ཟབ་མོ་གཅོད་ཀྱི་ལས་མཐའ།
ཡང་གསང་མཁའ་འགྲོའི་ཐུགས་ཐིག་ལས༔ ཟབ་མོ་གཅོད་ཀྱི་ལས་མཐའ་སྟོན༔ ཡུམ་ཆེན་བཅོམ་ལྡན་མ་ལ་འདུད༔ ཟབ་མོ་གཅོད་ཀྱི་གཏད་མནན་དང༔ ནད་པ་སྨྱོ་འདུལ་ལྕགས་ཁྲ་སྟོན༔ ས་མ་ཡཱ༔ དང་པོ་གཏད་པའི་ལས་རིམ་ནི༔ ཡུལ་གྱི་ཟོ་དོར་གཞི་བདག་དང༔ གཏོད་ཀྱི་ཕ་ཝཾ་མཚོ་ཆུ་མིག༔ གང་ལ་གཏད་པའི་ས་དེ་རུ༔ ནད་པ་ཁྱེར་བཅུག་དེ་ལ་གཏད༔ ཚིག་འདིས་དམིགས་པ་ཡེངས་མེད་ངང༔ ཕཊཿ ཡུལ་གྱི་ཟོ་དོར་ཆེན་པོ་ཁྱེད་ལ་ནད་པ་འདི་གཏད་པ་ཡིན་པས་ན་མི་ཐུབ་འཆི་མི་ཐུབ་པ་འདི་དུས་ད་ལྟ་ཉིད་དུ་ན་ཞིང་གཟེར་ལ་འཆི་བའི་དུས་བྱེད་པར་གྱིས་ལ་ནད་ནད་བདག་དང་བཅས་པ་ཁྱེད་ལ་དུས་ལྟ་ཉིད་དུ་གཏད་དོ༔ གཉེར་རོ༔ མཐུ་རྩལ་དང་ནུས་པ་ཅི་འདུག་ད་རེས་བལྟའོ༔ བདག་གི་འདོད་དོན་དུས་ད་ལྟ་ཉིད་དུ་སྒྲུབས་ཤིག༔ གལ་ཏེ་བཀའ་ལས་འདའ་ན་ཡུལ་འདིར་མཛེ་ཤས་རི་བོ་བརྩེགས༔ མཛེ་ཁྲག་གིས་རྒྱ་མཚོ་བསྐྱིལ༔ མཛེ་རྐང་གིས་ཀ་བ་བཙུགས༔ མཛེ་ལྤགས་ཀྱིས་བླ་རེ་ཕུབ༔ གནམ་ས་སྟེང་འོག་བསྒྱུར༔ ལྷ་འདྲེ་གནས་རྟེན་ཡུལ་མེད་དུ་གཏོང་ཏ་རེ༔ ཁྱོད་རྣམས་ལ་བཀའ་བསྒོ་བ་དེ་ལས་མི་འདའ་ཞིང་ལེགས་པར་བསྒྲུབ་ཚེ་དཀར་དམར་ནག་འགྱེད་སོགས་ཀྱིས་ལྷ་འདྲེ་ཁྱེད་རྣམས་མཉེས་པར་བྱས་ནས་སྦྱིན་པ་རྣམ་པ་བཞིས་ཡོངས་སུ་བསྐྱངས་ནས་བདེ་ཞིང་བདེ་བའི་ས་ལ་འགོད་པར་བྱའོ༔ དེ་ནས་རང་གཞུང་གི་གཅོད་རྒྱས་བསྡུས་སྐབས་དང་བསྟུན༔ ནད་པ་ལ་ཕྱར་ནག་སོགས་བཀབ་ནས་བཞག་གོ༔ ཤི་སོས་མྱུར་དུ་ཐག་ཆོད་པར༔ ཡེ་ཤེས་མཁའ་འགྲོའི་བརྡ་ལས་སྣང༔ སྐལ་ལྡན་ཆོས་ཀྱི་བདག་པོར་གཏོད༔ སྐལ་མེད་ལོག་ལྟ་ཅན་ལ་གསང༔ བཀའ་སྲུང་འབར་བ་གསུམ་གྱིས་སྲུང༔ ལུང་རིགས་ཚད་མ་གསུམ་གྱི་རྒྱ༔ ཞལ་ཤེས་ཆོས་ཀྱི་བདག་པོས་དཔྱོད༔ དགོས་གལ་དུས་ཀྱི་བྱ་བས་ཤེས༔ ཟབ་པ་གཅོད་ཀྱི་ལས་ཚོགས་བཀའ༔ ས་མ་ཡཱ༔ མནྟྲ་གུ་ཧྱ༔ ཤུ་བྷཾ༔ ལྷ་སའི་ཇོ་བོ་ལ་དམིགས་ནས་རྒྱལ་མོ་རོང་ནས་བརྐྱང་ཕྱག་འཚལ་བའི་རྣལ་འབྱོར་པ་ཀླུ་སྐྱབས་ལ་གཏེར་མིང་ཅུང་ཟད་འཛིན་པ་ས་ར་ཧི་ཏ་བྷ་ཏྲས་སོཿ