ཌཱཀྐིའི་མེ་མཆོད་ཆ་ལག་སྔོན་འགྲོའི་ཆོས་ཀྱི་ལས་རིམ་རས་པ་གསལ་སྟོབས་ཀྱིས་མཛད་པ།

ཡང་གསང་ཌཱཀྐིའི་མེ་མཆོད་ཆ་ལག་ཏུ༔ སྔོན་འགྲོའི་ཆོས་ཀྱི་ལས་རིམ་བཞུགས༔ སྐུ་གསུམ་མཁའ་འགྲོའི་སྐུ་ལ་འདུད༔ ལས་གཞུང་བཞིན་དུ་གནད་ལྡན་བྱ༔ ཐ་མ་མེ་མཆོད་ལས་སྦྱོར་ལ༔ དང་པོ་རྡོར་དྲིལ་བྱིན་རླབས་དང༔ གཉིས་པ་བསྲེག་རྫས་བྱིན་གྱིས་བརླབ༔ གསུམ་པ་མེ་དཀྱིལ་བྱིན་གྱིས་བརླབ༔ གཞན་ཞིང་ངམ་སྟག་གཟིག་ལྤགས་པའི་ཁྲིའི་ཁར༔ རྡོ་རྗེ་སློབ་དཔོན་ཉིད་བྱམས་བཞུགས་མཛད་ནས༔ ལས་བུམ་ཌཱ་དྲིལ་འཐོར་ནས་སོགས་མཁོ་ཆས་རྣམས་སྟ་གོན་བྱ༔ རང་ཉིད་ལྷ་ཡི་ང་རྒྱལ་གསལ་བསྟན་ངང་ནས༔ ཕཊཿ རང་ཉིད་སྐད་ཅིག་གིས་མ་ཅིག་ཁྲོས་མ་དམར་མོ་ཞི་ཁྲོའི་ཉམས་ཀྱིས་སྒེག་པའི་རྣམ་འགྱུར་ཅན་བལྟར་མི་བཟོད་པའི་སྐུར་གྱུར༔ ཅེས་བརྗོད་ཅིང་ཕྱག་གཡས་རྡོ་རྗེ་གསོར་བཞིན་ཨོཾ་མ་ཧཱ་བཛྲ་ཧཱུྃ༔ ཕྱག་གཡོན་དྲིལ་བུ་བསིལ་བཞིན་ཨོཾ་བཛྲ་གྷནྜེ་ཨཱ༔ ཞེས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་ཨོཾ་སརྦ་ཏ་ཐ་ག་ཏ་སོགས་ཧཾ༔ དེ་ནས་བསྲེག་རྫས་བྱིན་རླབས་ནི༔ ཨོཾ་སྭ་བྷ་ཝས་སྦྱངས༔ སྟོང་པའི་ངང་ལས་བྷནྡྷ་ལྕང་ལོ་དང་བཅས་པ་སྟོང་གསུམ་མཉམ་པའི་ནང་དུ་ཞིང་བཅུ་དགྲ་བགེགས་གནོད་བྱེད་ཟ་འདྲེ་ཤི་གཤེད་ཐམས་ཅད་བསྒྲལ་བའི་ཤ་ཡི་རི་བོ༔ ཁྲག་གི་རྒྱ་མཚོ༔ རུས་པའི་གྲམ་ཁྲོད་ཆེན་པོས་བྷནྡྷ་ལྟེམས་ཀྱིས་གང་བར་གྱུར༔ དེའི་ངོ་བོ་ཤ་ཁྲག་ལ་རྣམ་པ་ཟག་མེད་ཡེ་ཤེས་ཀྱི་བདུད་རྩི་ལ་འདོད་ཡོན་གྱི་སྤྲིན་འཕྲོ་བར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ༔ དེ་ནས་དཔལ་འབར་ཐོགས་ནས༔ ཕཊཿ རཾ་ཛཿ བདག་ཉིད་ཁྲོས་མར་གསལ་བའི་ཐུགས་ཀ་ནས་ཡུམ་གོས་དཀར་མོའི་ངོ་བོ་རཾ་དམར་ནག་མེའི་ཚྭ་ཚྭ་དང་བཅས་པ་འཕྲོས་ནས་མདུན་གྱི་མེ་དཀྱིལ་དུ་བཞུགས་པ་ཙམ་གྱིས་ཤར་ལྷོའི་མཚམས་ནས་མེ་འུར་སྒྲ་དང་བཅས་ཏེ་འབར་བར་བསམ༔ རཾ་སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ ཞེས་བརྗོད་ཤར་ལྷོའི་མཚམས་ནས་མེ་སྦར་རོ༔ ཡང་རླུང་གཡབ་ཡཾ་ལྗང་གུས་མཚན་པ་བཟུང་ནས༔ ཕཊཿ ཡཾ་ཛཿ བདག་ཉིད་ཁྲོས་མའི་ཐུགས་ཀ་ནས་ཡུམ་དམ་ཚིག་སྒྲོལ་མའི་ངོ་བོ་ཡཾ་ལྗང་གུ་རླུང་གྲང་བའི་ངར་དང་ལྡན་པ་ཞིག་འཕྲོས་ནས་མེ་དཀྱིལ་གྱི་བྱང་ཤར་མཚམས་ནས་ཞུགས་པ་ཙམ་གྱིས་མེ་སྒྲ་འུར་འུར་ཆེམ་ཆེམ་འབར་ནས་དུད་སྤྲིན་སྔོ་དམར་དུ་འཁྲིགས་པས་ཕྱོགས་བཅུ་ཐམས་ཅད་ཕྱུར་ཕྱུར་དུ་འཕྲོ་བར་གྱུར༔ གནོད་བྱེད་ཟ་འདྲེ་ཤི་གཤེད་ཀྱི་ཤ་ཁྲག་ཐམས་ཅད་སིར་སིར་ཆེམ་ཆེམ་ཚིག་ནས་ལྷག་མ་རྗེས་ཤུལ་ཙམ་ཡང་མེད་པར་གྱུར༔ ཡཾ་སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ གནོད་བྱེད་རྣམས་ཨགྣེ་ཡེ་ཛྭ་ལ་རཾ་རཾ་ཕཊ༔ དེ་ནས་མེ་ལྷ་བསྐྱེད་པ་ནི༔ ཨོཾ་སྭ་བྷ་ཝ་སོགས༔ ཧཱུྃ་ཧཱུྃ་ཧཱུྃ༔ ཞེས་བརྗོད་པས་སྟོང་པ་ཉིད་དང་སྙིང་རྗེ་དབྱེར་མེད་པའི་ངང་ལས༔ ཧཱུྃ་ཆོས་རྣམས་དག་མཉམ་ཆེན་པོའི་ཀློང༔ ཞེས་སོགས་གཞུང་བཞིན་བྱ༔ སྤེལ་ཚིག་འདོད་གསོལ་རྣམས་རིག་པས་འཕྲུལ་ཤེས་པར་བྱའོ༔ ཞེས་པའང་སྐྱབས་རྗེ་རིན་པོ་ཆེའི་མཁའ་འགྲོའི་མེ་མཆོད་ཀྱི་ཆ་ལག་ཏུ་ཁོ་བོ་འབངས་དམན་པདྨ་གསལ་སྟོང་གིས་སོ༔