ནད་པ་ལྕགས་ཁྲ།
ཟབ་མོ་གཅོད་ཀྱི་གདམས་པ་ལས༔ ནད་པ་ལྕགས་ཁྲ་ཞེས་བྱ་སྟོན༔ རང་བྱུང་ཤེས་རབ་ཕ་རོལ་ཕྱིན༔ སྐྱེ་འགག་གཉིས་མེད་དེ་ལ་འདུད༔ ས་མ་ཡཱ༔ དང་པོ་སྙིང་རྗེ་ཐུན་གཅིག་སྒོམ༔ དེ་ནས་སྐད་ཅིག་རང་ཉིད་ནི༔ མ་ཅིག་མཁའ་འགྲོ་ནག་མོ་བསྒོམ༔ ཕྱག་གཡས་ནད་པའི་རྐང་པ་ནས༔ བཟུང་ཞིང་ཀླད་ལ་ལན་གསུམ་བསྐོར༔ དབང་ཆེན་ས་ལ་གདབ་པར་བསམ༔ ཤ་མྱག་རུས་མྱག་དག་ཏུ་སོང༔ དེ་ནས་ལྕགས་ཀྱི་པ་ཏྲ་ནི༔ སྒྲོ་བ་ལྟ་བུའི་ནང་དུ་གཞུག༔ དྲྭ་མིག་རེ་རེའི་ནང་དུ་ནི༔ དམ་པ་རྒྱ་གར་རེ་རེ་བཞུགས༔ སྐུ་ལས་མེ་དཔུང་ཁྲོ་ཚྭ་འཕྲོས༔ གསུང་གདངས་ཕཊ་དང་ཧཱུྃ་སྒྲ་སྒྲོག༔ ཐུགས་དབྱིངས་སྟོང་གསལ་ངང་དུ་གནས༔ རྣམ་རྟོག་ལྷ་འདྲེ་བདག་མེད་གཏོང༔ དེ་འདྲའི་དམིགས་གནད་མ་རྫོགས་བར༔ ཕཊཿནི་བརྒྱ་སྟོང་གྲངས་སུ་བསྙེན༔ གནོད་ཚབ་ཅི་ལྟར་ཆེ་ན་ཡང༔ གདོན་ལས་གྲོལ་བར་ཐེ་ཚོམ་མེད༔ ཡང་ཅིག་དམིགས་པའི་འཕྲོ་འདུ་ལས༔ རང་ཉིད་མ་ཅིག་ཁྲོས་མ་ཡི༔ སྐུ་ལས་མེ་དཔུང་ཁྲོ་ཆུང་འཕྲོས༔ ནད་པ་ནད་བདག་ཐམས་ཅད་བསྲེགས༔ ཕྱི་སྣོད་ལྕགས་བསྲེགས་རི་གླིང་ལ༔ ནང་དབྱིངས་མེ་དཔུང་ཁྲོ་ཚྭ་འཕྲོས༔ ཀུན་གྱི་བདག་རྟོག་དབྱིངས་སུ་གཏོར༔ བདག་མེད་གནས་ལུགས་རང་ཞལ་མཇལ༔ ཡུལ་མེད་ཟང་ཐལ་ཨ་ལ་ལ༔ ཕཊཿནི་གྲངས་མེད་དམིགས་གནད་བསྟུན༔ འདི་ཡིས་མི་གྲོལ་ནད་གདོན་བགེགས༔ གང་ཡང་ཡོད་པ་མ་ཡིན་ནོ༔ བདེན་རྫུན་ལག་ཏུ་ལོངས་དང་གསལ༔ ཁྱད་པར་སྨྱོ་འདྲེ་འདུལ་ལ་དཔའ༔ ནད་གདོན་འདུལ་བའི་གཉེན་པོར་བསྔགས༔ བཀའ་ཡི་སྲུང་མས་བྱ་ར་མཛོད༔ སྐལ་ལྡན་རིགས་པའི་བུ་ལ་གཏོད༔ དམ་མེད་ལོག་ལྟ་ཅན་ལ་རྒྱ༔ ས་མ་ཡཱ༔ གུ་ཧྱ༔ བརྡ་ཐིམ༔ གཅོད་ཀྱི་རྣལ་འབྱོར་གསལ་སྟོང་དང་ཀླུ་སྐྱབས་གཉིས་ལ་སྤེལ་གྱི༔ ཟབ་མོ་གཅོད་ཀྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག༔ མངྒལཾ༔