སྲུང་མ་སྤྱིའི་གསོལ་བསྡུས་ཀུན་འབྱུང་དབང་སྔོན་རྒྱལ་པོ།

ཡང་གསང་མཁའ་འགྲོའི་ཐུགས་ཐིག་ལས༔ སྲུང་མ་སྤྱིའི་གསོལ་བསྡུས་ཀུན་འབྱུང་དབང་སྔོན་རྒྱལ་པོ་ནི༔ ན་མོ་མ་ཧཱ་གུ་རུ་པདྨ་ཀ་ར་ཡེ༔ དེ་ལ་འདིར་རང་བསྲུང་དྲེགས་པའི་ཚོགས་ལ་གསོལ་བསྡུས་བྱ་བར་འདོད་པས་ཕུད་རྒོད་གཙང་མའམ་གཏོར་མ་དཀར་གསུམ་མདའ་དར་གྱིས་བརྒྱན་པ་བཤམས་ལ༔ རང་ཉིད་ལྷ་ཡི་ཐུགས་ཀའི་ས་བོན་ལས་རཾ་ཡཾ་ཁཾ་སྤྲོས་ཏེ་གཏོར་མའི་མ་དག་ཉེས་སྐྱོན་བསྲེག་གཏོར་བཀྲུས༔ ཨོཾ་ཨཱཿཧཱུྃ་གིས་གང་འདོད་རིན་པོ་ཆེའི་གཏེར་དུ་བསྒྱུར་ལ༔ སྟོང་པའི་ངང་ལས་སྐད་ཅིག་དྲན་རྫོགས་སུ༔ མཚན་ལྡན་མི་མཆོག་ལྕང་ལོའི་གཏོར་སྣོད་དུ༔ ཤ་ལྔ་བདུད་རྩི་ལྔ་སོགས་སྦྱོར་སྒྲོལ་རྫས༔ སྨན་རཀ་གཏོར་ཚོགས་མཆོད་པ་རྣམ་ལྔ་དང༔ ཀུན་བཟང་མཆོད་པའི་སྤྲིན་ཚོགས་གཏིབ་པ་འདི༔ མཆོག་གསུམ་རྩ་གསུམ་ངོ་བོ་པདྨ་འབྱུང༔ ཡི་དམ་རྒྱུད་སྡེ་བཞི་དྲུག་ཐེག་རིམ་དགུ༔ ཏཱ་རེ་ཉེར་གཅིག་གནས་གསུམ་མཁའ་འགྲོའི་ལྷ༔ རལ་གཅིག་དུད་སོལ་མགོན་པོ་བདུན་ཅུ་ལྔ༔ མ་གཟའ་རྡོར་ལེགས་ཤན་དམར་སྲོག་སྒྲུབ་ནག༔ སྡེ་དཔོན་སུམ་ཅུ་སྔགས་བདག་བཅོ་བརྒྱད་དང༔ རྒྱལ་ཆེན་སྡེ་བཞི་ལྷ་མོ་ནོར་རྒྱུན་མ༔ ཛཾ་ལྷ་ཉེར་གཅིག་རྟ་ལྷ་རེ་མནྟ༔ རྒྱལ་ཆེན་སྐུ་ལྔ་གནོད་སྦྱིན་ཙི་འུ་དམར༔ རྨ་ཆེན་སྤོམ་ར་གཉན་ཆེན་ཐང་ལྷ་དང༔ མགུར་ལྷ་བཅུ་གསུམ་བསྟན་མ་བཅུ་གཉིས་སོགས༔ ལྷ་མོ་བསྟན་མ་ཡུལ་གཞི་གནས་ཀྱི་བདག༔ མཆོད་ཅིང་བསྟོད་པར་འོས་པ་ཐམས་ཅད་ཀྱིས༔ དབང་པོ་དྲུག་ལ་བདེ་བ་བསྐྱེད་ཕྱིར་བཞེས༔ ཉམས་ཆག་ཉེས་ལྟུང་བརྗོད་བྲལ་ཀློང་དུ་བཤགས༔ སྐུ་གསུང་ཐུགས་དང་ཡོན་ཏན་ཕྲིན་ལས་བསྟོད༔ བདག་གི་འདོད་པའི་དོན་དང་ལས་བཅོལ་སྒྲུབས༔ ནད་གདོན་འཇིགས་བརྒྱད་ཞི་ཞིང་ཚེ་བསོད་རྒྱས༔ སྣང་སྲིད་དབང་བསྡུས་ལོག་འདྲེན་ཆམ་ལ་ཕོབ༔ མི་མཐུན་གཡུལ་རྒྱལ་མཐུན་པའི་དགེ་ལེགས་སྩོལ༔ ཅེས་པ་འདི་ཡང་ཤེས་རབ་སྐྱེས་ཐོབ་ཀྱི་བློ་ལྡན་ཚ་བོ་རྡོ་རྗེ་རྒྱལ་མཚན་གྱིས་གསང་ཆེན་གསང་བའི་དམ་རྫས་མཾ་ས་ལེགས་པའི་སྐྱེས་བཅས་བསྐུལ་ངོར་ཆོས་མེད་ཆོས་པའི་གཟུགས་འཆང་ཁུ་བོ་གཞན་ལ་ཕན་དེས་དབྱིངས་རིག་སྟོང་པའི་སྒྲོམ་ནས་བརྡ་ཐོགས་མེད་དུ་སུག་བྲིས་བགྱིས་པས་ཆོས་རྒྱུད་འཛིན་པའི་བུ་ལ་འགོ་ཞིང་གྲོགས་བྱེད་པའི་རྒྱུར་གྱུར་ཅིག༔ ཤུ་བྷཾ༔