འདུལ་རྒྱབ་བསྡུས་པ།
དེ་ནས་འདུལ་རྒྱབ་བསྡུས་པ་ལ༔ གཅོད་གཡོག་གིས་འདུལ་ཆས་རྣམས་བཟུང་ལ་འདི་བཞིན་གྱེར༔ ཧཱུྃ༔ ཐུགས་རྗེ་ཁྲོས་མ་ནག་མོ་ཡི༔ བཀའ་ཡི་ཕོ་ཉ་ལས་མཁན་ནི༔ རིགས་བཞི་མཁའ་འགྲོ་བྱེ་བ་འབུམ༔ ཀུན་ཀྱང་མ་ངེས་བརྟུལ་ཞུགས་ངོམ༔ དུར་ཁྲོད་ཆས་རྫོགས་རང་རྟགས་མཛེས༔ ཕྱག་ན་མཚོན་ཆ་སྣ་ཚོགས་བསྣམས༔ དོན་ལ་སངས་རྒྱས་ཡིན་མོད་ཀྱི༔ ཁྱོད་ཀྱི་ཐུགས་དམ་དུས་ལ་བབས༔ གཤེད་པོ་བསྒྲལ་འདུལ་དུས་ལ་བབས༔ སྔོན་ཚེ་བསྐལ་པའི་དང་པོ་ལ༔ བཅོམ་ལྡན་ཁྲོས་ནག་རྟ་ཕག་གིས༔ བདུད་པོ་རུ་ཏྲ་ནག་པོ་བཏུལ༔ རུ་ཏྲ་འདུལ་བའི་ཕུང་པོ་ལ༔ རང་གཤེད་དྲག་པོའི་འདུལ་ཆས་བྱུང༔ རུ་ཏྲ་བསྒྲལ་བའི་ཆས་རྣམས་ལ༔ གཤེད་པོ་འདུལ་བའི་གཉེན་པོ་བྱུང༔ གནོད་བྱེད་ཟ་འདྲེ་ཤི་གཤེད་དང༔ གྲི་སྲི་གྲི་གཤེད་ཐམས་ཅད་དང༔ ལས་ངན་གཤེད་པོ་དམ་ཉམས་ཀྱི༔ མགོ་ལུས་དོན་སྙིང་དུམ་བུར་ཕྲོལ༔ ཡན་ལག་གཟུགས་བཞི་སིལ་བུར་ཐོངས༔ ཤ་དང་རུས་པ་ད་ཕྲོལ་ལ༔ སྲོག་རྩ་དམར་པོ་སྒལ་གྱིས་ཆོད༔ ཐལ་བ་རྡུལ་དུ་བརླག་པར་མཛོད༔ ཨོཾ་བཛྲ་ཝ་ར་ཧི་ཀྲོ་ཏི་ཀ་ལི་ཧ་རི་ནི་ས་གནོད་བྱེད་ཟ་འདྲེ་ཤི་གཤེད་ཤི་སྲི་ཐམས་ཅད་ཧ་ན་ཧ་ན་ཧཱུྃ་ཕཊ༔ ཕཊཿ ཕཊཿ ཕཊ༔ ཅེས་སྔགས་འདོན་ཅིང་རིམ་པར་རྒྱབ༔ འདུལ་ཆས་རྒྱབ་དུས༔ ཆུ་ཡིས་ཤི་ན་དུག་ཆུའི་རྦ་རླབས༔ གྲི་ལ་ཤི་ན་རལ་གྲིའི་ཆར༔ མདས་ཤི་ན་མདའ་ཡི་ཆར༔ འགག་གྲི་ལ་ཞག་པ་སོགས༔ རང་ལ་གནོད་པ་འབེབས་པའི་དམིགས་པ་ཕོ་གདོན་ལ་རྡོ་ཐུན༔ མོ་གདོན་ལ་ཁྲག་ཐུན༔ ཀླུ་གདོན་ལ་དུག་ཐུན༔ དམིགས་པ་སྤྲོ་ན་ཐུན་བརྡེགས་མཇུག་ཏུ་འདོན༔