སྐྲ་ཆོག་བྱིན་རླབས་ཡེ་ཤེས་འཁོར་ལོ།
ཡང་གསང་མཁའ་འགྲོའི་ཐུགས་ཐིག་ལས༔ སྐྲ་ཆོག་བྱིན་རླབས་ཡེ་ཤེས་འཁོར་ལོ་བཞུགས༔ རང་རིག་ལྷག་པའི་ལྷ་ལ་འདུད༔ དབུ་སྐྱེས་བྱིན་རླབས་རིམ་པ་འདི༔ དམིགས་པ་གཅིག་པུས་ཆོག་པ་ཡིན༔ ཡོ་བྱད་སྒྲུབ་རྗས་དགོས་པ་བསྐྱུངས༔ གསང་སྔགས་བརྟུལ་ཞུགས་ངར་ལྡན་པའི༔ བླ་མ་སྐྱབས་གནས་གཅིག་ཆོག་ལ༔ མོས་གུས་སྔགས་ལ་ཡིད་ཆེས་པའི༔ སློབ་བུ་ངལ་གསོའི་སྟངས་སྟབས་སུ༔ བྱེད་དུ་བཅུག་ལ་འདི་བཞིན་བསྒོམ༔ ཨེ་མ་ཧོ༔ སྐལ་ལྡན་རིག་པ་འཛིན་པའི་བུ༔ ཁྱོད་ཀྱི་བདེ་ཆེན་འཁོར་ལོ་ཡི༔ སྟེང་དུ་དག་པ་རབ་འབྱམས་ཀྱི༔ ཕོ་བྲང་དཀྱིལ་དུ་སེང་ཁྲི་དང༔ པད་ཟླའི་གདན་ལ་བླ་མ་ཉིད༔ ཨོ་རྒྱན་སྤྲུལ་སྐུའི་རྣམ་པར་གསལ༔ ལྕང་ལོའི་ཉག་མ་རེ་རེའི་ཀློང༔ དཔའ་བོ་མཁའ་འགྲོ་འབུམ་སྡེ་གསལ༔ ཀུན་ཀྱང་རྣམ་འགྱུར་མ་ངེས་པ༔ སྐུ་ཡི་གར་སྟབས་ཤིགས་སེ་ཤིག༔ གསུང་དབྱངས་སྔགས་སྒྲ་འུ་རུ་རུ༔ ཐུགས་དབྱིངས་བརྗོད་བྲལ་ཏ་ལ་ལ༔ འོད་དང་འོད་ཟེར་གྱི་ལི་ལི༔ ཡེ་ཤེས་ལྷ་ཚོགས་ཤ་ར་ར༔ བྱིན་རླབས་ན་བུན་ཐིབས་སེ་ཐིབ༔ རྟེན་དང་དབྱེར་མེད་ཨ་ལ་ལ༔ སྣང་ཞེན་ལྷ་ཡི་འཁོར་ལོར་རོལ༔ ཨ་ཨ་ཕཻཾ་ཕཻཾ་ཛཿཛཿཏིཥྛ་ལྷན༔ ཨོཾ་ཨཱཿཧཱུྃ་མ་ཧཱ་གུ་རུ་དྷེ་ཝ་ཌཱཀྐི་ནི་ཧྲཱིཿམ་ཧ་རི་ནི་ས་ར་ཙ་ཧྲཱིཿཡ་སརྦ་ཀརྨ་ཙིཏྟ་ཧྲིང་ཧྲིང་ཛཿཛཿ བརྒྱ་ཕྲག་དང༔ དབྱངས་གསལ་ཡེ་དྷར་བརྒྱ་ཕྲག་གིས༔ སྐྲ་ཡི་ལྷ་ཚོགས་རྟེན་ལ་བསྟིམས༔ སྐྲ་ཡི་ཀློང་བཞུགས་དམ་ཚིག་པ༔ ཧྲཱིཿ གསང་སྔགས་དབང་ཕྱུག་རིགས་ལྔ་ལོངས་སྤྱོད་རྫོགས༔ བླ་མ་ཡི་དམ་མཁའ་འགྲོ་ཆོས་སྐྱོང་བཅས༔ སྔགས་ཀྱི་སྙིང་པོ་འབྲས་བུ་བཅུད་དང་ལྡན༔ དེང་འདིར་བདག་གི་སྐྲ་ལ་དབང་བསྐུར་ནས༔ དཔལ་དང་གཟི་བརྗིད་བདེན་པ་འགྲུབ་མཛད་ཀུན༔ བྱིན་རླབས་དབང་དང་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་ཧྲཱིཿཨ་བྷི་ཥིཉྩ་ཧོ༔ དེ་རྗེས་སྐྲ་ཡི་དམ་ཚིག་ཏུ༔ སྐྲ་ཉག་རེ་བཞིན་ལྷ་ཡི་དལ༔ དེ་ལ་བརྙས་བཅོས་མི་བྱ་བར༔ རྣམ་དག་ལྷ་ལ་ལྷ་ཉིད་ལྷ༔ རྡོ་རྗེ་ལུས་ཀྱི་གྲོང་ཁྱེར་དུ༔ གདན་གསུམ་ལྷ་ཡི་ཕོ་བྲང་ཡིན༔ དེ་ན་རིག་པ་ཆོས་ཀྱི་སྐུ༔ ལུས་གནས་བརྗོད་མེད་ཕྱག་རྒྱ་ཆེ༔ སངས་རྒྱས་གུད་དུ་བཙལ་མེད་པའི༔ གསང་སྔགས་ཁྱད་ཆོས་རྨད་དུ་བྱུང༔ ས་མ་ཡཱ༔ དེ་ནས་དེ་ཡི་རྒྱབ་ཆོས་སུ༔ མཁའ་འགྲོའི་ཚོགས་ལ་མཆོད་ཚོགས་འབུལ༔ རྩ་གསུམ་སྲུང་མ་མཉེས་པར་བྱ༔ དགའ་སྟོན་ཚོགས་ཀྱི་རྫས་ལ་རོལ༔ མནྟྲ་གུ་ཧྱ༔ ཤཱུ་བྷཾ༔