གཅོད་དབང་ཆུ་བོ་གཅིག་འདྲེས།

ཡང་གསང་ཌཱཀྐིའི་ཐུགས་ཐིག་ལས༔ གཅོད་དབང་ཆུ་བོ་གཅིག་འདྲེས་བཞུགས༔

བཛྲ་ཛྙཱ་ན་ཌཱཀྐི་ཡེ༔ ཤེས་རབ་ཕ་རོལ་ཕྱིན་མ་ནི༔ དུས་གསུམ་རྒྱལ་ཀུན་བསྐྱེད་པའི་ཡུམ༔ རང་རིག་འདུ་འབྲལ་མེད་པ་ལ༔ ཡེ་ནས་རང་ངོ་ཤེས་པས་འདུད༔ རྡོ་རྗེ་བདུད་འདུལ་ཆེན་མོ་དང༔ ཏཱ་རེ་གངྒཱའི་ལྷ་མོ་ཡི༔ སྤྲུལ་པ་གཉིས་མཉམ་རྒྱ་བལ་བཟའ༔ གཅིག་འདུས་གསང་ཡེ་མཚོ་རྒྱལ་མ༔ ཡང་སྤྲུལ་ལབ་ཀྱི་སྒྲོན་མ་ཡི༔ སྒྲུབ་ཐབས་ཉམས་ལེན་གང་ཟག་དོན༔ དབང་ཆོག་ཆུ་བོ་གཅིག་འདྲེས་སྟོན༔ ས་མ་ཡཱ༔ འདི་ལ་སྦྱོར་དངོས་རྗེས་དང་གསུམ༔ སྦྱོར་བ་ཡོ་བྱད་བཤམས་པ་ནི༔ དཀྱིལ་འཁོར་མདའ་གང་བཀོད་ལེགས་སྟེང༔ རྡུལ་ཚོན་རས་བྲིས་ཚོམ་བུ་གསུམ༔ གང་འཛོམས་དབུས་སུ་སྐུ་རྟེན་དང༔ བུམ་པ་ཉེར་ལྔའི་བཅུད་ལྡན་དགོད༔ མདུན་དུ་ཐུགས་རྟེན་ཤེལ་མེ་ལོང༔ གཡས་སུ་ཡོན་ཏན་ཡིད་བཞིན་ནོར༔ རྒྱབ་ཏུ་གསུང་དབྱངས་བགྲང་ཕྲེང་དམར༔ གཡོན་དུ་ཕྲིན་ལས་གཏོར་མ་དང༔ མཐའ་མཚམས་ཌཱ་དྲིལ་རྐང་གི་གླིང༔ ཐོད་ཊཱཾ་རུས་རྒྱན་སྟག་གི་ལྤགས༔ མཆོད་པ་རྣམ་ལྔ་སྨན་རཀ་སོགས༔ མ་ཚང་མེད་པར་འདུ་བྱས་ལ༔ རང་གཞུང་སྐྱབས་སེམས་ནས་བཟུང་སྟེ༔ བདག་མདུན་དབྱེར་མེད་ལྷ་རུ་གསལ༔ བསྙེན་པ་བརྒྱ་སྟོང་ཁ་ཡང་གསོ༔ བུམ་པ་ནུས་ལྡན་བསྒྲུབས་པའི་རྗེས༔ ལས་བུམ་ཁྲོ་མོ་དབྱིངས་ཕྱུག་བསྐྱེད༔ བདག་འཇུག་ལེན་ཞིང་རྫས་ལ་རོལ༔ གླུད་གཏོང་བཀའ་བསྒོ་མཚམས་གཅོད་བྱ༔ སློབ་མ་ཆོས་ལ་ཉན་པར་བསྐུལ༔ མི་རྟག་རྒྱུ་འབྲས་བསླུ་མེད་ཀྱིས༔ བློ་བཅོས་སྤྱི་དང་བྱེ་བྲག་གི༔ གསང་ཆེན་ཆོས་ཀྱི་ཆེ་བ་བརྗོད༔ ཁྱད་པར་གཅོད་དབང་ཟབ་མོ་འདིའི༔ ལོ་རྒྱུས་ཆོས་དང་གང་ཟག་གི༔ ཆེ་བ་བརྗོད་པས་སྤྲོ་བ་བསྐྱེད༔ མཎྜལ་འབུལ་ཞིང་རང་གཞུང་གི༔ སྐྱབས་སེམས་ཡན་ལག་བདུན་པ་འདོན༔ དེ་ཡིས་སྦྱོར་བའི་ཆོས་རྣམས་རྫོགས༔ དངོས་གཞིའི་དབང་དོན་གསོལ་འདེབས་ནི༔ ཨེ་མ་ཧོ༔ སྐུ་བཞིའི་བདག་ཉིད་བླ་མ་རྗེ༔ རྒྱལ་ཡུམ་ཡེ་ཤེས་ཌཱཀྐི་མའི༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་གིས་བདག་རྒྱུད་སྨིན་པར་མཛོད༔ ལན་གསུམ་གསོལ་བཏབ་ལན་འདི་སྦྱིན༔ ཀྱཻ༔ སྐལ་ལྡན་རིགས་ཀྱི་བུ་མཆོག་རྣམས༔ ཡེ་ཤེས་མཁའ་འགྲོའི་དཀྱིལ་འཁོར་དུ༔ འཇུག་པར་འདོད་པ་ལེགས་མོད་ཀྱང༔ དམ་ཚིག་རིམ་པ་བསྲུང་ནུས་སམ༔ དྲིས་པའི་ལན་དུ་སློབ་མ་ཡིས༔ བླ་མ་རྡོ་རྗེ་འཛིན་པ་ལགས༔ ཁྱེད་ཀྱིས་རྗེས་བཟུང་བཀའ་དྲིན་གྱིས༔ མཁའ་འགྲོའི་དབང་བསྐུར་གནང་གྱུར་ན༔ དམ་ཚིག་རིམ་པ་ཚུལ་བཞིན་བསྲུང༔ ལན་གསུམ་ཞུས་མཐར་བླ་མ་ཡིས༔ ཨེ་མ་དད་ལྡན་རིགས་མཆོག་རྣམས༔ མཁའ་འགྲོའི་དབང་བསྐུར་ཞུ་འདོད་ན༔ སོ་ཐར་བྱང་སེམས་སྔགས་སྡོམ་རྣམས༔ རིམ་བཞིན་མི་ཉམས་བསྲུང་འཚལ་ལོ༔ སླར་ཡང་མོས་ལྡན་སློབ་བུ་ཡིས༔ བླ་མས་ཇི་ལྟར་བསྒོ་བ་བཞིན༔ སྡོམ་པ་གསུམ་གྱི་རིམ་པ་རྣམས༔ ངོ་བོ་གནས་འགྱུར་གོང་འཕེལ་དུ༔ ཡོན་ཏན་ཡར་ལྡན་ཚུལ་གྱིས་བསྲུང༔ དེ་ནས་བླ་མས་དམ་ཆུ་སྦྱིན་པ་ནི༔ ཧོ༔ སྡོམ་པ་དང་ནི་དམ་ཚིག་རྣམས༔ མི་ཉམས་བསྲུང་བ་གལ་ཆེ་བས༔ དམ་ཚིག་རྡོ་རྗེའི་ཆུ་འདི་འཐུང༔ བྱང་ཆུབ་བར་དུ་བསྲུང་བར་གྱིས༔ ས་མ་ཡཱ་ན་ར་ཀན༔ དེ་ནས་བྱིན་རླབས་ཀྱི་གཞི་སྒྲུབ་པ་ཡེ་ཤེས་དབབ་པ་ཡིན་པས་དམིགས་པ་འདི་བཞིན་དུ་མཛོད་ཅིག༔ ཨོཾ་མ་ཧཱ་ཤུ་ནྱ་ཏ་སོགས། ཆོས་ཐམས་ཅད་རང་བཞིན་གྱིས་འོད་གསལ་བའི་སྟོང་པ་ཉིད་དུ་གྱུར༔ སྟོང་པའི་ངང་ལས་རང་སྣང་དག་པ་མཁའ་སྤྱོད་ཀྱི་གཞལ་ཡས་ཁང་དུ་གྱུར་པའི་དབུས་སུ་སྣ་ཚོགས་པདྨ་དང་ཉི་མའི་གདན་ལ་རང་རིག་པ་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་སྐུ་མདོག་དཀར་ལ་དམར་བའི་མདངས་ཆགས་པ༔ སྐུ་གཅེར་བུ་བཅུ་དྲུག་ལོན་པའི་ན་ཚོད་ཅན༔ ལང་ཚོ་རབ་ཏུ་རྒྱས་ཤིང་འོ་འཛིན་དང་གསང་བའི་ཆུ་སྐྱེས་རབ་ཏུ་རྒྱས་པས་ཕྱག་གཡས་གསེར་གྱི་ཌཱ་མ་རུ་དང་གཡོན་དངུལ་དཀར་གྱི་དྲིལ་བུ་འཁྲོལ་བ༔ རུས་པའི་ཕྱག་རྒྱ་ལྔས་སྤྲས་པ༔ དབུ་སྐྲ་ཐོར་ཅོག་བྱས་ཤིང་རིན་པོ་ཆེའི་པྲོག་ཞུས་སྤུད་པ༔ ཞབས་གཉིས་བརྐྱང་བསྐུམ་གར་སྟབས་ཀྱི་ཚུལ་གྱིས་བཞུགས་པའི་སྤྱི་བོར་ཟླ་བའི་སྟེང་དུ་ཨོཾ་དཀར་པོ༔ མགྲིན་པར་པདྨའི་སྟེང་དུ་ཨཱཿདམར་པོ༔ ཐུགས་ཀར་ཉི་མའི་སྟེང་དུ་ཧཱུྃ་མཐིང་ཀ་དང༔ ཐུགས་ཀའི་ཆ་སྨད་དུ་དགའ་བ་འཁྱིལ་བ་གཡས་བསྐོར་གྱི་ལྟེ་བར་བཾ་དང་ཡན་ལག་བཞི་ལ་ཧ་རི་ནི་ས་གསལ་བ་རྣམས་ལས་འོད་ཟེར་གློག་ཞགས་ལྟར་མྱུར་བ་འཕྲོས་པས༔ སྐུ་གསུམ་རྒྱལ་བའི་ཞིང་ཁམས་ན་བཞུགས་པའི་རྒྱལ་བ་རྒྱ་མཚོ་སྲས་དང་བཅས་པ༔ ས་གསུམ་གྱི་དཔའ་བོ་མཁའ་འགྲོའི་བཞུགས་གནས་ནས་ཡེ་ཤེས་ལས་དང་དམ་ཚིག་ཤ་ཟ་མཁའ་འགྲོའི་ཚོགས་དང་བཅས་པ་ཁ་བ་བུ་ཡུག་འཚུབས་པ་བཞིན་དུ་བྱོན་པར་གྱུར༔ ཅེས་བསམ་ལ་ཤ་ཆེན་གུ་གུལ་སྤོས་དུད་སྦྱར་བའི་དྲི་སོགས་འཐུལ་དུ་བཅུག་སྟེ་རོལ་མོའི་སྒྲ་དང་བཅས་ཏེ༔ ཕཊཿ ཕཻཾ་ཛ༔ ཧཱུྃ༔ ཡུལ་གྱི་མིང་ནི་ཨོ་རྒྱན་མཁའ་འགྲོའི་གླིང༔ གནས་ཀྱི་མིང་ནི་ཟངས་མདོག་དཔལ་གྱི་རི༔ རང་བྱུང་པདྨས་སྤྲུལ་པའི་ཞིང་ཁམས་ནས༔ སྐུ་གསུམ་མཁའ་འགྲོའི་གཙོ་མོ་མཚོ་རྒྱལ་མ༔ དབྱེར་མེད་སྤྲུལ་སྐུ་མ་ཅིག་ལབ་ཀྱི་སྒྲོན༔ སྒྱུ་འཕྲུལ་རབ་འབྱམས་སྲུང་མ་རྒྱ་མཚོར་བཅས༔ མོས་གུས་གདུང་བས་གནས་འདིར་སྤྱན་འདྲེན་ནོ༔ ཚད་མེད་ཐུགས་རྗེ་ཆེན་པོས་ཉེར་དགོངས་ནས༔ འདིར་འདུས་བདག་ཅག་སྐལ་ལྡན་སྒོ་གསུམ་ལ༔ སྐུ་གསུང་ཐུགས་ཀྱི་བྱིན་ཆེན་དབབ་ཏུ་གསོལ༔ སྐུ་ཡི་བྱིན་ཕོབ་ལུས་ལ་བདེ་དྲོད་འབར༔ གསུང་གི་བྱིན་ཕོབ་ངག་ལ་ནུས་པ་འབྱོང༔ ཐུགས་ཀྱི་བྱིན་ཕོབ་སེམས་ལ་རྟོགས་པ་བསྐྱེད༔ རང་བྱུང་ཡེ་ཤེས་ལྔ་ཡི་དབང་མཆོག་བསྐུར༔ ཚེ་འདིར་སྨིན་ཅིང་གྲོལ་བར་མཛད་དུ་གསོལ༔ རྩ་བའི་སྔགས་ཀྱི་ཤམ་དུ༔ ཨོཾ་ཨཱཿཧཱུྃ་ཛྙཱ་ན་བཛྲ་ཨ་ཝེ་ཤ་ཡ་ཕཻཾ་ཕཻཾ༔ ཕེབས་རྟགས་ལུས་ངག་ཡིད་ལ་འབྱུང༔ གནས་གསུམ་རྡོ་རྗེས་རྒྱས་གདབ་ནས༔ བྱང་ཆུབ་བར་དུ་བརྟན་པར་བྱ༔ ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་མི་དམིགས་ངང་ལ་བཞག༔ ས་མ་ཡཱ༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྗེས་གནང་ལྔ་དང་འཕྲོས་དོན་བསྟན༔ དང་པོ་སྐུ་ཡི་རྗེས་གནང་ནི༔ བུམ་པ་སློབ་མའི་སྤྱི་བོར་བཞག༔ ཨོཾ༔ སྟོང་གསལ་འགགས་མེད་ཆོས་ཀྱི་དབྱིངས༔ འཁོར་འདས་གཞི་རྫོགས་བུམ་པ་ནས༔ སྐུ་གསུམ་ཡེ་ཤེས་བདུད་རྩིའི་རྒྱུན༔ སྐལ་ལྡན་ལུས་ལ་དབང་བསྐུར་བས༔ མཁའ་འགྲོའི་སྐུ་རུ་སྨིན་པར་ཤོག༔ རྩ་སྔགས་ཤམ་དུ་འདི་བཞིན་བརྗོད༔ ཀ་ཡ་ཨ་བྷི་ཥིཉྩ་ཨོཾ༔ མཁའ་འགྲོའི་སྐུ་རྟེན་སྤྱི་བོར་བཞག༔ གནས་གསུམ་མཁའ་འགྲོ་ཡོངས་ཀྱི་གཙོ༔ སྣང་སྟོང་སྒྱུ་མའི་ལྷ་སྐུར་བསྒོམ༔ ལུས་ཀྱི་གཉིས་འཛིན་སྒྲིབ་དག་ནས༔ སྤྲུལ་པའི་སྐུ་རུ་སྨིན་པར་ཤོག༔ རྩ་སྔགས་ཤམ་དུ་ཨ་བྷི་ཥིཉྩ་ཨོཾ༔ མཁའ་འགྲོ་སྡེ་ལྔའི་སྐུ་ཐོགས་ལ༔ ཧཱུྃ༔ ཕྱི་ནང་འབྱུང་ལྔ་གནས་དག་ཀྱང༔ ཡེ་ཤེས་སྐུ་ལྔ་ལྷུན་གྲུབ་པའི༔ མཁའ་འགྲོ་སྡེ་ལྔའི་དབང་བསྐུར་བས༔ ཕུང་ཁམས་སྐྱེ་མཆེད་གནས་དག་ཤོག༔ རྩ་སྔགས་གོང་བཞིན་ཧ་རི་ནི་ས་ཨ་བྷི་ཥིཉྩ་ཨོཾ༔ གསུང་དབང་སྔགས་བྱང་མགྲིན་པར་བཞག༔ ཨཱཿ མ་དག་འཁྲུལ་པའི་ལས་ཀྱི་རླུང༔ སྦྱོང་བྱེད་རང་བྱུང་སྔགས་ཀྱི་སྒྲ༔ མཁའ་འགྲོའི་སྲོག་ཡིག་འདི་གཏད་པས༔ ཚངས་དབྱངས་གསུང་གི་དབང་ཐོབ་ཤོག༔ རྩ་སྔགས་ཤམ་དུ་ཝཱཀྐ་ཨ་བྷི་ཥིཉྩ་ཨཱ༔ དཔོན་སློབ་གཉིས་ཀ་ལྷ་རུ་གསལ༔ ཐུགས་ཀར་ཉི་ཟླའི་གདན་ལ་བཾ༔ སྲོག་སྔགས་འོད་ལྔའི་ཁ་དོག་ཅན༔ གཡོན་དུ་འཁོར་བའི་འོད་ཟེར་གྱིས༔ གནས་གསུམ་མཁའ་འགྲོའི་བྱིན་རླབས་བསྡུས༔ དཔོན་སློབ་གཉིས་ཀར་ཐིམ་པ་ཡིས༔ གསུང་གི་བྱིན་རླབས་ཐོབ་པར་བསམ༔ སྔགས་རྣམས་རིམ་བཞིན་རྗེས་ཟློས་བྱ༔ སྔགས་ཕྲེང་སློབ་མའི་སྤྱི་བོར་བཞག༔ ཨེ་མ་ཧོ༔ མཁའ་འགྲོའི་གཙོ་མོ་མཚོ་རྒྱལ་དང༔ དབྱེར་མེད་མ་ཅིག་ལབ་སྒྲོན་མའི༔ དམིགས་མེད་མཁྱེན་དང་བརྩེ་བ་ཡིས༔ སློབ་མ་འདི་ལ་ལེགས་བསྩལ་ནས༔ བྱང་ཆུབ་སྙིང་པོའི་བར་དག་ཏུ༔ རྗེས་སུ་འཛིན་པར་མཛད་དུ་གསོལ༔ མ་ཧཱ་མཎྜ་ལ་སརྦ་སིདྡྷི་ཕ་ལ་ཧཱུྃ་བྷྲཱུྂ༔ སློབ་བུའི་ལྕེ་ལ་བདུད་རྩི་བཞག༔ ཨོཾ་ཨཱཿཧཱུྃ༔ རྩ་ཁམས་ཀུན་རྫོབ་བྱང་ཆུབ་སེམས༔ ཡེ་ཤེས་རླུང་གི་འཕྲུལ་འཁོར་ལས༔ འཕོ་མེད་སྒྲ་གཅན་དབྱིངས་ཆུད་ནས༔ ལས་རླུང་སྔགས་སུ་རོལ་བར་ཤོག༔ དབྱངས་གསལ་བརྗོད་ཅིང་བརྗོད་བྲལ་ངང༔ རང་བྱུང་རྡོ་རྗེའི་བཟླས་པ་བྱ༔ ཐུགས་རྟེན་མན་ཤེལ་སྙིང་གར་བཞག༔ ཨེ་མ་ཧོཿ སྤྲོས་དང་བྲལ་བའི་རིག་པ་ནི༔ གདངས་གསལ་དྭངས་ཤེལ་སྒྲིབ་བྲལ་ལྟར༔ ངོ་བོ་སྟོང་ཞིང་རང་བཞིན་གསལ༔ ཀ་དག་སྒྲིབ་བྲལ་དབང་ཐོབ་ཤོག༔ རྩ་སྔགས་ཤམ་དུ་ཙིཏྟ་ཨ་བྷི་ཥིཉྩ་ཧཱུྃ༔ མེ་ལོང་དྲི་བྲལ་མིག་ལམ་བསྟན༔ ཧཱུྃ༔ རྒྱལ་ཀུན་ཐུགས་ཀྱི་གསང་བའི་དབང༔ རྟོག་པ་མེད་ཀྱང་ཤེས་བྱའི་ཆོས༔ མ་འདྲེས་སོ་སོར་མཁྱེན་པ་ལྟར༔ མཁའ་འགྲོའི་ཐུགས་རྟེན་མེ་ལོང་གིས༔ སློབ་བུ་ཁྱོད་ལ་དབང་བསྐུར་བས༔ སྟོང་ཉིད་བསྒོམ་པའི་རང་རྩལ་གྱིས༔ ཆོས་ཀུན་མཁྱེན་པའི་རྩལ་རྫོགས་ཤོག༔ ཡོན་ཏན་ཡིད་བཞིན་ནོར་བུའི་གཟུགས༔ སློབ་བུའི་ལྟེ་བར་བཞག་བྱས་ཏེ༔ ཧྲཱིཿ རྟོག་མེད་ཡིད་བཞིན་ནོར་བུ་ལ༔ གསོལ་བཏབ་དགོས་འདོད་འབྱུང་བ་བཞིན༔ རྣམ་པར་རྟོག་པ་མི་མངའ་ཡང༔ འགྲོ་ལ་འདོད་རྒུའི་དཔལ་སྟེར་བའི༔ རྒྱལ་ཀུན་ཡོན་ཏན་དབང་ཐོབ་ཤོག༔ རྩ་སྔགས་ཤམ་དུ་འདི་ཉིད་བཏགས༔ གུརྞ་ཨ་བྷི་ཥིཉྩ་ཏྲཾ༔ ཕྲིན་ལས་གཏོར་མ་ལག་ཏུ་གཏད༔ ཧོ༔ སྣ་ཚོགས་གཉིས་འཛིན་ཀུན་བརྟགས་ཆོས༔ དམིགས་པ་མེད་པའི་དབྱིངས་སུ་གཏོར༔ སྟོང་ཉིད་ཀུན་ལ་ཁྱབ་པའི་མ༔ རྒྱལ་བ་ཀུན་གྱི་ཕྲིན་ལས་ཏེ༔ སྐལ་ལྡན་ཁྱོད་ལ་དབང་བསྐུར་བས༔ ཤེས་པ་དྲུག་ལྡན་དབང་ཐོབ་ཤོག༔ རྩ་སྔགས་ཤམ་དུ་ཀརྨ་ཨ་བྷི་ཥིཉྩ་ཨ༔ འཕྲོས་དོན་བརྟུལ་ཞུགས་བསྐྱེད་པའི་དབང༔ ཐོག་མར་ཌཱ་དྲིལ་སློབ་མར་གཏད༔ ཧཱུྃ༔ མ་རིག་གཉིད་ལས་སད་པའི་ཕྱིར༔ ཐབས་ཤེས་རྫས་མཆོག་ཌཱ་དྲིལ་འདི༔ སྐལ་ལྡན་ཁྱོད་ལ་གཏད་པ་ཡིས༔ དོན་གཉིས་ལྷུན་གྲུབ་དབང་ཐོབ་ཤོག༔ ཅེས་བསྐུར༔ རྐང་གླིང་ཐོགས་ལ༔ ཧཱུྃ༔ ཕུང་པོ་ཁམས་དང་སྐྱེ་མཆེད་ཀྱི༔ ཐབས་ཤེས་རྫས་མཆོག་རྐང་གླིང་འདི༔ སྐལ་ལྡན་ཁྱོད་ལ་གཏད་པ་ཡིས༔ སྣང་སྲིད་ཟིལ་གནོན་དབང་ཐོབ་ཤོག༔ ཞིང་ཆེན་གཡང་གཞི་ཐོགས་ལ༔ ཧཱུྃ༔ གཏི་མུག་ཤ་དང་འདོད་ཆགས་ཁྲག༔ ཞེ་སྡང་རུས་པ་དང་བྲལ་བའི༔ ཞིང་ཆེན་གཡང་གཞི་འདི་གཏད་པས༔ ཁམས་གསུམ་དབང་འདུས་དབང་ཐོབ་ཤོག༔ གཅན་གཟན་ལྤགས་པ་ཐོགས་ལ་གཏད༔ ཧཱུྃ༔ འཁོར་བའི་བག་ཆགས་ཡོངས་བསྒྲལ་བའི༔ གཅན་གཟན་པགས་པའི་གདན་འདི་ཉིད༔ སྐལ་ལྡན་ཁྱོད་ལ་གཏད་པ་ཡིས༔ སྲིད་གསུམ་བྲན་ཁོལ་དབང་ཐོབ་ཤོག༔ རུས་རྒྱན་ཐོགས་ལ༔ ཧཱུྃ༔ ཕ་རོལ་ཕྱིན་དྲུག་མཚོན་པའི་རྒྱན༔ རུས་པའི་རྒྱན་ཆ་རྣམ་དྲུག་འདི༔ སྐལ་ལྡན་ཁྱོད་ལ་གཏད་པ་ཡིས༔ འགྲོ་དྲུག་སྒྲོལ་ནུས་དབང་ཐོབ་ཤོག༔ བྷནྡྷ་ཐོགས་ལ༔ ཧཱུྃ༔ ཉོན་མོངས་བརྒྱད་ཁྲི་བཞི་སྟོང་གི༔ རྟེན་འབྲེལ་ཕུང་ཁམས་སྐྱེ་མཆེད་བཅས༔ བསྒྲལ་བསད་རྟོག་མེད་ཐོད་སྣོད་འདི༔ སྐལ་ལྡན་ཁྱོད་ལ་གཏད་པ་ཡིས༔ ཁམས་གསུམ་བཅུད་ལ་རོལ་ནས་ཀྱང༔ ཟག་མེད་བདེ་ཆེན་རོ་མྱོང་ཤོག༔ ཁ་ཊཱཾ་ཐོགས་ལ༔ ཧཱུྃ༔ རྩེ་གསུམ་དུག་གསུམ་དབྱིངས་སྒྲོལ་མཚོན༔ སྐུ་གསུམ་དོན་ལ་སྦྱོར་བྱེད་འདི༔ སྐལ་ལྡན་ཁྱོད་ལ་གཏད་པ་ཡིས༔ ཁམས་གསུམ་འཁོར་བ་སྟོང་ནུས་ཤོག༔ ཀྱེ་མ་མི་མིན་སོགས། མ་ཤར་ནས་སོགས། བཀའ་གཏད་ནི། ཨོཾ་ཨཱཿཧཱུྃ༔ ཆོས་སྐུ་ཡུམ་ཆེན་མོ་སོགས། མཐའ་རྟེན། མཆན། ཞེས་དབང་རྫས་རྣམས་གཏད་མཐར། དམ་ཚིག་རྣམས་བསྒྲགས་པ་ནི༔ ཨེ་མ༔ མ་ཅིག་ཡེ་ཤེས་མཁའ་འགྲོ་དང༔ དབྱེར་མེད་རྡོ་རྗེ་སློབ་དཔོན་དགོངས༔ མཁའ་འགྲོའི་སྐུ་ཡི་དམ་ཚིག་ཏུ༔ སྲོག་གཅོད་སྤངས་ཤིང་ཚངས་སྤྱོད་སྲུང༔ གང་སྣང་སྒྱུ་མའི་ལྷ་སྐུར་སྦྱོང༔ སློབ་དཔོན་སྐུ་དང་རང་གི་ལུས༔ རྟག་ཏུ་བརྙས་པར་མི་བྱ་འོ༔ མཁའ་འགྲོའི་གསུང་གི་དམ་ཚིག་ཏུ༔ རྫུན་སྨྲ་སྤངས་ཤིང་བཟླས་བརྗོད་བརྩོན༔ བུད་མེད་ཡོངས་ལ་མི་སྨོད་ཅིང༔ བླ་མས་ཅི་གསུང་བཀའ་བསྒྲུབ་བོ༔ མཁའ་འགྲོའི་ཐུགས་ཀྱི་དམ་ཚིག་ཏུ༔ དངོས་འཛིན་འཁྲུལ་བའི་དབང་མི་གཏོང༔ གང་ཤར་སྤང་བླང་མི་བྱ་ཞིང༔ སྟོང་ཉིད་ལྟ་བའི་གདེངས་ལྡན་པས༔ འགྲོ་ལ་སྙིང་རྗེ་རྒྱུན་མི་གཅོད༔ ཡོན་ཏན་ཕྲིན་ལས་དམ་ཚིག་ཏུ༔ ཡར་མར་ཚེས་བཅུ་རྒྱུན་མི་གཅོད༔ སྒོ་གསུམ་དཀྱིལ་འཁོར་གསུམ་ལྡན་པས༔ རྟག་ཏུ་ཆོས་སྤྱོད་བཅུ་ལ་འབད༔ འདུག་གནས་གཉན་ས་རི་ཁྲོད་དང༔ ནམ་ཡང་འབྲལ་བར་མི་བྱ་འོ༔ ཕུང་པོ་གཅེས་འཛིན་དང་བྲལ་ཏེ༔ ཤ་ཁྲག་སྟོན་འགྱེད་ལྷ་འདྲེར་གཏོང༔ རྐྱེན་ངན་ལམ་དུ་སློང་བ་ལས༔ རེ་དོགས་བསྲུང་བ་གདགས་མི་བྱ༔ ཡོན་བདག་སྣང་སྲིད་ལྷ་འདྲེ་ལ༔ མ་ཡིས་བུ་ལ་གདུང་བཞིན་བརྩེ༔ ང་རུ་འཛིན་པའི་ངར་འཛིན་དང༔ ཡུལ་མེད་ཟང་ཐལ་གཏོང་ལགས་སོ༔ གཙོ་བོས་ཇི་ལྟར་སོགས། དེ་ནས་དེ་ཡི་རྗེས་འབྲེལ་དུ༔ གཏང་རག་འབུལ་ཞིང་མཐའ་རྟེན་གཏད༔ ཚོགས་འཁོར་བཀྲ་ཤིས་སྨོན་ལམ་བྱ༔ ཨེ་མ་ཡང་ཟབ་གདམས་པའི་བཅུད༔ སྐྱེ་མེད་གཅིག་ཆོག་གདམས་པའི་གནད༔ ནད་གདོན་ལམ་ཁྱེར་གདམས་པའི་མཆོག༔ མ་ཅིག་ཡུམ་ཆེན་གདམས་ངག་ཕུལ༔ སྔོན་ཚེ་རྒྱ་གར་བྱང་གི་ཕུག༔ པཎ་ཆེན་སྨོན་ལམ་གྲུབ་པ་ཡི༔ དགོངས་པ་ཁྲོས་མའི་ཐུགས་དང་འདྲེས༔ མཁའ་འགྲོ་བདུད་འདུལ་རྡོ་རྗེ་ལ༔ འགྲོ་འདྲེན་ལབ་ཡུལ་སྐུ་འཁྲུངས་པ༔ ལབ་ཀྱི་སྒྲོན་མ་ཞེས་བྱ་འབྱུང༔ གསང་གཅོད་བསྟན་པ་མཁའ་དང་མཉམ༔ དེ་ཚེ་སྨོན་ལམ་དུས་འཛོམས་པའི༔ རྒྱ་གར་ལྷ་མཆོག་ཐོད་པ་ཡི༔ སྤྲུལ་པའི་ཨ་ཙ་ར་དང་འཕྲད༔ ཐབས་ཤེས་མཉམ་སྦྱོར་རིགས་རྒྱུད་སྤེལ༔ འགྲོ་དོན་ཉི་ཟླའི་དཔལ་ལ་འགྲན༔ མཚན་སྙན་དབྱར་རྔའི་ཟླ་བོར་མཆེད༔ དེ་འདྲའི་དུས་སུ་ཟངས་རི་ཡི༔ མཁར་དམར་བསྟན་པའི་ག་དར་མཛད༔ ཕ་མཆོག་ཐོད་པ་བྷ་ཏྲ་ཡིས༔ མ་ཅིག་དགོངས་པ་ཐུགས་སུ་ཆུད༔ ཟབ་མོ་གཅོད་ཀྱི་གདམས་པ་ཡིས༔ མ་འོངས་འགྲོ་ལ་སྤེལ་བའི་སླད༔ མི་ཤིགས་དགོངས་པའི་རྩལ་དུ་སྦས༔ མ་ཅིག་མཁའ་འགྲོས་ཐོད་པ་ལ༔ མ་འོངས་དུས་ཀྱི་ཐ་མ་ལ༔ ཁྱོད་ཀྱི་སྤྲུལ་པ་རྒྱལ་མོ་རོང༔ ས་ར་ཧི་ཏའི་མིང་འཛིན་པའི༔ རྣལ་འབྱོར་འབྲེལ་ཚད་དོན་ལྡན་འབྱུང༔ ང་སྤྲུལ་ཌཱཀྐི་དྷརྨའི་མཚན༔ དེ་དང་འཕྲད་ཚེ་འགྲོ་བའི་དོན༔ ད་ལྟ་འུ་ཅག་དང་འགྲན་འབྱུང༔ དེ་དང་རྟེན་འབྲེལ་མ་འགྲིགས་ན༔ སྐལ་བ་ལྡན་པ་གྲོགས་སུ་བརྟེན༔ ང་ཡི་གསང་གཅོད་འདི་སྟོན་དང༔ འབྲེལ་ཐོགས་འབུམ་ཕྲག་གནས་སྐབས་དང༔ མཐར་ཐུག་མཁའ་སྤྱོད་ས་ལ་རེག༔ ཆོས་བདག་ལྔ་གསུམ་བདུན་ལ་སྤྲོད༔ རྣོ་ནུས་གཞན་དང་འགྲན་ཟླ་བྲལ༔ ད་ལྟ་མ་སྤེལ་སྙིང་སྒྲོམ་སྦོས༔ འགྲོ་དོན་འབྱུང་ངོ་ང་ཡི་གྲོགས༔ ཞེས་གསུངས་ཐོད་པའི་རྣལ་འབྱོར་པས༔ ད་ནི་རྟེན་འབྲེལ་ལེགས་པར་འགྲིགས༔ ཁྱེད་ཀྱིས་ཁམས་སུ་འགྲོ་དོན་མཛོད༔ ང་ནི་རྒྱ་གར་ཡུལ་དུ་བཞུད༔ རིགས་སྲས་རྣམས་ནི་ཁྱོད་ཀྱིས་བདག༔ ང་ནི་དགོས་མེད་རྒྱུད་ལ་བརྟེན༔ བོད་ཆོས་རྒྱ་ལ་དར་བར་བྱེད༔ མ་ཅིག་མཁའ་འགྲོའི་སྨོན་ལམ་བཞིན༔ འགྲོ་དོན་འབྱུང་བར་བྱིན་གྱིས་རློབས༔ ཞེས་གསུངས་པ་བཞིན་འགྲོ་དོན་དུས་ལ་བབས་པའི་ཚེ་བསམ་གཏན་ཡེ་ཤེས་གླིང་པས་ཟངས་མདོག་དཔལ་གྱི་རི་བོ་རྟེན་བརྟེན་པ་དང་བཅས་པ་མཐོང་སྣང་དུ་བཀྲ་བའི་ཚེ་ཨོ་རྒྱན་ཆེན་པོས་དབུགས་དབྱུང་གཟེངས་བསྟོད་གཏེར་སྟོན་གྱི་མཚན་གསོལ༔ མ་ཅིག་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མས་ཀྱང་བྱིན་རླབས་བདུད་རྩིའི་ཕ་ཕོག་གནང༔ དེའི་སྒྱུ་འཕྲུལ་འཇིག་རྟེན་མི་མོའི་ཟོལ་བསྟན་པ་སྡེ་དགེ་མཁའ་འགྲོ་མ་ཆོས་ཀྱི་སྒྲོན་མས་ཀྱང་ཕ་ཐོད་པ་བྷ་ཏྲའི་སྐྱེ་བ་ཡིན་པར་ངོས་བཟུང་དབུགས་དབྱུང༔ བདག་གི་དག་པའི་སྣང་བ་ལའང་གྲུབ་ཆེན་ཐོད་པའི་སྐྱེ་བ་ཡིན་པ་མང་ཞིག་བྱུང༔ ལྷ་དང་བླ་མས་ཀྱང་གཅོད་ཀྱི་གདམས་པ་ཟབ་མོ་འདི་དངོས་སམ་བརྒྱུད་ནས་བཀས་གནང་བ་སོགས་རང་སེམས་གཙང་མ་དཔང་པོར་ཡོད་པའི་དག་སྣང་འདི་རང་བྱུང་ཡེ་ཤེས་མཁའ་འགྲོ་མ་དང་ཡབ་ཐོད་པ་བྷ་ཏྲའི་སྨོན་ལམ་གཅིག་ཏུ་འཚོགས་པའི་རྟེན་འབྲེལ་སྔོན་སྦྱངས་ལས་འཕྲོའི་བག་ཆགས་སད་པའི་རྐྱེན་ལས་ལས་ཅན་ཆོས་ཀྱི་བདག་པོ་ནཱ་གའི་མཚན་འཆང་དམ་པས་ནན་གྱིས་བསྐུལ་བ་དང༔ གསང་སྔགས་དོན་གྱི་རྣལ་འབྱོར་བ་གང་ཤར་རང་སར་གྲོལ་བའི་ཧེ་རུ་ཀ་བློ་གྲོས་རབ་གསལ་གྱིས་སྣང་བ་རྒྱན་གྱིས་འཕྲུལ་པའི་ཤ་ཟ་མཁའ་འགྲོ་མ་ལ་ཕབ་དགོས་པའི་ཞུ་བ་ཕུལ་བ་བདག་གི་བློ་ལ་ཤར་བའི་རྐྱེན་སོགས་ཀྱིས་དབེན་གནས་བརྟུལ་ཞུགས་མཆོག་གི་གནས་སུ་ཧོར་ཟླ་༢པའི་ཚེས་༡ལ་ཐུན་མཚམས་རྒྱས་པའི་དུས་སུ་ཇ་སྐབས་གཅིག་ལ་བློ་གྲོས་ཐོགས་མེད་དུ་བྲིས་པ་དགེ་ཞིང་བཀྲ་ཤིས་པར་གྱུར་ཅིག༔ མ་ཅིག་གྲུབ་ཐོབ་བརྒྱུད་པའི་ཚོགས་ཀྱི་བཀའ་ཡི་ཐ་ཚིག་འཆང་བའི་ཀླུ་རྒྱལ་དྲག་པོ་ཟླ་སྐྱོང༔ ཤམ་པོ་གཟའ་བདུད་མགོ་དགུ༔ ཟངས་རི་བཙན་རྒོད་སོགས་ཀྱིས་གཏེར་འདི་འཚོས་ཤིག༔ གཉེར་ཅིག༔ བཀའ་རྐུན་དམ་ཚིག་ལོག་པའི་སྙིང་ཁྲག་འཕོས་ཤིག༔ དབང་པོ་སྣུབས་ཤིག༔ བྱིན་རླབས་བདུད་རྩིའི་བཅུད་ལ་མྱོང་བའི་དད་པ་ཅན་གྱི་སྡོང་གྲོགས་མཛོད་ཅིག༔ ལེགས་པའི་དཔལ་ཁ་སྤྲོད་ཅིག༔ ཆོས་འདི་གང་དུ་དར་བའི་ཕྱོགས་སྐྱོངས་ཤིག༔ འཚོས་ཤིག༔ མཎྜ་གུ་ཧྱ༔ ས་མ་ཡཱ༔ རྒྱ་རྒྱ་རྒྱ༔ ཤུ་བྷཾ༔