ཚེ་འདས་གཤེད་དང་བྲལ་ནས་རིགས་དྲུག་གི་སྡུག་བསྔལ་ལས་ཐར་ཏེ་བདེ་ཆེན་དུ་བགྲོད་པའི་ཆོ་ག་གནས་འདྲེན།

ཚེ་འདས་གཤེད་དང་བྲལ་ནས་རིགས་དྲུག་གི་སྡུག་བསྔལ་ལས་ཐར་ཏེ་བདེ་ཆེན་དུ་བགྲོད་པའི་ཆོ་ག་གནས་འདྲེན་ཞེས་བྱ་བ་བཞུགས༔

དེ་ནས་དང་པོ་ཚེ་འདས་མིང་བྱང་ལ་ཡིད་ཆགས་ཀྱི་རྫས་བཏགས༔ གདན་པདྨའི་སྟེང་དུ་བཞག༔ རིགས་དྲུག་གི་གཏོར་མ་དང་ཇ་ཆང་དཀར་མངར་རེག་བྱ་བཤམས༔ སྟོང་ཉིད་སྙིང་རྗེ་དང་མ་བྲལ་བའི་ངང་ནས༔ ཕཊཿ རང་ཉིད་ཆོས་སྐུ་ཡུམ་ཆེན་མོ་གསེར་མདོག་རྒྱན་ཆ་ལུགས་ཡོངས་སུ་རྫོགས་པ་ཞལ་གཅིག་ཕྱག་བཞི༔ ཕྱག་དང་པོ་གཉིས་རལ་གྲི་གླེགས་བམ༔ འོག་མ་གཉིས་ལྕགས་ཀྱུ་བུམ་པ༔ ཞབས་རྡོ་རྗེ་དཀྱིལ་ཀྲུང་པད་ཉི་ཟླ་བའི་གདན་ལ་བཞུགས་པ༔ དབུ་གཙུག་ན་ཀུན་ཏུ་བཟང་པོ༔ འཁོར་དུ་རྒྱལ་བ་རིགས་བཞི༔ ཐུགས་ཀ་ན་རྡོ་རྗེ་སེམས་དཔའ་གསལ་བར་གྱུར༔ དེ་ཡི་ཐུགས་ཀར་བཾ་ཡིག་གི་དབུས་སུ་ཧཱུྃ་ཡིག་དཀར་པོ་དེ་ལས་འོད་ཟེར་འཕྲོས༔ ཚེ་འདས་ཀྱི་རྣམ་པར་ཤེས་པ་ཁམས་གསུམ་རིགས་དྲུག་གང་ན་ཡོད་པ་དེ་ལ་ཕོག་མ་ཐག་ཏུ་རྡོ་ཁབ་ལེན་གྱིས་ལྕགས་ལེན་པ་ལྟར་བཀུག་ནས་མདུན་གྱི་དམིགས་རྟེན་འདི་ལ་ཁུག་ཅིག༔ ན་མོ་རྗེ་བཙུན་རིག་འཛིན་གྲུབ་ཐོབ་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་བཀའ་བདེན་པ་དང༔ དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང༔ ཡི་དམ་རྒྱལ་བ་ཞི་ཁྲོའི་ལྷ་ཚོགས་རྣམས་ཀྱི་བཀའ་བདེན་པ་དང༔ གནས་གསུམ་མཁའ་འགྲོའི་བདག་ཉིད་མ་ཅིག་ལབ་ཀྱི་སྒྲོན་མའི་བཀའ་བདེན་པ་དང༔ རིགས་ལྔ་རིགས་ཀྱི་མཁའ་འགྲོ་བྱེ་བ་འབུམ་དང་བཅས་པའི་བཀའ་བདེན་པ་དང༔ བཀའ་སྲུང་དྲང་སྲོང་ཆེན་པོ་ཟངས་རི་བཙན་རྒོད་མཆེད་གཉིས༔ ཀླུ་རྒྱལ་དྲག་པོ་ཟླ་སྐྱོང་ལ་སོགས་སྲུང་མ་དམ་ཅན་རྒྱ་མཚོའི་བཀའ་བདེན་པ་དང༔ བདེན་པ་ཆེན་པོའི་མཐུ་སྟོབས་ནུས་པ་ལ་བརྟེན་ནས་འཇིག་རྟེན་འདི་ནས་འཇིག་རྟེན་ཕ་རོལ་དུ་སོང་བའི་ཆེ་གེ་མོ་རྣམ་པར་ཤེས་པ་ཁམས་གསུམ་རིགས་དྲུག་སྡུག་བསྔལ་གྱི་གནས་ཡུལ་གང་ན་ཡོད་ཀྱང་སྐད་ཅིག་ཡུད་ཙམ་གྱིས་རྟེན་མིང་བྱང་འདི་ལ་ཁུག་ཅིག༔ ནྲི་ཛཿཧཱུྃ་བཾ་ཧོ༔ ཨ་ནྲི་སུ་ཏྲི་པྲེ་དུ་མ་མ་ཨཾ་ཀུ་ཤ་ཡ་ཛ༔ དེ་ནས་རྟེན་ངོ་སྤྲོད་པ་ནི༔ བཾ་ཧཱུྃ༔ ཉོན་ཅིག་དམིགས་ཡུལ་རིགས་ཀྱི་བུ༔ མིང་གཟུགས་སྐྱེ་མཆེད་ལུས་ཀྱི་རྟེན༔ མེ་ལོང་གསལ་བ་སེམས་ཀྱི་རྟེན༔ སྦ་སྨྱུག་ལྡེམ་པ་འཇུ་བའི་ཤིང༔ རིན་ཆེན་གདུགས་མཆོག་བསིལ་གྲིབ་ལྡན༔ གཞོན་ཚུལ་པུས་བཙུགས་ཐལ་མོ་སྦྱར༔ དམིགས་པའི་རྟེན་དང་གཉིས་མེད་གྱུར༔ ཆེ་གེ་མོ་ཏིཥྛ་བཛྲ་ས་མ་ཡཱ་ལྷན༔ ཞལ་ཟས་རིན་པོ་ཆེའི་སྣོད་དུ་བཞག་ནས༔ ཨ་ཀ་རོས་བྱིན་གྱིས་བརླབས་ཏེ༔ ཨོཾ་ཨཱཿཧཱུྃ༔ ཞལ་ཟས་རོ་བརྒྱ་ལྡན་པའི་ཡིད་འཕྲོག་པ༔ ལེགས་སྦྱར་འདི་ནི་སངས་རྒྱས་བྱང་སེམས་དང༔ བླ་མ་ཡི་དམ་མཁའ་འགྲོའི་ཚོགས་རྣམས་ལ༔ དད་པས་ཕུལ་བས་ཚེ་འདས་འདི་ཉིད་ཀྱིས༔ འབྱོར་ལྡན་ཏིང་འཛིན་ཟས་ལ་ལོངས་སྤྱོད་ཤོག༔ ངན་སོང་གནས་སྦྱང་ཐར་པའི་ལམ་སྣ་དྲོངས༔ ཨོཾ་བུདྡྷ་བོ་དྷི་ས་ཏྭ་གུ་རུ་དྷེ་ཝ་ཌཱཀྐི་ནི་ཨེ་དམ་བྷ་ལིང་ཏ་ཁཱ་ཧི༔ བགེགས་འབྲང་བཤམས་ཤིང་བྱིན་གྱིས་བརླབ༔ བཾ་ཧཱུྃ༔ ཚེ་འདས་གཤེད་དང་བྲལ་བ་ལ༔ མི་ཉན་གླགས་ལྟ་བར་གཅོད་བདུད༔ སྣང་ཞིང་སྲིད་པའི་ལྷ་སྲིན་ལ༔ ལན་ཆགས་ཤ་ཁྲག་གཏོར་མ་བསྔོ༔ སརྦ་བྷུ་ཏ་གྷྲྀ་ཧ་ན་ཨེ་དཾ་བྷ་ལིང་ཏ་ཁཱ་ཧི༔ སརྦ་བིགྣཾ་གཙྪ༔ ཀྱེ་མ་ཚེ་འདས་རིགས་ཀྱི་བུ༔ མཐོ་དམན་རིགས་དྲུག་གར་སྐྱེས་ཀྱང༔ བདེན་མེད་སྡུག་བསྔལ་དྲི་ཟའི་གྲོང༔ བདག་ནི་ཁྱོད་ཉིད་འདྲེན་པ་ཡིན༔ རྩེ་གཅིག་གུས་པས་གསོལ་བ་ཐོབ༔ དེ་ནས་རིགས་དྲུག་སོ་སོ་ལ་གཏོར་མ་བསྔོ་བ་ནི༔ བཾ་ཧཱུྃཿ གཏོར་མ་འདོད་ཡོན་ལྔ་ལྡན་པའི༔ མཁོ་དགུའི་ལོངས་སྤྱོད་ཕུན་སུམ་ཚོགས༔ ཚེ་འདས་ཞེ་སྡང་ལས་བསགས་པའི༔ ཚ་གྲང་སྡུག་བསྔལ་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་ཧཱུྃ༔ རྡོ་རྗེ་སེམས་དཔས་བྱིན་བརླབས་པའི༔ མ་མ་ཀི་ཡི་རང་བཞིན་ཆབ༔ བཟོད་པའི་ཆུ་ཡིས་ལེགས་བགོས་པས༔ ཁོང་ཁྲོའི་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱི་ཁྲུས་བགྱིའོ༔ མངོན་དགའི་ཞིང་དུ་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་བཛྲ་ས་ཏྭ་ས་མ་ཡཱ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་ཚེ་འདས་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ ཞེ་སྡང་སྲོག་གཅོད་བསགས་པའི་འབྲས༔ ད་ལྟ་དམྱལ་བའི་གནས་སུ་སྐྱེས༔ ཚ་དམྱལ་བརྒྱད་དང་གྲང་དམྱལ་བརྒྱད༔ ཉི་ཚེ་ཉེ་འཁོར་ཤལ་མ་ལི༔ དེ་དག་རང་བྱས་འབྲས་བུ་ཡིན༔ བཙོ་བསྲེག་ཚ་གྲང་དཔག་མེད་སྤྱོད༔ ང་ནི་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ དམྱལ་བའི་གནས་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ ཡང་གཏོར་མ་བསྔོ་བ་ནི༔ བཾ་ཧཱུྃ༔ གཏོར་མ་འདོད་ཡོན་ལྔ་ལྡན་པའི༔ མཁོ་དགུའི་ལོངས་སྤྱོད་ཕུན་སུམ་ཚོགས༔ ཚེ་འདས་སེར་སྣའི་ལས་བསགས་པའི༔ བཀྲེས་སྐོམ་སྡུག་བསྔལ་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་ཏྲཾ༔ རིན་ཆེན་འབྱུང་ལྡན་བྱིན་བརླབས་པའི༔ སངས་རྒྱས་སྤྱན་མའི་རང་བཞིན་ཆབ༔ སྦྱིན་པའི་ཆུ་ཡིས་ལེགས་བགོས་པས༔ སེར་སྣའི་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱི་ཁྲུས་བགྱི་འོ༔ དཔལ་ལྡན་ཞིང་དུ་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་རཏྣ་ས་ཏྭ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ སེར་སྣ་འཇུར་གེགས་རྣམ་སྨིན་གྱིས༔ ད་ལྟ་ཡི་དྭགས་གནས་སུ་སྐྱེས༔ ཡི་དྭགས་ཕྱི་ནང་སྒྲིབ་པ་ཅན༔ མེ་ལྕེ་འཁོར་ལོ་མཁའ་རྒྱུའི་གདོན༔ བཀྲེས་སྐོམ་དབུལ་ཕོངས་སྡུག་རེ་བསྔལ༔ ང་ནི་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ ཡི་དྭགས་གནས་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ ཡང་གཏོར་མ་བསྔོ་བ་ནི༔ བཾ་ཧཱུྃ༔ གཏོར་མ་འདོད་ཡོན་ལྔ་ལྡན་པའི༔ མཁོ་དགུའི་ལོངས་སྤྱོད་ཕུན་སུམ་ཚོགས༔ ཚེ་འདས་གཏི་མུག་ལས་བསགས་པའི༔ བཀོལ་སྤྱོད་སྡུག་བསྔལ་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་ཧཱུྃ༔ རྣམ་པར་སྣང་མཛད་བྱིན་བརླབས་པའིྀ༔ དབྱིངས་ཕྱུག་མ་ཡི་རང་བཞིན་ཆབ༔ ཤེས་རབ་ཆུ་ཡིས་ལེགས་བགོས་པས༔ གཏི་མུག་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱི་ཁྲུས་བགྱིའོ༔ སྟུག་པོ་བཀོད་ཞིང་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་བུདྡྷ་ས་ཏྭ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་ཚེ་འདས་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ གཏི་མུག་བཀོལ་སྤྱོད་བསགས་པའི་འབྲས༔ ད་ལྟ་དུད་འགྲོའི་གནས་སུ་སྐྱེས༔ བྱིང་ན་གནས་དང་ཁ་འཐོར་བ༔ བདག་ཏུ་བཟུང་དང་མ་བཟུང་བ༔ རྐང་བཞི་རྐང་མང་རྐང་མེད་སོགས༔ གདོལ་བ་ཀླུ་རིགས་རྣམ་པ་ཀུན༔ བླུན་རྨོངས་གཏི་མུག་དབང་དུ་སོང༔ བཀོལ་སྤྱོད་སྡུག་བསྔལ་བརྗོད་ལས་འདས༔ དེ་དག་རང་བྱས་འབྲས་བུ་ཡིན༔ ང་ནི་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ དུད་འགྲོའི་གནས་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ དེ་ནས་གཏོར་མ་བསྔོ་བ་ནི༔ བཾ་ཧཱུྃ༔ གཏོར་མ་འདོད་ཡོན་ལྔ་ལྡན་པའི༔ མཁོ་དགུའི་ལོངས་སྤྱོད་ཕུན་སུམ་ཚོགས༔ ཚེ་འདས་ཕྲག་དོག་ལས་བསགས་པའི༔ འཐབ་རྩོད་སྡུག་བསྔལ་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་ཨཾ༔ དོན་ཡོད་གྲུབ་པས་བྱིན་བརླབས་པའི༔ དམ་ཚིག་སྒྲོལ་མའི་རང་བཞིན་ཆབ༔ སྤྲོ་དགའ་ཆུ་ཡིས་ལེགས་བགོས་པས༔ ཕྲག་དོག་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱིས་ཁྲུས་བགྱིའོ༔ ལས་རབ་ཞིང་དུ་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་ཀརྨ་ས་ཏྭ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ ཕྲག་དོག་འཐབ་རྩོད་ལས་བསགས་འབྲས༔ ད་ལྟ་ལྷ་མིན་གནས་སུ་སྐྱེས༔ ཚིག་རྩུབ་མཚོན་ཆ་སྙིང་ལ་བརྒྱབ༔ ཕ་རོལ་ཁྱད་གསོད་ལས་དབང་གིས༔ འཐབ་རྩོད་སྡུག་བསྔལ་དོས་རེ་གྲགས༔ དེ་དག་རང་བྱས་འབྲས་བུ་ཡིན༔ ང་ནི་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ ལྷ་མིན་གནས་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ སླར་ཡང་གཏོར་མ་བསྔོ་བ་ནི༔ བཾ་ཧཱུྃ༔ གཏོར་མ་འདོད་ཡོན་ལྔ་ལྡན་པའི༔ མཁོ་དགུའི་ལོངས་སྤྱོད་ཕུན་སུམ་ཚོགས༔ ཚེ་འདས་ང་རྒྱལ་ལས་བསགས་པའི༔ འཕོ་ལྟུང་སྡུག་བསྔལ་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་སྭ༔ འཕགས་པ་གསེར་ཐུབ་བྱིན་བརླབས་པའི༔ ནོར་རྒྱུན་མ་ཡི་རང་བཞིན་ཆབ༔ ཏིང་འཛིན་ཆུ་ཡིས་ལེགས་བགོས་པས༔ ང་རྒྱལ་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱི་ཁྲུས་བགྱི་འོ༔ ཡོན་ཏན་བརྩེགས་ཞིང་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་རཏྣ་ས་ཏྭ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ ང་འོ་ང་རྒྱལ་ལས་བསགས་འབྲས༔ ད་ལྟ་ལྷ་ཡུལ་གནས་སུ་སྐྱེས༔ འཕོ་ལྟུང་སྡུག་བསྔལ་བརྗོད་ལས་འདས༔ གཟུགས་མེད་གཉིད་ལས་སད་པ་བཞིན༔ ངན་སོང་གནས་མཐོང་སྡུག་བསྔལ་མྱོང༔ ང་ཉིད་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ རྣམ་གཡེང་གནས་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ སླར་ཡང་གཏོར་མ་བསྔོ་བ་ནི༔ བཾ་ཧཱུྃ༔ གཏོར་མ་འདོད་ཡོན་ལྔ་ལྡན་པའི༔ མཁོ་དགུ་ལོངས་སྤྱོད་ཕུན་སུམ་ཚོགས༔ ཚེ་འདས་འདོད་ཆགས་ལས་བསགས་པའི༔ བུ་ལོན་ལན་ཆགས་སྦྱང་ཕྱིར་དུ༔ གསོན་བདུད་གཤིན་ལྕགས་ཚོགས་ལ་བསྔོ༔ ཁྱེད་རྣམས་བྱང་ཆུབ་ཡི་རང་ནས༔ ཕན་པའི་སེམས་དང་ལྡན་པར་མཛོད༔ ཚེ་འདས་བླ་ཡིད་སེམས་གསུམ་ལ༔ མ་འཁོར་མ་གནོད་མྱུར་དུ་ཐོངས༔ ཐར་ལམ་བར་ཆད་མ་བྱེད་ཅིག༔ ཁ་འབར་མ་ཡི་སྔགས་ཀྱིས་བསྔོ༔ དེ་ནས་ཁྲུས་བྱ་བ་ནི༔ བཾ་ཨཾ༔ སྣང་མཐའ་རྒྱལ་པོས་བྱིན་བརླབས་པའི༔ གོས་དཀར་མོ་ཡི་རང་བཞིན་ཆབ༔ ཚུལ་ཁྲིམས་ཆུ་ཡིས་ལེགས་བགོས་པའི༔ འདོད་ཆགས་དྲི་མ་སྦྱོང་བར་ཤོག༔ ཁྲུས་ལེགས་མཛད་ཀྱི་ཁྲུས་བགྱིའོ༔ བདེ་ཆེན་ཞིང་དུ་དབུགས་དབྱུང་ཤོག༔ ཨོཾ་བཾ་ཧ་རི་ནི་ས་ཌཱཀྐི་ནི་པདྨ་ས་ཏྭ་སོགས་ཡིག་བརྒྱ་དང་ཁྲུས་སྔགས་བརྗོད་པས་དག་པར་བཀྲུ༔ ཀྱེ་མ་གསོན་ཅིག་རིགས་ཀྱི་བུ༔ ཁྱོད་ནི་ལས་ངན་སྡིག་པོ་ཆེ༔ འདོད་ཆགས་མིག་སེར་རྣམ་སྨིན་གྱིས༔ ད་ལྟ་མི་ཡི་གནས་སུ་སྐྱེས༔ རྩ་བའི་སྡུག་བསྔལ་ཆེན་པོ་གསུམ༔ སྐྱེ་རྒ་ན་འཆིའི་ཆུ་བོ་བཞི༔ ཁྱབ་པ་འདུ་བྱེད་སྡུག་བསྔལ་རྒྱུ༔ ཕ་མ་བུ་ཚ་ཉེ་འབྲེལ་དང༔ སྣང་ཞེན་དངོས་པོ་ཐམས་ཅད་ཀུན༔ མི་རྟག་འབྲལ་བའི་ཆོས་ཅན་ཡིན༔ རྟག་པར་གནས་པ་གཅིག་ཀྱང་མེད༔ སྒྱུ་མ་རྨི་ལམ་གཟུགས་བརྙན་དང༔ དྲི་ཟའི་གྲོང་ཁྱེར་བྲག་ཆའི་སྐད༔ མིག་ཡོར་ཆུ་ཟླ་ཆུ་བུར་སོགས༔ མི་རྟག་སྒྱུ་མའི་དཔེ་འདི་སོམས༔ མ་ཆགས་མ་ཞེན་རིགས་ཀྱི་བུ༔ ང་ནི་ཡུམ་ཆེན་ཕ་རོལ་ཕྱིན༔ ཁྱོད་ཀྱི་ཐར་པའི་ལམ་སྟོན་ཡིན༔ མ་ཡེངས་རྩེ་གཅིག་གསོལ་བ་ཐོབ༔ མཐོ་རིས་བདེ་བའི་ས་ཡིན་པས༔ ཉོན་མོངས་འདམ་ལ་མ་འཁོར་བར༔ ཕྱིར་མི་ལྡོག་པའི་ས་ཐོབ་ཤོག༔ དེ་ནས་འདོད་ཡོན་བསྔོ་བ་གཅོད་གཞུང་གཞན་ནས་བྱུང་བ་ལྟར་འཛུད་ཅིང་བསྡུ་ན༔ ཨོཾ་ཨ་ཀ་རོ་སོགས། འདོད་ཡོན་གྱི་རང་བཞིན་གཟུགས་སྡུག་པ༔ སྒྲ་སྙན་པ༔ དྲི་ཞིམ་པ༔ རོ་མངར་བ༔ རེག་བྱ་འཇམ་པ༔ མཁོ་དགུས་འབྱོར་བ༔ མཛེས་དགུས་བརྒྱན་པ་ངོ་བོ་ཟག་པ་མེད་པའི་ཀུན་བཟང་སྤྲིན་གྱི་རོལ་མོར་འབྱམས་ཀླས་པར་གྱུར༔ ནམ་མཁའ་མཛོད་སྔགས་དང་འགྱུར་སྔགས་མང་པོ་བརྗོད༔ དེ་ནས་ཐམས་ཅད་ནམ་མཁའ་མཛོད་སོགས་ལན་གསུམ༔ མར་མེ་གཟུགས་ཀྱི་ལམ་སྟོན་ནི༔ ཀྱེ་མ་ཚེ་འདས་རིགས་ཀྱི་བུ༔ ཐར་ལམ་ཞིང་དུ་འགྲོ་བ་ལ༔ ཁྱེད་ཉིད་མ་རིག་རྒོང་རྒྱར་དུབ༔ ཡེ་ཤེས་གསལ་བའི་ལམ་མེ་བ༔ ཐར་ལམ་རབ་གསལ་སྒོ་ཕྱེ་ནས༔ ལྷག་མཐོང་འོད་ལ་འདའ་བར་ཤོག༔ ལམ་བསྟན་པ་ནི༔ ཧཱུྃ༔ ཉོན་ཅིག་ཚེ་འདས་རིགས་ཀྱི་བུ༔ སྤྱི་གཙུག་སྟེང་གི་ནམ་མཁའི་ཀློང༔ པདྨ་ཉི་ཟླའི་གདན་གྱི་སྟེང༔ གསུམ་ལྡན་རྩ་བའི་བླ་མ་ནི༔ མ་ཅིག་ཡུམ་ཆེན་དབྱེར་མེད་པའི༔ ཐུགས་ཀློང་འོད་ལྔའི་ཟླུམ་ཐིག་བཾ༔ དེ་ལས་གསེར་མདངས་ལྕགས་ཀྱུ་ལྟར༔ འཕྲོས་པས་ཚེ་འདས་རྣམ་ཤེས་དྲོངས༔ རིག་པ་ལྕགས་གོང་རྣམ་པ་རུ༔ ཕཊཿཀྱིས་ཡུམ་ཆེན་ཐུགས་ཀློང་འཕོ༔ ལྡོག་མེད་ཡུམ་ལྔའི་མཁའ་ལ་རྒྱ༔ ཕཊཿ ཕཊཿ ཕཊཿ ཕཊཿ ཕཊཿ འོ་ཁྱོད་རང་གི་སྟེང་གི་ནམ་མཁར་མ་ཅིག་ལབ་ཀྱི་སྒྲོན་མ་སྐུ་གར་སྟབས་ལིང་ལིང༔ ཕྱག་ཌཱ་དྲིལ་སིང་སིང༔ གསུང་སྙན་པའི་དབྱངས་ཀྱིས་རིགས་ཀྱི་བུ་ཡར་ཤོག་དག་པ་མཁའ་སྤྱོད་ཀྱི་ཞིང་དུ་འགྲོ་འོ༔ དགའ་འོ༔ སྐྱིད་དོ༔ ཞེས་གསུངས་པའི་མོས་པས་ཚེ་འདས་ཀྱི་རྣམ་ཤེས་སེམས་དང་མ་ཅིག་གི་ཐུགས་རྣམ་པར་མི་རྟོག་པའི་ཡེ་ཤེས་ཆུ་ལ་ཆུ་བཞག་པ་བཞིན་དབྱེར་མེད་རོ་གཅིག་འདྲེས་པར་བསམ༔ ཕཊཿ ཕཊཿ ཕཊཿ བསྔོ་སྨོན་ཤིས་བརྗོད་སྤྱི་ལྟར་བྱའོ༔ ཞེས་ཡང་གསང་ཌཱཀྐིའི་ཐུགས་ཐིག་གྲུབ་ཐོབ་ཐོད་པ་བྷ་ཏྲའི་ཐུགས་བཅུད་ཟབ་མོ་གཅོད་ཀྱི་གདམས་པ་འདི་ཉིད་སྙིང་ལ་ཤར་ནས་ལོ་བདུན་བཀའ་རྒྱས་བཏབ་སྟེ་མཐར་བསྔོ་སྨོན་ལས་འབྲེལ་བཟང་པོས་མཚམས་སྦྱར་ནས་སྦ་རོང་བྲག་དཀར་ལ་གནས་འབྲེལ་འཇོག་སྐབས་ཡེ་ཤེས་ཀྱི་མཁའ་འགྲོ་མ་ལྔས་ཞལ་གཟིགས་ལུང་བསྟན་པའི་སྐབས༔ རང་སློབ་དམ་པ་ཀླུ་སྐྱབས་ཀྱིས་ལེགས་པར་བསྐུལ་བ་ལ་བརྟེན་ནས་སྨུག་རོང་ལྷུན་གྲུབ་གླིང་གི་གདན་སར་སྲོད་ཐུན་གཉིས་ལ་བརྡ་ཐོགས་མེད་དུ་བྲིས་པ་ཆོས་བརྒྱུད་འཛིན་པའི་སློབ་བུ་མཐོན་མཐིང་རལ་པའི་གླེགས་བམ་ཅན་གྱི་བསྟན་པ་མཐའ་ནས་མཐའ་རུ་རྒྱས་ཤིང་དེ་སོགས་ལ་ཟུར་ཟ་གཤེ་སྐུར་མཁན་ལ་དྲང་སྲོང་སྨུག་ནག་འོད་འཕྲོ་དང༔ ཟངས་རི་བཙན་རྒོད་འབར་བས་མཐའ་སྟུང་ཞིག༔ འཛིན་སྐྱོང་སྤེལ་བའི་སྡོང་གྲོགས་མཛོད་ཅིག༔ གུ་ཧྱ༔ ཤུ་བྷཾ༔