བསྟབས་པ་ཆ་དྲུག་ཕུང་པོའི་མཆོད་སྦྱིན་ཀརྨའི་མིང་གིས་ཁྲིགས་སུ་བསྡེབ་པ།

ཡང་གསང་ཌཱཀྐིའི་ཐུགས་ཐིག་ལས༔ བསྟབས་པ་ཆ་དྲུག་ཕུང་པོའི་མཆོད་སྦྱིན་བཞུགས༔

མ་ཅིག་ཡུམ་ཆེན་མཁའ་འགྲོའི་ཚོགས་ལ་འདུད༔ སྐྱེ་མེད་གཅིག་ཏུ་གཅོད་པའི་རྣལ་འབྱོར་པས༔ ནད་ཀྱིས་གདུང་བའི་སྐྱེ་འགྲོ་ཕོ་མོ་རྣམས༔ མདུན་དུ་བོས་ལ་རྣམ་རྟོག་ཐོག་མི་བརྫི༔ འཇིག་རྟེན་ཆོས་བརྒྱད་བསམ་པ་མ་ཡིན་པས༔ བྱམས་དང་སྙིང་རྗེའི་སྙིང་པོ་སྟོང་ཉིད་རྩལ༔ ཞི་དང་ཁྲོ་བོའི་དབང་སྡུད་སྔོན་ལ་བཏང༔ གདན་ཐོག་མ་འམ་ལུས་སྦྱིན་ཙམ་གྱི་མཐར༔ ནད་པའི་གཟུགས་ཀྱི་ལིང་ག་སྐྱེ་མཆེད་ལྡན༔ ལན་ཆགས་དྲི་ཆུ་གཏོར་མ་གྲངས་སུ་བསགས༔ ཆེ་གེ་མོ་རྣམས་མདུན་དུ་ཉལ་བཅུག་ལ༔ ཕཊཿ ན་མོ་རྗེ་བཙུན་གྲུབ་ཐོབ་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་བཀའ་བདེན་པ་དང༔ སངས་ཀྱི་བཀའ་བདེན་པ་དང༔ ཆོས་ཀྱི་བཀའ་བདེན་པ་དང༔ དགེ་འདུན་གྱི་བཀའ་བདེན་པ་དང༔ མ་ཅིག་ལབ་ཀྱི་སྒྲོན་མ་རིགས་ལྔའི་རིགས་ཀྱི་མཁའ་འགྲོ་ཤུགས་འགྲོ༔ ཟངས་རི་བཙན་རྒོད༔ དྲང་སྲོང་ཁྱབ་འཇུག༔ ཀླུ་རྒྱལ་དྲག་པོ་ཟླ་སྐྱོང་དང་བཅས་པའི་བཀའ་བདེན་པས༔ བསྲུང་བྱ་འདིའི་ལུས་ལ་དང་པོ་ནད་ཀྱི་སྣ་འདྲེན་པ༔ བར་དུ་གདོན་གྱི་ཚང་བཅའ་བ༔ ཐ་མ་སྲོག་འཕྲོག་ཅིང་དབུགས་སྡུད་པའི་འབྱུང་པོ༔ རྩ་ལ་ཞེན་ཅིང་བག་ལ་ཉལ་བའི་འབྱུང་པོ་གང་དང་གང་ཡིན་པ་ཐམས་ཅད་གཟུགས་ལིང་ག་གཏོར་མ་དྲི་ཆུ་ཆང་བུ་འདི་རྣམས་ལ་ཁུག་ཅིག༔ ཛཿཧཱུྃ་བཾ་ཧོ༔ ལན་གསུམ་བྱ་ལ༔ ཕཊཿ ཕཊཿ ཕཊཿ མ་དབུས་ཕྱོགས་སངས་རྒྱས་མཁའ་འགྲོ་མ༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་གཏི་མུག་ཆོས་ཀྱི་དབྱིངས་སུ་སྤོར༔ སྟེང་གཟའ་གདོན་བྱད་མ་ཕྱིར་ལ་བཟློག༔ ཕཊཿ ཕཊཿ ཕཊཿ མ་ཤར་ཕྱོགས་བཛྲ་ཌཱཀྐི་མ༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་ཞེ་སྡང་མེ་ལོང་ཡེ་ཤེས་ཀློང༔ ཤར་དྲི་ཟའི་གདུབ་རྩུབ་ཕྱིར་ལ་བཟློག༔ ཕཊཿ ཕཊཿ ཕཊཿ མ་ལྷོ་ཕྱོགས་རཏྣ་ཌཱཀྐི་མ༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་ང་རྒྱལ་མཉམ་ཉིད་ཡེ་ཤེས་རྩལ༔ ལྷོ་གཤིན་རྗེའི་གཤེད་མ་ཕྱིར་ལ་བཟློག༔ ཕཊཿ ཕཊཿ ཕཊཿ མ་ནུབ་ཕྱོགས་པདྨ་ཌཱཀྐི་མ༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་འདོད་ཆགས་སོར་རྟོག་ཡེ་ཤེས་མཉམ༔ ནུབ་མོ་སྲི་བསེན་མོ་ཕྱིར་ལ་བཟློག༔ ཕཊཿ ཕཊཿ ཕཊཿ མ་བྱང་ཕྱོགས་ཀརྨ་ཌཱཀྐི་མ༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་ཕྲག་དོག་བྱ་གྲུབ་ཡེ་ཤེས་འཕྲུལ༔ བྱང་དམ་སྲིའི་སྡང་མིག་ཕྱིར་ལ་བཟློག༔ ཕཊཿ ཕཊཿ ཕཊཿ འོག་ས་སྤྱོད་བི་ཤྭ་ཌཱཀྐི་མ༔ མཚམས་ཕྱོགས་འཛིན་ལོ་ཀ་ཌཱཀྐིའི་ཚོགས༔ ཁྱེད་མཐུ་དང་ནུས་པའི་སྟོབས་བསྐྱེད་ལ༔ གདོན་ཀླུ་དང་མེ་ལྷ་སྲིན་མོ་དང༔ རླུང་ལྷ་དབང་ལྡན་ཡུལ་འདྲེ་གནས་ལུས་གདོན༔ ཀུན་ཀྱང་ཤ་ཁྲག་སྟོན་འགྱེད་མགྲོན་ལ་འདུས༔ གདོན་ནད་ཡམས་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྦད་དེ་གཞོམ༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ དེ་ནས་ལིང་ག་གྲི་གུག་གིས་གཏུབ་ལ༔ རྐང་ལག་སྡེ་བཞི༔ མགོ་དང་བྲང་སྦྱར་བ༔ ཁོག་སྨད་དང་དྲུག་བྱས་ལ་ཤ་དུམ་སྦྱར༔ ཁྲག་ཐིག་བྱུག་ཅིང་ཏིང་འཐེབ་དྲུག་ཏུ་བཤམས༔ ཡང་གཏོར་མ་དྲུག་ཀྱང་ཤ་ཁྲག་གིས་བརྒྱན་ལ་འཐེབ་དྲུག་ཏུ་བཤམས་ཤིང་བྲན༔ སྡེར་མའམ་སྣོད་དྲུག་ཏུ་ཆང་བུ་རེ་བཞག་ཅིང་ཁྲུས་ཆུ་འདེབས་པའི་གཟར་བུ་དང་ཁྲུས་ཆུ་བཞག་ལ༔ མཆོད་གཡོག་གསུམ་ལང་ལ་གཅིག་གིས་གཏོར་མ༔ གཅིག་གིས་ལིང་ག་མགོ་ངོས༔ གཅིག་གིས་ཆང་བུ་དང་ཁྲུས་ཆུ་གཟར་བུའི་ནང་བཟུང་བཅུག་ཅིང་བདུད་རྩིས་བྲན་ལ༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བཾ་ཆེན་བསྣོལ་བའི་ཁྲི༔ དབུས་ཀྱི་ཕྱོགས་ཀྱི་མ་ཅིག་ཁྲོས་མ་ནི༔ སྐུ་མདོག་མཐིང་ནག་རྔམ་ཞིང་འཇིགས་པའི་གཟུགས༔ ཕྱག་གཡས་གྲི་གུག་གཡོན་པས་རྒྱུ་ཞགས་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་བརྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ འཁོར་དུ་སངས་རྒྱས་རིགས་ཀྱི་མཁའ་འགྲོས་བསྐོར༔ གཏི་མུག་ལས་བྱུང་ཤི་འདྲེ་འབྱུང་པོ་དང༔ སྟེང་ཕྱོགས་གཟའ་གདོན་རྒྱུ་སྐར་ལྷ་སྲིན་ཚོགས༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་མགོ་བོ་དོན་སྙིང་འདི༔ མ་ཅིག་བདུད་འདུལ་ཁྲོས་མའི་ཞལ་དུ་བསྟབས༔ སངས་རྒྱས་མཁའ་འགྲོ་འབུམ་གྱིས་དགྱེས་པར་རོལ༔ སྟེང་གདོན་གཟའ་སྐར་ཕུང་པོའི་སྟོན་འགྱེད་བཞེས༔ གཏི་མུག་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ དམར་གཏོར་ནམ་མཁའ་ལ་འཕང༔ ལིང་གའི་མགོ་བོ་ནམ་མཁར་འཕང༔ ཆང་བུ་དྲི་ཆུ་ཡང་ནམ་མཁར་གཏོར་ལ༔ དེ་ནས་གཞན་ཐམས་ཅད་རིགས་འགྲེས་སོ༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བཾ་ཆེན་བསྣོལ་བའི་ཁྲི༔ ཤར་གྱི་ཕྱོགས་ཀྱི་མ་ཅིག་ཁྲོས་མ་ནི༔ སྐུ་མདོག་དཀར་མོ་རབ་ཏུ་འཇིགས་པའི་གཟུགས༔ ཕྱག་གཡས་གྲི་གུག་གཡོན་པས་རྒྱུ་ཞགས་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་བརྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ འཁོར་དུ་རྡོ་རྗེ་རིགས་ཀྱི་མཁའ་འགྲོས་བསྐོར༔ ཞེ་སྡང་ལས་བྱུང་ཕོ་གདོན་རྒྱལ་འགོང་དང༔ ཤར་ཕྱོགས་དྲི་ཟ་ལ་སོགས་ལྷ་སྲིན་གདོན༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་ལག་སྡེབ་གཡས་པ་འདི༔ མ་ཅིག་ཐུགས་ཀྱི་ཁྲོས་མའི་ཞལ་དུ་བསྟབས༔ རྡོ་རྗེ་མཁའ་འགྲོ་འབུམ་གྱིས་དགྱེས་པར་རོལ༔ དྲི་ཟའི་གདོན་རྣམས་ཕུང་པོའི་སྟོན་འགྱེད་བཞེས༔ ཞེ་སྡང་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ གོང་ལྟར་དམར་གཏོར་ལིང་ག་ཤར་ཕྱོགས་སུ་འཕང༔ ཆང་བུ་དྲི་ཆུ་ཡང་ཤར་དུ་གཏོར༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བམ་ཆེན་བསྣོལ་བའི་ཁྲི༔ ལྷོ་ཡི་ཕྱོགས་ཀྱི་མ་ཅིག་ཁྲོས་མ་ནི༔ སྐུ་མདོག་སེར་མོ་རབ་ཏུ་འཇིགས་པའི་གཟུགས༔ ཕྱག་གཡས་གྲི་གུག་གཡོན་པས་རྒྱུ་ཞགས་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་བརྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ འཁོར་དུ་རིན་ཆེན་རིགས་ཀྱི་མཁའ་འགྲོས་བསྐོར༔ ང་རྒྱལ་ལས་བྱུང་ཡ་མནྟ་ཀ་དང༔ ལྷོ་ཕྱོགས་གཤིན་རྗེ་ལ་སོགས་ལྷ་སྲིན་གདོན༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་ལག་སྡེབ་གཡོན་པ་འདི༔ མ་ཅིག་ཡོན་ཏན་ཁྲོས་མའི་ཞལ་དུ་བསྟབས༔ རིན་ཆེན་མཁའ་འགྲོ་འབུམ་སྡེས་དགྱེས་པར་རོལ༔ གཤིན་རྗེའི་གདོན་རྣམས་ཕུང་པོའི་སྟོན་འགྱེད་བཞེས༔ ང་རྒྱལ་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ གཏོར་མ་ལིང་ག་ལན་ཆགས་ཁྲུས་ཆུ་བཅས་གོང་ལྟར་ལྷོ་ཕྱོགས་སུ་གཏོར་ལ༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བཾ་ཆེན་བསྣོལ་བའི་ཁྲི༔ ནུབ་ཀྱི་ཕྱོགས་ཀྱི་མ་ཅིག་མཁའ་འགྲོ་ནི༔ སྐུ་མདོག་དམར་མོ་རྔམ་ལ་འཇིགས་པའི་གཟུགས༔ ཕྱག་གཡས་གྲི་གུག་གཡོན་པས་རྒྱུ་ཞགས་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་རྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ འཁོར་དུ་པདྨ་རིགས་ཀྱི་མཁའ་འགྲོས་བསྐོར༔ འདོད་ཆགས་ལས་བྱུང་མོ་གདོན་བསེན་མོ་དང༔ ནུབ་ཕྱོགས་ཀླུ་གདོན་ལ་སོགས་ལྷ་སྲིན་གདོན༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་རྐང་སྡེབ་གཡོན་པ་འདི༔ མ་ཅིག་གསུང་གི་ཁྲོས་མའི་ཞལ་དུ་བསྟབས༔ པདྨ་མཁའ་འགྲོ་འབུམ་སྡེས་དགྱེས་པར་རོལ༔ ཀླུ་ཡི་གདོན་རྣམས་ཕུང་པོའི་སྟོན་འགྱེད་བཞེས༔ འདོད་ཆགས་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ གཏོར་མ་ལིང་ག་ལན་ཆགས་ཁྲུས་ཆུ་བཅས་གོང་ལྟར་ནུབ་ཕྱོགས་སུ་གཏོར་ལ༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བཾ་ཆེན་བསྣོལ་བའི་ཁྲི༔ བྱང་གི་ཕྱོགས་ཀྱི་མ་ཅིག་ཁྲོས་མ་ནི༔ སྐུ་མདོག་ལྗང་གུ་འཇིགས་ལ་རྔམ་པའི་གཟུགས༔ ཕྱག་གཡས་གྲི་གུག་གཡོན་པས་རྒྱུ་ཞགས་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་བརྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ འཁོར་དུ་ལས་ཀྱི་རིགས་ཀྱི་མཁའ་འགྲོས་བསྐོར༔ ཕྲག་དོག་ལས་བྱུང་དམ་སྲི་འབྱུང་པོ་དང༔ བྱང་ཕྱོགས་གནོད་སྦྱིན་ལ་སོགས་ལྷ་སྲིན་གདོན༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་རྐང་སྡེབ་གཡས་པ་འདི༔ མ་ཅིག་ཕྲིན་ལས་ཁྲོས་མའི་ཞལ་དུ་བསྟབས༔ ལས་ཀྱི་མཁའ་འགྲོ་འབུམ་སྡེས་དགྱེས་པར་རོལ༔ གནོད་སྦྱིན་གདོན་རྣམས་ཕུང་པོའི་སྟོན་འགྱེད་བཞེས༔ ཕྲག་དོག་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ གཏོར་མ་ལིང་ག་ལན་ཆགས་ཁྲུས་ཆུ་བཅས་གོང་ལྟར་བྱང་ཕྱོགས་སུ་གཏོར་ལ༔ ཧཱུྃ༔ ཨོ་རྒྱན་རང་བྱུང་དུར་ཁྲོད་ཆེན་པོའི་གནས༔ རང་བྱུང་ཐོད་མཁར་འབར་བའི་གཞལ་ཡས་དབུས༔ ཉི་ཟླ་པདྨ་བམ་ཆེན་བསྣོལ་བའི་ཁྲི༔ འོག་གི་ཕྱོགས་ཀྱི་མ་ཅིག་ཁྲོས་མ་ནི༔ སྐུ་མདོག་སྔོ་སྐྱ་རྔམ་ཞིང་འཇིགས་པའི་གཟུགས༔ ཕྱག་གཡས་གྲི་གུག་གཡོན་པས་ཞགས་པ་བསྣམས༔ མི་ལྤགས་གཡང་གཞི་སྟག་ལྤགས་དར་དཔྱངས་བརྒྱན༔ མི་མགོའི་ཕྲེང་བ་རིན་ཆེན་རུས་རྒྱན་རྔམ༔ ཕྱོགས་མཚམས་འཛིན་ལོ་ཀ་ཌཱཀྐི་ཚོགས༔ འཁོར་སྣ་ཚོགས་མཁའ་འགྲོ་འབུམ་འབུམ་བསྐོར༔ ཉོན་མོངས་ལས་བྱུང་ཀླུ་གདོན་ས་བདག་དང༔ ཤར་ལྷོ་མེ་ལྷ་ལྷོ་ནུབ་སྲིན་པོའི་གདོན༔ ནུབ་བྱང་རླུང་ལྷ་བྱང་ཤར་དབང་ལྡན་གདོན༔ ཁྱེད་རྣམས་འདིར་གཤེགས་དམར་གྱི་གཏོར་མ་བཞེས༔ བེམ་པོ་ལུས་གདོན་རྩིབ་ཁོག་ནང་ཆུར་བཅས༔ མ་ཅིག་སྐུ་ཡི་ཁྲོས་མའི་ཞལ་དུ་བསྟབས༔ སྣ་ཚོགས་མཁའ་འགྲོ་འབུམ་སྡེས་དགྱེས་པར་རོལ༔ འོག་ཕྱོགས་གདོན་རྣམས་ཕུང་པོའི་སྟོན་འགྱེད་བཞེས༔ ཉོན་མོངས་གདོན་ཚོགས་ལན་ཆགས་དྲི་ཆུས་ཚིམ༔ རྐྱེན་ནད་གདོན་བར་ཆད་དབྱིངས་སུ་སོལ༔ བན་བོན་གྱི་བྱད་མ་རྡུལ་དུ་རློགས༔ མཆོག་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊཿ ཕཊཿ ཕཊཿ དེ་ནས་གཤེགས་གསོལ་སྨོན་ལམ་ནི༔ མ་རིགས་ལྔ་རིགས་ཀྱི་མཁའ་འགྲོ་ཤུགས་འགྲོ་དང༔ སྟེང་འོག་དང་ནི་ཕྱོགས་སྐྱོང་གདོན་གྱི་ཚོགས༔ ཁྱེད་དགའ་མགུ་ཡི་རང་ངོམ་ཞིང་ཚིམ༔ མགྲོན་མཁའ་འགྲོ་རིགས་ལྔ་རང་གནས་གཤེགས༔ འཁོར་ཕྱོགས་སྐྱོང་ལྷ་འདྲེ་རང་གནས་སོང༔ ཁྱེད་དགྱེས་པའི་གད་མོ་ཤ་ར་ར༔ མགུ་བའི་གླུ་ལེན་ཀྱུ་རུ་རུ༔ བཞུད་དོ་གཤེགས་སོ་ཕྲིན་ལས་མཛོད༔ དགེ་བ་འདིས་སྣང་སྲིད་ལྷ་འདྲེའི་ཚོགས༔ མ་ཡུམ་ཆེན་གྱི་གོ་འཕང་མྱུར་ཐོབ་ནས༔ བསམ་ངན་གྱི་སྦྱོར་བ་རང་སར་གྲོལ༔ ཀུན་གྲོལ་དང་ཀུན་བཟང་ཨ་ལ་ལ༔ ཕཊཿ ཕཊཿ ཕཊཿ ཅེས་གཅོད་ཀྱི་བསྟབས་པ་ཆ་དྲུག་ས་བདག་དྲུག་སྦྱོར་སྣང་སྲིད་ལྷ་འདྲེའི་སྟོན་འགྱེད་འདི་ཉིད༔ རིག་འཛིན་ཆེན་པོ་ཛྙཱ་ནཱ་དཱི་པས་སྙིང་དབུས་མི་ཤིགས་དྭངས་མའི་སྒྲོམ་ནས་མཁའ་འགྲོའི་བརྡ་བཞིན་སྤེལ་བ་ལ༔ ཞབས་པད་དུ་འཁོད་པའི་སྙོམ་ལས་པ་ཀརྨའི་མིང་ཅན་གྱིས་སྤྲུལ་པའི་སྐུ་རིན་པོ་ཆེའི་བཀས་གནང་བ་བཞིན་རྩ་ཚིག་ལ་ཅུང་ཟད་ཁ་ཕྲོལ་ཏེ་འདོན་བདེར་བསྒྲིགས་པ་ཉེས་འགལ་མཆིས་ན་མ་དང་ཌཱཀྐི་མའི་སྤྱན་སྔར་བཤགས་ཤིང་དགེ་བས་འགྲོ་ཀུན་རྡོ་རྗེའི་སྐུ་འགྲུབ་པར་ཤོག་ཅིག༔ སརྦ་མངྒ་ལམ༔