དྲང་སྲོང་བླ་རྡོ་འབྲི་ཐབས།
ཡང་གསང་ཌཱཀྐིའི་ཐུགས་ཐིག་ལས༔ ཟུར་འགེབ་མི་ཟད་རྒྱན་འཁོར་བསྟན༔ དེ་ལ་དྲང་སྲོང་བླ་རྡོ་ནི༔ འདབ་ཆགས་རྙི་ལ་འཇུག་ཐབས་བསྟན༔ ཧེ་རུ་ཀ་དཔལ་ལ་བཏུད་དེ༔ དྲང་སྲོང་སྲོག་འཁོར་བླ་རྡོ་ནི༔ ཉ་སྟོང་ཚེས་བརྒྱད་དུས་བཟང་ལ༔ དྲང་སྲོང་རྒྱུ་བའི་དུས་དག་དུ༔ ཆེ་བཙན་དྲེགས་པ་ལས་འོང་བའི༔ ལེབ་ཤོག་དྲི་བྲལ་གཙང་མའི་ངོས༔ དྲི་བཟང་སྨན་གྱིས་སྦག་ཏུ་བཅུག༔ དྲང་སྲོང་ཁྱབ་འཇུག་སྣང་བརྙན་ནི༔ མངོན་རྟོགས་ཅི་བཞིན་བྲིས་པའི་ལྟོར༔ འཁོར་ལོ་རྩིབས་བརྒྱད་མུ་ཁྱུད་གསུམ༔ དང་པོའི་དབུས་སུ་སྲོག་ཡིག་མཐར༔ གཡས་སྐོར་རྩ་བའི་བསྙེན་པ་ཤམ༔ དྲང་སྲོང་ཆེན་པོ་འཁོར་དང་བཅས༔ བདག་ཅག་རྣལ་འབྱོར་འཆང་བ་པོའི༔ ནད་གདོན་ཞི་ཞིང་ཚེ་བསོད་རྒྱས༔ སྣང་བ་དབང་འདུས་ལོག་འདྲེན་སྒྲོལ༔ མཆོག་ཐུན་དངོས་གྲུབ་སིདྡྷི་ཧཱུྃ༔ རྩིབས་བརྒྱད་སྡེ་བརྒྱད་སྲོག་བསྙེན་བཀོད༔ རྩིབས་མཆན་བཞི་ལ་གདོང་མོ་བཞི༔ མ༔ སྟག་སྲིན་ཟོར་བའི་གདོང་དཀར་སེར་ལྕགས་ཀྱུ་དང་ཞགས་པ༔ ར༔ བཾ་སྲིན་དྲེད་གདོང་སེར་ནག་ཐོད་དབྱུག་སྦྲུལ་ཞགས༔ ཙ༔ ནུབ་ཏུ་གོང་སྲིན་བ་གླང་གི་གདོང་ཅན་དམར་ནག་དགྲ་སྟྭ་དང་ཞགས་པ༔ ཤ༔ བྱང་དུ་འབྲོག་སྲིན་ཆུ་སྲིན་གདོང་ཅན་ལྗང་ནག༔ མཚམས་བཞི་རྒྱུ་སྐར་ཉེར་བརྒྱད་དང༔ སྦལ་མགོ་སྲིན་མོ་ཛྭ་ལ་ཡི༔ གཟུགས་སམ་ཡང་ན་སྲོག་སྔགས་ གཡས་སུ་ཡབ་ལ་ཛ༔ གཡོན་དུ་ཡུམ་ལ་ཕུ༔ འབྲི༔ ཕྱི་རིམ་དབྱངས་གསལ་སྦྲགས་ཏེ་འབྲི༔ དེའི་ཕྱིར་རྟེན་འབྲེལ་སྙིང་པོ་བཀོད༔ དེའི་ཕྱིར་མེ་དུད་རླུང་ཐོག་སེར༔ འཇིགས་པའི་རི་མོའི་པ་ཏྲ་བཀོད༔ རབ་ཏུ་གནས་ཤིང་ལེགས་པར་བསྒྲུབ༔ དྲི་བཟང་སེལ་མེད་དམ་རྫས་བྱུག༔ ཕ་ཝཾ་ལོང་བུ་ཀྵ་ཡིག་མཚན༔ སྲོག་སྙིང་དྲིལ་ལ་འཆང་བར་བྱ༔ ཟ་འོག་དམར་ཁྲའི་ཁུག་མར་བཅུག༔ མཆན་གྱི་འོག་ཏུ་གདག་པར་བྱ༔ དྲང་སྲོང་དྲེགས་པའི་དམ་ཚིག་དང༔ གནད་ཡིག་རྒྱུད་སྡེ་གཞན་དང་མཐུན༔ ཁྱབ་འཇུག་སྲོག་ལ་དབང་ཐོབ་འགྱུར༔ སྲུང་མ་ལུས་དང་གྲིབ་བཞིན་འགྲོག༔ ཚེ་ཆོས་སྲིད་ནོར་གང་ལ་དབང༔ མ་དང་ཌཱཀྐིའི་སྙིང་ཁྲག་ཡིན༔ བཛྲ་ས་མ་ཡཱ༔ ལས་སྐལ་ལྡན་པའི་དཔལ་དུ་ཤོག༔ བསྟན་པ་སྲུང་བའི་མཚོན་ཆ་ཡིན༔ དམ་མེད་ལག་ཏུ་མ་ཤོར་ཞིག༔ མནྟྲ་གུ་ཧྱ༔