ཨ་རྒོང་ཞུ་ལན་སྣང་སྲིད་བརྡ་གླུ།

ཨ་རྒོང་ཞུ་ལན་སྣང་སྲིད་བརྡ་གླུ༔ ནམ་མཁའ་མཛོད་ཀྱིས་བརླབས་ལ་འདི་སྐད་དང་པོ་ཡར་ལ་ཞུ༔ ༼༡ ཀྱེ༔ ང་ཨ་རྒོང་རྒྱལ་པོའི་ཞལ་ན་རེ༔ ཁྱེད་རྣལ་འབྱོར་དམ་པ་སྙན་ཅིག་གསོན༔ འབྲུ་མཆོག་ངར་གྱི་མི་བོ་ཆེ༔ ཡོན་བདག་གླུད་དུ་འགྲོ་དགོས་ན༔ དཔྲལ་བའི་མིག་དང་ཁོག་པའི་སྙིང༔ རྣ་བ་སྣ་དབང་ལྕེ་དང་སོ༔ ང་ལ་སྐྱེ་མཆེད་མེད་མོད་ཀྱང༔ དེ་སོགས་ཁྱེད་ཀྱིས་གནང་བར་ཞུ༔ ༼༢ ཀྱེ༔ ང་ཨ་རྒོང་རྒྱལ་པོའི་ཞལ་ན་རེ༔ ཁྱེད་རྣལ་འབྱོར་དམ་པ་སྙན་ཅིག་གསོན༔ ཡོན་བདག་གླུད་དུ་འགྲོ་དགོས་ན༔ མགོ་ཞྭ་རྐང་ལྷྭམ་ལུས་གོས་དང༔ སྐེ་རག་ལྷམ་སྒྲོག་གསེར་གཡུའི་རྒྱན༔ གང་ཡང་མེད་པས་གནང་བར་ཞུ༔ ༼༣ ཀྱེ༔ ང་ཨ་རྒོང་རྒྱལ་པོའི་ཞལ་ན་རེ༔ ཁྱེད་རྣལ་འབྱོར་དམ་པ་སྙན་ཅིག་གསོན༔ ཡོན་བདག་གླུད་དུ་འགྲོ་དགོས་ན༔ ནོར་དང་བག་མ་གྲོགས་པོ་དང༔ འཁོར་འབངས་ལོངས་སྤྱོད་དངོས་པོ་མེད༔ དེ་སོགས་ཁྱེད་ཀྱིས་གནང་བར་ཞུ༔ ༼༤ ཀྱེ༔ ང་ཨ་རྒོང་རྒྱལ་པོའི་ཞལ་ན་རེ༔ ཁྱེད་རྣལ་འབྱོར་དམ་པ་སྙན་ཅིག་གསོན༔ ང་ཡོན་བདག་གླུད་དུ་འགྲོ་དགོས་ན༔ ཅི་དང་གང་གི་གླུད་འདི་དག༔ སུ་དང་གང་ལ་ཇི་ལྟར་འཇལ༔ སྔགས་འཆང་རྒྱལ་པོས་གསུང་དུ་གསོལ༔ ༼༥ ཀྱེ༔ ང་ཨ་རྒོང་རྒྱལ་པོའི་ཞལ་ན་རེ༔ ཁྱེད་རྣལ་འབྱོར་དམ་པ་སྙན་ཅིག་གསོན༔ ང་ཡོན་བདག་ཁམས་དང་སྐྱེ་མཆེད་དང༔ འབྱུང་ལྔའི་གླུད་དུ་འགྲོ་དགོས་ན༔ འབྱུང་བ་ལྔ་ལ་ཇི་ལྟར་འཇལ༔ ཡོན་བདག་རྐྱེན་ངན་ཇི་ལྟར་བསལ༔ ང་རང་རྗེས་མེད་གང་དུ་འགྲོ༔ གྲོལ་བའི་གནད་དོན་ཅི་དང་ཅི༔ བཀྲ་ཤིས་སྨོན་ལམ་ཇི་ལྟར་ལེགས༔ སྔགས་འཆང་རྒྱལ་པོས་གསུང་དུ་གསོལ༔ ཞུ་ལེན་རྗེས་ནས་མར་གནང་ནི༔ ༼༡ ཀྱཻ༔ ང་སྔགས་འཆང་རྒྱལ་པོའི་ཞལ་ན་རེ༔ ཨ་རྒོང་རྒྱལ་པོ་ཚུར་གསོན་དང༔ ཁྱོད་ལ་དགོས་པ་བདག་གིས་སྟེར༔ ཞོ་ཤའི་སྙིང་དང་མུ་ཏིག་ཀླད༔ ལུང་ཐང་མིག་ལ་མགྲོན་བུའི་སོ༔ བྱི་རུའི་ལྕེ་ལ་ལེ་བརྒན་རྣ༔ བསུང་ཞིམ་སྣ་ལ་དབང་པོའི་ལག༔ ཟངས་ལྕགས་རྐང་དང་སྐྱེ་མཆེད་ལྔ༔ རྐང་པས་སྟངས་སྟབས་ལག་གར་བསྒྱུར༔ ཨ་རྒོང་ངར་གྱི་མི་བོ་ཆེ༔ ཁམས་དང་སྐྱེ་མཆེད་ཡོངས་རྫོགས་ཚང༔ སྣང་སྲིད་ལྷ་འདྲེ་ཡོངས་ལ་བསྔོ༔ ཕྱིན་ཆད་མ་འཁོར་མ་གནོད་ཅིག༔ ༼༢ ཀྱཻ༔ ང་སྔགས་འཆང་རྒྱལ་པོའི་ཞལ་ན་རེ༔ ཨ་རྒོང་རྒྱལ་པོ་ཚུར་གསོན་དང༔ ཁྱོད་ལ་དགོས་པ་བདག་གིས་སྟེར༔ མགོ་ལ་ཝ་ཞྭ་ཤིགས་སེ་ཤིག༔ རྒྱབ་ལ་དར་གོས་འཇོ་སེ་འཇོ༔ ཞབས་ལ་རྒྱ་ལྷྭམ་གད་དེ་གད༔ ལག་པ་གདུ་བུ་ཁྲོ་ལོ་ལོ༔ མགུལ་ལ་དོ་ཤལ་སི་ལི་ལི༔ རིན་ཆེན་རྒྱན་ཆ་སྤུངས་སེ་སྤུང༔ སྣང་སྲིད་ལྷ་འདྲེའི་ཚོགས་ལ་བསྔོ༔ ཕྱིན་ཆད་མ་འཁོར་མ་གནོད་ཅིག༔ འདི་ལ་གནོད་པ་མ་བྱེད་ཅིག༔ ༼༣ ཀྱཻ༔ ང་སྔགས་འཆང་རྒྱལ་པོའི་ཞལ་ན་རེ༔ ཨ་རྒོང་རྒྱལ་པོ་ཚུར་གསོན་དང༔ ཁྱོད་ལ་དགོས་པ་བདག་གིས་སྟེར༔ བརྒྱན་བརྒྱན་དེ་ནི་སྤུར་སྤུར་ནས༔ སྐྱེས་བུ་དམག་ལ་ཆས་པ་འདྲ༔ ན་ཆུང་བག་མར་ཆས་པ་འདྲ༔ རྒྱལ་པོའི་བང་མཛོད་ཕྱེས་པ་འདྲ༔ རྒྱ་ནག་རྒྱལ་པོའི་ལོངས་སྤྱོད་ནི༔ དར་ཟབ་རི་ལྟར་སྤུངས་པ་ནི༔ ཁྱོད་ལ་གོས་ཀྱི་སྐལ་བར་བསྔོ༔ རྒྱ་གར་ཡུལ་ནས་གསེར་དངུལ་གཡུ༔ སངས་རྒྱས་བསྟན་པའི་ཀ་དར་དེ༔ ཁྱོད་ཀྱི་དཀོར་གྱི་སྐལ་བར་བསྔོ༔ སྟག་གཟིག་ཡུལ་ནས་རྟ་གླང་གནག༔ ཁྱོད་ལ་ནོར་གྱི་སྐལ་བར་བསྔོ༔ ཡུལ་གྱི་ཐ་གྲུ་རིན་ཆེན་གླིང༔ མཛེས་པའི་ན་རི་འཕྱོར་བོའི་རྒྱན༔ ཁྱོད་ལ་བག་མའི་སྐལ་བར་བསྔོ༔ འབྲུ་དྲུག་ངར་གྱི་མི་ཆེན་ལ༔ སྔགས་དང་ཕྱག་རྒྱས་བྱིན་རླབས་པ༔ རེ་རེ་ལ་ཡང་བརྒྱ་སྟོང་འཕྲོས༔ ཁྱོད་ལ་གྲོགས་ཀྱི་ཚུལ་དུ་བསྔོ༔ གླུད་ལ་གཙོ་དང་འབངས་སུ་སྤྲུལ༔ ཁྱེད་ལ་འབངས་ཀྱི་རྣམ་པར་བསྔོ༔ འགོང་པོ་ཐེའུ་བྲང་སྤུན་དགུ་དང༔ དམ་སྲི་ཡང་གཡོག་ཚུལ་དུ་བསྔོ༔ སྣང་སྲིད་ལྷ་འདྲེ་ཡོངས་ལ་བསྔོ༔ ཕྱིན་ཆད་མ་འཁོར་མ་གནོད་ཅིག༔ ༼༤ ཀྱཻ༔ ང་སྔགས་འཆང་རྒྱལ་པོའི་ཞལ་ན་རེ༔ ཨ་རྒོང་རྒྱལ་པོ་ཚུར་གསོན་དང༔ ཁྱོད་ཕྱོགས་བཞིར་འགྲོ་ལ་ཆས་ཙ་ན༔ ཤར་གྱི་ས་བདག་ཕོ་མོ་དང༔ དྲི་ཟའི་དམག་ཚོགས་ཕྱིར་ཟློག་ཅིག༔ ལྷོ་ཕྱོགས་རྒྱལ་ཆེན་ཕོ་མོ་དང༔ གཤིན་རྗེའི་དམག་ཚོགས་ཕྱིར་ཟློག་ཅིག༔ ནུབ་ཕྱོགས་རྒྱལ་བཙན་ཕོ་མོ་དང༔ ཀླུ་དབང་དམག་ཚོགས་ཕྱིར་ཟློག་ཅིག༔ བྱང་ཕྱོགས་བདུད་རྗེ་ཕོ་མོ་དང༔ གནོད་སྦྱིན་དམག་ཚོགས་ཕྱིར་ཟློག་ཅིག༔ མདོས་དང་གླུད་གྱི་སྒོ་ཕྱེ་ལ༔ ངར་གྱི་མི་ཆེན་བྲན་འཁོར་གཡོག༔ རང་རང་བགྲོད་པའི་ཡས་ལམ་ལ༔ ཞུགས་ཏེ་ཐོགས་མེད་འགྲོ་བར་གྱིས༔ ལྷ་འདྲེའི་ཁ་ཁོག་ངོ་ལོངས་ལ༔ ཡོན་བདག་གླུད་དུ་ད་སོང་ཅིག༔ ཕྱིན་ཆད་མ་འཁོར་མ་གནོད་ཅིག༔ ༼༥ ཀྱཻ༔ ང་སྔགས་འཆང་རྒྱལ་པོའི་ཞལ་ན་རེ༔ ཨ་རྒོང་རྒྱལ་པོ་ཚུར་གསོན་དང༔ ཁྱོད་ཡོན་བདག་གླུད་དུ་ད་འགྲོ་དགོས༔ མི་བརྒྱ་ལས་ལྷག་གླུད་བཟང་གཅིག༔ ལྷ་ཕྲུག་བུ་མོའི་རྣམ་འགྱུར་ངོམ༔ སྣང་སྲིད་ལྷ་འདྲེའི་ཡས་ལེན་ཚེ༔ རང་རང་འདོད་པའི་ཡོན་ལྔར་སྤྲུལ༔ འབྱུང་བ་ནམ་མཁའི་ཁམས་ལ་ནི༔ སེམས་ཀྱི་གླུད་དུ་མཁའ་ལ་བསྔོ༔ འབྱུང་བ་ས་ཡི་ཁམས་ལ་ནི༔ ཤ་ཡི་གླུད་དུ་ས་ལ་འབུལ༔ འབྱུང་བ་ཆུ་ཡི་ཁམས་ལ་ནི༔ ཁྲག་གི་གླུད་དུ་ཆུ་ལ་འཇལ༔ འབྱུང་བ་རླུང་གི་ཁམས་ལ་ནི༔ དབུགས་ཀྱི་གླུད་དུ་རླུང་ལ་འཇལ༔ འབྱུང་ལྔའི་ལྷ་འདྲེ་འཁོར་དང་བཅས༔ གླུད་དང་ཆང་བུ་འདི་ཁྱེར་ལ༔ འཁོར་འདིར་གནོད་པ་མ་བྱེད་ཅིག༔ ཡོན་བདག་ཚེ་རིན་སྲོག་གི་གླུད༔ མི་ཕྱུགས་ར་བ་གང་གི་གླུད༔ ཁ་རྗེ་བསོད་ནམས་ཉམས་པའི་གླུད༔ མཐུ་གཏད་སྣ་འདྲེན་རྒྱབ་བརྟེན་གྱི༔ ལྷ་འདྲེའི་ཚོགས་ལ་གླུད་དུ་འབུལ༔ ཨ་རྒོང་ཁྱོད་ཀྱིས་རྐྱེན་ཁ་བསྒྱུར༔ ཡོན་བདག་བསམ་པ་འགྲུབ་པ་དང༔ བཀྲ་ཤིས་བདེ་ལེགས་མཛད་དུ་གསོལ༔ གཤེགས་སོ་བཞུད་དོ་ཤ་ར་ར༔ ཞི་ཞིང་བྱམས་པའི་སེམས་ཀྱིས་ནི༔ མ་འཁོར་མ་གནོད་གཙྪ་མུ༔ ཞེས་བསམ་གཏན་ཡེ་ཤེས་གླིང་པས་ཕབ་པའོ༔