ཀླུ་རྒྱལ་དགའ་བོའི་སྒྲུབ་ཐབས་ཕན་བདེའི་མྱུ་གུ།

ཡང་གསང་ཌཱཀྐིའི་ཐུགས་ཐིག་ལས༔ ཀླུ་རྒྱལ་དགའ་བོའི་སྒྲུབ་ཐབས་ཕན་བདེའི་མྱུ་གུ་བཞུགས༔

གསང་བའི་བདག་པོ་ལ་ཕྱག་འཚལ༔ གསང་འཛིན་དཔའ་བོའི་བཀའ་ཉན་པ༔ ཀླུ་རྒྱལ་མཐའ་ཡས་སྒྲུབ་ཐབས་སྟོན༔ རཏྣའི་གཞོང་པ་འབྲུ་ཡིས་བཀང༔ དཀར་དམར་སྨན་གྱི་ཕྱེ་ཟན་ལ༔ རི་རབ་བང་རིམ་བཞི་པའི་སྟེང༔ མ་ཧཱ་གསེར་གྱི་རུས་སྦལ་བཀོད༔ མཐའ་ལ་མཚོ་རྫིང་ལྟེང་ཀ་ཤིང༔ སྟེང་དུ་པདྨ་འདབ་བརྒྱད་དབུས༔ ཀླུ་རྒྱལ་མཐའ་ཡས་རང་གཟུགས་ནི༔ མངོན་རྟོགས་ཇི་བཞིན་ལེགས་པར་བཀོད༔ དེ་མཐར་ཀླུ་བདུན་རང་གཟུགས་སམ༔ ཡང་ན་ཀླུ་བཤོས་བདུན་གྱིས་བསྐོར༔ དེའི་མཐར་བཤོས་བུ་ཟླུམ་པོ་བཅུ༔ འབྲང་རྒྱས་བརྒྱད་ཀྱིས་ལེགས་པར་བསྐོར༔ སྤར་ཁ་སྨེ་བ་བླ་ཁམས་སོགས༔ ས་བདག་ལྷ་ཀླུའི་བཅའ་བཤོས་དང༔ ཀླུ་ནོར་ཉེར་གཅིག་གཟུགས་རྣམས་བཀོད༔ དཀར་གསུམ་མངར་གསུམ་རིལ་བུ་དང༔ ཤེལ་ཚིགས་འབྲུ་སྣའི་རིགས་བྱེད་བསགས༔ ཀླུ་གཉན་གནས་པའི་ས་སྣ་དང༔ མཚོ་དང་ཆུ་མིག་ཆུ་སྣ་བསྡུས༔ འབྲི་བརྒྱའི་མར་ཆུར་ཞིང་བརྒྱའི་འབྲུ༔ མི་དཔོན་དབང་ཐང་བསོད་ནམས་ཆེ༔ ལས་བསླང་དཀོར་རྫས་གཡང་རྟེན་བསགས༔ ཀླུ་ཡི་སྐྱེད་ཚལ་ནང་དུ་བླུག༔ ཕྱི་རུ་ཀླུ་ཡི་ཤིང་སྒྲོམ་ཁང་བཟང་ནི༔ དཔལ་གྱི་བེ་འུ་དགུ་ཐོག་ཕུབ༔ དེ་སྟེང་ནམ་ལྔ་ཙིཏྟ་ཐུགས༔ ཡིད་བཞིན་ནོར་བུའི་ཏོག་གིས་སྤྲས༔ མཐའ་ལ་འདོད་རྫས་སྣ་བདུན་དང༔ རྫས་རྟགས་རང་མཐུན་རྒྱང་བུས་མཛེས༔ ཀླུ་བརྒྱད་ཕྱག་མཚན་བྲིས་འབུར་གཟུགས༔ ཤིང་རྩི་དར་ཚོན་བལ་གྱིས་བརྒྱན༔ མཆོད་རྫས་རྒྱང་བུ་བཅུ༔ ཕྱག་མཚན་རྒྱང་བུ་བརྒྱད༔ རྫས་རྟགས་སྣ་བདུན༢༣༔ ཀུན་ལ་རང་མཐུན་འདོད་གསོལ་བྲི༔ རྣལ་འབྱོར་ཤ་ཆང་སྒོག་ཙོང་སྤང༔ གསོ་སྦྱོང་ལ་གནས་གོས་གཙང་བགོ༔ སྐྱབས་སེམས་ཚོགས་བསགས་མཆོད་པའི་རྫས༔ བྱིན་རླབས་དྲི་བཟང་དུད་པ་གཏོང༔ མདུན་བསྐྱེད་རྟེན་དང་བརྟེན་པར་གསལ༔ ཐམས་ཅད་དག་མཉམ་ཆེན་པོའི་ངང༔ ཨོཾ་སྭ་བྷ་ཝ་སོགས། ཆོས་རྣམས་མི་དམིགས་སྟོང་པའི་ངང་ཉིད་ལས༔ འགགས་མེད་གསལ་ཆ་སྙིང་རྗེའི་འོད་མདངས་རྩལ༔ འབྱུང་བ་རིམ་བརྩེགས་བང་རིམ་བཞི་ཡི་དབུས༔ མ་ཧཱ་གསེར་གྱི་རུས་སྦལ་རྒྱས་པའི་མཐའ༔ མཚོ་དང་ནེའུ་གསིང་སྐྱེད་ཚལ་ལྟ་ན་སྡུག༔ ཕོ་བྲང་དཔལ་གྱི་བེ་འུ་དགུ་ཐོག་སྟེང༔ གཡང་གི་ནོར་བུ་བཻཌཱུར་འོད་འབར་ཏོག༔ བ་ལང་མིག་དང་ལྗོན་ཤིང་པ་ཏྲ་རིས༔ ཀླུ་ནོར་སྣ་ཚོགས་འདབ་ཆགས་རི་དྭགས་བྲེལ༔ འཇའ་ཚོན་མེ་གྷའི་རྦ་ཀློང་དབྱར་རྔ་ལྡིར༔ བསིལ་ཞིང་འཇམ་པའི་སྦྲང་ཆར་འཇོ་བའི་གནས༔ སྣ་ཚོགས་པདྨ་འདབ་བརྒྱད་གྱེས་པའི་སྟེང༔ དབུས་ཀྱི་གདན་ལ་ཡི་གེ་ཕུ་པྲ་ལྗང༔ གསལ་འཚེར་འོད་ཀྱིས་འབྱུང་བཞིའི་བཅུད་བསྡུས་ཤིང༔ འཕྲོ་འདུས་ཡོངས་གྱུར་ཀླུ་རྒྱལ་མཐའ་ཡས་དགའ༔ སྐུ་མདོག་ལྗང་གསལ་དྭངས་ཤེལ་འཇའ་སྤྲིན་འཁྱུད༔ ཕྱག་བཞིའི་རྩ་ཕྱག་གཉིས་མཉམ་ཐལ་མོ་སྦྱར༔ ཡིད་བཞིན་ནོར་མཆོག་དགོས་འདོད་ཆར་འབེབས་བསྣམས༔ གཡས་འོག་པད་འཛིན་སྙན་གྱི་ཐད་སོར་གྱེས༔ གཡོན་འོག་ནེའུ་རྐྱལ་པུས་མོའི་སྟེང་དུ་བསྙིལ༔ སྦྲུལ་མགོ་འབར་བ་སྟོང་གི་གདེངས་ཀ་ཅན༔ སྤྱན་གཉིས་དྭངས་ཤེལ་རིན་ཆེན་སྒྲོན་མེ་འབར༔ སྐུ་སྟོད་དར་དང་པད་སྔོན་སྟོད་གཡོགས་གསོལ༔ སྐུ་སྨད་ལྟོ་འཕྱེ་གདུག་པ་སེར་ཁྲ་འཁྱིལ༔ རུས་སྦལ་པད་སྟེང་གཡས་སུ་འཁྱིལ་བར་བསྒོམས༔ དེའི་ཕྱིར་སྣ་ཚོགས་པདྨའི་ཟེའུ་འབྲུའི་སྟེང༔ སངས་རྒྱས་བཀའ་ཉན་ཀླུ་ཆེན་ར་ཛཱ་བདུན༔ འཁོར་རྣམས་གཏེར་གཞུང་དུ་ཅུང་ཟད་བསྡུས་པས༔ ཆགས་མེད་རིན་པོ་ཆེས༔ ལྷོ་ཕྱོགས་ཀླུ་རྒྱལ་འཇོག་པོ་ནི༔ སྐུ་མདོག་སྔོ་ལ་འོད་ཟེར་འབར༔ ཕྱག་མཚན་ཨུཏྤལ་སྔོན་པོ་བསྣམས༔ ནུབ་ཕྱོགས་ཀླུ་རྒྱལ་སྟོབས་རྒྱུ་ནི༔ སྐུ་མདོག་དམར་ལ་འོད་ཟེར་འབར༔ ཕྱག་མཚན་ཕྱག་ན་སྤྲིན་ཕུང་བསྣམས༔ བྱང་ཕྱོགས་ཀླུ་རྒྱལ་རིགས་ལྡན་ནི༔ སྐུ་མདོག་ལྗང་ལ་འོད་ཟེར་འབར༔ ཕྱག་མཚན་རིན་ཆེན་སྡོང་བུ་འཛིན༔ ཤར་ལྷོ་ཀླུ་རྒྱལ་ནོར་རྒྱས་ནི༔ སྐུ་མདོག་དཀར་སེར་ཕྲེང་བ་བསྣམས༔ ལྷོ་ནུབ་ཀླུ་རྒྱལ་དུང་སྐྱོང་ནི༔ སྐུ་མདོག་དམར་ལྗང་འོད་ཟེར་འབར༔ ཕྱག་མཚན་ཕྱག་ན་འབུད་དུང་བསྣམས༔ ནུབ་བྱང་ཀླུ་རྒྱལ་པདྨ་ནི༔ སྐུ་མདོག་དམར་ལ་འོད་ཟེར་འབར༔ ཕྱག་ན་མེ་ཏོག་པདྨ་འཛིན༔ བྱང་ཤར་ཀླུ་རྒྱལ་ཆུ་ལྷ་ནི༔ སྐུ་མདོག་དཀར་ལ་འོད་ཟེར་འབར༔ ཕྱག་མཚན་ཨུཏྤལ་ཞགས་པ་བསྣམས༔ ཀུན་ཀྱང་སྦྲུལ་མཇུག་གཡས་སུ་འཁྱིལ༔ དབུ་ལ་སྦྲུལ་གྱི་གདེངས་ཀས་སྤྲས༔ སྐུ་སྟོད་དར་དཔྱངས་སྟོད་གཡོག་ནི༔ རང་མདོག་རིན་ཆེན་རྒྱན་ཆས་སྤུད༔ གཏེར་གཞུང་ནི༔ མཐའ་བསྐོར་ཕྱོགས་སྐྱོང་ས་བདག་ཀླུ་གཉན་དང༔ སྤར་ཁ་སྨེ་བ་བླ་ཁམས་ལོ་རྒྱལ་དྲུག༔ ས་བདག་ཙང་ཀུན་དུས་བཞིའི་ལྷ་མོས་བསྐོར༔ ལྷ་ཚོགས་རྣམས་ཀྱི་སྤྱི་མགྲིན་སྙིང་ལྟེ་གསང༔ ཏྲཾ་སེར་ཕུ་ལྗང་པྲ་སྔོན་སཱ་མཐིང་ཀ༔ དུ༔ནག་ཀླུ་རིགས་ལྔ་ཡི་ས་བོན་གྱིས༔ མཚན་པ་ལས་འཕྲོས་འོད་ཀྱིས་ཀླུ་རྒྱལ་ཚོགས༔ འཁོར་དང་བཅས་པའི་ཐུགས་དམ་རྒྱུད་བསྐུལ་ནས༔ སྔོན་གྱི་ཐ་ཚིག་དྲན་བཞིན་གནས་འདིར་བྱོན༔ དེ་ནས་སྤྱན་འདྲེན་པ་ནི༔ ཨོཾ༔ དུས་གསུམ་བདེ་གཤེགས་སྲས་བཅས་སྤྱན་སྔ་རུ༔ སངས་རྒྱས་བསྟན་པ་སྲུང་བར་དམ་བཅས་པའི༔ ཀླུ་རྒྱལ་དགའ་བོ་མཐའ་ཡས་འཁོར་དང་བཅས༔ མཆོད་པའི་གནས་མཆོག་བཀོད་པའི་དཀྱིལ་འཁོར་འདིར༔ གཞལ་ཡས་ཁང་གི་དམ་ཚིག་ལྷ་རྣམས་ལ༔ ཡེ་ཤེས་པ་རྣམས་དབྱིངས་ནས་སྤྱན་འདྲེན་ནོ༔ ཀུན་མཁྱེན་རྒྱལ་བའི་བསྟན་པ་རབ་ཏུ་བསྲུང༔ འགྲོ་དྲུག་སེམས་ཅན་བདེ་བས་རབ་འཚོ་ཞིང༔ དབུལ་བའི་སྡུག་བསྔལ་རབ་ཏུ་སེལ་བའི་ཕྱིར༔ ཀླུ་དབང་རབ་མཆོག་འཁོར་བཅས་སྤྱན་འདྲེན་གཤེགས༔ སྔོན་གྱི་ཐུགས་བསྐྱེད་གཡར་དམ་དགོངས་མཛོད་ལ༔ རྒྱལ་ཁམས་སྤྱི་དང་ཁྱད་པར་ཡུལ་ལྗོངས་འདིར༔ མི་འདོད་རྐྱེན་ངན་སད་སེར་ཐན་པ་དང༔ མི་ཕྱུགས་ནད་རིམས་བཟློག་ཕྱིར་གཤེགས་སུ་གསོལ༔ ཨོཾ་བྷ་ཏ་ལི་བྷ་ཏ་ལི་ཧཱུྃ་ཧཱུྃ་ཛ་ཛ༔ ནཱ་ག་རཱ་ཛ་ཕུ་ཕཻཾ་ཨེ་ཧྱ་ཧི༔ མ་ཧཱ་ཀ་རུ་ཎི་ཀ་དྲི་ཤ་ཡཱ་ཧོ༔ ཛཿཧཱུྃ་བཾ་ཧོ༔ བཞུགས་གསོལ་ནི༔ ཨོཾ༔ ཀླུ་དབང་རྒྱལ་པོ་མ་ཧཱ་ཨ་ནན་ཏྱ༔ ཀླུ་ཆེན་བརྒྱད་དང་ས་བདག་ལོ་སྐོར་དང༔ སྤར་ཁ་སྨེ་བ་ཞག་ཚེས་དབང་བྱེད་ཚོགས༔ མ་ལུས་འཁོར་དང་བཅས་པ་ཐམས་ཅད་ཀུན༔ ཕན་བདེའི་སེམས་ཀྱིས་དགྱེས་པར་བཞུགས་སུ་གསོལ༔ ཨོཾ་ཧི་ལི་ཧི་ལི་མ་ཧཱ་ཕྲུཾ་ཕུ་སྭཱ་ཧཱ༔ པདྨ་ཀ་མ་ལ་ཡེ་སྟྭཾ༔ ནཱ་ག་ར་ཛ་ས་མ་ཡཱ༔ ཏིཥྛ་ལྷན༔ གུས་པས་ལྷ་ཕྱག་འཚལ་བ་ནི༔ ཨོཾ༔ གསང་བའི་བདག་པོ་ལག་ན་རྡོ་རྗེ་ཡི༔ སྤྱན་སྔར་ཁས་བླངས་བསྟན་འགྲོ་སྐྱོང་བའི་མགོན༔ ཀླུ་ཡི་རྒྱལ་པོ་ཆེན་པོ་འཁོར་བཅས་ལ༔ རང་ལས་རང་ཤར་འཕྲུལ་དགའི་ལྷ་བཞིན་འདུད༔ ཕུ་པྲ་ནཱ་ག་རཱ་ཛ་ན་མོ༔ མཆོད་པ་འབུལ་བ་ལ་བཅུ་གཅིག་ལས༔ དང་པོ་ནི༔ ཨོཾ༔ ནཱ་ག་རཱ་ཛ་མ་ཧཱ་ཨ་ནན་ཏྱ༔ ཀླུ་རྒྱལ་སཔྟ་གཞན་ཡང་ལྷ་ཀླུ་གཉན༔ དཀར་ཕྱོགས་སྐྱོང་བའི་སྡེ་ཚོགས་ཐམས་ཅད་ལ༔ མཆོད་ཡོན་ཞབས་བསིལ་མེ་ཏོག་བདུག་སྤོས་དང༔ མར་མེ་དྲི་ཆབ་ཞལ་ཟས་རོལ་མོའི་ཚོགས༔ ཐུན་མོང་ཕྱི་ཡི་མཆོད་པས་མཉེས་གྱུར་ཅིག༔ བཞེས་ནས་སངས་རྒྱས་བསྟན་པ་དར་བ་དང༔ བྱད་མ་ལྷ་སྲུང་རང་གཤེད་རང་ལ་ཕོབ༔ མནན་གཏད་ས་ཆུའི་སྦྱོར་བ་བཀྲོལ་དུ་གསོལ༔ ཨོཾ་ནཱ་ག་རཱ་ཛ་ཕུ་པྲ་ས་པཱ་རི་ཝ་ར་ཨརྒྷཾ་ནས་ཤཔྟ་པྲ་ཏིཤྩ་ཡེ་སྭཱ་ཧཱ༔ ༼ཀ༽གཉིས་པ་ཀླུ་སྨན་བདུད་རྩི་འབུལ༔ གསུམ་པ་དཀྱིལ་འཁོར་མཆོད་རྫས་འབུལ༔ བཞི་པ་སྨན་སྣ་འབུལ༔ ལྔ་པ་མེ་ཏོག་སྣ་ཚོགས་འབུལ༔ དྲུག་པ་དཀར་གསུམ་འབུལ༔ བདུན་པ་མངར་གསུམ་འབུལ༔ བརྒྱད་པ་ཤིང་རྩི་འབུལ༔ དགུ་བ་དར་ཚོན་ཁང་བཟང་ཤིང་རིས་འབུལ༔ བཅུ་པ་རིན་ཆེན་སྣ་ཚོགས་དང་ཤེལ་ཚིགས་འབུལ༔ བཅུ་གཅིག་པ་བསིལ་བའི་ཆབ་གཏོར་ཀླུ་གཏོར་འབུལ་བ་ནི༔ ཨོཾ༔ ཀླུ་ཡི་རྒྱལ་པོ་མཐའ་ཡས་ལ་སོགས་པའི༔ ས་བདག་ཀླུ་གཉན་རིགས་སུ་གྱུར་ཚད་ལ༔ ཚ་བའི་གདུང་བ་བསིལ་བར་བྱེད་པ་ཡི༔ རྣམ་དག་བདུད་རྩི་ཆབ་ཀྱི་གཏོར་མ་འདི༔ འབུལ་ལོ་བཞེས་ནས་ས་བདག་ལྷ་ཀླུ་གཉན༔ བྱེ་ཚན་འབབས་སོགས་ཚ་ཞིང་སྲེག་པའི་ནད༔ སྡུག་བསྔལ་ཞི་ཞིང་བསིལ་བའི་ཆར་འབེབས་ཤིང༔ དགའ་ཞིང་བདེ་བས་རྟག་ཏུ་འཚོ་བ་དང༔ འཇིག་རྟེན་སྤྱི་དང་ཡུལ་རིའི་རྒྱལ་ཁམས་འདིར༔ ཆར་ཆུ་དུས་འབེབས་འབྲུག་སྒྲ་སྙན་ལྡིར་ཞིང༔ ཐོག་སེར་གློག་གི་ཟེར་སོགས་མི་འབྱུང་ཞིང༔ ཐམས་ཅད་བདེ་བར་འཚོ་བའི་ཕྲིན་ལས་མཛོད༔ ཨོཾ་ནཱ་ག་རཱ་ཛ་ས་པཱ་རི་ཝ་ར་ཨ་མྲི་ཏ་ཛ་ཧུ་པྲ་ཏིཤྩ་ཡེ་སྭཱཧཱ༔ ཀླུ་གཏོར་གཞན་ཡང་ཕུལ༔ ཡི་དྭགས་ལ་ཆུ་སྦྱིན་བྱ༔ བསྟོད་པ་བྱ་བ་ནི༔ ཨོཾ༔ སྔོན་ཚེ་སྟོན་པ་སངས་རྒྱས་གསང་བདག་སྤྱན་སྔ་རུ༔ འཁོར་དང་བཅས་པ་སྐྱོང་བར་ཁས་བླངས་པའི༔ ཀླུ་རྒྱལ་མཐའ་ཡས་ཐ་ཚིག་འཆང་བའི་བདག༔ སངས་རྒྱས་བསྟན་པ་སྐྱོང་ལ་ཕྱག་འཚལ་བསྟོད༔ སྟོན་པའི་ཞལ་མཐོང་བཀའ་ཡི་འབངས་གྱུར་པ༔ ཀླུ་ཆེན་བདུན་དང་གཞན་ཡང་ས་བདག་གཉན༔ སྤར་ཁ་སྨེ་བ་དུས་བཞིའི་བདག་པོ་སོགས༔ འཇིག་རྟེན་སྐྱོང་བ་ཀུན་ལ་ཕྱག་འཚལ་བསྟོད༔ འཛམ་གླིང་སྤྱི་དང་གངས་ལྗོངས་ཡུལ་ཁམས་འདིར༔ གནས་པའི་ཀླུ་གཉན་ས་བདག་མ་ལུས་ཚོགས༔ དཀར་ཕྱོགས་སྐྱོང་ཞིང་དངོས་གྲུབ་གཏེར་མཛད་པའི༔ མཆོད་བསྟོད་འོས་པ་ཀུན་ལ་ཕྱག་འཚལ་བསྟོད༔ ཐུགས་དམ་བསྐུལ་ཞིང་བཟླས་པ་ནི༔ བདག་ཉིད་ཡི་དམ་དུ་གསལ་བའི་ཐུགས་ཀ་ནས་འོད་ཟེར་དམར་པོ་གློག་གི་ཞགས་པ་ལྟ་བུ་འཕྲོས༔ ཀླུ་རྒྱལ་འཁོར་དང་བཅས་པའི་ཐུགས་དམ་ཀྱི་རྒྱུད་བསྐུལ༔ སྔོན་གྱི་དམ་ཚིག་དྲན་ནས་ཅི་བསྒོ་བའི་ལས་བསྒྲུབ་ཅིང་མནན་པ་བཏོན༔ གཏད་པ་ཁྲོལ༔ བཅིངས་པ་བཤིགས་ཤིང་གང་འདོད་པའི་དངོས་གྲུབ་ཐམས་ཅད་རྩོལ་མེད་དུ་ཐོབ་པར་བསམ་ལ༔ ཨོཾ་ནཱ་ག་རཱ་ཛ་ཕུ་པྲ་སྭཱ་ཧཱ༔ ས་བདག་ཀླུ་གཉན་གྱིས་བཅིངས་པ་དང་བསྡམས་པ་ཕྱེ་ཕྱེ་ཁྲོལ་ཁྲོལ༔ དངོས་གྲུབ་བསྐུལ་བའི་དོན་ཡིན་ན་རྩ་སྔགས་གཤམ་ནི༔ རཏྣ་སརྦ་བ་སུ་སིདྡྷི་ཕ་ལ་ཧོ༔ འདོད་དོན་ཐམས་ཅད་ཡིད་བཞིན་འགྲུབ༔ དེ་ནས་ཀླུ་དགའ་བའི་ཕྱག་རྒྱ་དང་བཅས་སྔགས་འདི་བཟླ༔ ཨོཾ་ཧི་ལི་ཧི་ལི་མ་ཧཱ་ཧི་ལི་ཕྲུཾ་ཕུ་སྭཱཧཱ༔ ཅི་ནུས་བཟླ༔ གཞན་ཡང་ཆགས་མེད་འཁྲུགས་བཅོས་སྔགས་ནི༔ ཨོཾ་ཀྵི་ཧི་རཱ་ཛ་པྲི་ཐི་དྷེ་ཝི་སྭཱཧཱ༔ ཅི་ནུས་བཟླ༔ ཨོཾ་ཀྵི་ཧི་རཱ་ཛ་པྲི་ཐི་དྷེ་ཝི་སརྦ་སིདྡྷི་སྭཱཧཱ༔ ལོ་ལེགས་ཕྱིར་བཟླས་སོ༔ འཁྲུགས་བཅོས་ཡིན་ན༔ ཨོཾ་ཨ་ཀ་ནི་ནི་ཀ་ནི༔ ཨ་བྷི་ལ༔ མ་དྷ་ལ༔ མ་ཡེ་སྭཱཧཱ༔ ཕོག་ཐུག་ཤོར་ན་འདི་བཟླའོ༔ ཨ་ལས་སུ་རཀྴ་འདུས༔ ཨ་ལས་མ་རཀྵ་འདུས༔ ཧཱུྃ་ཧཱུྃ་དྷ་དྷ་དུ་མ་ཡི་ཏ་ཙ་ཀེ་ཧཱུྃ་ཕཊ༔ ས་བདག་ཀླུ་གཉན་གྱི་གདུག་པ་ཞི་བར་གྱུར་ཅིག༔ ནད་པ་ཡིན་ན་འདི་བཟླའོ༔ ཨོཾ་ཀྵི་ཧི་རཱ་ཛ་པྲི་ཐི་དྷེ་ཝི་བྷུ་མི་པ་ཏི་སརྦ་རོ་ག་ཤནྟིཾ་ཀུ་རུ་ཡེ་སྭཱཧཱ༔ དེ་ནས་འབྲུ་སྣ་དང་མེ་ཏོག་སྣ་ཚོགས་གཏོར་ལ་ཕྲིན་ལས་གསོལ༔ ཨོཾ༔ དགོངས་སུ་གསོལ་ལོ་ཀླུ་རྒྱལ་མཐའ་ཡས་ཆེ༔ དགོངས་སུ་གསོལ་ལོ་ཀླུ་ཡི་རྒྱལ་པོ་བརྒྱད༔ དགོངས་སུ་གསོལ་ལོ་ཀླུ་གཉན་ས་བདག་ཚོགས༔ སྔོན་ཚེ་བཅོམ་ལྡན་སངས་རྒྱས་སྤྱན་སྔ་རུ༔ དཀོན་མཆོག་བསྟན་སྲུང་སེམས་ཅན་བདེ་སྐྱིད་སྤེལ༔ འཇིག་རྟེན་སྐྱོང་བ་ཁས་བླངས་ཀླུ་ཡི་རྒྱལ༔ མཐའ་ཡས་ཀླུ་ཆེན་བདུན་ལ་སོགས་པ་ཡི༔ ས་བདག་ཀླུ་གཉན་ཡུལ་འདིར་གཉུག་གནས་དང༔ མཁའ་རྒྱུ་དུས་བཞི་ལྷ་མོ་མི་མིན་ཚོགས༔ མ་ལུས་རྣམས་ལ་ཕྲིན་ལས་བཅོལ་བ་ནི༔ ཀུན་མཁྱེན་རྒྱལ་བའི་བསྟན་པ་རིན་པོ་ཆེ༔ ཕྱོགས་དུས་གནས་སྐབས་དར་རྒྱས་ཡུན་རིང་ཞིང༔ བསྟན་འཛིན་སྐྱེས་བུ་ཕྱོགས་རིས་མ་ཆད་པ༔ ཐུགས་མཐུན་ཁྲིམས་གཙང་བསླབ་གསུམ་ཉམས་ལེན་ཞིང་༔ སྡེ་གསུམ་ཀློང་དགུ་རྒྱུད་སྡེ་བཞི་དྲུག་གི༔ འཆད་ཉན་མི་ཉམས་གོང་ནས་གོང་འཕེལ་མཛོད༔ འཇིག་རྟེན་ཁམས་སུ་སྡུག་བསྔལ་མཐའ་དག་ཞི༔ བདེ་སྐྱིད་དཔལ་གྱིས་མངོན་པར་འཚོ་བར་མཛོད༔ སེམས་ཅན་རྒྱུད་ལ་ཡང་དག་དགེ་བཅུ་ལྡན༔ མི་དགེའི་ལས་བཅུ་དྲི་མ་དག་མཛད་གསོལ༔ ཞིང་ལ་སད་སེར་འབུ་སྲིན་དུས་མིན་ཆར༔ མི་མཐུན་ལོ་ནད་མཐའ་དག་ཞི་བར་མཛོད༔ དུས་ལ་བབས་པའི་ལོ་ཏོག་མ་སྨིན་པས༔ ཆར་གྱི་རྒྱུན་ཆེན་ལེགས་པར་འབེབས་མཛོད་གསོལ༔ འབྲུ་བཅུད་སྨིན་སྦོམ་རགས་ལ་བལྟས་ཚིམ་ཞིང༔ འབྲུ་དྲུག་དམ་པ་གཡུར་དུ་ཟ་དབང་སྩོལ༔ མ་རུངས་ཕྱུགས་ནད་གློ་གོར་ཧོན་གསུམ་དང༔ སྐེ་འགགས་ཁ་ཚ་གོད་ཡམས་ཞི་བར་མཛོད༔ འཛད་མེད་རིན་ཆེན་གཏེར་གྱིས་མངོན་འཚོ་ཞིང༔ སྟོབས་རྩལ་ཀླུ་དང་བསོད་ནམས་མཉམ་པར་མཛོད༔ ཀླུ་རྒྱལ་མཐའ་ཡས་འཁོར་བཅས་སྒྲུབ་ཡིག་འདི༔ གང་དུ་གནས་ཤིང་འབྲི་ཀློག་སྤེལ་བའི་ཡུལ༔ མཐུན་རྐྱེན་དངོས་གྲུབ་ཆར་ལྟར་འབེབས་པ་དང༔ དགེ་ཞིང་བཀྲ་ཤིས་མཚན་ལྟས་བསྟན་དུ་གསོལ༔ བདག་གི་གཙོར་བྱས་ཉམས་ལེན་གང་ཟག་ཀུན༔ བར་ཆད་བདུད་དགྲའི་གཡུལ་ལས་རྣམ་རྒྱལ་ཞིང༔ ས་གསུམ་འགྲོ་བའི་སྣང་བ་དབང་བསྡུས་ནས༔ ཡིད་ལ་འདོད་པའི་རེ་བ་སྐོང་དུ་གསོལ༔ དེ་ནས་འབྲུ་སྣ་ཀུན་འཐོར་ལ༔ འདོད་དོན་ཁྱད་པར་དུ་གསོལ་བ་ནི༔ ཡོན་བདག་རྣམས་ཀྱིས་ཀླུ་མདོས་ལ་འབྲུ་སྣ་གཏོར༔ ཧོ་དགོངས་སུ་གསོལ་ལོ༔ མཐོ་བ་མི་མངོན་ནམ་མཁའི་དབྱིངས་ན་བཞུགས་པའི་དྲང་སྲོང་ཁྱབ་འཇུག་སྨུག་ནག་འོད་འཕྲོ༔ དྲང་སྲོང་གི་མགོན་པོ་ཉི་མ་དང་ཟླ་བ༔ མིག་དམར་དང་ལྷག་པ༔ ཕུར་བུ་དང་པ་སངས༔ སྤེན་པ་དང་སྒྲ་གཅན་འཛིན༔ གཟའ་བརྒྱད་གདོང་མོ་བཞི་དང་བཅས་པ་རྣམས་དང༔ ཁྱད་པར་དུ་འོག་ཕྱོགས་ཀླུ་རྒྱལ་མཐའ་ཡས༔ ཀླུ་རྒྱལ་འཇོག་པོ༔ སྟོབས་རྒྱུ༔ རིགས་ལྡན༔ ནོར་རྒྱས༔ དུང་སྐྱོང་༔ པདྨ༔ ཆུ་ལྷ་སོགས་གཟའ་ཀླུ་དྲེགས་པ་སྡེ་བརྒྱད་ཁྱེད་རྣམས༔ སྔོན་ཚེ་སངས་རྒྱས་རིན་ཆེན་སྙིང་པོ༔ རྣམ་འདྲེན་བུ་རམ་ཤིང་པ༔ གསང་འཛིན་ལག་ན་རྡོ་རྗེ༔ རིག་འཛིན་ཡབ་སྲས་བརྒྱུད་པ་སོགས་ཀྱི་སྤྱན་སྔར་བསྟན་འཛིན་གྱི་སྐྱེས་བུ་བསྲུང་བ་དང༔ བསྟན་དགྲའི་གཤེད་མ་སྒྲོལ་བར་ཁས་བླངས་དམ་བཅས་པ་བཞིན་དུ་དམ་ཚིག་གཉན་པོ་དྲན་པར་གྱིས་ལ༔ ད་ལྟ་རྣལ་འབྱོར་པ་བདག་གིས་ལྷ་སྔགས་ཏིང་འཛིན་བདེན་པའི་མཐུས༔ ཁྱེད་རྣམས་བརྔན་གསོལ་མཆོད་སྦྱིན་བྱས་པའི་མཐུ་དང་ནུས་པ་ལ་བརྟེན་ནས༔ སྤྱིར་སངས་རྒྱས་བསྟན་པའི་སྤྱི་དགྲ༔ སྒོས་དཔལ་ལྡན་བླའི་སྐུ་དགྲ༔ ཁྱད་པར་དུ་རྣལ་འབྱོར་པ་བདག་ཅག་བསྲུང་བྱ་འཁོར་དང་བཅས་པ་རྣམས་ལ་བསམ་ངན་སྦྱོར་རྩུབ་ཤོམ་པའི་དགྲ་བོ་ས་ཆུ་མེ་རླུང་འབྱུང་བའི་འཁྲུལ་འཁོར༔ ཏིང་འཛིན་དགོངས་པའི་གཟེར་གྱིས་བཅིངས་པའི་བན་བོན་བྱད་མ་རྦོད་གཏོང་མཁན་གྱི་སྟེང་དུ༔ ལྷ་སྲིན་དྲེགས་པའི་དམག་ཚོགས་འཁོར་དང་ཡང་འཁོར༔ སྤྲུལ་པ་ཡང་སྤྲུལ་ཁྱེད་རྣམས་ཀྱི་མཐུ་དང་རྩལ་གྱི་ནུས་པ་ཕྱུང་ལ་སྒྲུབ་པའི་རྟགས་མྱུར་དུ་སྟོན་ཅིག༔ བྱད་མ་རང་གཤེད་རང་ལ་ཕོབ་ཅིག༔ རང་སྲོག་རང་གིས་ཆོད་ཅིག༔ བཟུང་བ་ཐོངས་ལ་གཏད་པ་ཁྲོལ་ཅིག༔ བསྡམས་པ་ཀློད་ལ་མནན་པ་ཐོངས་ཤིག༔ བཅིངས་པ་ཁྲོལ་ལ་རྦོད་གཏོང་ཟློག་ཅིག༔ ཁྲམ་ཁ་སྒྱུར་ཅིག་ཟློག་ཅིག་མ་རཱ་ཡ༔ རེ་ཞིང་ལྟོས་པའི་སྲུང་མ་ཁྱེད་རྣམས་བཀའ་དང་དམ་ལས་མ་འདའ་བར་རྣལ་འབྱོར་པ་བདག་ཅག་བསྲུང་བྱ་འཁོར་དང་བཅས་པ་རྣམས་ཀྱི་ལུས་དང་གྲིབ་མ་བཞིན་ཏུ་འགྲོགས་ནས་འགོ་ཞིང་སྡོང་གྲོགས་རྒྱ་ཆེན་པོ་མཛད་དུ་གསོལ༔ ཞེས་འདོད་དོན་གསོལ་ནས་འཐོར་རོ༔ སྤྱི་ལ་འདོད་གསོལ་འདི་ལྟར༔ ཨོཾ་ཀླུ་ཡི་རྒྱལ་པོ་ཆེན་པོ་མཐའ་ཡས་འཁོར་དང་བཅས་པ་རྣམས་ཀྱིས་སྔོན་ཚེ་བཅོམ་ལྡན་འདས་སངས་རྒྱས་གསང་བདག་ཕྱག་ན་རྡོ་རྗེའི་སྤྱན་སྔར་བསྟན་པ་དང༔ འཇིག་རྟེན་སྐྱོང་བར་ཁས་བླངས་པའི་དམ་ཚིག་དྲན་པར་མཛོད་ལ༔ གང་འདོད་པའི་ཕྲིན་ལས་དེ་བཞིན་དུ་འགྲུབ་པར་མཛད་དུ་གསོལ༔ གཞན་ཡང་འཇིག་རྟེན་སྐྱོང་བའི་དམ་ཚིག་ཅན༔ རིག་འཛིན་ཡབ་སྲས་བརྒྱུད་པ་དང་བཅས་པའི་བཀའ་དང་དམ་ལས་མ་འདའ་བར༔ ས་བདག་ཀླུ་གཉན་སྡེ་བརྒྱད་དྲེགས་པའི་ཚོགས་དང་བཅས་པ་རྣམས་ཀྱིས་རྣལ་འབྱོར་པ་བདག་གི་ལས་བྱད་གཏད་བཀྲོལ་བའི་ལས་འདི་ཞེས་བྱ་བ་འགྲུབ་པར་མཛད་དུ་གསོལ༔ བཀའ་དང་དམ་ལས་མ་འདའ་ཞིག༔ གལ་ཏེ་མི་ཉན་ཞིང་བར་དུ་གཅོད་ན་སྤྲུལ་པའི་ཁྲོ་ཚོགས་རྣམས་དྲག་ཏུ་ཁྲོས་ནས་མེ་དཔུང་བྱ་ཁྱུང་ལྕགས་སྡིག་གི་ཚོགས་གྲངས་མེད་པ་ཕྱོགས་བཅུར་འཕྲོས་ནས་དམ་ལ་མི་གནས་པ་རྣམས་ཀྱི་མགོ་བོ་ཨརྫ་ཀའི་དོག་པ་བཞིན་དུ་འགས་པར་འགྱུར་རོ༔ དེ་བས་ན་ཕན་བདེ་བྱང་ཆུབ་ཀྱི་སེམས་དང་ལྡན་པའི་ངང་ནས་ཕྲིན་ལས་གང་བཅོལ་ཐོགས་མེད་དུ་འགྲུབ་པར་མཛད་དུ་གསོལ༔ གང་འདོད་པའི་དོན་ལ་གསོལ་བ་བཏབ་ན་འགྲུབ་པར་འགྱུར་རོ༔ སྔོན་ཀླུའི་དམ་ཚིག་གི་ཁྱད་པར་ལའོ༔ ས་མ་ཡཱ༔ རྒྱ་རྒྱ་རྒྱ༔ དཀར་ཕྱོགས་སྐྱོང་བའི་ཀླུ་རྣམས་ལ༔ ཨོཾ༔ བླ་མ་མཆོག་གསུམ་སོགས་ཀྱིས་དངོས་གྲུབ་བསྐུལ༔ ནག་ཕྱོགས་ཀྱི་ཀླུ་རྣམས་ལ་ཆོས་ཀྱི་སྦྱིན་པ་བྱའོ༔ ལས་མཐའ་གྲུབ་ནས་ཀླུ་གཏོར་མཚོའམ་ཆུ་མིག་གི་སར་ཁ་ཕྱོགས་ལ༔ གཤེགས་གསོལ་ནི༔ ཀྱཻ༔ ཀླུ་ཡི་རྒྱལ་པོ་ཆེན་པོ་ཐ་ཚིག་ཅན༔ མཐའ་ཡས་གཙོར་བྱས་ཀླུ་ཆེན་བརྒྱད་པོ་དང༔ གཞན་ཡང་ས་བདག་ལྷ་ཀླུ་གཉན་གྱི་ཚོགས༔ དཀར་ཕྱོགས་སྐྱོང་བ་འཁོར་དང་ཡང་འཁོར་རྣམས༔ བྱམས་བརྩེའི་སྟོབས་ཀྱིས་བདག་ལ་དགོངས་སུ་གསོལ༔ ད་ནི་བདག་གི་ལས་རྣམས་ཐམས་ཅད་འགྲུབ༔ ལོངས་སྤྱོད་དངོས་གྲུབ་ཐམས་ཅད་དེ་རིང་ཐོབ༔ ཀླུ་རྒྱལ་མཐའ་ཡས་འཁོར་བཅས་བཀའ་དྲིན་ཆེ༔ ད་ནི་བདག་གིས་གཏང་རག་དུས་ལ་བབས༔ རིན་ཆེན་སྣ་ཚོགས་འབྲུ་སྨན་སྣ་ཚོགས་དང༔ དཀར་གསུམ་མངར་གསུམ་ཤིང་ཏོག་རོ་དྲུག་ཟས༔ ཞོ་དང་འོ་མ་ཀླུ་སྨན་བདུད་རྩི་སྐྱེམས༔ རང་གཟུགས་གཏོར་མ་ཤིང་རིས་དར་ཚོན་བལ༔ འཇའ་འོད་འཁྱིལ་བའི་ཁང་བཟང་རིམ་དགུས་རྒྱན༔ ཕུན་ཚོགས་ལོངས་སྤྱོད་གཏེར་གྱིས་རབ་ཏུ་གཏམས༔ ཤེལ་ཚིགས་དཀར་སྟོང་ནག་པོ་ཁྲ་བོ་འབུམ༔ ཤོག་ཤོག་དོང་ཙེ་ཇ་མར་ཐུད་དང་ཕྲུམ༔ སྤྱན་གཟིགས་ལོངས་སྤྱོད་སྣ་ཚོགས་གཏང་རག་འབུལ༔ མི་མཐུན་ལོ་ཟླ་ཞག་དང་ཟ་མའི་ཀེགས༔ འབྱུང་བའི་དགྲ་གཤེད་ཐམས་ཅད་ཞི་བར་མཛོད༔ སྤར་ཁ་སྨེ་བ་ཟླ་ཁམས་མི་མཐུན་པ༔ གནམ་སྒོ་བཅུ་གསུམ་ལོ་རྒྱལ་དྲུག་ཅུ་ཡང༔ མ་འཁྲུག་མ་གནོད་ཞི་ཞིང་མཐུན་གྱུར་ཅིག༔ བདག་དང་རྒྱུ་སྦྱོར་ཡོན་བདག་མི་ནོར་ཀུན༔ ས་བདག་གཉན་དང་ཀླུ་ལ་གཏད་པ་ཁྲོལ༔ བཅིངས་བ་ཤིག་ལ་གཏད་ཀྱི་ཐ་རམ་ཁྲོལ༔ བྱད་མ་བན་བོན་རང་གཤེད་རང་ལ་ཕོབ༔ མི་ཤེས་རྨོངས་པའི་དབང་དུ་གྱུར་པ་ཡིས༔ ཤིང་གཉན་བཅད་དང་ས་བརྐོས་བྲག་གཉན་བཤིགས༔ ཆུ་བཅུས་རྡོ་བཅགས་གནས་ཁང་གསར་བརྩིགས་སོགས༔ མངོན་ཤེས་མེད་པའི་སྐྱོན་ཅན་ནོངས་པ་བཤགས༔ རུ་ང་ཕྲག་དོག་གདུག་རྩུབ་མ་མཛད་པར༔ ཕན་བདེ་བྱང་ཆུབ་སེམས་དང་ལྡན་པའི་ངང༔ ཕོག་ཐུག་འགལ་འཁྲུལ་ཉམས་ཆགས་སོར་ཆུད་ནས༔ བདག་ཅག་འཁོར་དང་བཅས་པའི་མགོན་སྐྱབས་མཛོད༔ རང་རང་གནས་སུ་ད་ནི་གཤེགས་རེ་རན༔ སྐྱེ་མེད་ཆོས་དབྱིངས་མཁའ་རུ་བཛྲ་མཱུ༔ སླར་ཡང་ཐུགས་རྗེའི་དབང་གིས་འབྱོན་པར་འཚལ༔ ཅི་འདོད་དངོས་གྲུབ་མ་ལུས་སྩོལ་བ་དང༔ ཕན་བདེའི་དགེ་མཚན་འཕེལ་བའི་ཕྲིན་ལས་མཛོད༔ ཅེས་ཀླུ་གཏོར་མཚོའམ་ཆུ་མིག་གི་སར་བསྐྱལ་ལ་འདོད་དོན་དངོས་གྲུབ་ཞུ་བའི་འདོད་གསོལ་ཅི་ཤེས་བརྗོད་པར་བྱའོ༔ དེ་ནས་བཀྲ་ཤིས་བརྗོད་པ་ནི༔ ཧྲཱིཿ བཀའ་དྲིན་སྲིད་ན་འགྲན་ཟླ་བྲལ༔ དཀོན་མཆོག་གསུམ་གྱི་བཀྲ་ཤིས་ཤོག༔ མཛད་པ་བླ་ན་མེད་པ་མཆོག༔ སྟོན་པ་སངས་རྒྱས་བཀྲ་ཤིས་ཤོག༔ མཐུ་སྟོབས་བརྟུལ་ཞུགས་རྨད་བྱུང་བ༔ ཕྱག་ན་རྡོ་རྗེའི་བཀྲ་ཤིས་ཤོག༔ འཇིག་རྟེན་མཆོད་འོས་དཀར་ཕྱོགས་སྐྱོང༔ ལྷ་ཀླུ་གཉན་གྱི་བཀྲ་ཤིས་ཤོག༔ འགྲོ་ལ་ཕན་བདེའི་མཆོག་སྩོལ་བའི༔ ཀླུ་རྒྱལ་མཐའ་ཡས་བཀྲ་ཤིས་ཤོག༔ བདག་སོགས་གར་གནས་ས་ཕྱོགས་སུ༔ མི་ཕྱུགས་ནད་རིམས་ཀུན་ཞི་ཞིང༔ ཆར་ཆུ་དུས་འབེབས་ལོ་ཕྱུགས་ལེགས༔ དམ་ཆོས་འཕེལ་བའི་བཀྲ་ཤིས་ཤོག༔ ས་མ་ཡཱ༔