མནན་གཏད་མི་འགྱུར་ཀ་བའི་ལག་ལེན་གསལ་བྱེད་ལྡེ་མིག་རས་པ་གསལ་སྟོབས་ཀྱིས་མཛད་པ།

ཟབ་མོ་གཅོད་ཀྱི་ཆ་ལག༔ མནན་གཏད་མི་འགྱུར་ཀ་བ་ཡི༔ ལག་ལེན་གསལ་བྱེད་ལྡེའུ་མིག་བཞུགས༔ མ་དང་ཌཱཀྐིའི་ཚོགས་ལ་འདུད༔ འཁྲུལ་རྟོག་དབྱིངས་གྲོལ་རྣལ་འབྱོར་གྱིས༔ ཟབ་གཅོད་ལས་མཐའ་རྩོམ་པའི་ཚེ༔ དགྲ་གཟུགས་ལིང་ག་གཞུང་བཞིན་འབྲི༔ ལིང་ཁྲུས་ཆས་གཞུགས་མནན་གཏད་བར༔ གཞན་བྱུང་མ་ཅིག་ཞལ་ལུང་ལྟར༔ གནད་བསྟུན་དུས་ལ་བབས་པ་ན༔ སྔ་ནོན་གྱི་དམིགས་པ་དང་དཔའ་བའི་སྟབས་ཀྱིས་གཉན་སར་ཕྱིན༔ དེ་ནས་རང་ཉིད་སྐད་ཅིག་གིས་མ་ཅིག་ཁྲོས་མ་ནག་མོའི་སྐུའི་རྣམ་འགྱུར་ངོམ་བཞིན་དུ༔ དང་པོ་དབང་སྡུད་ཟིལ་གནོན་བྱ༔ རྐང་དུང་དྲག་འབུད་གཡང་གཞི་བརྡབ༔ ཕཊཿསྒྲས་སྟོང་གསུམ་གང་བར་བྱ༔ ཕཊཿ ཕཊཿ ཕཊཿ ཡེ་གཞི་སྟོང་ཆེན་དག་པ་ནམ་མཁའི་དབྱིངས༔ ཡེ་ཤེས་རང་རྩལ་སྒྱུ་འཕྲུལ་ལབ་ཀྱི་སྒྲོན༔ མ་ཅིག་ཁྲོས་མ་དམར་མོ་གཏུམ་རྔམ་འབར༔ ཕྱག་གཡས་མི་ལྤགས་གཡང་གཞིས་ཁམས་གསུམ་སྡུད༔ ཕྱག་གཡོན་མི་རྐང་གླིང་བུས་སྲིད་གསུམ་གནོན༔ སྐུ་ཡི་དཔའ་ཟིལ་མེ་རིས་རིགས་དྲུག་གི༔ སྐྱེ་འགྲོ་ལྷ་འདྲེ་དྲེགས་པ་ཆུམ་ཆུམ་འདུས༔ བཀའ་ཉན་གསུང་སྡོད་ཚུལ་དུ་མདུན་དེར་འཁོད༔ ཕཊཿ ཕཊཿ ཕཊཿ ཅེས་ལྷ་འདྲེ་བཀའ་ཉན་གསུང་སྡོད་དུ་གྱུར་པར་བསམ༔ གཉིས་པ་གཏོར་སྐྱེམས་རྣམས་འབྲུ་གསུམ་གྱིས་བྱིན་རླབས་བྱ༔ ཕཊཿ རིག་འཛིན་རྩ་བརྒྱུད་བླ་མ་དང༔ ཡི་དམ་རྒྱུད་སྡེ་བཞི་དྲུག་ལྷར༔ གནས་གསུམ་མ་སྲིང་མཁའ་འགྲོ་ལ༔ གཏོར་སྐྱེམས་མཆོད་པ་འདི་བཞེས་ལ༔ རྣལ་འབྱོར་བདག་གི་གྲོགས་མཛོད་ཅིག༔ ཁྱད་པར་ཆོས་སྐུ་ཡུམ་ཆེན་མོ༔ ལོངས་སྐུ་ཕག་གདོང་ཁྲོས་མ་ནག༔ སྤྲུལ་སྐུ་མ་ཅིག་ཡབ་ཡུམ་སྲས༔ གཏོར་སྐྱེམས་མཆོད་པ་འདི་བཞེས་ལ༔ རྣལ་འབྱོར་བདག་གི་གྲོགས་མཛོད་ཅིག༔ གནས་ཡུལ་མཁའ་འགྲོ་ཞིང་སྐྱོང་དང༔ གཟའ་ཀླུ་བཙན་གྱི་སྡེ་ཚོགས་འབངས༔ ལོ་ཟླ་ཞག་དུས་ཚེས་གྲངས་དང༔ སྣང་ཞིང་སྲིད་པའི་ལྷ་འདྲེ་རྣམས༔ གཏོར་སྐྱེམས་མཆོད་པ་འདི་བཞེས་ལ༔ རྣལ་འབྱོར་བདག་གི་གྲོགས་མཛོད་ཅིག༔ སྔོན་ཚེ་བརྒྱུད་གསུམ་བླ་མ་དང༔ མ་ཅིག་ཡབ་སྲས་སྤྱན་སྔ་རུ༔ ཇི་ལྟར་ཁས་བླངས་དམ་བཅས་བཞིན༔ རྣལ་འབྱོར་བདག་གི་གྲོགས་མཛོད་ཅིག༔ ལས་འབྲས་མྱུར་དུ་མཆིས་པར་མཛོད༔ ཅེས་གཏོར་སྐྱེམས་གཤེགསཿ གསུམ་པ་གཟུ་དཔང་ནི༔ ཕཊཿ ཧོ༔ དགོངས་ཤིག་དཀོན་མཆོག་རིན་ཆེན་གསུམ༔ གསོན་ཅིག་རྩ་གསུམ་བཀའ་སྲུང་བཅས༔ ཉོན་ཅིག་བཀའ་ཉན་ལྷ་འདྲེའི་ཚོགས༔ དེ་རིང་གཟུ་དང་དྲང་ཤན་འབྱེད༔ ངས་ནི་མ་ཉེས་མ་ཡོ་འོ༔ རྡོ་རྗེ་ཐེག་པ་ཉམས་བླངས་ནས༔ ཚེ་གཅིག་བྱང་ཆུབ་སྒྲུབ་སྙམ་ཡང༔ དམ་ཉམས་འདི་ཡིས་མ་སྟེར་རོ༔ འཇིག་རྟེན་བྱ་བ་རྒྱབ་བོར་ནས༔ ཆོས་དང་མཐུན་པའི་ལས་བྱས་ཀྱང༔ དགྲ་བོ་འདི་ཡིས་མ་སྟེར་རོ༔ རང་གཅིག་དོན་ལ་མ་གཉེར་ཞིང༔ འགྲོ་ཀུན་དོན་དུ་སེམས་བསྐྱེད་ཀྱང༔ ཆོས་སྒྲུབ་པ་ལ་བར་ཆད་བྱེད༔ ཕུང་བྱེད་དམ་ཉམས་ཁོ་ཡིས་ཉེས༔ སངས་རྒྱས་བསྟན་པ་གཉན་པོ་བཤིག༔ རྡོ་རྗེ་སློབ་དཔོན་སྐུ་དགྲ་བྱས༔ སེམས་ཅན་ཡོངས་ལ་བདེ་མི་སྟེར༔ རྣལ་འབྱོར་བདག་གི་དགྲ་རུ་ལངས༔ འདི་ནི་བསྒྲལ་བའི་ཞིང་ཡིན་ནོ༔ མངོན་སྤྱོད་དྲག་པོའི་ཕྲིན་ལས་མཛོད༔ མ་འདའ་བཛྲ་ས་མ་ཡཱ༔ བཞི་པ་ཧོམ་བསྐྱེད་ནི༔ ཕཊཿ ཨེ་ནྲྀ་ཏྲི་བྷྱོ་ཛཿམནྜ་ལ་བྷྲུྃ༔ རང་ཉིད་ཁྲོས་མ་ནག་མོའི་མདུན་དུ་དུར་ཁྲོད་དྲག་པོ་འཇིགས་སུ་རུང་བའི་དབུས་སུ་གྲུ་གསུམ་གྱི་ཁང་སྒྲོམ་ཁ་དོག་ཅིང་གཏིང་ཟབ་པ༔ ཁ་ལ་ཞེ་སྡང་གི་མེ་འབར་བ༔ འོག་ན་འདོད་ཆགས་ཀྱི་ཆུ་རླབས་འཁྲུགས་པ༔ བར་ན་ཕྲག་དོག་གི་རླུང་ནག་འཚུབས་པ༔ ནང་ན་གཏི་མུག་གི་སྨག་ནག་ཅིང་གཤིན་རྗེའི་ཕོ་ཉ་མང་པོ་རྒྱུག་ཅིང་གར་རྩེ་བ༔ དྲེགས་པ་ཡོངས་ཀྱི་བཤན་ཁང༔ སྡེ་བརྒྱད་རྒྱུ་བའི་སྲང་སྒོ༔ ལས་ཀྱི་བཙོན་ར་ཡ་ང་བ་དེའི་ནང་དུ་ནྲྀ་ལས་ཞིང་བཅུ་ཚངས་བའི་བྱད་མ་ཉམས་པ་བདུན་ལྡན་གྱི་དགྲ་བོ༔ སྔོ་བ་སྐྱ་བ་རིད་པ་ཉམ་ཐག་པ༔ རྐང་ལག་ལྕགས་སྒྲོག་གིས་བསྡམས་ནས་གན་རྐྱལ་དུ་གནས་པ༔ སྲོག་གཅོད་དྲག་པོའི་དམག་གིས་བསྐོར་བ༔ མི་སྙན་བརྡུང་ཆོམ་རྒྱོབ་སོད་ཀྱི་སྒྲ་དི་རི་རི་སྒྲོག་ཅིང་མཚོན་ཆའི་ཆར་འབེབས་པ༔ ནད་ཀྱི་ན་བུན་འཚུབ་པ༔ གདོན་གྱི་ཚང་བཅའ་བ༔ དུག་གི་རླངས་པ་འཕྲོ་བ༔ དེ་ལས་མནར་དུ་མེད་པའི་གནས་སུ་ཚུད་པར་གྱུར༔ ཅེས་ལྕགས་ཀྱུའི་ཕྱག་རྒྱས༔ ཕཊཿ ཛཿ ན་མོ་གྲུབ་ཐོབ་གཅོད་བརྒྱུད་བླ་མ་དང༔ ཡི་དམ་ཞི་ཁྲོ་གནས་གསུམ་མཁའ་འགྲོ་དང༔ གཟའ་ཀླུ་བཙན་གྱི་སྡེ་ཚོགས་བདེན་སྟོབས་ཀྱིས༔ དགྲ་འདྲེ་འཁོན་གསུམ་བྱད་མ་ལྷ་སྲུང་དང༔ ཇག་རྐུན་གྱོད་འཁོན་དམ་སྲི་སྤུན་དགུའི་རིགས༔ བསྒྲལ་བའི་ཞིང་བཅུ་ཚང་བ་མ་ལུས་པ༔ མིང་གཟུགས་ལིང་ག་འདི་ལ་མྱུར་དུ་ཁུག༔ ཅེས་འགུག་པ་རྟགས་ཐོན་འགུགས་སྔགས་བཟླས༔ མཐར་དྲག་སྔགས་གཤམ་དུ་ཨོཾ་བཛྲ་ཀྲོ་ཏ་ཀ་ལི་བཾ་ཧ་རི་ནི་ས་ཀྴ་རཀྴ་ནཱ་ག་དྲི་ཤུ་ལ་དགྲ་བགེགས་རྣམས་བཛྲ་ཨང་ཀུ་ཤ་ཡ་ཛ༔ རཏྣ་པ་ཤ་ཧཱུྃ༔ པདྨ་སྥོ་ཊ་བཾ༔ ཀརྨ་གྷནྚེ་ཧོ༔ ཞེས་དང༔ ལྔ་པ་ལྷ་འདྲེ་ལ་མནན་པ་གཏད་པ་ནི༔ འོ་འོ༔ བདག་ཉིད་ཡེ་ཤེས་མཁའ་འགྲོ་མའི༔ བཀའ་ཉན་གསུང་སྡོད་ལྷ་འདྲེ་ཀུན༔ སྤྱིར་སྣང་ཞིང་སྲིད་པའི་ལྷ་འདྲེ་དང༔ སྒོས་གཉན་ས་འདིར་གནས་ལྷ་འདྲེའི་ཚོགས༔ ངས་ཞིང་བཅུ་ཚང་བའི་དགྲ་བོ་འདིའི༔ གཟུགས་ཁམས་དང་སྐྱེ་མཆེད་དབང་པོ་ལྔ༔ མཐའ་རྩ་སྐྱེ་རྒྱུད་ཀ་ཆ་དཀོར་ནོར་ཀུན༔ ཁྱེད་ལྷ་འདྲེ་རྣམས་ལ་གཉེར་གཏད་བྱ༔ ད་མཐུ་རྩལ་ནུས་པ་ཅི་འདུག་ལྟ༔ དུས་བྱམས་པའི་བསྟན་པ་མ་ཤར་བར༔ ཁྱོད་ལྷ་འདྲེ་རྣམས་ཀྱིས་གཏོང་མི་བྱ༔ བཀའ་ཐ་ཚིག་མ་འདའ་ཐུབ་པར་བསྲུང༔ དོན་དམ་ཚིག་སྙིང་གི་དཀྱིལ་དུ་ཆོངས༔ དེ་མི་སྲུང་གཡར་དམ་འཆོལ་གྱུར་ན༔ ཁྱོད་ལུས་སེམས་རྡོ་རྗེ་དམྱལ་བར་ལྟུང༔ དེས་སྡུག་བསྔལ་བཟོད་བླག་མེད་པར་མྱོང༔ བཀའ་ཚུལ་བཞིན་ཉམས་བླངས་དོན་ཀུན་འགྲུབ༔ ངས་གཅེས་འཛིན་ཕུང་པོའི་མཆོད་སྦྱིན་བྱ༔ དུས་ཅི་སྲིད་འཁོར་བ་མ་སྟོང་བར༔ ཁྱེད་ལྷ་འདྲེ་རྣམས་ཀྱིས་ཅི་དགའ་སྤྱོད༔ ཆོས་བྱང་ཆུབ་སྙིང་པོའི་ལམ་ལ་སྦྱོངས༔ ངེད་རང་གཞན་ཚོམ་བུ་གཅིག་པ་རུ༔ མ་ཡུམ་ཆེན་ཐུགས་ཀློང་གྲོལ་བར་གྱུར༔ དོན་འཁོར་གསུམ་དམིགས་མེད་རྒྱས་གདབ་བོ༔ ཞེས་གཏད་བྱ་གཏད་ཡུལ་གཏོད་མཁན་ཀུན༔ གཞི་མ་བཅོས་གཉུག་མའི་ངང་དུ་ཀློད༔ ས་མ་ཡཱ༔ དྲུག་པ་ཕུང་པོ་མཆོད་སྦྱིན་ནི༔ དཀར་འགྱེད་ཁྲ་དང་དམར་འགྱེད་བྱ༔ དགེ་སྡིག་གཏོང་ལེན་ཆོས་སྦྱིན་དང༔ བསྔོ་སྨོན་ཤིས་བརྗོད་ཡང་དག་བྱ༔ ཕྱི་མཚམས་བཅད་ནས་རང་ཡུལ་སླེབས༔ ཕྱི་བོན་དམིགས་པ་གནད་ལྡན་གཅེས༔ དེ་ལྟར་ཟབ་གཅོད་ཆ་ལག་གི༔ མནན་གཏད་མི་འགྱུར་ཀ་བ་འདི༔ ཡབ་རྗེ་བླ་མའི་ཟབ་ཆོས་ཀྱིས༔ གཞིར་བཞག་མ་ཚང་ཁ་སྐོང་ཕྱིར༔ རང་བློས་ཁ་གསབ་འདོན་བདེར་བཀོད༔ ཟབ་ཆོས་ཟུང་གི་བསྟན་པ་འདི༔ བཀའ་སྲུང་གཟའ་ཀླུ་བཙན་གྱིས་འཚོས༔ དུས་མཐའི་བར་དུ་དར་བར་མཛོད༔ ས་མ་ཡཱ༔ རྒྱ་རྒྱ་རྒྱ༔ ཞེས་སློབ་འབངས་ཐ་ཤལ་རས་མིང་འཛིན་པ་པདྨ་གསལ་སྟོང་གིས་བྲིས་པ་དགེ་ལེགས་འཕེལ༔