རྐང་གླིང་གི་དོན་བཤད་འཇིགས་གླིང་གསུང་།
༄༅། རྐང་གླིང་གི་དོན་བཤད་ལ། མཆོག་ཆེན་མི་རྐང་གླིང་བུ་ལ། །བརྡ་དོན་རྟགས་གསུམ་བཤད་ཀྱིས་ཉོན། །རྟོག་མེད་རོ་ཡི་ཡན་ལག་ལས། །ཆགས་སྡང་མེད་པའི་སེམས་ཀྱི་བྲེགས། །ལྷ་བ་ཕྱུང་ཞིང་བྲད་བརྡར་བྱས། །ཕྱི་ནང་གཟུང་འཛིན་སྤོང་བའི་བརྡ། །རྐང་གླིང་ཁ་སྒོ་གཅིག་པ་ཡིན། །ཆོས་ཀུན་དུ་མ་རོ་གཅིག་བརྡ། །རྩ་བ་མཛོ་སྣ་ཟུང་འབྲེལ་ཅན། །ཆོས་ཉིད་ཟུང་འཇུག་གཅིག་དུ་སྟོན། །གཤམ་ལ་འབྲེལ་ལྕགས་ཅོད་པན་ཅན། །གྲུབ་ཐོབ་རྗེས་སུ་འབྲང་བའི་དོན༔ དྲང་ཞིང་སྟོང་པ་གཞུང་མིག་ཅན། །མཐའ་ལ་མི་གནས་དབུ་མའི་དོན། །འབུད་པ་རླུང་གི་རྟེན་འབྲེལ་ལས། །རོ་རྐྱང་དབུ་མར་ཡང་དག་འཛུད། །ཐོས་པས་ལྷ་འདྲེའི་ཡིད་རྩ་འཁོལ། །ཉན་པས་རང་སྣང་གཞན་སྣང་འགྱུར། །འབུད་སྟངས་དང་པོས་བླ་མ་མཆོད། །གཉིས་པས་སྣང་བ་ཟིལ་ཀྱིས་གནོན། །གསུམ་པས་མགྲོན་རྣམས་སྤྱན་འདྲེན་བྱེད། །བཞི་པས་ཕམ་རྒྱལ་མེད་པར་བསྔོ། །ལྔ་པས་གཟུང་འཛིན་ཐད་ཀར་གཅོད། །ལེ་ལོའི་གཉིད་ལས་སད་པའི་ཕྱིར། །བརྩོན་གྲུས་ཕ་རོལ་ཕྱིན་པ་འོ། །ཞེས་ཀློང་ཆེན་ནམ་མཁའི་རྣལ་འབྱོར་གྱིས་སོ།།