མེ་བསྐུལ།
མེའི་འཕྲུལ་འཁོར་དུས་སུ་ཁྲོས་མ་རིགས་ལྔའི་སྐུ་ལས་འཕྲོས་པར་བསམ༔ ཁྱེད་རང་རྣམས་ཀྱིས་དམིགས་པ་འདི་བཞིན་མཛོད༔ ཧཱུྃ༔ དུར་ཁྲོད་མེ་དཔུང་འབར་བའི་ཀློང་དཀྱིལ་ནས་མ་ཡུམ་ཆེན་ཁྲོས་མ་རིགས་ལྔའི་སྐུ་ལས་ཡེ་ཤེས་ལྔའི་མེ་དཔུང་ཁ་དོག་ལྔ་འཕྲོས་པའི་རྩེ་མོ་ལས༔ ལས་བྱེད་ཀྱི་ཁྲོ་བོ་སྨེ་བརྩེགས་ལག་ན་མེའི་མཚོན་ཆ་སྣ་ཚོགས་ཐོགས་པ་འཕྲོས༔ མེ་ཞགས་བརྒྱབ་པའི་ཚེ༔ ཁྱེད་རང་རྣམས་ཀྱི་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ༔ རྐྱེན་ངན་བར་ཆད༔ དུག་ལྔ་དུག་གསུམ་གཟུང་འཛིན་གྱི་རྣམ་རྟོག་གྲིབ་དང༔ མི་གཙང་བ་རྣམ་སྨིན་གདོས་བཅས་དང་བཅས་པ་གཞོབ་ཐུལ་གྱིས་བསྲེག༔ སེམས་རིག་སྟོང་ཡི་དམ་ཁྲོས་མ་རིགས་ལྔ་དང་དབྱེར་མེད་པར་གྱུར་པའི་མོས་པ་མཛོད༔ དེ་ནས༔ ཧཱུྃ༔ དུར་ཁྲོད་མེ་དཔུང་འབར་བའི་ཀློང་དཀྱིལ་ནས༔ མ་ཡུམ་ཆེན་རིགས་ལྔའི་སྐུ་ལས་ཡེ་ཤེས་ལྔའི༔ མེ་དཔུང་ཁ་དོག་ལྔ་འཕྲོས་སྟོང་གསུམ་གང༔ ལས་བྱེད་ཁྲོ་མོ་མེ་ཡི་མཚོན་ཐོགས་འཕྲོས༔ སྟེང་ཡང་མེ་ཡི་གུར་ཁང་ལ༔ མེ་ཡི་ཐོག་དང་སེར་ཆེན་འབེབས༔ འོག་ཀྱང་མེ་ཡི་ས་གཞི་ལ༔ མེ་ཡི་ཚྭ་ཚྭ་སྐར་ལྟར་འཁྲུགས༔ ཕྱོགས་མཚམས་ཐམས་ཅད་མེ་དཔུང་འབར༔ ལས་བྱེད་ཁྲོ་མོས་ཧཱུྃ་ཕཊ་སྒྲོག༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འཁྱུགས༔ ཡང་སྤྲུལ་ཚྭ་ཚྭ་སྐར་ལྟར་འཁྲིགས༔ རིགས་ལྔ་མཁའ་འགྲོའི་ཚོགས་ཀྱང་སྐར་ལྟར་འཁྲིགས༔ ལྷན་ཅིག་ལུས་གདོན་སྟེང་དུ་བརྒྱབ༔ ཚངས་པའི་འཇིག་རྟེན་མན་ཆད་དང༔ ས་འོག་ལྟོ་འཕྱེ་ཡན་ཆད་ཀྱི༔ གནོད་བྱེད་གདོན་བགེགས་བསྒྲལ་བའི་འཕྲིན་ལས་མཛོད༔ ནད་འདྲེ་ལྕོང་སྲི་རྡུལ་དུ་རློགས༔ ཟ་འདྲེ་ཤི་གཤེད་རྡུལ་དུ་རློགས༔ གོད་འདྲེ་བསེ་རག་རྡུལ་དུ་རློགས༔ མི་གཙང་བཙོག་གྲིབ་གཞོབ་ཏུ་བསྲེགས༔ དམེ་གྲིབ་ཡུག་གྲིབ་གཞོབ་ཏུ་བསྲེགས༔ མ་ལུས་ལུས་པ་མེད་པ་ཐམས་ཅད་ལ༔ དུར་ཁྲོད་མི་རོ་བམ་གྱི་ཚོགས་མཆོད་འབུལ༔ རྗེས་ཤུལ་ལྷག་མ་མེད་པར་ཧབ་ཐོབ་རོལ༔ ཕཊ༔ ཕཊ༔ ཕཊ༔ དེ་ལྟར་སྦྱིན་ཡུལ་ལྷ་འདྲེ་ཐམས་ཅད་ཀྱིས༔ ཧབ་ཐོབ་རོལ་པས་སོལ་ཕུང་བཞིན་དུ་སོང༔ ཆེ་བས་ཆུང་ཟོས་གཙོ་བོ་གསུམ་གྱིས་ཟོས༔ རྒྱལ་པོས་མོ་ཟོས་ས་བདག་ཆེན་པོས་ཟོས༔ དེ་ཡང་ནག་མོ་ཆེན་མོས་ཁྱུར་མིད་ཟོས༔ འཁོར་དང་དཔུང་ཟོས་ཆོས་སྐུའི་ཀློང་དུ་ཡལ༔ ཕཊ༔ ཕཊ༔ ཕཊ༔ བདག་དང་ཡུལ་སྣང་རྨི་ལམ་སད་པ་ལྟར༔ ཡེ་རིག་དོན་གྱི་ཧེ་རུའི་ངང་དུ་འདུས༔ ལྷ་མེད་འདྲེ་མེད་སངས་རྒྱས་སེམས་ཅན་མེད༔ བདག་མེད་ཡུལ་མེད་གནོད་བྱ་གནོད་བྱེད་མེད༔ ཕྱོགས་མེད་ཀ་དག་ལྷུན་འབྱམས་ཆེན་པོའི་ངང༔ མ་བཅོས་དེ་བཞིན་ཉིད་དུ་སྙོམ་པར་བརྡལ༔ ཕཊ༔ ཕཊ༔ ཕཊ༔