གསེར་སྐྱེམས་བདུད་རྩིའི་ཟེགས་མ།
༄༅། ཟབ་ཆོས་བཀའ་འདུས་ཆ་ལག་ཏུ། །གཏོར་མའི་གསེར་སྐྱེམས་བདུད་རྩིའི་ཟེགས་མ་བཞུགས། །གསང་བདག་རྣལ་འབྱོར་ཧེ་རུ་ཀས། །དྲག་པོའི་ལས་ལ་སྦྱོར་བའི་སྐབས། །གཏོར་སྐྱེམས་ཟག་མེད་བདུད་རྩིར་བསྒྱུར། །ལྟ་སྒོམ་སྤྱོད་པའི་བརྟུལ་ཞུགས་བསྐྱེད། །འཆམ་སྟབས་དབྱངས་དང་བཅས་ཏེ་གྱེར།། རཾ་ཡཾ་ཁཾ། ཨོཾ་ཨཱཿཧཱུྃ། ཧཱུྃ། དགོངས་པ་བརྡ་དང་སྙན་བརྒྱུད་བླ་མ་དང་། །བྱ་སྤྱོད་རྣལ་འབྱོར་བླ་མེད་རྒྱུད་སྡེའི་ལྷ། །གནས་ཡུལ་ཞིང་སྐྱོང་མ་སྲིང་མཁའ་འགྲོའི་ཚོགས། །གཏོར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །རྒྱལ་ཀུན་མཐུ་སྟོབས་གཅིག་བསྡུས་ཧེ་རུ་ཀཿ གསང་སྔགས་རིག་སྔགས་གྲུབ་པ་རྡོ་རྗེ་འཛིན། །ཡེ་ཤེས་ལྔ་སྤྲུལ་ཕྲིན་ལས་ཁྱུང་གི་སྡེ། །གཏོར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །ལྷ་ལས་ལྷག་པའི་གསང་སྔགས་བཀའ་སྲུང་གཙོ། །དྲང་སྲོང་འོད་འཕྲོ་གཟའ་བརྒྱད་གདོང་མོ་བཞི། །སྡེ་བརྒྱད་རྒྱུ་སྐར་ལྷ་བཙན་ནོར་བདག་རྣམས། །གཏོར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །སྔགས་འཆང་བདག་གིས་བསྙེན་ཅིང་སྒྲུབ་པའི་ལྷ། །མགོན་པོ་ཕོ་རྒྱུད་ལྷ་མོ་མོ་རྒྱུད་དང་། །བཀའ་གཏེར་སྲུང་མ་དམ་ཅན་རྒྱ་མཚོ་དང་། །འགོ་ཞིང་སྐྱོབ་པའི་ལྷ་སྲུང་ཐམས་ཅད་ཀྱིས། །གཏོར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །སྔོན་ཚེ་བརྒྱུད་གསུམ་བླ་མའི་སྤྱན་སྔ་རུ། །ཁས་བླང་དམ་བཅའ་བོར་བའི་ལྷ་སྲིན་དང་། །སྡེ་བརྒྱད་དཀར་ཕྱོགས་ཡུལ་གཞི་གནས་ཀྱི་བདག །ལོ་ཟླ་ཞག་དུས་ཚེས་དབང་ཐམས་ཅད་ཀྱིས། །གཏོར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །བསྙེན་ཅིང་སྒྲུབ་པའི་རྩ་གསུམ་སྲུང་མ་གསོན། །ཞིང་བཅུ་ཚང་བའི་བྱད་མ་ལྷ་སྲུང་ལ། །མངོན་སྤྱོད་དྲག་པོའི་ཕྲིན་ལས་མི་མཛད་ཚེ། །བསྟན་དང་འགྲོ་བའི་བདེ་སྐྱིད་ནུབ་ལ་ཉེ། །ཐུགས་བསྐྱེད་དམ་བཅའ་མ་གཡེལ་ས་མ་ཡཱ། །སྔགས་འཆང་ཡིད་ལ་དམིགས་པའི་བྱད་མ་དགྲ། །སྐད་ཅིག་ཡུད་ཙམ་འགུགས་བསྒྲལ་སྤར་བར་གྱིས། །བཅོལ་པའི་ཕྲིན་ལས་མྱུར་དུ་འགྲུབ་པར་མཛོད།། ས་མ་ཡཱ༔ རྒྱ་རྒྱ་རྒྱ༔ ཞེས་པའང་སྤྲང་བཙུན་པདྨའི་མིང་པས་སྤེལ་བ་དགེ་ལེགས་འཕེལ༔ ཤུ་བྷཾ༔