འདོད་ཡོན་བསྔོ་བ་ཆགས་མེད་གར་གཅོད་ལས་བཏུས་པ།
༄༅། འདོད་ཡོན་ནི་གསུར་ཕྱེ་མར་ཇ་ཆང་ཟན་སྣ་རྣམས་ལ༔ ཕཊཿ སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཟས་གོས་བཟའ་བཏུང་ཕུན་སུམ་ཚོགས་པར་གྱུར༔ ན་མཿསརྦ་ཏ་ཐ་ག་ཏ་སོགས། ཀྱེ༔ ཉོན་ཅིག་ཚེ་འདས་ལུས་བརྗེས་རིགས་ཀྱི་བུ༔ སྔོན་ཚེ་རྒྱལ་སྲས་དྲི་མེད་གྲགས་པ་དེ༔ སྟན་མེད་ཐང་ལ་འཁྱམས་ཚེ་ལྷ་རྣམས་ཀྱིས༔ རྫུ་འཕྲུལ་སེང་གེའི་གདན་ཁྲི་བཏེགས་པ་ལྟར༔ ལས་ཀྱིས་འབྲེལ་བའི་ཉེ་དུ་བརྩེ་བ་ཡིས༔ སྣམ་རས་ཕྱིང་དཀར་གཙང་མའི་གདན་བཟང་འདི༔ ཚེ་འདས་ཁྱོད་ལ་སྟན་གྱི་སྐལ་བར་བསྔོ༔ ཚ་གྲང་སྡུག་བསྔལ་ཐམས་ཅད་རབ་ཞི་ཞིང༔ བདེ་ལྡན་བྱང་ཆུབ་འབྲས་བུ་ཐོབ་པར་ཤོག༔ སྔོན་ཚེ་རྒྱལ་བུ་བདེ་ལྡན་མུན་པར་འཁྱམས༔ སྤྱན་རས་གཟིགས་ཀྱིས་ཡེ་ཤེས་སྒྲོན་མེ་ཡིས༔ མ་རིག་མུན་པ་བསལ་བ་དེ་བཞིན་དུ༔ ལས་ཀྱིས་འབྲེལ་བའི་ཉེ་དུ་བརྩེ་བ་ཡིས༔ ཡེ་ཤེས་གསལ་བའི་སྒྲོན་མེ་འདི་བསྟན་ནས༔ ཚེ་འདས་ཁྱོད་ཀྱི་མུན་པ་སེལ་ཕྱིར་བསྔོ༔ མ་རིག་མུན་པ་རྟག་ཏུ་སངས་གྱུར་ཏེ༔ ཡེ་ཤེས་གསལ་བའི་མདངས་ལ་བདེ་བར་གཤེགས༔ སྔོན་ཚེ་མཽ་གལ་བུ་ཡིས་ཡུམ་ལ་ཟས༔ བསྔོས་པས་ངན་སོང་གནས་ནས་ཐར་བ་ལྟར༔ བརྩེ་ཞིང་བྱམས་པའི་ཉེ་འབྲེལ་འདི་དག་གིས༔ ཞལ་ཟས་བཟའ་བཅའ་ཞིམ་མངར་སྣ་ཚོགས་འདི༔ ཚེ་འདས་ཁྱོད་ལ་ཟས་ཀྱི་སྐལ་དུ་བསྔོ༔ ཟད་མེད་ཏིང་འཛིན་ཟས་ལ་སྤྱོད་པར་ཤོག༔ སྔོན་ཚེ་རྒྱལ་བུ་དགེ་མཐོང་ཚེ་ལས་འདས༔ སྲིང་མོ་ལྷ་མོ་བདེ་ལྡན་ཞེས་བྱ་བས༔ འབྲས་ཆང་བཏུང་བ་བདུད་རྩི་མངར་དང་ལྡན༔ བསྔོས་པས་ཚ་གྲང་སྡུག་བསྔལ་ཞི་བ་ལྟར༔ བརྩེ་གདུང་ཡིད་ལ་གཅགས་པའི་ཉེ་འབྲེལ་གྱིས༔ ཇ་ཆང་འོ་ཞོ་བཏུང་བ་སྣ་ཚོགས་ཀྱིས༔ ཚེ་འདས་ཁྱོད་ལ་སྐོམ་གྱི་སྐལ་བར་བསྔོ༔ ཚེ་འདས་སྐོམ་པའི་སྡུག་བསྔལ་ཞི་གྱུར་ནས༔ བླ་མེད་བྱང་ཆུབ་སྐོམ་དང་ལྡན་པར་ཤོག༔ སྔོན་ཚེ་བྲམ་ཟེའི་བུ་མོ་འཕགས་པའི་ཡུམ༔ སེར་སྣའི་དབང་གིས་ཡི་དྭགས་ཡུལ་དུ་འཁྱམས༔ བུ་མཆོག་སྤྱན་རས་གཟིགས་ཀྱི་ཐུགས་རྗེ་ཡིས༔ བྱིན་གྱིས་བརླབས་པའི་ན་བཟའ་བྱིན་པ་ལྟར༔ བརྩེ་གདུང་ཡིད་ལ་གཅགས་པའི་ཉེ་འབྲེལ་གྱིས༔ ཚ་བའི་བསིལ་གཡབ་གྲང་བའི་སྐྱབས་གྱུར་པའི༔ ཞྭ་གོས་སྣམ་ཕྱིང་བལ་དང་དར་རས་སོགས༔ ཚེ་འདས་ཁྱོད་ལ་གོས་ཀྱི་སྐལ་བར་བསྔོ༔ ནམ་ཡང་ཚ་གྲང་སྡུག་བསྔལ་མི་འབྱུང་ཞིང༔ ཡུན་དུ་བདེ་སྐྱིད་ཕུན་སུམ་ཚོགས་པར་ཤོག༔ བདེ་གཤེགས་རིན་ཆེན་མང་དང་གཟུགས་མཛེས་དང༔ འཇམ་ཀླས་འཇིགས་ཀུན་བྲལ་ལ་ཕྱག་འཚལ་ལོ༔ དེ་བཞིན་གཤེགས་པ་ཁྱེད་རྣམས་བདེན་པའི་མཐུས༔ ཚེ་འདས་འདོད་ཡོན་ལོངས་སྤྱོད་ཀུན་ཐོབ་ནས༔ སྐྱེ་བ་གཏན་གྱི་ལོངས་སྤྱོད་འབྱུང་བར་ཤོག༔ ཁ་འབར་མ་ཡི་སྔགས་ཀྱིས་བསྔོས་པའི་ཟས་གོས་སྤྲང་པོ་དང་བྱ་ཁྱི་ཉམ་ཐག་པ་རྣམས་ལ་སྦྱིན་པ་བཏང༔ ཆགས་མེད་གར་གཅོད་ལས་ཁོལ་དུ་ཕྱུང་བའོ༔