བདེན་བརྗོད།
༄༅། གནས་འོག་མིན་དག་པ་སྐུ་གསུམ་གྱི་ཞིང་ན། ཆོས་སྐུ་སྣང་བ་མཐའ་ཡས། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིང་ཧ། ཨོ་རྒྱན་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། མཁར་ཆེན་དཔལ་གྱི་དབང་ཕྱུག ཨ་ཙར་ཡེ་ཤེས་དབྱངས་ཉིད། གྲུབ་དབང་བྱང་ཆུབ་རྡོ་རྗེ། འགྲོ་འདུལ་ལུང་རིག་གླིང་པ། གཏེར་ཆེན་བསམ་གཏན་གླིང་པ། བརྒྱུད་འཛིན་ཆོས་ཀྱི་བདག་པོ་ལ་སོགས་པའི་རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་དུར་ཁྲོད་གསང་ཆེན་རོལ་བའི་དཀྱིལ་འཁོར་ཆེན་པོ་ནས། གསང་བདག་ཕྱག་ན་རྡོ་རྗེ། སྤྲུལ་བའི་བྱ་ཁྱུང་རིགས་ལྔ། རིགས་བདག་མི་བསྐྱོད་རྡོ་རྗེ། བདུད་འདུལ་ཁྲོ་བཅུ་ཡབ་ཡུམ། ཁྲོ་བོ་བཞི། སྒོ་མ་བཞི། གཙང་རིས་དཔལ་མགོན་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བཀའ་བདེན་པ་དང། ལྷ་ལས་ལྷག་པའི་གསང་སྔགས་བཀའ་ཡི་སྲུང་མ་དྲང་སྲོང་སྨུག་ནག་འོད་འཕྲོ། གདོང་མོ་བཞི། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། དྲེགས་པ་ལྷ་སྲིན་སྡེ་བརྒྱད། ཡང་སྤྲུལ་གྲངས་ལས་འདས་པ། གཏེར་སྲུང་ཡིད་བཞིན་ནོར་བདག་ལ་སོགས་པའི་བཀའ་གཏེར་གྱི་བསྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོ་དེ་དག་གི་མཐུ་དང་ནུས་པ་ལ་བརྟེན་ནས་དེང་འདིར་བདག་དང་བསྲུང་བྱ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་འབྱུང་པོའི་ཚོགས་སྤྱི་དང་། བྱེ་བྲག་ཏུ་ཡང་གསང་བའི་དཀྱིལ་འཁོར་གཉན་པོ་ཞལ་ཕྱེས། མཆོག་དང་ཐུན་མོང་གི་དངོས་གྲུབ་སྒྲུབ་པ་ལ་བར་དུ་གཅོད་པར་བྱེད་པའི་བགེགས་ཚོགས་ལོག་པར་འདྲེན་པ་ཐམས་ཅད་འདོད་ཡོན་ལྔ་དང་ལྡན་པའི་གཏོར་མ་འདིས་མགུ་ཞིང་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག གལ་ཏེ་མི་འགྲོ་འདུག་པའི་ཚེ་ན་བདག་ཉིད་དྲེགས་པ་ཀུན་འདུལ་ཀྱི་སྤྲུལ་པའི་ཁྲོ་ཚོགས་མཚོན་ཆ་མེ་དཔུང་གི་ཚྭ་ཚྭ་ཐོ་རོ་རོ་འཕྲོས་པས་གནོད་བྱེད་ཨ་མུ་ཀའི་ཚོགས་རྣམས་རྡུལ་དུ་བརླག་པར་འགྱུར་ཏ་རེ། ཧཱུྃ་བཞིའི་སྔགས་དང་གུལ་ཡུངས་བདུག་བྲབ་བྱས་ལ་བསྲུང་བའི་འཁོར་ལོ་ལ་འཇུག་གོ།