མཁའ་འགྲོ་དྲག་མོའི་སྦྱིན་སྲེག་གདུག་པ་དམ་འདོགས་ཡེ་ཤེས་མེ་ཡི་དྲྭ་བ།
ཡང་གསང་མཁའ་འགྲོའི་ཐུགས་ཐིག་ལས༔ མཁའ་འགྲོ་དྲག་མོའི་སྦྱིན་སྲེག་གདུག་པ་དམ་འདོགས་ཡེ་ཤེས་མེ་ཡི་དྲྭ་བ་བི་ཛ་ཧ་རཾ༔ བརྟུལ་ཞུགས་ལམ་དུ་སློང་བ་ཡི༔ ཟབ་མོ་གཅོད་ཀྱི་ཧེ་རུ་ཀས༔ དྲག་པོའི་སྦྱིན་སྲེག་བྱེད་འདོད་པས༔ བསམ་པ་ཀུན་སློང་བཟང་པོ་ཡིས༔ སྟོང་ཉིད་སྙིང་རྗེ་སྙིང་པོའི་གདངས༔ དང་པོ་སྟ་གོན་གནད་ལ་བསྣུན༔ སྟེགས་བུ་གྲུ་གསུམ་བསྣོལ་བའི་སྟེང༔ ཐབས་སྟེགས་ཐིག་ཆེན་ཆ་ཕྲན་སོགས༔ རྒྱལ་བའི་བཀའ་ལྟར་འཛོལ་མེད་སྟེང༔ ཚེར་ནག་རྩི་ཤིང་གང་ཡང་རུང༔ གྲུ་གསུམ་བརྩིགས་སྟེང་བླ་བྲེ་ཕུབ༔ བསྲེག་རྫས་ལིང་ག་བརྒྱའམ་བཅུ༔ ཡམ་ཤིང་དེ་ལྡན་དུག་ཁྲག་བྱུགས༔ བྲུབ་ཁུང་བསྐྱེད་ལ་འགུགས་པ་བསྐྱར༔ དེ་ནས་ཚེ་ཁྲུས་དགོངས་པས་བསྒྲལ༔ དེ་ནས་དཔལ་འབར་གྱིས་མེ་སྦར་ལ༔ མེ་ཐབ་སྦྱངས་ལ་སྭ་བྷ་ཝས༔ ཆོས་རྣམས་དག་མཉམ་ཆེན་པོའི་ཀློང༔ རཾ་ལས་སྐྱེས་པའི་མེ་དཔུང་འབར༔ ངོ་བོ་གོས་དཀར་ཡུམ་ཆེན་མོ༔ རྣམ་པ་དམར་ནག་ཚྭ་ཚྭ་འཕྲོས༔ ཡུམ་ཆེན་ལྔ་ཡི་ཕྲིན་ལས་མེ༔ གནམ་ས་བར་སྣང་ས་གཞི་ཁྱབ༔ གནོད་བྱེད་དམ་སྲི་བྱད་མ་དང༔ དམིགས་པའི་ཡུལ་གྱི་གདོན་བགེགས་བསྲེགས༔ མ་རྡོ་རྗེ་མཁའ་འགྲོའི་མེ་དཔུང་གིས༔ གདོན་རྒྱལ་འགོང་མེ་ལོང་ཡེ་ཤེས་ཀློང༔ རྗེས་ཤུལ་ལྷག་མེད་པར་ཛྭ་ལ་རཾ༔ མ་རིན་ཆེན་མཁའ་འགྲོའི་མེ་དཔུང་གིས༔ གདོན་ང་རྒྱལ་མཉམ་ཉིད་ཡེ་ཤེས་ཀློང༔ རྗེས་ཤུལ་ལྷག་མེད་པར་ཛྭ་ལ་རཾ༔ མ་པདྨ་མཁའ་འགྲོའི་མེ་དཔུང་གིས༔ གདོན་མོ་འདྲེ་སོར་རྟོག་ཡེ་ཤེས་ཀློང༔ རྗེས་ཤུལ་ལྷག་མེད་པར་ཛྭ་ལ་རཾ༔ མ་ཀརྨ་མཁའ་འགྲོའི་མེ་དཔུང་གིས༔ གདོན་དམ་སྲི་བྱ་གྲུབ་ཡེ་ཤེས་ཀློང༔ རྗེས་ཤུལ་ལྷག་མེད་པར་ཛྭ་ལ་རཾ༔ མ་བུདྡྷ་མཁའ་འགྲོའི་མེ་དཔུང་གིས༔ གདོན་ཀླུ་གཉན་ཆོས་དབྱིངས་ཡེ་ཤེས་ཀློང༔ རྗེས་ཤུལ་ལྷག་མེད་པར་ཛྭ་ལ་རཾ༔ མ་མཁའ་འགྲོ་རྒྱ་མཚོའི་སྐུ་ལས་སྐྱེས༔ མེ་ཁ་དོག་སྣ་ཚོགས་ཕྱོགས་བཅུར་འཕྲོས༔ རྒྱུ་དུག་ལྔ་དུག་གསུམ་ལས་བྱུང་བའི༔ རྐྱེན་ཀུན་བཏགས་ལས་ཉོན་འཁྲུལ་སྣང་གིས༔ ལམ་ཀུན་སློང་སྟོང་ཕྲག་བརྒྱད་ཅུའི་གདོན༔ ནད་བཞི་བརྒྱ་རྩ་བཞིས་གཟིར་བ་ཡི༔ ཕོ་གདོན་རྒྱལ་པོ་མོ་སྲི་བསེན༔ ཀླུ་གདོན་ས་བདག་དམ་འགོང་སྡེ༔ སྟེང་གདོན་བྱད་མ་ལྷ་སྲུང་དང༔ གོད་འདྲེ་ན་ཚའི་སྣ་འདྲེན་བགེགས༔ མ་ལུས་ལྷག་མེད་ཛྭ་ལ་རཾ༔ མིང་གི་ལྷག་མར་མཛད་དུ་གསོལ༔ ཡིད་ལ་དམིགས་པའི་ཆེ་གེ་མོ༔ ཏིལ་འབྲུ་ཙམ་ཡང་མ་བཞག་པར༔ ལྷག་མེད་མཁའ་འགྲོའི་ཞལ་ཧོམ་དུ༔ བསྟིམ་མོ་རྒྱས་འདེབས་ཛྭ་ལ་རཾ༔ ཌཱ་དྲིལ་འུར་ཆེམ་ཕབས་ལ༔ རྩ་སྔགས་མཐར༔ གནོད་བྱེད་ཟ་འདྲེ་ཤི་གཤེད་བྱད་མ་དམ་སྲི་གོད་འདྲེ་ཆུང་སྲི་ཨགྣེ་ཡེ་ཛྭ་ལ་རཾ་མཱ་ར་ཡ་རྦད་ཁཱ་ཧི༔ ལིང་རོ་དང་སྦྲགས་དགོས་གལ་བསྟུན༔ བརྒྱའམ་སྟོང་ལ་སོགས་པ་བཟླས༔ ཡུམ་ཆེན་ཁྲོས་མ་ལྷ་ལྔའི་ཞལ་དུ་གནོད་བྱེད་བྱད་མ་སྡེ་བརྒྱད་དམ་སྲི་མི་དང་མི་མ་ཡིན་པའི་ཤ་ཁྲག་རུས་གསུམ་ཕུང་ཁམས་སྐྱེ་མཆེད་ཐམས་ཅད་ཛྭ་ལ་རཾ་ཁཱ་ཧི༔ མཆོད་པས་མཆོད་ཅིང་བསྟོད་པས་བསྟོད༔ རྒྱས་པར་ཁྲོས་མ་ལྷ་ལྔ་ལྟར་བསྟོད༔ འདོད་གསོལ་གཞན་ནས་བྱུང་ལྟར་བྱ༔ ས་མ་ཡཱ༔ གུ་ཧྱ༔ བརྡ་ཐིམ༔ ཞེས་ཁྲོས་མའི་སྦྱིན་སྲེག་དྲེགས་པའི་སྲོག་འཕྲོག་མེ་ཡི་སྤུ་གྲི་འཁོར་མ་འདི་ཉིད་སྔོན་སྦྱངས་ལས་འཕྲོ་བཟང་པོས་འཕྲོ་མཐུད་པའི་ཟབ་མོ་གཅོད་ཀྱི་བཀའ་བབ༔ བདག་གི་སློབ་བུ་སྙིང་སྟོབས་ཕུལ་དུ་བྱུང་བའི་རྣལ་འབྱོར་ཆེན་པོ་ཀླུ་སྐྱབས་ཀྱིས་བཞེད་སྐོང་དུ་སྙིང་མཛོད་སྨུག་པོའི་སྒྲོམ་ནས་བཏོན་དེ་དབེན་གནས་བྱིན་ལྡན་ནས་བརྡ་ཐོགས་མེད་དུ་བྲིས་པ་དགེ་ལེགས་འཕེལ༔