གཅོད་ཀྱི་ལས་ཚོགས་ཉེར་མཁོ་སྐོར་ཕྱོགས་གཅིག་ཏུ་བྲིས་པ།

༄༅། གཅོད་ཀྱི་ལས་ཚོགས་ཉེར་མཁོ་སྐོར་ཕྱོགས་གཅིག་ཏུ་བྲིས་པ་བཞུགས༔ ཐོག་མར་དབང་དུ་སྡུད་ཅིང་ཟིལ་གྱིས་གནོན་པ་ནི༔ གཅོད་གཞུང་གི་དབང་སྡུད་ཟིལ་གནོན་བྱེད་མཐར༔ ཕཊཿ ཕཊཿ ཕཊཿ རང་ཉིད་སྐད་ཅིག་གིས་མ་ཅིག་ཁྲོས་མ་ནག་མོ་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ༔ ཕྱག་གཡོན་མི་རྐང་གི་གླིང་བུ་ལྷང་ལྷང་འབུད་པས་ཁམས་གསུམ་དབང་དུ་སྡུད་ཅིང༔ གཡས་མི་ལྤགས་ཀྱི་གཡང་གཞི་དམར་ལྷབ་ལྷབ་ཏུ་བརྡབ་པས་འཁོར་བའི་འཁྲུལ་འཁོར་བཤིགས་ཤིང་སྲིད་གསུམ་དམ་ལ་བཏགས་པ༔ སྐུ་སྟོད་སྲིད་པའི་རྩེ་ནས་འགྱིང་ཞིང༔ ཞབས་ཀྱིས་ངན་སོང་རྣམ་གསུམ་གནོན་པ་འཇིག་རྟེན་གྱི་ཁམས་ཐམས་ཅད་ཤིག་ཤིག་དཀྲུག་ཅིང་ཡོམ་ཡོམ་སྒུལ་བར་གྱུར༔ ཕཊཿ ཕཊཿ ཕཊཿ ན་མོ་གྲུབ་ཐོབ་གཅོད་ཡུལ་རྒྱུད་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༔ སངས་རྒྱས་ཆོས་དང་དགེ་འདུན་བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་བཀའ་བདེན་པས་བསྲུང་བྱ་འདི་ཡི་ལུས་ངག་ཡིད་གསུམ་ལ་དང་པོ་ནད་ཀྱི་སྣ་འདྲེན་པ༔ བར་དུ་ནད་ཀྱི་ཚང་བཅའ་བ༔ ཐ་མ་ནད་ཀྱིས་སྲོག་གཅོད་པར་བྱེད་པའི་འབྱུང་པོ་ཕོ་གདོན་རྒྱལ་པོ་དང་ཕྲོལ་ཅིག༔ མོ་གདོན་འདྲེ་མོ་དང་ཕྲོལ་ཅིག༔ ཀླུ་གདོན་ས་བདག་དང་ཕྲོལ་ཅིག༔ གཟའ་གདོན་རྒྱུ་སྐར་དང་ཕྲོལ་ཅིག༔ སྣང་སྲིད་ལྷ་འདྲེ་ཐམས་ཅད་དང་ཕྲོལ་ཅིག༔ ཕྱེས་ཤིག༔ ཕཊཿ ཕཊཿ ཕཊཿ ལན་གསུམ་བརྗོད་ཅིང་གཡང་གཞི་དྲག་ཏུ་བརྡབ་བོ༔ ཀྱཻ༔ མ་རིག་འཁྲུལ་པའི་སེམས་ཅན༔ ལས་ཉོན་བག་ཆགས་ཀྱི་འདྲེ་གདོན༔ སྲིད་པ་སྡུག་བསྔལ་གྱི་འཁོར་ལོར་དབང་མེད་འཁོར་ཡུག་ཏུ་འཁོར་བའི་འདྲེ་བགེགས་གདུག་པ་ཅན་ཁྱེད་རྣམས་ཉོན་ཅིག༔ ཁམས་གསུམ་གྱི་སེམས་ཅན་ཐམས་ཅད་ལ་ཕ་དང་མ་རུ་མ་གྱུར་པ་གཅིག་ཀྱང་མེད་པས་དྲིན་ལན་གནོད་པས་མ་འཇལ༔ བཟང་ལན་ངན་གྱིས་མ་འཇལ༔ སྨན་ལན་དུག་གིས་མ་འཇལ་བར༔ ཁྱོད་ལས་དང་ཉོན་མོངས་པས་བསླུས་པ་ཡིན་པར་ངོ་ཤེས་པར་གྱིས་ལ་བཟུང་བ་ཡོད་ན་ཐོངས༔ བཅིངས་པ་ཡོད་ན་ཁྲོལ༔ བསྡམས་པ་ཡོད་ན་ཀློད༔ མནན་པ་ཡོད་ན་ཁྱོག༔ གལ་སྲིད་གཞན་གནོད་གདུག་རྩུབ་གྱི་བསམ་སྦྱོར་ལ་སྤྱོད་པར་གྱུར་ན་ཁྱོད་རང་འཁོར་བ་སྡུག་བསྔལ་གྱི་བཙོན་ཁང་དུ་ཚུད་ནས་ཚོར་བ་མྱ་ངན་དང༔ མྱོང་རྒྱུ་སྡུག་བསྔལ་ལས་མེད་པའི་དོན་ཤེས་པར་གྱིས་ལ་དད་གུས་དྲག་པོའི་སྒོ་ནས་བདག་གི་བཀའ་ལ་ཉན་ཏེ༔ དམ་ཚིག་ལ་གནས་པར་གྱིས་ཤིག༔ ཕཊཿ ཕཊཿ ཕཊཿ ཅེས་དབང་སྡུད་ཟིལ་གནོན་བྱའོ༔ ༈ ལུས་སྦྱིན་མཇུག་ཏུ༔ བདེ་སྡུག་གཏོང་ལེན་ནི༔ ཕཊཿ བདག་གིས་དུས་གསུམ་བསགས་པའི་རྣམ་དཀར་དགེ༔ ནང་འབྱུང་རླུང་གི་རྒྱུ་བ་དང་འགྲོགས་ཏེ༔ ཡོངས་ཀྱི་འགྲོ་བའི་རྒྱུད་ལ་ཐིམ་གྱུར་ནས༔ སྡུག་བསྔལ་ཀུན་བྲལ་བདེ་ཆེན་མཆོག་ཐོབ་གྱུར༔ ཕཊ༔ ཕཊ༔ སླར་ཡང་འགྲོ་བའི་རྒྱུད་ཀྱི་མི་དགེའི་ལས༔ འབྲས་བུ་ངན་སོང་གསུམ་སོགས་རིགས་དྲུག་གི༔ སྡུག་བསྔལ་རྒྱུ་བཅས་ལས་རླུང་ནང་ལྡོག་དང༔ འགྲོགས་ཏེ་རང་གི་སྒོ་གསུམ་ལ་ཐིམ་པས༔ འགྲོ་རྣམས་སྡུག་བསྔལ་དང་བྲལ་བདེ་ལྡན་གྱུར༔ ཕཊཿ ཆོས་ཀྱི་སྦྱིན་པ་ནི༔ ཆོས་རྣམས་ཐམས་ཅད་སོགས། སྡིག་པ་ཅི་ཡང་སོགས། འབྱུང་པོ་གང་དག་སོགས། ཕཊཿ བདེ་སྟོང་ཟག་མེད་རྡོ་རྗེ་ཕག་མོའི་སྐུ༔ བརྩེ་བའི་རང་གཟུགས་ཨརྱ་ཏཱ་རེ་མ༔ མཁའ་འགྲོའི་དབང་ཕྱུག་སུ་ཁ་སིདྡྷི་དངོས༔ ཨ་མ་ལབ་ཀྱི་སྒྲོན་མའི་བཀྲ་ཤིས་ཤོག༔ སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན་སོགས། ལུས་སྦྱིན་བཏོན་ནས་མཇུག་ཏུ། སྣང་གྲགས་རྟོགས་སོགས།