཅིག་ལ་སྲོག་གཅོད་ཁུག༔ གཅིག་ལ་དབུགས་ལེན་ཁུག༔ གཅིག་ལ་ཚེ་ལེན་ཁུག༔ གཅིག་ལ་མདངས་འཕྲོག་ཁུག༔ གཅིག་ལ་གསོན་བདུད་ཁུག༔ གཅིག་ལ་གཤིན་ལྕགས་ཁུག༔ གཅིག་ལ་ཤི་འདྲེ་ཁུག༔ གཅིག་ལ་གྲི་བོ་ཤི་སྲི་ཁུག་ཅེས་སོགས་བྲིས་ལ་བཞག༔ ཤོག་བུ་ལ་ཚེ་འདས་ཀྱི་མིང་བྱང་ནྲི་དང་བཅས་པ་བྲིས་ལ་བཤམས༔ དེ་ནི་བཅའ་ལུགས་རྒྱས་པ་ཡིན་ནོ༔ དེ་ཙམ་མི་ཐུབ་ན༔ ཐམས་ཅད་ལ་ཤི་གྲི་ཤ་བའི་མགོ་ཅན་གྱི་སྙིང་གར་ནྲི་ཏྲི་དང་ཡན་ལག་བཞི་ལ་ཛ་ཧཱུྃ་བཾ་ཧོ་དང་ཞ་བཞི༔ ལིངྒའི་མཐར་གནོད་བྱེད་དམ་སྲི་ཆུང་སྲི་ཐམས་ཅད་ཁུག་ཅིག་མཱ་ར་ཡ་ཛ་ཛ༔ ཞེས་བྲིས༔ ཤིང་བྱང་ལྔ་ཡིས་ཆོག༔ ཤིན་ཏུ་བསྡུས་ན་གཅིག་ལ་ནྲི་ཏྲི་ཛཿཞེས་བྲིས་པ་དང༔ ཟན་ལིང་ཙམ་ལ་བརྟེན་ཡང་རུང༔ དེ་ཅིའི་ཕྱིར་ན་གཅོད་ཀྱི་དམིགས་པ་གཙོ་ཆེ་བའོ༔ དེ་ནས་རྣལ་འབྱོར་བརྟུལ་ཞུགས་ཀྱི་སྤྱོད་པ་འཆང་བ་པོས་མཁའ་འགྲོ་ཁྲོས་པའི་དཔའ་ངར་གྱིས༔ ཕཊཿ རང་ཉིད་སྐད་ཅིག་གིས་ངོ་བོ་མ་ཅིག་ལ༔ རྣམ་པ་ཁྲོས་མ་ནག་མོ་སྐུ་མདོག་དམར་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ༔ སྤྱན་གཡས་ཉི་མ༔ གཡོན་ཟླ་བ༔ དབུས་ཉི་ཟླའི་དཀྱིལ་འཁོར་གྱིས་སྲིད་པ་གསུམ་ལ་གཟིགས་པ༔ དབུ་སྐྲ་སྤྱི་བོར་བཅིངས་པའི་ཟར་བུ་ལ་ལྕགས་སྲེག་གི་ཕུར་པ་རེ་རེས་བརྒྱན་པ༔ དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང༔ ཞབས་གཡས་བསྐུམས་པས་རི་རབ་ཀྱི་རྩེ་ནས་གནོན་ཅིང་ཞབས་གཡོན་བརྐྱངས་པས་རྒྱ་མཚོའི་གཏིང་ནས་དཀྲུགས་པ༔ སྤྱི་བོ་ནས་ཕག་ཞལ་ངུར་སྒྲ་སྒྲོག་པས་ལྷ་སྲིན་སྡེ་བརྒྱད་བྲན་དུ་ཁོལ་བ༔ ཕྱག་གཡས་མི་ལྤགས་ཀྱི་གཡང་གཞི་དང༔ གཡོན་མི་རྐང་གི་གླིང་བུ་འབུད་པ༔ རང་དང་འདྲ་བའི་མཁའ་འགྲོ་སྡེ་བཞིས་བསྐོར་བའི་དབུ་གཙུག་གི་ནམ་མཁར་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོའི་ཚོགས་ཐམས་ཅད་གཟུ་དང་དཔང་པོ་དྲང་ཤན་གྱི་ཚུལ་དུ་བཞུགས་པར་གྱུར༔ ཕཊཿ ཀྱཻ༔ དགོངས་ཤིག་སྐྱབས་གནས་དཀོན་མཆོག་གསུམ༔ གསོན་ཅིག་ཡི་དམ་ཌཱཀྐིའི་ཚོགས༔ གསོན་ཅིག་འཇིག་རྟེན་དྲེགས་པའི་ཚོགས༔ བདག་ནི་མ་ཉེས་མ་ལན་ནོ༔ དང་པོ་བདག་གི་སེམས་མ་ཉེས༔ བར་དུ་བདག་གི་ཁ་མ་ཉེས༔ ཐ་མ་བདག་གི་ལག་མ་ཉེས༔ མ་ཉེས་གཟུ་དཔང་དཀོན་མཆོག་གསུམ༔ དཀོན་མཆོག་གཟུ་དཔང་མི་མཛད་རྒྱུ༔ སྐྱབས་མགོན་རེ་ས་གཞན་ན་མེད༔ ཡི་དམ་ལྷ་ཚོགས་གཟུ་དང་དཔང༔ ཡི་དམ་གཟུ་དཔང་མི་མཛད་རྒྱུ༔ དངོས་གྲུབ་རེ་ས་གཞན་ན་མེད༔ མཁའ་འགྲོ་ཆོས་སྐྱོང་གཟུ་དང་དཔང༔ ཌཱཀྐིས་གཟུ་དཔང་མི་མཛད་རྒྱུ༔ ཕྲིན་ལས་སྒྲུབ་མཁན་གཞན་ན་མེད༔ ལྷ་སྲིན་སྡེ་བརྒྱད་གཟུ་དང་དཔང༔ སྡེ་བརྒྱད་གཟུ་དཔང་མི་མཛད་རྒྱུ༔ དྲང་ཤན་ཕྱེ་མི་གཞན་ན་མེད༔ དམ་ཉམས་གཤེད་པོ་ལས་ངན་འདིས༔ སངས་རྒྱས་བསྟན་པ་གཉན་པོ་བཤིག༔ དཀོན་མཆོག་གསུམ་གྱི་དབུ་འཕང་སྨད༔ བླ་མ་དམ་པའི་སྐུ་ལ་བསྡོས༔ གསང་སྔགས་ཟབ་མོའི་ཆོས་ལ་སྨད༔ དམ་ཚིག་གཉན་པོ་ཁྱད་དུ་བསད༔ དགེ་བ་བཅུ་པོ་རྒྱབ་ཏུ་བསྐྱུར༔ མི་དགེ་བཅུ་པོ་དང་དུ་བླངས༔ ཕུག་གི་ལྷ་ལ་མནོལ་བཙོག་ཕབ༔ བར་གྱི་མི་ཡི་ཚེ་སྲོག་བརྐུས༔ སྒོ་ཡི་ནོར་ལ་གོད་ཁ་ཕྱེ༔ ཞིང་གི་ལོ་ལ་སད་སེར་བཏང༔ ཞིམ་མངར་ཟས་ཀྱི་གཡང་ལ་བརྐུས༔ བསམ་པའི་དོན་ལ་སྟབ་བསྣོལ་བྱེད༔ ཏིང་ངེ་འཛིན་ཡང་བྱིང་རྒོད་བཏང༔ ཁྱོད་ཀྱིས་ལས་ངན་སྣ་ཚོགས་བྱས༔ དེ་བས་བསྒྲལ་བའི་ཞིང་དུ་གྱུར༔ ཞིང་བཅུ་ཚང་བའི་ཤི་གཤེད་ཁྱོད༔ བསྒྲལ་བའི་ཆོ་ག་བྱེད་པ་འདི༔ ངན་སོང་གནས་ནས་འདྲེན་པའི་རྟགས༔ མོན་རེས་ལག་ལྕིབ་བྱས་པ་འདི༔ ཁྱོད་བདེ་ཆེན་ལམ་ལ་འགོད་པའི་རྟགས༔ དུག་ཤོག་ངོས་ལ་བྲིས་པ་འདི༔ ལས་ངན་སྒྲིབ་པ་བྱང་བའི་རྟགས༔ སྒྲོ་རྐང་སྨྱུ་གུས་བྲིས་པ་འདི༔ ཐུགས་རྗེ་ལྕགས་ཀྱུས་འཛིན་པའི་རྟགས༔ ཁྲག་སྣ་སྣག་ཚས་བྲིས་པ་འདི༔ ཐར་པའི་ལམ་ལ་ཁྲིད་པའི་རྟགས༔ འདུག་ས་ཧོམ་ཁུང་བྱས་པ་འདི༔ གཞལ་ཡས་ཁང་དུ་བཀོད་པའི་རྟགས༔ དུག་ཤིང་རྩང་གིས་བསྐོར་བ་འདིས༔ དུག་ལྔའི་སྒྲིབ་པ་བྱང་བའི་རྟགས༔ མདའ་གསུམ་མདའ་ཁྲི་བྱས་པ་འདི༔ དུག་གསུམ་གནས་ནས་སྦྱངས་པའི་རྟགས༔ ཐུན་རྫས་སྣ་ཚོགས་བསགས་པ་འདི༔ རྟེན་འབྲེལ་ཐབས་ལ་མཁས་པའི་རྟགས༔ ཨེ་མ་གཤེད་པོ་སྙིང་རེ་རྗེ༔ མི་དགེ་བཅུ་པོ་སྤྱད་སྤྱད་ནས༔ སྲོག་གཅོད་དབུགས་ལེན་བྱེད་བྱེད་ནས༔ ངན་སོང་གསུམ་དུ་ལྟུང་བར་དོགས༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ བསྒྲལ་ནས་གྲོལ་བར་བྱ་བའི་ཕྱིར༔ ལྷ་དང་སྲུང་མ་ཐམས་ཅད་ཀྱིས༔ དམ་རྫས་གཏོར་སྐྱེམས་འདི་བཞེས་ལ༔ རྣལ་འབྱོར་བདག་གི་སྡོང་གྲོགས་མཛོད༔ ཅེས་བརྗོད་པས་གནོད་བྱེད་རྒྱབ་བརྟེན་ཐམས་ཅད་དང་བྲལ་བར་བསམ་ལ༔ ཕཊཿབྱའོ༔ བྲུབ་ཁུང་དང་འདུལ་ཆས་བྱིན་རླབས་ནི༔ ཕཊཿ ཨེ་ཛྭ་ལ་རཾ༔ ལྕགས་ཁང་སླ་ང་གཤེད་སྒྲོ་གཤེད་འབྲེང་སྟ་རེ་ཟོར་བ་མདའ་མདུང་རལ་གྲི་རྔ་ཡབ་གཡང་གཞི་མི་མགོའི་སྒྱེད་པུ་སོགས་གཤེད་པོ་རུ་ཏྲའི་རྟེན་འབྲེལ་གྱི་རྫས་ལས་བྱུང་བའི་འདུལ་ཆས་ཐམས་ཅད་ལ་མེ་འབར་ཞིང་ཚྭ་ཚྭ་འཕྲོས་གནོད་བྱེད་ཟ་འདྲེ་ཤི་གཤེད་ཐམས་ཅད་འདུལ་བའི་གཉེན་པོ་གཅིག་ཏུ་དྲོང་ངེ་སོང་བར་བསམ༔ ཕཊཿ ཕཊཿ ཕཊཿ དེ་ནས་ཉ་བོ་དམིགས་པ་ནི༔ ཕཊཿ རང་ཉིད་ཁྲོས་མ་ནག་མོའི་ཐུགས་ཀ་ནས་ལས་བྱེད་ཀྱི་མཁའ་འགྲོ་དཀར་སེར་དམར་ལྗང་གྲངས་མེད་འཕྲོས་ནས་ཀུན་ཀྱང་ཕྱག་ན་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་བཟུང་ནས་ཕྱོགས་མཚམས་སྟེང་འོག་གི་བྱད་མ་ཟ་འདྲེ་ཤི་གཤེད་ཐམས་ཅད་བཀུག་ནས༔ གཤེད་ཀྱི་ཀ་ཆའི་རྩ་རུ་ལིངྒ་མཚན་ཉིད་གཟུགས་བྱང་འདི་ལ་ཤ་རུལ་ལ་སྦྲང་མ་བཞིན་འདུས་ཤིང་བཀུག་པར་དམིགས་ལ༔ ཕཊཿ ན་མོ་རྗེ་བཙུན་རིག་འཛིན་གྲུབ་ཐོབ་གཅོད་ཡུལ་བརྒྱུད་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༔ དཀོན་མཆོག་གསུམ་གྱི་བཀའ་བདེན་པ་དང༔ ཆོས་སྐུ་ཡེ་ཤེས་ཀྱི་མཁའ་འགྲོ་མ་ཡུམ་ཆེན་མོའི་ལྷ་ཚོགས་འཁོར་དང་བཅས་པའི་བདེན་པ་དང༔ ལོངས་སྐུ་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ལྷ་ཚོགས་རྣམས་ཀྱི་བཀའ་བདེན་པ་དང༔ སྤྲུལ་སྐུ་ཡེ་ཤེས་ཀྱི་མཁའ་འགྲོ་མ་ཨ་མ་ལབ་ཀྱི་སྒྲོན་མའི་ལྷ་ཚོགས་འཁོར་དང་བཅས་པའི་བཀའ་བདེན་པ་དང༔ བཀའ་སྲུང་དྲང་སྲོང་ཆེན་པོ༔ ཟངས་རིའི་བཙན་རྒོད་མཆེད་གཉིས༔ ཀླུ་རྒྱལ་དྲག་པོ་ཟླ་སྐྱོང་ལ་སོགས་བཀའ་སྐྱོང་དམ་ཅན་རྒྱ་མཚོའི་བཀའ་བདེན་པ་དང༔ བདེན་པ་ཆེན་པོའི་མཐུས༔ སྤྱིར་སངས་རྒྱས་བསྟན་པའི་སྤྱི་དགྲ༔ རྣལ་འབྱོར་པ་བདག་གི་སྒོས་དགྲ༔ ཁྱད་པར་དུ་ཡང་ཚེ་ལས་འདས་པ་ཆེ་གེ་མོ་ཞེས་བྱ་བ་ལ༔ དང་པོ་ནད་ཀྱི་སྣ་འདྲེན་པ༔ བར་དུ་གདོན་གྱི་ཚང་བཅའ་བ༔ ཐ་མ་ཁོག་པའི་སྲོག་གཅོད་པ༔ གཤིན་པོའི་གནས་མི་བདེ་ཞིང༔ གསོན་པོ་བཀྲ་མི་ཤེས་པར་བྱེད་པའི་ཟ་འདྲེ་ཤི་གཤེད་སྲོག་གཅོད་དབུགས་ལེན་ཚེ་ལེན་མདངས་འཕྲོག༔ གསོན་བདུད་གཤིན་ལྕགས༔ ཆེ་སྲི་ཆུང་སྲི༔ དར་སྲི་རྒན་སྲི་རྒབ་འདྲེ་གནོད་བྱེད་གང་ཡིན་པ་ཐམས་ཅད་མཐོ་རི་བོའི་རྩེ༔ དམའ་རྒྱ་མཚོའི་འགྲམ༔ ས་འོག་ས་སྟེང་ས་བླ་སྲིད་པ་གསུམ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིངྒ་མིང་ཡིག་བྱང་བུ་འདི་ལ་ཁུག་ཅིག་ཛ་ཛ༔ ཛཿཧཱུྃ་བཾ་ཧོ༔ ཕཊཿ ཕཊཿ ཕཊཿ ཞེས་ལན་རེ་བཞིན་རྐང་དུང་ཌཱ་དྲིལ་དྲག་ཏུ་འཁྲོལཿ འགུག་གཞུག་དང་བླ་འགུགས་སྔགས་རྟགས་མཚན་ཐོན་བར་བཟླ༔ དེ་ནས་ལིངྒ་བྱང་བུ་རྡེའུ་རྣམས་སྒྲོ་བར་བླུག༔ དེ་ནས་གཅོད་གཡོག་གིས་གཤེད་སྒྲོ་དང་གཤེད་འབྲེང་བཟུང་ནས་ཕོ་ཉ་སྒོས་བསྐུལ་དང་མཁའ་འགྲོ་འབུམ་བསྐུལ་བྱ༔ ཕཊ་ཛ༔ བསྐལ་པ་མེ་ལྟར་འབར་བའི་ཀློང་དཀྱིལ་དུ༔ པད་ཉི་རུ་ཏྲ་བམ་གྱི་གདན་སྟེང་དུ༔ རྒྱལ་བའི་ཡུམ་མཆོག་མ་ཅིག་ཁྲོས་མའི་སྐུ༔ གནས་ལྔ་སྐུ་གསུང་ཐུགས་དང་བ་སྤུའི་གྲངས༔ ལས་བྱེད་མཁའ་འགྲོ་བྱེ་བ་འབུམ་འབུམ་འགྱེད༔ ཀུན་གྱི་ཕྱག་ན་འགུགས་འཆིང་མཚོན་ཆ་འཛིན༔ དགྲ་བགེགས་གནོད་བྱེད་བྱད་མ་འབྱུང་པོའི་ཚོགས༔ གསོན་བདུད་གཤིན་ལྕགས་ཆུང་སྲི་གོད་འདྲེ་སོགས༔ སྟེང་འོག་ཕྱོགས་མཚམས་གར་ཡོད་གར་བྲོས་ཀྱང༔ ལྕགས་ཀྱུ་ཅན་གྱིས་སྙིང་ནས་བཟུང་ཞིང་དྲོངས༔ ཞགས་པ་ཅན་གྱིས་སྐེ་ནས་འཆིང་བར་གྱིས༔ ལྕགས་སྒྲོག་ཅན་གྱིས་དབང་པོ་ཡན་ལག་སྡོམ༔ དྲིལ་བུ་ཅན་གྱིས་མྱོས་ཤིང་བརླག་པར་བྱེད༔ ཐོ་བ་ཅན་གྱིས་མགོ་ནས་གཞོམ་ཞིང་བརྡུང༔ གཤོག་པ་ཅན་གྱིས་རྒྱབ་ནས་དེད་ལ་ཤོག༔ མཆུ་སྡེར་ཅན་གྱིས་གློ་སྙིང་མིག་ཚིལ་འབྲུ༔ སྐད་ཅིག་རང་དབང་མེད་པར་འདིར་ཁུག་ཅིག༔ གཤེད་སྒྲོ་རླུང་ཐུབ་ནང་གི་རྟེན་ལ་བསྟིམ༔ གཤེད་འབྲེང་འདོམ་དགུས་ཁ་ནས་བསྡམ་པ་ཡིས༔ ཐར་བར་མ་གྱུར་མཱ་ར་ཡ་ཛ་ཕཊ༔ རྩ་སྔགས་མཇུག་ཏུ༔ ཨོཾ་བཛྲ་ཨཾ་ཀུ་ཤ་ཛ༔ ཨོཾ་བཛྲ་པ་ཤ་ཧཱུྃ༔ ཨོཾ་བཛྲ་སྥོ་ཊ་བཾ༔ ཨོཾ་བཛྲ་གྷནྡྷེ་ཧོ༔ ཞེས་པས་ཁ་སེ་ཆིངས་མདུད་པ་བྱས་ལ་གཅོད་གཡོག་པས་སྟ་རེ་ཕྲག་གཡོན་ནས་གཟར༔ འབྲིང་བ་གྲུ་མོ་གཡོན་ནས་བསྐོན༔ ཟོར་བ་ལག་གཡོན་དུ་ཐོགས༔ ལག་པ་གཡས་པས་གཤེད་སྒྲོ་བཟུང་ནས་ལངས་ཏེ་འདུག༔ ཁ་ཤར་དུ་གྱུ༔ ཧཱུྃ༔ ང་ནི་ཁྲོས་མ་ནག་མོའི་སྐུ༔ སྲིད་གསུམ་འདུལ་བའི་མཐུ་མོ་ཆེ༔ ཕག་ཞལ་གཟུགས་མེད་ཁམས་སུ་ངུར༔ སྐུ་སྟོད་གཟུགས་ཁམས་གནས་སུ་འགྱིང༔ སྐུ་སྨད་འདོད་ཁམས་གནས་སུ་རོལ༔ ཞབས་གཉིས་ངན་སོང་གསུམ་པོ་མནན༔ མི་ཤ་གཤེད་ལ་བརྡབ་པའི་ཕྱིར༔ སྤྲུལ་པའི་ཕོ་ཉས་སྟོང་གསུམ་གང༔ སྐུ་ལས་སྤྲུལ་པའི་ཕོ་ཉ་ནི༔ ལྕགས་ཀྱི་སྤྱང་ཀི་སྔོན་མོ་ལ༔ དུང་གི་བུད་མེད་དཀར་མོ་ཆིབས༔ བླ་བྱ་དཀར་མོ་ཀླད་ན་ལྡིང༔ བླ་ཁྱི་དཀར་པོ་རོལ་དུ་ཁྲིད༔ བླ་འཛིན་དྲྭ་བ་རྒྱབ་ནས་ཁུར༔ གཤེད་སྟྭ་ཁ་ཆེ་ཕྲག་ལ་གཟར༔ གཤེད་ཟོར་འགུགས་མོ་ལག་ན་ཐོགས༔ གཤེད་སྒྲོ་རླུང་ཐུབ་ལག་ཏུ་ཐོགས༔ གཤེད་འབྲེང་འདོམ་དགུ་གྲུ་ལ་བཀོན༔ མི་ཤ་གཤེད་ལ་བརྡབ་པའི་ཕྱིར༔ གཤེད་པོ་ཟ་འདྲེ་ཤི་གཤེད་འདི༔ ཤར་གྱི་ཕྱོགས་ནས་ཁུག་ལ་ཤོག༔ མི་ལྤགས་གཡང་གཞིས་རྒྱོབ་ལ་ཤོག༔ གཤེད་སྟར་ཁ་ཆེས་རྒྱོབ་ལ་ཤོག༔ གཤེད་ཟོར་འགུགས་མོས་བྲོགས་ལ་ཤོག༔ གཤེད་སྒྲོ་རླུང་ཐུབ་ནང་དུ་ཆུག༔ གཤེད་འབྲེང་འདོམ་དགུས་སྡོམ་ལ་ཤོག༔ བླ་འཛིན་དྲྭ་བས་དྲིལ་ལ་ཤོག༔ སྐད་ཅིག་ཉིད་ལ་འདིར་ཁུག་ཅིག༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས༔ གནོད་བྱེད་ཟ་འདྲེ་ཤི་གཤེད་སྲོག་གཅོད་དབུགས་ལེན་ཤི་འདྲེ་ཤི་སྲི་གསོན་བདུད་གཤིན་ལྕགས་ཐམས་ཅད་ནྲི་ཏྲི་ཨཾ་ཀུ་ཤ་ཛ་ཛ༔ ཕཊཿ ཕཊཿ ཕཊཿ ཅེས་ཤར་ངོས་སུ་གཤེད་སྒྲོ་བརྡབ་བཅུག་ནས་སླ་ངའི་ཁ་ནས་གྲི་སོ་ཡར་བསྟན་པའི་སྟེང་དུ་བྱོ༔ ཚེ་འདས་ཀྱི་མིང་བྱང་རྡེའུ་དང་གཟུགས་ཡོད་པར་ཡར་གཞི་འགྲམ་དུ་བཞག༔ བྱང་བུ་རྣམས་ཕོ་ཡིན་ན་ཁ་སྦུབ་པ་རྣམས་ཁུག་པ་ཡིན༔ མོ་ཡིན་ན་ཁ་ཡར་བསྟན་པ་རྣམས་ཁུག་པ་ཡིན༔ ཁུག་པ་རྣམས་ཧོམ་ཁུང་དུ་འཕེན༔ མ་ཁུག་པ་རྣམས་སྔར་ལྟར་བཞིན་སྣོད་དུ་བསྡེབ་ནས་འདི་ལྟར་གྱེར༔ ཧཱུྃ༔ མ་ཅིག་ཁྲོས་མ་ནག་མོ་ཡི༔ ཡོན་ཏན་སྤྲུལ་པའི་ཕོ་ཉ་ནི༔ ལྕགས་ཀྱི་སྤྱང་མོ་སྔོན་མོ་ལ༔ གསེར་གྱི་བུད་མེད་སེར་མོ་ཆིབས༔ བླ་བྱ་སེར་པོ་ཀླད་ན་ལྡིང༔ བླ་ཁྱི་སེར་པོ་རོལ་དུ་ཁྲིད༔ བླ་འཛིན་དྲྭ་བ་རྒྱབ་ནས་ཁུར༔ གཤེད་སྟར་ཁ་ཆེ་ཕྲག་ལ་གཟར༔ གཤེད་ཟོར་འགུགས་མོ་ལག་ན་ཐོགས༔ གཤེད་སྒྲོ་རླུང་ཐུབ་ལག་ཏུ་ཐོགས༔ གཤེད་འབྲེང་འདོམ་དགུ་གྲུ་ལ་བཀོན༔ མི་ཤ་གཤེད་ལ་བརྡབ་པའི་ཕྱིར༔ གནོད་བྱེད་ཟ་འདྲེ་ཤི་གཤེད་འདི༔ ལྷོ་ཡི་ཕྱོགས་ནས་ཁུག་ལ་ཤོག༔ མི་ལྤགས་གཡང་གཞིས་རྡོབས་ལ་ཤོག༔ གཤེད་སྟར་ཁ་ཆེས་རྒྱོབ་ལ་ཤོག༔ གཤེད་ཟེར་འགུགས་མོས་ཟུང་ལ་ཤོག༔ གཤེད་སྒྲོ་རླུང་ཐུབ་ནང་དུ་ཆུག༔ གཤེད་འབྲེང་འདོམ་དགུས་སྡོམ་ལ་ཤོག༔ བླ་འཛིན་དྲྭ་བས་དྲིལ་ལ་ཤོག༔ སྐད་ཅིག་ཉིད་ལ་འདིར་ཁུག་ཅིག༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས་གནོད་བྱེད་ཟ་འདྲེ་ཤི་གཤེད་སྲོག་གཅོད་དབུགས་ལེན་ཤི་འདྲེ་ཤི་སྲི་གསོན་བདུད་གཤིན་ལྕགས་ཐམས་ཅད་ནྲི་ཏྲི་ཨཾ་ཀུ་ཤ་ཛ་ཛ༔ ཕཊཿ ཕཊཿ ཕཊཿ སྔགས་གོང་ལྟར་དང༔ ཕཊ་ཤད་བྱས་ནས་གྱུ་བ་ཧོམ་ཁུང་དུ་བླུག༔ ཡང་སྔར་ལྟར་ནུབ་ཏུ༔ ཧཱུྃ༔ མ་ཅིག་ཁྲོས་མ་ནག་མོ་ཡི༔ གསུང་ལས་སྤྲུལ་པའི་ཕོ་ཉ་ནི༔ ལྕགས་ཀྱི་སྤྱང་མོ་སྔོན་མོ་ལ༔ བྱི་རུའི་བུད་མེད་དམར་མོ་ཆིབས༔ བླ་བྱ་དམར་མོ་ཀླད་ནས་ལྡིང༔ བླ་ཁྱི་དམར་པོ་རོལ་དུ་ཁྲིད༔ བླ་འཛིན་དྲྭ་བ་རྒྱབ་ཏུ་ཁུར༔ གཤེད་སྟར་ཁ་ཆེ་ཕྲག་ལ་གཟར༔ གཤེད་ཟོར་འགུགས་མོ་ལག་ན་ཐོགས༔ གཤེད་སྒྲོ་རླུང་ཐུབ་ལག་ཏུ་ཐོགས༔ གཤེད་འབྲེང་འདོམ་དགུ་གྲུ་ལ་བཀོན༔ མི་ཤ་གཤེད་ལ་བརྡབ་པའི་ཕྱིར༔ གནོད་བྱེད་ཟ་འདྲེ་ཤི་གཤེད་འདི༔ ནུབ་ཀྱི་ཕྱོགས་ནས་ཁུག་ལ་ཤོག༔ མི་ལྤགས་གཡང་གཞིས་རྡོབས་ལ་ཤོག༔ གཤེད་སྟར་ཁ་ཆེས་རྒྱོབ་ལ་ཤོག༔ གཤེད་ཟོར་འགུགས་མོས་ཟུང་ལ་ཤོག༔ གཤེད་སྒྲོ་རླུང་ཐུབ་ནང་དུ་ཆུག༔ གཤེད་འབྲེང་འདོམ་དགུས་སྡོམ་ལ་ཤོག༔ བླ་འཛིན་དྲྭ་བས་དྲིལ་ལ་ཤོག༔ སྐད་ཅིག་ཉིད་ལ་འདིར་ཁུག་ཅིག༔ གོང་ལྟར་སྔགས་དང་འགྲེས༔ ཕཊཿ སླར་བྱོ་དང་མ་ཁུག་པ་རྣམས་བཅུག་ལ༔ ཡང་ཁ་བྱང་དུ་གྱུ་ལ༔ ཧཱུྃ༔ མ་ཅིག་ཁྲོས་མ་ནག་མོ་ཡི༔ ཕྲིན་ལས་སྤྲུལ་པའི་ཕོ་ཉ་ནི༔ ལྕགས་ཀྱི་སྤྱང་མོ་སྔོན་མོ་ལ༔ གཡུ་ཡི་བུད་མེད་ལྗང་མོ་ཆིབས༔ བླ་བྱ་ལྗང་མོ་ཀླད་ན་ལྡིང༔ བླ་ཁྱི་ལྗང་མོ་རོལ་དུ་ཁྲིད༔ བླ་འཛིན་དྲྭ་བ་རྒྱབ་ནས་ཁུར༔ གཤེད་སྟར་ཁ་ཆེ་ཕྲག་ལ་གཟར༔ གཤེད་ཟོར་འགུགས་མོ་ལག་ན་ཐོགས༔ གཤེད་སྒྲོ་རླུང་ཐུབ་ལག་ཏུ་ཐོགས༔ གཤེད་འབྲེང་འདོམ་དགུ་གྲུ་ལ་བཀོན༔ མི་ཤ་གཤེད་ལ་བརྡབ་པའི་ཕྱིར༔ གནོད་བྱེད་ཟ་འདྲེ་ཤི་གཤེད་འདི༔ བྱང་གི་ཕྱོགས་ནས་ཁུག་ལ་ཤོག༔ མི་ལྤགས་གཡང་གཞིས་རྡོབས་ལ་ཤོག༔ གཤེད་སྟར་ཁ་ཆེས་རྒྱོབ་ལ་ཤོག༔ གཤེད་ཟོར་འགུགས་མོས་ཟུང་ལ་ཤོག༔ གཤེད་སྒྲོ་རླུང་ཐུབ་ནང་དུ་ཆུག༔ གཤེད་འབྲེང་འདོམ་དགུས་སྡོམ་ལ་ཤོག༔ བླ་འཛིན་དྲྭ་བས་དྲིལ་ལ་ཤོག༔ སྐད་ཅིག་ཉིད་ལ་འདིར་ཁུག་ཅིག༔ གོང་ལྟར་སྔགས་དང་འགྲེས༔ ཕཊཿ མཚམས་བཞི་སྟེང་འོག་ཏུ་བརྡབ༔ ཧཱུྃ༔ མ་ཅིག་ཁྲོས་མ་ནག་མོ་ཡི༔ ཐུགས་ལས་སྤྲུལ་པའི་ཕོ་ཉ་ནི༔ ལྕགས་ཀྱི་སྤྱང་ཀི་སྔོན་མོ་ལ༔ མཐིང་གི་བུད་མེད་སྔོན་མོ་ཆིབས༔ བླ་བྱ་སྔོན་མོ་ཀླད་ན་ལྡིང༔ བླ་ཁྱི་སྔོན་མོ་རོལ་དུ་ཁྲིད༔ བླ་འཛིན་དྲྭ་བ་རྒྱབ་ནས་ཁུར༔ གཤེད་སྟར་ཁ་ཆེ་ཕྲག་ལ་གཟར༔ གཤེད་ཟོར་འགུགས་མོ་ལག་ན་ཐོགས༔ གཤེད་སྒྲོ་རླུང་ཐུབ་ལག་ཏུ་ཐོགས༔ གཤེད་འབྲེང་འདོམ་དགུ་གྲུ་ལ་བཀོན༔ མི་ཤ་གཤེད་ལ་བརྡབ་པའི་ཕྱིར༔ གནོད་བྱེད་ཟ་འདྲེ་ཤི་གཤེད་འདི༔ མཚམས་བཞི་སྟེང་འོག་ཀུན་ནས་ཁུག་ལ་ཤོག༔ མི་ལྤགས་གཡང་གཞིས་རྡོབས་ལ་ཤོག༔ གཤེད་སྟར་ཁ་ཆེས་རྒྱོབ་ལ་ཤོག༔ གཤེད་ཟོར་འགུགས་མོས་ཟུང་ལ་ཤོག༔ གཤེད་སྒྲོ་རླུང་ཐུབ་ནང་དུ་ཆུག༔ གཤེད་འབྲེང་འདོམ་དགུས་སྡོམ་ལ་ཤོག༔ བླ་འཛིན་དྲྭ་བས་དྲིལ་ལ་ཤོག༔ གཤེད་པོ་ཟ་འདྲེ་ཤི་གཤེད་རྣམས༔ སྐད་ཅིག་ཉིད་ལ་འདིར་ཁུག་ཅིག༔ གོང་གི་འགུགས་སྔགས་དང་༔ ཕཊཿ སླར་བྱོ་བླུག་གོང་ལྟར་རོ༔ དེ་ནས་བྱང་དུ་ཧོམ་ཁུག་མ་ཁུག་བརྟག་ནས་ཟན་ལིང་བཅས་སྒྲོ་བར་བཅུག་ལ༔ དེ་ནས་ཁང་པའི་ཡང་ཐོག་དང་ཁྱིམ་གྱི་ཕྱི་ནང་དུ་མི་རྐང་འབུད་ཅིང་རྡོ་ཐུན་བྲབ༔ ཀུན་ལ་རྡེབ་བཅུག་གབ་སྐུང་ཕུད༔ ཁྲོས་མའི་བརྟུལ་ཞུགས་འདི་ལྟར་གྱེར༔ ཕཊ་ཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་སེང་གེའི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ཤར་དུ་རྒྱུག༔ དཀར་པོའི་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊཿཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་སྟག་གི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ཤར་ལྷོར་རྒྱུག༔ དཀར་སེར་རྫས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊཿཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་ཝ་ཡི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ལྷོ་རུ་རྒྱུག༔ སེར་པོའི་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཕཊཿཛཿ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་སྤྱང་ཀིའི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ལྷོ་ནུབ་རྒྱུག༔ དམར་སེར་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊཿཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་ཀང་ཀའི་མགོ༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ནུབ་ཏུ་རྒྱུག༔ དམར་པོའི་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོག་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊཿཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་བྱ་རྒོད་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་ནུབ་བྱང་རྒྱུག༔ དམར་ལྗང་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊཿཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་ཁྭ་ཁའི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་བྱང་དུ་རྒྱུག༔ ལྗང་གུའི་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ཕཊ་ཛ༔ མ་ཅིག་ཁྲོས་མ་ནག་མོ་ཡི༔ སྤྲུལ་པ་ཕྲ་མེན་ཨུ་ལུའི་གདོང༔ འཁོར་དུ་ཕོ་ཉ་འབུམ་ཕྲག་འགྱེད༔ ཀུན་གྱིས་ལྕགས་ཀྱུ་ཞགས་སྒྲོག་དྲིལ༔ ཐོགས་པ་ཁྱིམ་གྱི་བྱང་ཤར་རྒྱུག༔ ལྗང་གུའི་རིགས་ལ་གཤེད་གབ་ན༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ ཕཊཿ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ ཚེ་ལེན་མདངས་ཕྲོགས་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཤི་འདྲེ་ཤི་སྲི་ཁུག་ལ་ཤོག༔ གོད་སྲི་གོད་འདྲེ་ཁུག་ལ་ཤོག༔ ཆེ་སྲི་ཆུང་སྲི་ཁུག་ལ་ཤོག༔ གནོད་བྱེད་བྱད་མ་ལྷ་སྲུང་དང༔ བསྒྲལ་བའི་ཞིང་བཅུ་མ་ལུས་པ༔ གབ་སྐུང་ཕུད་ལ་འདིར་ཁུག་ཅིག༔ མིང་བྱང་གཟུགས་དང་དབྱེར་མེད་མཛོད༔ གཤེད་པོ་ལས་ངན་ཁུག་ལ་ཤོག༔ གསོན་བདུད་གཤིན་ལྕགས་ཁུག་ལ་ཤོག༔ ཟ་འདྲེ་ཤི་གཤེད་ཁུག་ལ་ཤོག༔ སྲོག་གཅོད་དབུགས་ལེན་ཁུག་ལ་ཤོག༔ གཞོན་སྲི་དར་སྲི་ཁུག་ལ་ཤོག༔ ནད་འདྲེ་ཤི་འདྲེ་ཁུག་ལ་ཤོག༔ ཛ་ཧཱུྃ་བྷྱོ༔ བཛྲ་ཨཾ་ཀུ་ཤ་ཡ་ཛཿཛ༔ ཏྲི་ཡཾ་ཛཿཛ༔ ད་རུང་མ་ཁུག་པ་གདའ་ན་ཟན་ལིང་གཅིག་དང་མཉམ་དུ་ཤོག་ལིང་མང་བ་སླ་ངའི་ནང་ནས་སྒྲོ་བར་བཅུག་ལ་གདོང་ཆེན་བཞི་བསྐུལ་གྱིས་བཀུག་ནས་བསྒྲལ་བ་ནི༔ གཤེད་སྒྲོའི་གཤེད་འབྲེང་མིང་རུས་མི་གཅིག་པ་གཉིས་ཀྱིས་ཕར་འཐེན་ཚུར་འཐེན་བྱེད་ཅིང་གཉིས་ཀས་འབྲེང་བའི་སྣེ་མོ་ནས་འཐེན་ཅིང་ཕྱོགས་བཞིར་སྡེབ་བཅུག་སྟེ༔ གདུང་ཆེན་རྣམས་ཕྱོགས་སོ་སོ་ནས་གཡང་གཞིས་སྡེབ་ཅིང༔ ལས་བྱེད་དམར་མོ་ཟངས་ལྕགས་འཛིན་པ་གཉིས་ཀྱིས་ཞགས་པ་འཕངས་པས་སྐེ་ནས་ཕར་འཐེན་ཚུར་འཐེན་བྱེད་ནས་སྐད་ངན་ཙི་རེ་རེ་བྱེད་པར་བསྒོམས༔ ཕཊཿ མ་ཡུམ་ཆེན་ཐུགས་ལས་སྤྲུལ་པའི་སྲས༔ མ་ཅིག་ཇོ་མོ་རྣལ་འབྱོར་མ༔ ཕ་རོལ་ཕྱིན་པའི་གྲུབ་ཐོབ་མ༔ སྐལ་ལྡན་ཡོངས་ཀྱི་རྒྱུད་གྲོལ་མ༔ ཐུགས་དམ་བསྐུལ་ལོ་མཁའ་འགྲོའི་ཚོགས༔ སངས་རྒྱས་མཁའ་འགྲོའི་དུས་ལ་བབས༔ ཁྲོས་མ་ནག་མོའི་དུས་ལ་བབས༔ དུར་ཁྲོད་བདག་མོའི་དུས་ལ་བབས༔ ཤར་ཕྱོགས་དུར་ཁྲོད་གཞལ་ཡས་ནས༔ རྡོ་རྗེ་རིགས་ཀྱི་མཁའ་འགྲོ་མ༔ དཀར་མོ་ཆེན་མོ་སེང་གེའི་གདོང༔ ཤར་ན་དཀར་མོ་སེང་གདོང་མ༔ ལྷོ་ན་སེར་མོ་སེང་གདོང་མ༔ ནུབ་ན་དམར་མོ་སེང་གདོང་མ༔ བྱང་ན་ལྗང་མོ་སེང་གདོང་མ༔ ཤར་ཕྱོགས་མཁའ་འགྲོའི་དུས་ལ་བབས༔ དབུགས་ལེན་སྲོག་གཅོད་འགུགས་པའི་དུས་ལ་བབས༔ ཟ་འདྲེ་ཤི་གཤེད་འགུགས་པའི་དུས་ལ་བབས༔ བཀུག་ནས་བསྒྲལ་བའི་དུས་ལ་བབས༔ དུས་ལ་བབ་པོ་ས་མ་ཡཱ༔ ཕཊ༔ ཕཊཿ ཕཊཿ ཅེས་ཤར་དུ་རྡེབ། ཧཱུྃ༔ ལྷོ་ཕྱོགས་དུར་ཁྲོད་གཞལ་ཡས་ན༔ རིན་ཆེན་རིགས་ཀྱི་མཁའ་འགྲོ་མ༔ སེར་མོ་རིན་ཆེན་སྟག་གདོང་མ༔ ཤར་ན་དཀར་མོ་སྟག་གདོང་མ༔ ལྷོ་ན་སེར་མོ་སྟག་གདོང་མ༔ ནུབ་ན་དམར་མོ་སྟག་གདོང་མ༔ བྱང་ན་ལྗང་མོ་སྟག་གདོང་མ༔ ལྷོ་ཕྱོགས་མཁའ་འགྲོ་སྡེ་ལྔ་ཡང༔ ཕྱག་གཡས་ཞིང་ཆེན་གཡང་གཞིས་རྡེབ༔ གཡོན་པས་འགུགས་བྱེད་ལྕགས་ཀྱུ་བསྣམས༔ ལྷོ་ཕྱོགས་མཁའ་འགྲོའི་དུས་ལ་བབས༔ དབུགས་ལེན་སྲོག་གཅོད་འགུགས་པའི་དུས་ལ་བབས༔ ཟ་འདྲེ་ཤི་གཤེད་འགུགས་པའི་དུས་ལ་བབས༔ བཀུག་ནས་བསྒྲལ་བའི་དུས་ལ་བབས༔ དུས་ལ་བབ་པོ་ས་མ་ཡཱ༔ ཕཊཿ ཕཊཿ ཕཊཿ ཅེས་ལྷོ་རུ་རྡེབ༔ ཧཱུྃ༔ ནུབ་ཕྱོགས་དུར་ཁྲོད་གཞལ་ཡས་ན༔ པདྨ་རིགས་ཀྱི་མཁའ་འགྲོ་མ༔ དམར་མོ་པདྨ་ཆུ་སྲིན་གདོང༔ ཤར་ན་དཀར་མོ་ཆུ་སྲིན་གདོང༔ ལྷོ་ན་སེར་མོ་ཆུ་སྲིན་གདོང༔ ནུབ་ན་དམར་མོ་ཆུ་སྲིན་གདོང༔ བྱང་ན་སྔོན་མོ་ཆུ་སྲིན་གདོང༔ ནུབ་ཕྱོགས་མཁའ་འགྲོ་སྡེ་ལྔ་ཡང༔ ཕྱག་གཡས་ཞིང་ཆེན་གཡང་གཞི་རྡེབ༔ གཡོན་པས་འགུགས་བྱེད་ལྕགས་ཀྱུ་བསྣམས༔ ནུབ་ཕྱོགས་མཁའ་འགྲོའི་དུས་ལ་བབས༔ དབུགས་ལེན་སྲོག་གཅོད་འགུགས་པའི་དུས་ལ་བབས༔ ཟ་འདྲེ་ཤི་གཤེད་འགུགས་པའི་དུས་ལ་བབས༔ བཀུག་ནས་བསྒྲལ་བའི་དུས་བབས༔ དུས་ལ་བབ་པོ་ས་མ་ཡཱ༔ ཕཊཿ ཕཊཿ ཕཊཿ ཅེས་ནུབ་ཏུ་རྡེབ༔ ཧཱུྃ༔ བྱང་ཕྱོགས་དུར་ཁྲོད་གཞལ་ཡས་ན༔ ལས་ཀྱི་རིགས་ཀྱི་མཁའ་འགྲོ་མ༔ ལྗང་མོ་ཆེན་མོ་འབྲུག་གདོང་མ༔ ཤར་ན་དཀར་མོ་འབྲུག་གདོང་མ༔ ལྷོ་ན་སེར་མོ་འབྲུག་གདོང་མ༔ ནུབ་ན་དམར་མོ་འབྲུག་གདོང་མ༔ བྱང་ན་ལྗང་མོ་འབྲུག་གདོང་མ༔ བྱང་ཕྱོགས་མཁའ་འགྲོ་སྡེ་ལྔ་ཡང༔ ཕྱག་གཡས་ཞིང་ཆེན་གཡང་གཞིས་རྡེབ༔ ཕྱག་གཡོན་འགུགས་པའི་ལྕགས་ཀྱུ་བསྣམས༔ བྱང་ཕྱོགས་མཁའ་འགྲོའི་དུས་ལ་བབས༔ དབུགས་ལེན་སྲོག་གཅོད་འགུགས་པའི་དུས་ལ་བབས༔ ཟ་འདྲེ་ཤི་གཤེད་འགུགས་པའི་དུས་ལ་བབས༔ བཀུག་ནས་བསྒྲལ་བའི་དུས་ལ་བབས༔ དུས་ལ་བབ་པོ་ས་མ་ཡཱ༔ ཕཊཿ ཕཊཿ ཕཊཿ དེ་ནས་ཐམས་ཅད་སླ་ངའི་ནང་བྱོས་སོ༔ བྲོས་ལམ་བཅད་པ་ནི༔ མི་ཐམས་ཅད་ཀྱིས་འདུལ་ཆས་མདའ་གཞུ་མདུང་གྲི་ཐོ་བ་རྔ་མ་ཤ་ལག་རྣམས་བཟུང་ནས་སླ་ང་བསྐོར༔ ཧཱུྃ༔ ང་ནི་ཁྲོས་མ་ནག་མོའི་སྐུ༔ སྣང་སྲིད་ཐམས་ཅད་ང་ལས་བྱུང༔ གནོད་བྱེད་ཟ་འདྲེ་ཤི་གཤེད་ཁྱོད༔ ཤར་གྱི་ཕྱོགས་སུ་མ་འབྲོས་ཤིག༔ ཤར་གྱི་ཕྱོགས་སུ་འབྲོས་སྙམ་ན༔ ཤར་ཕྱོགས་རྡོ་རྗེ་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཤར་གྱི་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ ལྷོ་ཡི་ཕྱོགས་སུ་མ་འབྲོས་ཤིག༔ ལྷོ་ཡི་ཕྱོགས་སུ་འབྲོས་སྙམ་ན༔ ལྷོ་ཕྱོགས་རིན་ཆེན་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ལྷོ་ཡི་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ ནུབ་ཀྱི་ཕྱོགས་སུ་མ་འབྲོས་ཤིག༔ ནུབ་ཀྱི་ཕྱོགས་སུ་འབྲོས་སྙམ་ན༔ ནུབ་ཕྱོགས་པདྨ་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ནུབ་ཀྱི་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ བྱང་གི་ཕྱོགས་སུ་མ་འབྲོས་ཤིག༔ བྱང་གི་ཕྱོགས་སུ་འབྲོས་སྙམ་ན༔ བྱང་ཕྱོགས་ལས་ཀྱི་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་བྱང་གི་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ ཤར་ལྷོ་མཚམས་སུ་མ་འབྲོས་ཤིག༔ ཤར་ལྷོ་མཚམས་སུ་འབྲོས་སྙམ་ན༔ ཤར་ལྷོ་དམ་ཚིག་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཤར་ལྷོའི་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ ལྷོ་ནུབ་མཚམས་སུ་མ་འབྲོས་ཤིག༔ ལྷོ་ནུབ་མཚམས་སུ་འབྲོས་སྙམ་ན༔ ལྷོ་ནུབ་སྣ་ཚོགས་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ལྷོ་ནུབ་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ ནུབ་བྱང་མཚམས་སུ་མ་འབྲོས་ཤིག༔ ནུབ་བྱང་མཚམས་སུ་འབྲོས་སྙམ་ན༔ ནུབ་བྱང་རིན་ཆེན་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ནུབ་བྱང་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ བྱང་ཤར་མཚམས་སུ་མ་འབྲོས་ཤིག༔ བྱང་ཤར་མཚམས་སུ་འབྲོས་སྙམ་ན༔ བྱང་ཤར་དམ་ཚིག་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་བྱང་ཤར་འབྲོས་ལམ་ཆོད༔ གནོད་བྱེད་ཟ་འདྲེ་ཤི་གཤེད་ཁྱོད༔ སྟེང་གི་ཕྱོགས་སུ་མ་འབྲོས་ཤིག༔ སྟེང་གི་ཕྱོགས་སུ་འབྲོས་སྙམ་ན༔ སྟེང་ཕྱོགས་མཁའ་སྤྱོད་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་སྟེང་གི་འབྲོས་ལམ་ཆོད༔ གནོད་བྱེད་ལས་ངན་སྡིག་ཅན་ཁྱོད༔ འོག་གི་ཕྱོགས་སུ་མ་འབྲོས་ཤིག༔ འོག་གི་ཕྱོགས་སུ་འབྲོས་སྙམ་ན༔ འོག་ཕྱོགས་ས་སྤྱོད་མཁའ་འགྲོ་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་འོག་གི་འབྲོས་ལམ་ཆོད༔ ཕཊཿ ཧཱུྃ༔ ང་ནི་ཁྲོས་མ་ནག་མོའི་སྐུ༔ གཤེད་པོ་ལས་ངན་སྡིག་ཅན་ཁྱོད༔ ནམ་ལངས་དུས་སུ་མ་འབྲོས་ཤིག༔ ནམ་ལངས་དུས་སུ་བྲོས་གྱུར་ན༔ ནམ་ལངས་དཀར་མོ་སེང་གེའི་གདོང༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ ཉི་དྲོས་དུས་སུ་མ་བྲོས་ཤིག༔ ཉི་དྲོས་དུས་སུ་འབྲོས་སྙམ་ན༔ ཉི་དྲོས་སེར་མོ་སྤྱང་གདོང་མ༔ དེ་ཡང་ང་ཡི་ཕོ་ཉ་ཡིན༔ གནོད་བྱེད་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ ཉིན་གུང་དུས་སུ་མ་འབྲོས་ཤིག༔ ཉིན་གུང་དུས་སུ་འབྲོས་སྙམ་ན༔ ཉིན་གུང་དཀར་སེར་བྱ་རྒོད་གདོང༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ དགོང་ཁའི་དུས་སུ་མ་འབྲོས་ཤིག༔ དགོང་ཁའི་དུས་སུ་བྲོས་གྱུར་ན༔ དགོང་ཁ་སྔོན་མོ་བྱ་རོག་གདོང༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ སྲོད་ཀྱི་དུས་སུ་མ་འབྲོས་ཤིག༔ སྲོད་ཀྱི་དུས་སུ་འབྲོས་སྙམ་ན༔ སྲོད་ནི་དམར་མོ་ཁྭ་ཡི་གདོང༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ ནམ་གུང་དུས་སུ་མ་འབྲོས་ཤིག༔ ནམ་གུང་དུས་སུ་འབྲོས་སྙམ་ན༔ ནམ་གུང་ནག་མོ་སྟག་གདོང་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁྱོད༔ ཐོ་རངས་དུས་སུ་མ་འབྲོས་ཤིག༔ ཐོ་རངས་དུས་སུ་འབྲོས་སྙམ་ན༔ ཐོ་རངས་ལྗང་མོ་ཝ་གདོང་མ༔ དེ་ཡང་ང་ཡི་ཕོ་ཉ་ཡིན༔ གཤེད་པོ་ཁུག་ལ་འབྲོས་ལམ་ཆོད༔ གཤེད་པོ་ལས་ངན་སྡིག་ཅན་ཁུག༔ གཤེད་པོ་ཁུག་ལ་བྲོས་ལམ་ཆོད༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས༔ གནོད་བྱེད་ཟ་འདྲེ་ཤི་གཤེད་ཐམས་ཅད་བྷནྡྷ་བྷནྡྷ་ཧ་ན་ཧ་ན་ཧཱུྃ་ཕཊ༔ ཅེས་ཐམས་ཅད་ཀྱིས་འདུལ་ཆས་རྣམས་ཀྱིས་བརྒྱབ་ཏུ་བཅུག༔ ཕཊཿ དེ་ནས་ལྷ་དབྱེ་བ་ནི༔ ནྲྀ་བྱང་གཤེད་བྱང་དང་བྱ་འུག་གི་སྒྲོ་ཐོགས་ལ་རྫས་ངན་གྱི་དུད་པས་བདུག་སྟེ་འདི་སྐད་དོ༔ ཕཊཿ རང་ཉིད་ཁྲོས་མའི་ཐུགས་ཀ་ནས༔ ལས་བྱེད་དབྱེ་བའི་ཕྲ་མེན་འཕྲོས༔ དམིགས་ཡུལ་རིགས་ཀྱི་བུ་འདི་ལ༔ གསོན་དུས་ཚེ་ལ་བར་གཅོད་པ༔ ཤི་ཚེ་ཕུང་པོ་བདག་ཏུ་བཟུང༔ བླ་མི་བདེ་ཞིང་འགྲོ་ལ་གནོད༔ ཐར་པའི་ལམ་ལ་བར་དུ་གཅོད༔ དེ་འདྲའི་གསོན་བདུད་གཤིན་ལྕགས་ཚོགས༔ བླ་ཡིད་གཤེད་མ་སོ་སོར་དབྱེ༔ དབྱེའོ་དབྱེའོ་གཤེད་དང་དབྱེ༔ ཕྲོལ་ལོ་ཕྲོལ་ལོ་གཤེད་དང་ཕྲོལ༔ གུ་གུལ་སྦྱར་བའི་དུད་པ་འདིས༔ ཕ་ལྷ་ཞང་ལྷ་གཤེད་དང་དབྱེ༔ དབྱེའོ་དབྱེའོ་གཤེད་དང་དབྱེ༔ ཕྲོལ་ལོ་ཕྲོལ་ལོ་གཤེད་དང་ཕྲོལ༔ ཁྱི་བྲུན་ནག་པོའི་དུད་པ་འདིས༔ མ་ལྷ་མ་སྨན་གཤེད་དང་དབྱེ༔ དབྱེའོ་དབྱེའོ་གཤེད་དང་དབྱེ༔ ཕྲོལ་ལོ་ཕྲོལ་ལོ་གཤེད་དང་ཕྲོལ༔ སྤྱང་བྲུན་ཞུགས་ལ་སྦྱར་དུད་འདིས༔ ཚེ་ལྷ་སྲོག་ལྷ་གཤེད་དང་དབྱེ༔ དབྱེའོ་དབྱེའོ་གཤེད་དང་དབྱེ༔ ཕྲོལ་ལོ་ཕྲོལ་ལོ་གཤེད་དང་ཕྲོལ༔ ཡུག་སའི་ལྷྭམ་རྩྭ་དུད་པ་འདིས༔ ཡུལ་ལྷ་ཕྲག་ལྷའི་གཤེད་དང་དབྱེ༔ དབྱེའོ་དབྱེ་འོ་གཤེད་དང་དབྱེ༔ ཕྲོལ་ལོ་ཕྲོལ་ལོ་གཤེད་དང་ཕྲོལ༔ རྩ་སྔགས་མཐར༔ དམིགས་ཡུལ་འདི་ལ་གནོད་པར་བྱེད་པའི་ཟ་འདྲེ་ཤི་གཤེད་དང༔ གསོན་བདུད་གཤིན་ལྕགས་ད་ཕྲོལ་ཅིག༔ ཚེ་ལེན་མདངས་ཕྲོགས་ད་ཕྲོལ་ཅིག༔ སྲོག་གཅོད་དབུགས་ལེན་ད་ཕྲོལ་ཅིག༔ མཱ་ར་ཡ་ཤག་ཤག་ཕྱེ་ཕྱེ་ཨུ་ཙ་ཏ་ཡ་ཕཊཿ དེ་ནས་གཙོ་ཕུར་ཐོགས་ལ་ཕུར་བསྐྱེད་དང་ཚེ་ཁྲུས་ཀྱི་དགོངས་གནད་དང་ལྡན་པས༔ ཧཱུྃ་ཡིག་ལས་བྱུང་ཁྲོས་མ་ནག་མོ་ནི༔ མཐིང་ནག་རབ་བརྗིད་གྲི་གུག་ཐོད་ཁྲག་བསྣམས༔ སྐུ་སྨད་གནམ་ལྕགས་ཕུར་པ་རྣོ་ངར་ཅན༔ གནོད་བྱེད་དགྲ་བགེགས་སྙིང་ལ་ཀཱི་ལ་ཡ༔ ཟ་འདྲེ་ཤི་གཤེད་སྙིང་ལ་མཱ་ར་ཡ༔ གནོད་བྱེད་གཤེད་པོ་ལས་ངན་སྡིག་ཅན་གྱི༔ ལྟ་བྱེད་མིག་ལ་བཛྲ་ཀཱི་ལ་ཡ༔ སྣོམ་བྱེད་སྣ་ལ་བཛྲ་ཀཱི་ལ་ཡ༔ ཉན་བྱེད་རྣ་ལ་བཛྲ་ཀཱི་ལ་ཡ༔ སྨྲ་བྱེད་ལྕེ་ལ་བཛྲ་ཀཱི་ལ་ཡ༔ བསམ་བྱེད་སྙིང་ལ་བཛྲ་ཀཱི་ལ་ཡ༔ རྙབ་བྱེད་ལག་ལ་བཛྲ་ཀཱི་ལ་ཡ༔ འགྲོ་བྱེད་རྐང་ལ་བཛྲ་ཀཱི་ལ་ཡ༔ སྲོག་ཡིག་ཏྲི་ལ་བཛྲ་ཀཱི་ལ་ཡ༔ སྟོབས་ནུས་མཐུ་ལ་བཛྲ་ཀཱི་ལ་ཡ༔ སྟོབས་ནུས་བརྟུལ་ཞུགས་བརླག་པའི་དུས་ལ་བབས༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས་བཛྲ་ཀི་ལི་ཀཱི་ལ་ཡ་གནོད་བྱེད་ཟ་འདྲེ་ཤི་གཤེད་གཤེད་སྲི་མཱ་ར་ཡ་ཧཱུྃ་ཕཊ༔ ཅེས་ཕུར་པ་བཏབ༔ ཕཊཿ བདག་ཉིད་མ་སྐྱེས་ཡེ་ནས་རང་བཞིན་སྤྲོས་མཐའ་བྲལ་བའི་ཐུགས་རྗེ་ཁྲོས་མ་ནག་མོ་ཕྱག་གཉིས་གནམ་ལྕགས་ཀྱི་ཕུར་པ་འདྲིལ་བ༔ དམིགས་བྱའི་སྙིང་དཀར་ནག་མཚམས་སུ་གཟིར་བས་ཚེ་བསོད་ཀྱི་ངོ་བོ་ཐིག་ལེ་འོད་ལྔ་འཁྱིལ་བའི་ཀློང་ན་རྣམ་པར་ཤེས་པའི་ངོ་བོ་ཨ་དཀར་པོ་ཕུར་རྩེ་གཏད་པ་ཙམ་གྱིས་ཕུར་བུའི་ཁོང་སེང་ནས་བརྒྱུད༔ ལས་ངན་གྱི་སྒྲིབ་པ་སྦྱངས༔ ཡུམ་ཆེན་མོའི་མཁའ་ཀློང་དུ་སངས་རྒྱས་པར་བསམ༔ ཕཊཿ ཚེ་བསོད་ནྲི་ལྗང་གི་རྣམ་པས་བདག་ལ་བསྟིམ༔ ཚེ་བསོད་ཀྱི་གསོས་ཐེབས་པར་བསམ༔ ཕཊཿ ཕཊཿ ཕཊཿ མཚོན་གྱིས་བསྒྲལ་བ་ནིཿ ཕཊཿ བདག་ལས་སྤྲུལ་པའི་ཕོ་ཉ་ནི༔ མཁའ་འགྲོ་དམར་མོས་ཆུ་གྲི་ཕྱར༔ གཤེད་པོ་ལས་ངན་སྡིག་ཅན་གྱི༔ བླ་སྲོག་རྣམ་ཤེས་རྟེན་དང་ཕྲོལ༔ མགོ་དང་ཡན་ལག་སོ་སོར་ཕྱེ༔ ཤ་རུས་ལྤགས་པ་རྩ་རྒྱུས་དང༔ ནང་རོལ་དོན་སྙིང་སིལ་བུར་གཏུབ༔ རྡུལ་ཕྲན་བཞིན་དུ་བརླག་པར་མཛོད༔ ཉིན་ཐ་མའི་དུས་ཚེར་ལིང་ཤོག་ལིང་རྣམས་མཚོན་ཆས་བསྒྲལ། མཆན། རྩ་སྔགས་དང་དྲག་སྔགས་མཇུག་ཏུ༔ བཛྲ་ཧ་ན་མ་ཐ་ད་ཧ་པ་ཙ་དི་ན་མི་གེ་གནོད་བྱེད་འབྱུང་པོ་ཐམས་ཅད་མ་རཱ་ཡ་ཧཱུྃ་ཕཊ༔ དེ་ནས་ཐུན་བྲབ་པ་ནི༔ ཕཊཿ ང་ནི་ཁྲོས་མ་ནག་མོ་ཡི༔ སྤྲུལ་པའི་ཁྲོས་མ་ལྷ་ལྔ་མ༔ ཕྱག་ན་ཡུངས་དཀར་ཡུངས་ནག་དང༔ རྡོ་ལྕགས་ཟངས་ཕྱེ་མཚེ་མདའ་མདུང༔ མེ་དཔུང་དུག་ཁྲག་གཏོར་ཟོར་ཐོག༔ དམ་ཉམས་གཤེད་པོ་ལས་ངན་འདིའི༔ བསམ་པའི་སྙིང་ལ་ཤན་ཤན་རྦད༔ ལྟ་བའི་མིག་ལ་ཤན་ཤན་རྦད༔ ཉན་པའི་རྣ་ལ་ཤན་ཤན་རྦད༔ སྣོམ་པའི་སྣ་ལ་ཤན་ཤན་རྦད༔ མྱོང་བའི་ལྕེ་ལ་ཤན་ཤན་རྦད༔ རེག་ཕུང་ལུས་ལ་ཤན་ཤན་རྦད༔ ཕུང་ཁམས་སྐྱེ་མཆེད་མཱ་ར་ཡ༔ རྩི་སྦུར་མེ་དང་འཕྲད་བཞིན་ཐོངས༔ ཕཊཿ ཕཊཿ ཕཊཿ བཾ་ཧ་རི་ནི་ས་ཌཀྐི་ནི་ཟ་འདྲེ་འབྱུང་པོ་མཱ་ར་ཡཱ་རྦད༔ དེ་ནས་བདེན་པའི་ཆོས་བཤད་པ་ནི༔ ཕཊཿ ཀྱཻ༔ ཉོན་ཅིག་གཤེད་པོ་སྡིག་ཅན་ཁྱོད༔ མི་དགེ་བཅུ་པོ་སྤྱད་སྤྱད་པའི༔ རྣམ་སྨིན་འབྲས་བུ་སོ་སོར་མྱོང༔ དེ་ལས་ལྡོག་པའི་དགེ་བཅུ་སྒྲུབ༔ གནས་སྐབས་བདེ་ཞིང་མཐར་ཐུག་གྲོལ༔ དམ་ཉམས་གཤེད་པོ་སྡིག་ཅན་ཁྱོད༔ ཉོན་མོངས་རྒྱུད་ལས་རབ་གྲོལ་ནས༔ ཡང་དག་ཆོས་དང་ལྡན་པར་འགྱུར༔ འཁོར་བ་དོང་ནས་སྤྲུགས་པར་ཤོག༔ ཆོས་རྣམས་ཐམས་ཅད་སོགས་ བསྟན་པ་ཡིན༔ ཕཊཿ ཕཊཿ ཕཊཿ དེ་ནས་འདུལ་ཆས་རྣམས་ཧོམ་ཁུང་གི་གཡས་གཡོན་དུ་བཞག་ལ་སླ་ངའི་ལིང་རོ་དང་བཅས་པ་གཅོད་གཡོག་གིས་བཀྱགས་ལ་ཕྱོགས་བཞི་དབུས་ལྔར་བསྟབ་པ་བྱེད་པ་ཡིན༔ མཁའ་འགྲོ་མ་རྣམས་ཀྱིས་ཟ་འདྲེའི་ཤ་ཁྲག་ཧབ་ཐོབ་ཏུ་གསོལ་བར་བསྒོམ༔ ཕཊཿ ཧཱུྃ༔ མ་ཅིག་ཁྲོས་མ་ནག་མོ་དང༔ བཛྲ་རཏྣ་པདྨ་དང༔ ཀརྨ་མཁའ་འགྲོས་ཞལ་ཕྱེས་ཤིག༔ གདོན་དུག་ལྔ་བསྒྲལ་བའི་ཕུང་པོ་འདི༔ ཌཱཀྐི་སྡེ་ལྔའི་ཞལ་དུ་སྟོབས༔ གཟུགས་ཤ་ཁྲག་རུས་པའི་མཆོད་པ་བཞེས༔ སེམས་སྐྱེ་མེད་ཆོས་དབྱིངས་ངང་དུ་དྲོངས༔ ཡེ་ཤེས་ལྔ་ཡི་དངོས་གྲུབ་སྩོལ༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་བཾ་ཧ་རི་ནི་ས་གནོད་བྱེད་ཟ་འདྲེ་ཤི་གཤེད་ཀྱི་མ་ཧཱ་མཾ་ས་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་ཀེཾ་ནི་རི་ཏི་ལ་ཁཱ་ཧི༔ ཕཊཿ ཕཊཿ ཕཊཿ དེ་ནས་ཟན་ལིང་ཅུང་ཟད་ཅིག་གཏོར་མའི་རྩར་འབུལ། མཆན། ཤོག་ལིང་དང་ལིང་རོ་བྱང་བུ་རྣམས་ལྕགས་ཁང་ནང་དུ་བླུག་ནས༔ ཕཊཿ ཨེ་ལས་གནམ་ལྕགས་ཀྱི་ཁང་སྒྲོམ་མེ་འབར་བ༔ དཔང་མཐོ་ཞིང་གཏིང་ཟབ་པ༔ སྟོད་ལ་ཞེ་སྡང་གི་མེ་འབར་བ༔ སྨད་ལ་འདོད་ཆགས་ཀྱི་ཁྲག་མཚོ་འཁྱིལ་བ༔ བར་ན་གཏི་མུག་གི་མུན་པ་འཐིབས་པ༔ ང་རྒྱལ་གྱི་བྲག་རི་རྙིལ་བ༔ ཕྲག་དོག་གི་རླུང་དམར་འཚུབས་པ༔ དེའི་ནང་དུ་བྱད་མ་གནོད་བྱེད་ཟ་འདྲེ་འབྱུང་པོ་ཐམས་ཅད་ཚུད་པར་བསམ༔ ཕཊཿ དེ་ནས་དུས་དྲུག་དམིགས་སྔགས་གནད་འབེབས་ནི༔ ཕཊཿརང་ཉིད་ཕག་མོའི་ཐུགས་ལས་ཕཊཿཛ་འཕྲོས༔ བྲུབ་ཁུང་ནང་གི་ཟ་འདྲེའི་སྙིང་ཁར་ཟུག༔ རྣོ་ངར་ཟངས་ལྕགས་རྩིབས་སྟོང་གཡས་གཡོན་འཁོར༔ སྲོག་སྙིང་དཀྲུགས་ཅིང་ཚལ་པ་དུམ་བུར་གཏུབ༔ ཁོ་ལ་ན་ཚ་ཟུག་གཟེར་མི་སྐྱེ་ཞིང༔ དྲན་པ་གཏད་མེད་བདེ་སྟོང་ངང་དུ་བརྒྱལ༔ བསྙེན་སྒྲུབ་ལས་སྦྱོར་སྔགས་ཤམ་དུ༔ གནོད་བྱེད་ཟ་འདྲེ་ཤི་གཤེད་ཀྱི་སྲོག་ལ་དྲིག་ནན༔ ཨེ་ཧུར་ཐུམ་ཛཿ མཱ་ར་ཡ་རྦད་ནན༔ ཅེས་རྟགས་མ་ཐོན་བར་བཟླས་ཤིང་དམིགས་རིམ་གསལ་འདེབས་པར་བྱའོ༔ ཕཊཿ སླར་ཡང་གནམ་ལྕགས་ཀྱི་འཁོར་ལོ་རྩིབས་བརྒྱད་པས་ཁ་བཅད༔ མི་ལྤགས་ཀྱི་གཡང་གཞི་འབར་བས་བཀབ༔ མུན་པ་ནག་པོ་དགུ་རིམ་གྱིས་གཡོག་པར་བསམ༔ ཕཊཿ ཕཊཿ ཕཊཿ སླ་ངས་འགེབ་སྟངས་དང་ཕཊ་སྒྲ་རེ་སྦྲགས། མཆན། ཕཊཿ ཕཊཿ ཕཊཿ ཕཊཿ ཕཊཿ ཕཊཿ ཕཊཿ ཕཊཿ ཕཊཿ དེ་ནས་ཧོམ་ཁུང་སྟེང་དུ་ཕུར་བུ་བཙུག༔ བྲུབ་ཁུང་སྟེང་དུ་མ་ཅིག་མཁའ་འགྲོ་མ་ནག་མོ་འཇིགས་སུ་རུང་བ་གཅིག་གི་སྐུ་སྨད་ཕུར་བུས་ཟ་འདྲེ་ཤི་གཤེད་ཐམས་ཅད་གཟེར་བའི་ལས་བྱེད་པར་གྱུར༔ ཕུར་པ་དང་གཏོར་མ་དབྱེར་མེད་དུ་བསྒོམ༔ ཕཊཿ གཏད་མེད་ཀྱི་ངང་དུ་བཞག༔ དེ་ནས་ཡང་འདུལ་གནས་གཞི་དང་བཅས་པ་སྟོང་པར་བསམ༔ ཕཊཿ མ་རིག་གཤེད་དུ་ཆེ་བ་ལ༔ རང་རིག་ཡེ་ཤེས་སྒྲོན་མེས་གསལ༔ བདག་འཛིན་དུག་གི་སྡོང་པོ་འདི༔ གཉིས་མེད་འཕྲུལ་གྱི་སྟྭ་རེས་བཅད༔ ངན་སོང་གསུམ་སོགས་སྡུག་བསྔལ་འབྲས༔ ཐུགས་རྗེ་ཡེ་ཤེས་བདུད་རྩིས་གསོས༔ གཟུང་འཛིན་འཁྲུལ་བའི་བདུད་ཀྱི་སྡེ༔ དབྱེར་མེད་ཟང་ཐལ་མཚོན་གྱིས་གཏུབ༔ འཁྲུལ་འཛིན་ཨ་འཐས་བག་ཆགས་ཀུན༔ རྨི་ལམ་འཁྲུལ་འཁོར་ཞིག་པ་བཞིན༔ དབྱིངས་ཡུམ་མཁའ་འགྲོའི་ཀློང་དུ་སད༔ ཡུམ་ཆེན་རྒྱལ་ས་ཐོབ་པར་ཤོག༔ ཅེས་བདག་མེད་གནས་ལུགས་རང་གཞིའི་ཞལ་མཐོང་བར་བཞག༔ ས་མ་ཡཱ༔ ཡང་གསང་མཁའ་འགྲོའི་སྙིང་གི་ཁྲག༔ ཨ་ཙར་སྤྲུལ་པའི་ཐུགས་ལ་གབ༔ མ་འོངས་སུམ་ཅུ་ཁ་རལ་དུས༔ འགྲོ་ལ་ཕན་ཕྱིར་གཏད་རྒྱ་བཀྲོལ༔ ལས་ལྡན་སློབ་བུ་ཆོས་ལ་དབང༔ གང་གི་དངོས་གྲུབ་སྐལ་བར་གནང༔ བཀའ་སྲུང་མ་གཟའ་བཙན་ཀླུ་རྒྱལ༔ གཏེར་འདི་སྲུངས་ཤིག་ན་ར་ཀན༔ དམ་མེད་འཆོལ་སྤྱོད་ལག་མ་འཆོར༔ དམ་ལྡན་ཡོངས་ལ་གཏད་དོ་རྒྱ༔ དུས་བབ་གཏེར་འདོན་འགྲོ་འདྲེན་པ༔ བསམ་གཏན་ཡེ་ཤེས་གླིང་པ་ལ༔ རིག་རྩལ་མཁའ་འགྲོའི་བརྡས་བསྐུལ་ནས༔ སློབ་བུ་འགའ་ཡི་བཞེད་དོན་དུ༔ གཅོད་འདུལ་གདུག་པ་དམ་འདོག་གི༔ འདུལ་གཞུང་ཉུང་བསྡུས་གསལ་བ་ལ༔ དེ་ཡི་མ་ཚང་ཁ་སྐོང་དུ༔ མཁས་གྲུབ་རཱ་ག་ཨ་སྱ་ཡི༔ གཅོད་འདུལ་གཞིར་བཞག་བསྒྲིགས་ཆོག་འདི༔ ལྕགས་བྱི་ཟླ་བའི་ཚེས་བཅུ་ལ༔ སློབ་འབངས་ཐ་ཤལ་རས་མིང་ཟུང༔ འཆད་རྩོད་བདག་ལ་དབེན་མོད་ཀྱང༔ བསམ་པ་ཀུན་སློང་བཟང་པོས་བྲིས༔ ཉེས་འགལ་མཁའ་འགྲོའི་ཚོགས་ལ་བཤགས༔ དགེ་ཚོགས་མཆིས་ན་འགྲོ་ལ་བསྔོ༔ སངས་རྒྱས་བསྟན་པ་དར་བ་དང༔ སེམས་ཅན་བདེ་སྐྱིད་དཔལ་འབར་ཤོག༔ ཤུ་བྷཾ༔