དམ་སྲིའི་འགུགས་རྟགས་གསལ་བྱེད་དབལ་ཁྱུང་བོན་གཏེར་བསྟན་གཉིས་གསང་སྔགས་གླིང་པའི་གཏེར་བྱོན།
༄༅༔ བླ་མ་སྐུ་གསུམ་ཕུར་སྒྲུབ་ལས༔ དམ་སྲིའི་འགུགས་རྟགས་གསལ་བྱེད་བཞུགས༔
ཞེ་སྡང་ཁྲོས་པས་དམ་སྲི་ལོག་པ་འདུལ༔ བླ་མ་དྲག་ཕུར་ལྷ་ལ་ཕྱག་འཚལ་ལོ༔ སྒྲུབ་པའི་ཕྲིན་ལས་གཞུང་རྣམས་སྔོན་སོང་ནས༔ མཐར་ཕྱིན་རྗེས་ཀྱི་བྱ་བ་རྟོགས་པའི་ཚད༔ གདུག་པའི་དམ་སྲི་ཉུ་ལེ་བར་ཆད་བདུད༔ འགུགས་རྟགས་དངོས་ཉམས་རྨི་ལམ་ཐལ་རྗེས་དང༔ གྲི་ཧོམ་ལིང་སྦྱོར་རྟེན་འབྲེལ་དཔྱད་ཚུལ་ནི༔ རབ་ཀྱིས་བླ་ཚེ་མྱུར་དུ་ཁུག་པ་དང༔ འབྲིང་གིས་ཐལ་རྗེས་ཐ་མས་རྨི་ལམ་དང༔ ཡང་ཐ་གྲི་ཧོམ་ལིང་ག་བརྟག་པ་ལ༔ དང་པོ་རབ་ཀྱིས་བྱད་མ་གང་གནོད་ཀྱི༔ བླ་རྟགས་བྱ་གཅན་རི་གཡུང་ཆུ་གནས་དང༔ འབུ་སྲིན་ལ་སོགས་གཅན་གཟན་སྤྲུལ་ནས་འོང༔ དཀྱིལ་འཁོར་མ་ཊཾ་རྩ་རུ་ཏང་ངེར་སླེབས༔ དམ་སྲི་ཁོ་རང་དངོས་སུ་ཁུག་པ་ཡིན༔ གཉིས་པ་འབྲིང་གིས་ཐལ་རྒྱ་ནང་དུ་རྗེས༔ མི་རྗེས་བྱུང་ན་དམ་སྲིས་གནོད་པ་ཡིན༔ རྟ་རྗེས་ཀླུ་བཙན་ཁྱི་རྗེས་འགོང་པོ་དང༔ སྤྲེའུ་རྗེས་རྒྱལ་པོ་བྱ་རྗེས་མ་མོ་བདུད༔ འབུ་རྗེས་དོད་ན་ཤི་འདྲེའི་གནོད་པ་ཡིན༔ དེ་དག་རང་རང་བཅོས་ཐབས་མྱུར་དུ་བྱ༔ ཁྲམ་རིས་མཚོན་ཆའི་རྗེས་དོད་བྱད་མ་ཁུག༔ གསུམ་པ་ཐ་མས་རྨི་ལམ་དག་ཏུ་གསལ༔ སྲི་མ་ཁུག་ན་རང་བྲོས་ཤག་ཀ་ཕམ༔ གཡང་ལྷུང་འཁྲུགས་རྩོད་རང་ཕམ་གྲི་མཚོན་ཟུག༔ ཉི་ཟླ་ནུབ་དང་མཁར་ཞིག་གཅན་གཟན་རྨུག༔ མི་གཙང་གོས་བྱོན་ཐོག་སེར་རླུང་འཚུབས་འདུག༔ ཤིང་འགྱེལ་ཆུ་གཤའ་ཟམ་ཆད་རྨིས་ན་ངན༔ ཚོགས་དང་བཅོལ་བ་བསྙེན་སྔགས་གཟབ་པར་གཅེས༔ འདུལ་རྟགས་གོས་གྱོན་མཚོན་ཐོགས་མདའ་གཞུ་འགེངས༔ དམག་བསྡུས་བསད་བཅད་ཤ་ཁྲག་དམར་ལས་བྱེད༔ དར་ཕྱར་དུང་འབུད་ཟོར་འཕང་མེ་ཆེན་འབར༔ འཐབས་ན་རང་རྒྱལ་རྫོང་མཁར་བཙན་པོར་ཞུགས༔ དེ་སོགས་རྨིས་ན་བྱད་མ་ཁུག་རྟགས་ཡིན༔ བཞི་པ་ཡང་ཐ་གྲི་ཧོམ་ནང་དུ་སྦྱོང༔ གསུམ་བཞི་ཚུན་ཆད་རབ་ལ་དྲུག་བདུན་འབྲིང༔ བརྒྱད་དགུ་ཐ་མ་ཡིན་ཏེ་ཁུག་པ་ཙམ༔ དང་པོ་ཕོ་སྲི་༼ཕོ་༽རྒྱལ་པོ་མ་ཁུག་ན༔ ཕ་ཁུའི་ཁྱིམ་དང་རང་འཐག་ནང་དུ་སོང་༔ དུང་སོ་རྒོག་པོ་མདའ་ཆགས་ལྕགས་མདེལ་གབ༔ ཁྱིམ་དང་གྲོང་གི་བུད་མེད་སྦྲུམ་མར་ཕོག༔ གཉིས་པ་རྒས་སྲི་༼ཕོ་༽མགོ་སྐྱ་མ་ཁུག་ན༔ ཁྱིམ་ན་སྒྲོ་བ་ལྷན་པ་སེར་པོ་དང༔ གོས་ཧྲུལ་ཕོར་ཆག་མཆེ་བ་སྤུ་འཐུག་གབ༔ ཁྱིམ་དང་གྲོང་པའི་ཞ་ལོང་འཐེང་རྒན་ཕོག༔ གསུམ་པ་ཆུང་སྲི་༼ཕོ་༽ཁ་དམར་མ་ཁུག་ན༔ ཐག་ཆད་ཐབ་ཟངས་གྲི་ཆུང་ཁག་སྡེར་གབ༔ ཕ་མྱེས་ཤི་བའི་གློ་ཟུང་ལག་རྫས་སམ༔ ཁྱིམ་དུ་མོ་རིགས་གྲོང་གི་བུ་ཆུང་ཕོག༔ བཞི་པ་གྲི་སྲི་༼ཕོ་༽དབུག་ལེན་མ་ཁུག་ན༔ བང་མཛོད་ནང་དུ་གཅན་གཟན་པགས་པ་དང༔ དར་གོས་ཁྲ་བོ་མཚོན་ཆ་ཡང་རྫས་རིགས༔ ཕག་ཚང་མིག་མང་མགོ་སེར་བྲེ་རྒྱར་གབ༔ ལྔ་པ་དགྲ་སྲི་༼ཕོ་༽ཕམ་རྒྱལ་མ་ཁུག་ན༔ ཁྱིམ་མམ་ཕ་མྱེས་ཁང་པའི་ཕྱི་ནང་ན༔ ཕ་ཝཾ་ས་འབུར་ཀླུ་བཙན་གནས་སར་ཕོག༔ ཐབ་རྡོ་རས་ནག་ཤ་ཤུན་སྒ་ཆས་གབ༔ དྲུག་པ་བྱེས་སྲི་༼ཕོ་༽ལྟས་ངན་མ་ཁུག་ན༔ རབ་ཆད་རྫས་དང་ཁུག་དམར་ལྷྭམ་ངན་དང༔ མདེའུ་ལྕགས་གྲི་ལྕགས་རྫས་ངན་སྣོད་ལ་གབ༔ ཁྱིམ་མམ་གྲོང་པའི་གཡོག་པོ་གཡོག་མོར་ཕོག༔ བདུན་པ༼ཕོ་༽བྱུར་སྲི་འགོང་པོ་མ་ཁུག་ན༔ ཁྱིམ་ན་འཁོན་འགྲས་ཐབ་གཞོབ་བག་ཡུག་གམ༔ ཐབ་ཟངས་ཁྲོ་སྣོད་དྲི་མ་ཅན་ལ་གབ༔ བན་བོན་བརྩེ་གདུང་རྨི་ལམ་འཁྲུགས་ལ་ཕོག༔ བརྒྱད་པ་ཟ་སྲི་༼ཕོ་༽གནོད་བྱེད་མ་ཁུག་ན༔ སྒོ་དང་མཚེར་ཤུལ་ལུག་རྫི་བུ་ཆུང་དང༔ ཡང་ན་རྫ་མཁན་རྫ་མ་སྣོད་ངན་གབ༔ བུམ་པ་ཟོ་བ་ཆག་གས་ཡོད་སར་ཕོག༔ དགུ་པ་གདོན་སྲི་༼ཕོ་༽ཕུག་ཉལ་མ་ཁུག་ན༔ མི་མགྲོན་མཛོ་རྟ་ནོར་ཕྱུགས་གསར་ལེན་དང༔ ཆུ་རའི་རྒྱབ་ཏུ་སྣོད་ངན་བུག་པ་ཅན༔ གསུང་རབ་སྐུ་འདྲ་ཞབས་རྡོལ་ཞིག་ལ་གབ༔ བཅུ་པ་མོ་སྲི་འདི་མན་མོ་ཡིན་བསེན་མོ་མ་ཁུག་ན༔ ཁྱིམ་བདག་མོ་ཡི་ཉལ་ས་མལ་འོག་གབ༔ འཕང་ཆག་སྣམ་བུ་སྒོ་ཁྱི་རྒྱ་བོ་དང༔ མ་སྨད་གཉིས་ཡོད་གྲུ་གུ་དཀར་ནག་ཕོག༔ བཅུ་གཅིག་དར་སྲི་སྲོག་གཅོད་མ་ཁུག་ན༔ ཁྱིམ་གྱི་བདག་པོ་ཤ་དཀར་གདོང་སྨེ་ཅན༔ གཡུ་དང་བྱི་རུ་འོད་ཅན་རྫས་ལ་གབ༔ ཕ་སྤུན་གསུམ་དང་ལྔ་ཡོད་ཅན་ལ་ཕོག༔ བཅུ་གཉིས་དུར་སྲི་ནག་པོ་མ་ཁུག་ན༔ ཁྱིམ་དུ་གཡག་རྭ་མི་མགོ་ཁྱི་ཐོད་དང༔ ཆང་སྣོད་སྐས་ཞབས་སྟྭ་རེ་འཇོར་ལ་གབ༔ བུད་མེད་གདོན་ཅན་རྟ་བོང་བ་གླང་ཕོག༔ བཅུ་གསུམ་གོས་སྲི་དབུལ་བྱེད་མ་ཁུག་ན༔ ཁྱིམ་གྱི་སྣམ་ཕྲུག་ཐག་གི་རིགས་ལ་གབ༔ སྒྱེ་སྒྲོ་ཁྲ་བོ་སྣེ་གྲངས་ཡོད་པ་དང༔ མི་བསད་གྲི་དང་ཕྲེང་བ་ཟངས་ཆས་ཕོག༔ བཅུ་བཞི་ཡུལ་འདྲེ་འཁྱམ་པོ་མ་ཁུག་ན༔ ཁྱིམ་དང་གྲོང་པ་དབུལ་སྤྲང་གཅིག་ལ་གབ༔ བླ་མ་སྒར་དཔོན་ཚོང་པའི་ནོར་འཚག་གམ༔ ཞག་ཟླ་ལོ་གསུམ་ཅན་གྱི་བྱིས་པར་ཕོག༔ བཅོ་ལྔ་ནད་སྲི་མདངས་འཕྲོག་མ་ཁུག་ན༔ ཁྱི་ཕག་བྱ་གསུམ་ཐོད་པ་ཞྭ་ངན་དང༔ ཡང་ན་ཕ་མྱེས་ཤི་བའི་འདྲེ་གྱུར་གདོན༔ སྨན་སྣ་རིལ་བུ་རྫས་ཀྱི་ཐུམ་བུར་གབ༔ བཅུ་དྲུག་ཤི་སྲི་གཤེད་མ་མ་ཁུག་ན༔ ལྷ་ཆ་མཆོད་ཆ་ཟངས་རག་སྣོད་བཟང་དང༔ འབོལ་གདན་དར་གོས་སེར་གོས་རིགས་ལ་གབ༔ བལ་ཚོན་གྲུ་གུ་དཀར་ནག་ཁྲ་གསུམ་ཕོག༔ བཅུ་བདུན་ཕུང་སྲི་བྲོ་ངན་མ་ཁུག་ན༔ ཨ་ལུང་ཚར་ཚར་སྐེ་རག་གློ་ཆ་དང༔ ཕུང་ཤུལ་ནོར་རྫས་ལུས་ཆས་ཞིག་ལ་གབ༔ བུད་མེད་སྐྱེས་པ་དར་མ་གཉིས་ལ་ཕོག༔ བཅོ་བརྒྱད་གཅན་སྲི་ཁྲག་འཐུང་མ་ཁུག་ན༔ མཚན་ངན་དོར་རྟ་ཞྭ་གོས་ནག་པོ་དང༔ དམར་ཐབ་རི་མོ་ས་སློག་ཤིང་གཅོད་པའི༔ བང་མཛོད་གསར་བཞག་མཁར་བརྩེགས་ར་བར་ཕོག༔ དེ་ཡང་ཕོ་གསུམ་མོ་གསུམ་དྲུག་ཚན་གསུམ༔ ཚན་གསུམ་བྱས་ལ་གཤེད་སྒྲོར་བྲུབ་བརྗོད་བྱ༔ ཐོག་མར་ཕོ་གསུམ་བསྐོར་བས་སྲི་བྲུབ་རྟགས༔ ཕོ་རྣམས་སྦུབ་དང་མོ་རྣམས་གན་རྐྱལ་འགྱེལ༔ རྗེས་མ་ལུས་པའི་ལིངྒས་གདོན་ངོས་བཟུང་༔ དེ་ལྟར་མ་ནོར་ཕོ་གསུམ་མོ་གསུམ་སྟེ༔ སྦྲག་ལ་ཚན་གཉིས་གཤེད་སྒྲོར་བྲུབ་རྫོང་བྱ༔ དང་པོ་ཆད་ན་བླ་མ་གྲྭ་ཚང་འཁུ༔ བར་མ་ཆད་ན་སྦྱིན་བདག་རང་ལ་འཁུ༔ ཐ་མ་ཆད་ན་གྲོང་པ་ཡུལ་ཁམས་འཁུ༔ བླ་མར་འཁུ་ན་ཚོགས་དང་བསྐང་གསོ་གཏོང༔ སྦྱིན་བདག་འཁུ་ན་ཚེ་ཐར་མར་མེ་འབུལ༔ ཡུལ་ཁམས་འཁུ་ན་མདོས་དང་བཀའ་ཆེན་སྒྲོགས༔ སྒྲུབ་པོ་སྔགས་དང་དགོངས་པ་མི་ལྡན་ན༔ བླ་ཡང་མི་འགུགས་སྲི་ཡང་མི་འདུལ་ཞིང༔ རང་གཞན་གཉིས་ཀ་ཕུང་བའི་རྒྱུར་འགྱུར་བས༔ དེ་ཕྱིར་ཡི་དམ་བསྙེན་སྒྲུབ་ཚད་ལྡན་དང༔ མི་དམིགས་ཏིང་འཛིན་དགོངས་པའི་གནས་ལུགས་སྐྱོངས༔ འགྲོ་ལ་སྙིང་རྗེ་སྦྱོར་སྒྲོལ་སྔགས་ལ་བརྩོན༔ ཞེས་གསུང་བཞིན་དུ་ལོཙྪས་བརྡ་རིས་བྲིས༔ གཡུང་དྲུང་རིན་ཆེན་འབར་བའི་བྲག་ལ་སྦས༔ གཏེར་སྲུང་བཅོལ་གཏད་དུས་བབ་སྨོན་ལམ་བཏབ༔ ས་མ་ཡཱ༔ རྒྱ་རྒྱ་རྒྱ༔ རྒྱ༔ དམ་རྒྱ༔ གསང་རྒྱ༔ ཞེས་དམ་སྲི་འགུགས་རྟགས་འདི་ནི་དབལ་ཁྱུང་བོན་གཏེར་གར་དབང་རྡོ་རྗེ་བསྟན་གཉིས་གསང་སྔགས་གླིང་པའམ་གར་དབང་རྡོ་རྗེ་དྲག་པོ་རྩལ་ནས་དྲངས་ནས་ཤོག་སེར་ནས་བོད་ཡིག་ཏུ་ཕབ་པའོ༔ གཏེར་སྟོན་འདི་རྫ་ཁོག་ཏུ་བཞུགས་པ་ཡིན་གོང་འོག་གི་ཕུར་པའི་ཡིག་ཆུང་སོགས་བརྟགས་དཔྱད་བྱས་ན་དཔལ་ཨོ་རྒྱན་ཡབ་ཡུམ་གྱིས་བྱིན་གྱིས་བརླབས་ཤིང་ཁོང་ལོ་ཆེན་བཱཻ་རོའི་རྣམ་འཕྲུལ་ཡིན་པ་འདྲ་ལགས༔