མནན་པ་མི་འགྱུར་ཀ་བ།
ཟབ་མོ་གཅོད་ཀྱི་ཆ་ལག་ལས༔ མནན་པ་མི་འགྱུར་ཀ་བ་སྟོན༔ དབྱིངས་ཕྱུག་མཁའ་འགྲོའི་ཚོགས་ལ་འདུད༔ མནན་པ་གང་དེ་བྱ་བ་ཡི༔ སྲི་དང་རྒབ་འདྲེ་གོད་ཁ་དང༔ དགྲ་གྱོད་མི་ཁ་ཚེ་ཆོས་སྲིད༔ བར་དུ་གཅོད་པ་མནན་པའི་ཐབས༔ ལིང་ག་སྤྱི་མཐུན་རང་སྲོག་མཐར༔ དགྲ་འདྲེ་འཁོན་གསུམ་བྱད་མ་ལྷ༔ ཇག་རྐུན་གྱོད་འཁོན་དམ་སྲི་གོད༔ མ་ལུས་ལིངྒ་འདི་ལ་འདུས༔ ནྲྀ་ཏྲི་ཤ་ཏྲུཾ་མཱ་ར་ཡ་ནན་རྦད་བྷྱོ་ཛ༔ ཕྱི་ལ་དམོད་བཅོལ་སྤྱི་ལྟར་འབྲི༔ གནས་ཡིག་ཛ་ཁྲམ་བྷྱོ་ཡིས་བསྐོར༔ ཚོན་སྐུད་ཀྱིས་བཅིངས་ལྕགས་ཁང་གཞུགས༔ འགུག་པ་རྟགས་ཐོན་འགུགས་སྔགས་བཟླ༔ དེ་ནས་གཉན་སའི་ལྷ་འདྲེ་ལ༔ གཏད་པ་དང་བཅས་གྲུ་གསུམ་བྲུས༔ མནན་ལ་འགུག་གཞུག་རྟ་བྲོ་བརྡུང༔ རྐང་དུང་ལན་གསུམ་འབུད་ནས་ཀྱང༔ ཀེ་ཀེའི་ས་ཕྱོགས་འདི་ན་གནས་པའི་ལྷ་སྲིན་སྡེ་བརྒྱད་མཐུ་བོ་ཆེ༔ སྐྱབས་གནས་དཀོན་མཆོག་གསུམ་དང་གནས་གསུམ་མཁའ་འགྲོའི་ཚོགས་ཀྱི་བཀའ་བདེན་པས༔ སངས་རྒྱས་བསྟན་དགྲ་སེམས་ཅན་གྱི་སྤྱི་དགྲ༔ རྣལ་འབྱོར་པའི་སྒོས་དགྲ༔ དཔལ་ལྡན་བླ་མའི་སྐུ་དགྲ༔ ཁྱད་པར་ཡིད་ལ་དམིགས་པའི་དགྲ་འདྲེ་དམ་སྲི་བྱད་མ་རྦོད་གཏོང་གོད་འདྲེ་གོད་སྲི་ཆུང་འདྲེ་ཆུང་སྲི་བསྒྲལ་བའི་ཞིང་བཅུ་ཉམས་པ་བདུན་ལྡན་གྱི་གདུག་པ་ཅན་གྱི་ལུས་ངག་ཡིད་གསུམ་ཐམས་ཅད་སྟྭཾ་བྷ་ཡ་ནན་ནན༔ ལྷ་འདྲེ་ཁྱེད་རྣམས་ལ་གཏད་པ་ཡིན་པས་ཐུབ་པར་གྱིས་ཤིག༔ མཐུ་དང་ནུས་པ་རྫུ་འཕྲུལ་ཅི་འདུག་ད་རེས་བལྟའོ༔ རྣལ་འབྱོར་བདག་གི་བཀའ་དང་ཐ་ཚིག་ལས་མ་འདའ་བར་ལས་བཅོལ་སྒྲུབ་པར་གྱིས་ཤིག༔ ཕཊ་ཕཊ་ཕཊ༔ ཕྱི་བཅོལ་ལས་ཀྱི་ཞུ་སྐྱེམས་ཕུང་པོའི་མཆོད་སྦྱིན་ལ་འདུས་ཤིག༔ ཅེས་དཀར་དམར་གྱི་འགྱེད་སོགས་གཅོད་གཞུང་སྤྱི་ལྟར་རོ༔ ས་མ་ཡཱ༔ དེ་ནས་རྒྱང་གྲགས་ཀྱི་མཐའ་མཚམས་ལ་ཚེར་ལྕགས་བཙུག་ལ་ཁྲོཾ་བྲིས་ཕྱི་ལམ་བཅད་ལ་རྒབ་འདྲེ་མཐར་བསྐྲད་པར་བསམ་ལ༔ ཀེང་རུས་མེ་འབར་བ་བསམ་ལ༔ རང་གནས་སུ་སླེབས་ལ་མཉམ་བཞག་བྱས༔ བཀྲ་ཤིས་དང་བདེ་ལེགས་བརྗོད༔ གུ་ཧྱ༔ རྒྱ༔