བཀའ་ཡི་སྲུང་མ་ནག་པོ་ཆེའི་གསོལ་བསྡུས་དངོས་གྲུབ་འབྱུང་བའི་གཏེར།
ཡང་གསང་ཌཱཀྐིའི་ཐུགས་ཐིག་ཆ་ལག་ཏུ༔ བཀའ་ཡི་སྲུང་མ་ནག་པོ་ཆེའི༔ གསོལ་བསྡུས་དངོས་གྲུབ་འབྱུང་བའི་གཏེར༔ ཟབ་དོན་གནད་ཀྱི་རྒྱ༔ རྣལ་འབྱོར་ཏིང་འཛིན་ངར་ལྡན་པས༔ གཏོར་མཆོད་གསེར་གཡུའི་སྐྱེམས་ལེགས་བཀོད༔ རྔ་བརྡུང་དབྱངས་ཀྱིས་འདི་སྐད་དོ༔ ཧཱུྃ་ཧཱུྃ༔ ང་ནི་གསང་འཛིན་ཁྲོ་བོའི་རྒྱལ༔ ཐུགས་ལས་འོད་ཟེར་ལྕགས་ཀྱུ་ལྟར༔ མྱུར་དྲག་ཤུགས་ལྡན་རབ་འཕྲོས་ཏེ༔ འོག་མིན་སྐུ་གསུམ་ཕོ་བྲང་ནས༔ མགོན་པོ་འཁོར་བཅས་ས་མ་ཛ༔ དད་པ་དང་ནི་དམ་ཚིག་གིས༔ ལེགས་ལྡན་ལྷ་ཆེན་ཚོགས་ཀྱི་བདག༔ ཡུམ་ཆེན་བཻ་ཏ་སྐུ་གསུང་ཐུགས༔ ཡོན་ཏན་ཕྲིན་ལས་སྡེ་བརྒྱད་མགོན༔ ཕྱོགས་བཅུའི་མགོན་པོ་ལྷ་དམག་ཚོགས༔ མཆོད་ཕྱིར་སྒྲུབ་ཕྱིར་སྤྱན་འདྲེན་གཤེགས༔ དམ་ཚིག་དྲན་བཞིན་བརྟན་པར་བཞུགས༔ འཕྲུལ་དགའི་ལྷ་མོས་གུས་ཕྱག་འཚལ༔ ཕྱི་མཆོད་འདོད་ཡོན་རྣམ་པ་ལྔ༔ གཟུགས་སྒྲ་དྲི་རོ་རེག་བྱ་མས༔ མགོན་པོའི་ལྷ་ཚོགས་བསྐང་གྱུར་ཅིག༔ ནང་མཆོད་སྨན་གཏོར་རཀྟ་དང༔ སྒྲུབ་རྟེན་སྲོག་འཁོར་བླ་རྡོ་མདུང༔ བ་དན་རྒྱལ་མཚན་རལ་གྲི་བིང༔ རྩེ་གསུམ་མཚོན་གྱི་ཡ་ལད་ཀྱིས༔ མགོན་པོའི་ལྷ་ཚོགས་བསྐང་གྱུར་ཅིག༔ གསང་མཆོད་སྦྱོར་སྒྲོལ་ཏན་གན་དང༔ རྡོ་རྗེའི་གླུ་གར་བདེ་སྟོང་གིས༔ མཆོད་བྱ་མཆོད་བྱེད་བྲལ་བས་མཆོད༔ མགོན་པོའི་ལྷ་ཚོགས་བསྐང་གྱུར་ཅིག༔ བསྐང་ནས་རྣལ་འབྱོར་བདག་ཅག་ལ༔ མཆོག་ཐུན་དངོས་གྲུབ་དེང་འདིར་སྩོལ༔ དགྲ་སྒྲོལ་མཐུ་ཡི་ནུས་པ་བསྐྱེད༔ མགོན་པོ་ནག་པོ་དགྲ་ལ་བྷྱོ༔ དགྲ་དཔུང་བདུན་རྒྱུད་རྩད་ནས་ཆོད༔ བགེགས་དཔུང་ཐལ་བ་རྡུལ་དུ་རློགས༔ སྐུ་ལ་བསྡོ་བའི་རིགས་རྒྱུད་ཆོད༔ བཅོལ་པའི་ཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ ཆོས་ཉིད་ཞི་ལས་མ་གཡོས་ཀྱང༔ སྙིང་རྗེས་གདུལ་དཀའ་འདུལ་བའི་ཕྱིར༔ འཕགས་པའི་རང་གདངས་བསྟན་སྲུང་གཙོ༔ མ་ཧཱ་ཀཱ་ལར་ཕྱག་འཚལ་བསྟོད༔ རྣམ་འགྱུར་སྤྲུལ་པའི་རང་གདངས་གསལ༔ སེམས་དང་སེམས་བྱུང་གནས་དག་པའི༔ བཻ་ཏ་སྐུ་གསུང་ཐུགས་མགོན་སོགས༔ བསྟན་སྲུང་སྤྲུལ་འཁོར་བཅས་ལ་བསྟོད༔ ཅེས་འདི་རིག་རྩལ་གཏེར་མཛོད་ནས༔ ཡིག་མེད་ནམ་མཁའི་བརྡ་རིས་ལས༔ ལེགས་ཕབ་བསྟན་དང་བསྟན་འཛིན་སྡེ༔ མི་ཉམས་ཡར་ཟླའི་མཆེད་པོར་གྱུར༔ ས་མ་ཡཱ༔ སྔོན་སྦྱངས་ལས་ཀྱི་འཕྲོ་ལྡན་པའི༔ བཙུན་པ་རིག་གི་བཞེད་སྐོང་དུ༔ རྣམ་དཀར་བསོད་ནམས་ལ་དབང་བའི༔ ཆོས་གཟུགས་ས་ར་ཧི་ཏས་སྨྲས༔ སརྦ་མངྒ་ལམ༔