གཅོད་ཀྱི་ལས་ཚོགས་བསྟབས་པ་ཆ་དྲུག་ཕྱིན་དྲུག་ལམ་བཟང་།

ཡང་གསང་ཌཱཀྐིའི་ཐུགས་ཐིག་ལས༔ གཅོད་ཀྱི་ལས་ཚོགས་བསྟབས་པ་ཆ་དྲུག་ཕྱིན་དྲུག་ལམ་བཟང་བཞུགས༔

དམ་པ་མ་ཅིག་ལ་ཕྱག་འཚལ་ལོ༔ གཞན་ཕན་བསམ་སྤྱོད་སྔོན་དུ་བཏང༔ དབང་སྡུད་ཟིལ་གནོན་སྤྱི་ལྟར་ལ༔ ནད་པ་མདུན་དུ་བསྙལ་བྱས་ནས༔ མདུན་གྱི་ནད་པ་དང་རང་གི་རྣམ་ཤེས་ནམ་མཁར་སྤར་བས་ནམ་མཁའ་དང་དབྱེར་མེད་དུ་བསྲེས་ལ༔ བེམ་པོ་ཆེ་བ་ཚོ་བ་སྟོབས་དང་ལྡན་པ་ལྷ་འདྲེ་རྣམས་ཀྱིས་མཐོང་བ་ཙམ་གྱིས་དགའ་ཞིང་མགུ་བ་འདོད་པའི་རེ་བ་སྐོང་ནུས་པ་གཅིག་ཏུ་གྱུར༔ ཕཊ་ཕཊ་ཕཊཿ རྐང་དུང་ལན་གསུམ་དྲག་ཏུ་འབུད་ལ༔ ཕཊཿ ན་མོ་རྗེ་བཙུན་གྲུབ་ཐོབ་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་བཀའ་བདེན་པ་དང༔ དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང༔ ཡི་དམ་རྒྱལ་བ་ཞི་ཁྲོའི་ལྷ་ཚོགས་རྣམས་ཀྱི་བཀའ་བདེན་པ་དང༔ མ་ཅིག་ལབ་ཀྱི་སྒྲོན་མའི་བདེན་པ་དང༔ རིགས་ལྔ་རིགས་ཀྱི་མཁའ་འགྲོ་བྱེ་བ་འབུམ་དང་བཅས་པའི་བདེན་པ་དང༔ བཀའ་སྲུང་དྲང་སྲོང་ཆེན་པོ༔ ཟངས་རི་བཙན་རྒོད་མཆེད་གཉིས༔ ཀླུ་རྒྱལ་དྲག་པོ་ཟླ་སྐྱོང་ལ་སོགས་སྲུང་མ་དམ་ཅན་རྒྱ་མཚོའི་བདེན་པ་དང༔ བདེན་པ་ཆེན་པོའི་མཐུ་སྟོབས་ནུས་པ་ལ་བརྟེན་ནས༔ བསྲུང་བྱ་འདི་ལ་དང་པོ་ནད་ཀྱི་སྣ་འདྲེན་པ༔ བར་དུ་གདོན་གྱི་ཚང་བཅའ་བ༔ ཐ་མ་ནད་ལ་མི་ཕན་པར་བྱེད་པའི་ནད་ནད་བདག་དང་བཅས་པ༔ གདོན་སྣ་འདྲེན་དང་བཅས་པ༔ རྩ་རྩ་ལག་དང་བཅས་པ༔ འབྲེལ་བ་སྣ་འདྲེན་དང་བཅས་པ༔ མགོ་གཡོག་མགོ་སྐོར་བྱེད་ཅིང་བཀའ་དང་དམ་ལ་མི་གནས་པ་ཐམས་ཅད་གཟུགས་ཕུང་པོ་འདི་ལ་ཁུག་ཅིག༔ ཧཱུྃ་ཧཱུྃ་ཧཱུྃ༔ ཕཊཿ ཕཊཿ ཕཊཿ རྐང་དུང་དྲག་འབུད་གསུམ་རེ་དང༔ འགུགས་པ་གསུམ་ལྔ་བདུན་སོགས་འདོན༔ དེ་ནས་ཕུང་པོ་ཕྱོགས་དྲུག་ཏུ་གདོན་རྣམས་བསྐྱེད་པ་ནི༔ ཕཊཿ ཕཊཿ ཕཊཿ ཀྱེ༔ ཤར་དུ་ཞེ་སྡང་རྒྱལ་པོ་རྟ་མགོ་ཅན༔ ཞེ་སྡང་ལས་བྱུང་རྒྱལ་གདོན་འབྱུང་པོས་བསྐོར༔ ལྷོ་རུ་ང་རྒྱལ་གཤིན་རྗེ་གླང་མགོ་ཅན༔ ང་རྒྱལ་ལས་བྱུང་གཤིན་རྗེ་ལྷ་འདྲེས་བསྐོར༔ ནུབ་ཏུ་འདོད་ཆགས་མོ་གདོན་བྱ་མཆུ་ཅན༔ འདོད་ཆགས་ལས་བྱུང་མོ་གདོན་སྲིན་མོས་བསྐོར༔ བྱང་དུ་ཕྲག་དོག་དམ་སྲི་རི་བོང་མགོ༔ ཕྲག་དོག་ལས་བྱུང་དམ་སྲི་འགོང་པོས་བསྐོར༔ སྟེང་དུ་རྣམ་རྟོག་སེམས་བྱུང་གཟའ་བརྒྱད་ལ༔ རྒྱུ་སྐར་སྟེང་གདོན་ལྷ་སྲིན་འབྱུང་པོས་བསྐོར༔ འོག་ཏུ་གཏི་མུག་ཕག་གི་གདོང་ཅན་ལ༔ གཏི་མུག་ལས་བྱུང་ཀླུ་གདོན་ས་བདག་བསྐོར༔ དུར་ཁྲོད་མི་རོ་བམ་གྱི་ཚོགས་ལ་འདུས༔ མ་ཐོག་མ་འགྱང་མགྲོན་དུ་གཤེགས་སུ་གསོལ༔ ཁྱེད་ཚོགས་པ་རྣམས་ལ་ལུས་འདི་འབུལ༔ ཕྱི་ཤ་གཟུགས་དྲུག་མཆོད་པ་འབུལ༔ ཕ་རོལ་ཕྱིན་དྲུག་ཐོབ་པར་ཤོག༔ ནང་ཆ་བུ་དགུའི་མཆོད་པ་འབུལ༔ ཐེག་པ་རིམ་དགུ་ཐོབ་པར་ཤོག༔ དོན་སྙིང་ལྔ་ཡི་མཆོད་པ་འབུལ༔ སྐུ་ལྔ་ཡེ་ཤེས་ཐོབ་པར་ཤོག༔ ལྷ་འདྲེའི་ཚོགས་ལ་ལུས་ཀྱི་སྟོན་མོ་འབུལ༔ ཁྱེད་རིང་བ་རྣམས་ཀྱིས་རློན་པ་ཟོ༔ མི་རིང་བ་རྣམས་ཀྱིས་ཚོས་ལ་ཟོ༔ སྔོན་མ་རྣམས་ཀྱིས་ཁྱུར་མིད་གྱིས༔ རྗེས་མ་རྣམས་ཀྱིས་ཅི་དགའ་གྱིས༔ རིང་དང་མི་རིང་བྱེ་བྲག་གིས༔ བཙོ་བསྲེག་རློན་པ་ཅི་དགྱེས་གྱིས༔ སེང་གེ་ཤ་ལ་རོལ་བ་དང༔ དམག་ཆེན་མནོག་ཆེན་ཆོད་པ་དང༔ བྱིས་ནག་ཆུ་ལ་རུབ་པ་དང༔ བྱ་རྒོད་ཐེད་ལ་རོལ་བ་བཞིན༔ ཕུད་ལྷག་མ་མེད་པར་འདི་བཞེས་ཤིག༔ བེམ་པོ་ལུས་གདོན་འདི་ལ་ད་རོལ་ཅིག༔ ནད་འདྲེ་ཆུང་སྲི་འདི་ལ་ད་རོལ་ཅིག༔ ལས་ངན་རྣམ་སྨིན་འདི་དང་ད་ཕྲོལ་ཅིག༔ ནད་གདོན་སྡུག་བསྔལ་འདི་དང་ད་ཕྲོལ་ཅིག༔ ནད་བདག་གནོད་བྱེད་འདི་དང་ད་ཕྲོལ་ཅིག༔ བེམ་པོ་ལུས་གདོན་ཚོགས་ཀྱི་མཆོད་པ་བཞེས༔ ལུས་གདོན་རིག་པ་སྐྱེ་མེད་དབྱིངས་སུ་སྤོར༔ འཕྱུག་མེད་མངོན་སངས་རྒྱས་པའི་ཕྲིན་ལས་མཛོད༔ ཕཊཿ ཕཊཿ ཕཊཿ དེ་ནས་ཕུང་པོ་ལྷ་འདྲེ་རྣམས་ལ་བཀྱེ་བ་ནི༔ ཕཊཿ བདག་ཉིད་མ་ཅིག་ཁྲོས་མ་ཡི༔ གཡས་ཀྱི་ཕྱག་སོར་ལྕགས་སྤྱང་ལྔ༔ གཡོན་གྱི་ཕྱག་སོར་ཟངས་འཕར་ལྔ༔ དེ་བཅུས་ཕུང་པོ་སྤར་གཅོད་པས༔ ཤ་ཁྲག་དམར་ཆལ་ཕྱོགས་ཀུན་གཏོར༔ ལྷ་འདྲེས་ཁ་གདངས་སྤར་བསྒྲད་པས༔ ཧབ་སྒྲ་ལྕབ་སྒྲ་དིར་དིར་ཟོས༔ ལྷག་མ་མེད་པར་འགྱེད་པར་བསམ༔ ཕཊཿ ཕཊཿ ཕཊཿ ཞེ་སྡང་རྒྱལ་པོ་རྟ་ཡི་གདོང་ཅན་དང༔ ཞེ་སྡང་ལས་བྱུང་རྒྱལ་གདོན་འབྱུང་པོ་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་གི་མཆོད་སྦྱིན་འདི་བསྔོས་པས༔ ཁྱེད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ གཤིན་རྗེ་རྒྱལ་པོ་གླང་གི་མགོ་ཅན་དང༔ ང་རྒྱལ་ལས་བྱུང་གཤིན་རྗེ་ལྷ་འདྲེ་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་གི་མཆོད་སྦྱིན་འདི་བསྔོས་པས༔ ཁྱོད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ འདོད་ཆགས་མོ་གདོན་བྱ་ཡི་མཆུ་སྒྲོ་ཅན༔ འདོད་ཆགས་ལས་བྱུང་མོ་གདོན་སྲིན་མོ་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་གི་མཆོད་སྦྱིན་འདི་བསྔོས་པས༔ ཁྱོད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ ཕྲག་དོག་དམ་སྲི་རི་བོང་མགོ་ཅན་དང༔ ཕྲག་དོག་ལས་བྱུང་དམ་སྲི་འགོང་པོ་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་མཆོད་སྦྱིན་འདི་བསྔོས་པས༔ ཁྱོད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ གཏི་མུག་ཀླུ་གདོན་ཕག་གི་གདོང་ཅན་དང༔ གཏི་མུག་ལས་བྱུང་ཀླུ་གདོན་ས་བདག་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་གི་མཆོད་སྦྱིན་འདི་བསྔོས་པས༔ ཁྱོད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ སྟེང་གདོན་རྣམ་རྟོག་སེམས་བྱུང་གཟའ་བརྒྱད་དང༔ རྒྱུ་སྐར་ལ་སོགས་ལྷ་སྲིན་སྡེ་བརྒྱད་དང༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ཀྱི་ལྷ་འདྲེ་ལ༔ ལུས་ཤ་ཁྲག་གི་མཆོད་སྦྱིན་འདི་བསྔོས་པས༔ ཁྱོད་དགའ་མགུ་ཡི་རང་བྱང་སེམས་ལྡན༔ མཆོག་ཐུན་དངོས་གྲུབ་ཐོབ་པར་མཛོད༔ ཕཊཿ ཕཊཿ ཕཊཿ དེ་ལྟར་ཡུལ་དང་ལྷ་འདྲེ་ཐམས་ཅད་ཀྱིས༔ ཧབ་ཐོབ་རོལ་བས་ཤེས་རྒྱུད་མཉེས་ཤིང་ཚིམ༔ དགྱེས་པའི་གད་རྒྱངས་མགུ་བའི་གླུ་དབྱངས་ལེན༔ འབྲེལ་བ་ཐོབ་ཚད་བྱང་ཆུབ་ལམ་ལ་འགོད༔ ཆེ་བས་ཆུང་ཟོས་གཙོ་བོ་དྲུག་པོ་ཡང༔ གཅིག་གིས་གཅིག་ཟོས་འཁོར་དང་དཔུང་རྣམས་ཟོས༔ ཐམས་ཅད་བདག་མེད་ཆོས་སྐུའི་ཀློང་དུ་ཡལ༔ ཕཊཿ ཕཊཿ ཕཊཿ བདག་དང་ཡུལ་མེད་རྨི་ལམ་སད་པ་ལྟར༔ ཡེ་གཞི་དོན་གྱི་ཧེ་རུ་ཀ་དཔལ་དང༔ ལྷ་འདྲེ་གཉིས་མེད་འཁོར་འདས་ཆོས་སྐུར་གྲོལ༔ ཡུལ་དང་ཡུལ་ཅན་གནོད་བྱ་གནོད་བྱེད་སྟོང༔ ཕྱོགས་མེད་ཀ་དག་ལྷུན་འབྱམས་ཆེན་པོ་ཨ༔ མ་བཅོས་དེ་བཞིན་ཉིད་དུ་སྙོམ་པར་བརྡལ༔ ཕཊཿ ཕཊཿ ཕཊཿ ཅེས་བསྔོ་བ་དང་སྨོན་ལམ་ཆོས་སྦྱིན་སོགས་སྤྱི་ལྟར་བྱ༔ ས་མ་ཡཱ༔ ཞེས་པའི་གཅོད་ཀྱི་ཆ་ལག་བསྟབས་པ་ཆ་དྲུག་འདི་ནི་ལས་ལྡན་སློབ་བུ་རྣམས་ཀྱིས་བསྐུལ་ངོར༔ རྣལ་འབྱོར་ས་ར་ཧི་ཏས་མཆོང་མཛོད་སྨུག་པོའི་སྒྲོམ་ནས་བཏོན་ཏེ་སློབ་བུ་སྙིང་སྟོབས་ལྡན་པ་ལྷ་སའི་ཇོ་བོ་ལ་གསང་སྔགས་ཐབས་ཀྱི་ཕྱག་ལྗོན་ཤིང་ས་ལ་འགྱེལ་འདྲས་མཆོད་པའི་བཀུར་སྟི་དམ་པའི་བདག་པོ་ཀླུ་སྐྱབས་ལ་གཏད་པས་ཡུམ་དོན་ཆོས་སྐུའི་ཀློང་དུ་གཅོད་ནུས་པར་གྱུར་ཅིག་པའོ༔