སྣང་གསལ་པྲ་ཡི་ཆོ་ག་སྲིད་གསུམ་ལེགས་ཉེས་སྟོན་པའི་ཨ་དར་ཤ

ཡང་གསང་མཁའ་འགྲོའི་ཐུགས་ཐིག་ལས༔ སྣང་གསལ་པྲ་ཡི་ཆོ་ག་སྲིད་གསུམ་ལེགས་ཉེས་སྟོན་པའི་ཨ་དར་ཤ་བི་ཛ་ཧ་རཾ༔

ཨོ་རྒྱན་ཐོད་ཕྲེང་རྩལ་ལ་འདུད༔ སྣང་གསལ་པྲ་ཡི་ལྡིང་ཁང་གི༔ སྒྲུབ་ཐབས་མཐིང་གི་ཞལ་བཟང་མ༔ དོན་ལ་རྡོ་རྗེ་གཡུ་བུན་རྒྱལ༔ མ་ཅིག་སྲིང་གཅིག་གཡུ་ཡི་སྒྲོན༔ རྣམ་གསུམ་དབྱེར་མེད་ངོ་བོ་གཅིག༔ དོན་ལ་རྡོ་རྗེ་ཕག་གདོང་མ༔ དངོས་གྲུབ་ཀུན་གྱི་མདེའུ་ཡིན༔ གསང་སྔགས་དངོས་གྲུབ་འབྱུང་བའི་དཔལ༔ དམ་ལྡན་རྣལ་འབྱོར་སྐྱོང་བའི་མགོན༔ དངོས་གྲུབ་བཾ་གྱི་བདག་མོ་མཆོག༔ སྐལ་ལྡན་ཡོངས་ཀྱི་རྒྱུད་གྲོལ་རྗེ༔ དམ་ཚིག་གཉན་པོས་བྱ་ར་མཛད༔ ཉམས་པའི་སྲོག་གི་གཤེད་མ་མཛད༔ མ་རྒྱུད་མཁའ་འགྲོའི་བདག་ཉིད་ཆེ༔ ཨ་ལ་ལ་ཧོ་ས་མ་ཡཱ༔ དེ་ཉིད་ཚུལ་བཞིན་སྒྲུབ་འདོད་པའི༔ གང་ཟག་དམ་ཉམས་དམེ་ཡུག་གི༔ གྲིབ་ཀྱིས་མ་གོས་ཡི་དམ་གྱི༔ བསྙེན་པ་ཚད་དུ་ལོངས་པ་ཡི༔ རྣལ་འབྱོར་དམ་པས་སྒྲུབ་པའི་གནས༔ གངས་རི་བརྟན་ཆགས་གཡུ་མཚོ་ནི༔ གཏན་འཁྱིལ་རྫ་རི་སྤང་གི་རི༔ ལྷུན་བརྗིད་དགྲ་འདྲེའི་འཚེ་བ་དབེན༔ གྲུབ་ཐོབ་སྐྱེས་བུས་ཞབས་བཅག་པའི༔ གནས་སུ་དཀྱིལ་འཁོར་མདའ་གང་ལུག་ཕྱིང་གདན༔ སྟེང་དུ་འབྲུ་ལྔའི་ཚོམ་བུ་དགོད༔ འབྲས་བཤོས་གཙང་མའི་བཤོས་ལྔ་ནི༔ རིན་ཆེན་སྣོད་དུ་རྒྱན་གྱིས་སྤྲས༔ དངུལ་གྱི་མེ་ལོང་གཡའ་བྲལ་སྟེང༔ ལི་ཁྲི་སིནྡྷུ་ར་དམར་པོ༔ མྱོས་རྫས་ཛ་གད་ཀྱིས་སྦགས་པའི༔ ཐིག་ལེ་ཕྱོགས་བཞི་དབུས་ལྔར་བཀོད༔ མདུན་དུ་རང་བྱུང་ཤེལ་རྡོ་ཤོ༔ གཡུ་བྱང་མིག་མེད་རྨ་བྱའི་སྒྲོ༔ མར་གྱི་ལྷ་གཡག་ཨ་ལོ་ཀེ༔ མདའ་མོ་བྱ་རྒོད་སྒྲོ་མདེའུ༔ ལེགས་ཚང་སྣ་ལྔའི་དར་གྱིས་སྤུད༔ ཕྱི་ནང་མཆོད་པས་མཐའ་ནས་བསྐོར༔ རྣལ་འབྱོར་བདེ་བའི་སྟན་ལ་འདུག༔ ཡི་དམ་ལྷ་ཡི་ལས་གཞུང་བསྲང༔ བསྙེན་སྒྲུབ་མཆོད་བསྟོད་མཚམས་སུ་ནི༔ རྡོ་རྗེ་མཐིང་གི་ཞལ་བཟང་མའི༔ ཕྲིན་ལས་རིམ་པ་འདི་བཞིན་གྱེར༔ ས་མ་ཡཱ༔ ཨེ་མ་ཧོ༔ མདུན་གྱི་ནམ་མཁར་འཆི་མེད་དགའ་བའི་ཚལ༔ རང་སྣང་འོད་གསལ་སྤྲུལ་པ་སྐྱེད་མོས་ལྗོངས༔ གངས་དཀར་མཐོ་བརྗིད་ཉི་ཟླའི་འོད་ཕྲེང་འཁྱུག༔ སྣ་ཚོགས་མེ་ཏོག་བཀྲ་བའི་ཡིད་འོང་གནས༔ བྱ་ཚོགས་སྙན་སྒྲོག་རི་དྭགས་རྩེད་འཇོར་རོལ༔ སྤོས་ཆུའི་ཀླུང་འབབ་ཚ་གྲང་ཁོད་སྙོམ་ཞིང༔ དགའ་བདེའི་ཡོན་ཏན་རྫོགས་པའི་དཔལ་ལ་འགྲན༔ ཞིང་ཁམས་དེ་དབུས་རིན་ཆེན་གཞལ་མེད་ཁང༔ གཡུ་ཡི་ཁ་པད་གསེར་གྱི་རྒྱ་ཕིབ་ཏོག༔ འཇའ་དང་འོད་འཁྱུག་དེ་དབུས་རཏྣའི་ཁྲི༔ སྣ་ཚོགས་དར་གྱི་ལྷབ་ལྷུབ་དཔྱངས་པའི་སྟེང༔ མ་ཅིག་མཁའ་འགྲོ་རྡོ་རྗེ་ཞལ་བཟང་མ༔ དོན་ལ་རྡོ་རྗེ་གཡུ་ཡི་སྒྲོན་མ་ཞེས༔ ཞལ་འཛུམ་བཞད་མདངས་སྙན་པའི་གླུ་ལེན་མ༔ དཀར་གསལ་སྒེག་མཛེས་རཏྣའི་དབུ་རྒྱན་བརྗིད༔ དར་དཔྱངས་རིན་ཆེན་ནོར་བུའི་དོ་ཤལ་སྤུད༔ ཕྱག་གཡས་སྣ་ལྔའི་མདའ་དར་ཕྱོགས་བཅུར་གཡབ༔ སྣང་གསལ་པྲ་ཡི་ཕྱྭ་གཡང་མ་ལུས་འགུགས༔ ཕྱག་གཡོན་དངུལ་དཀར་པྲ་ཡི་མེ་ལོང་ངོམ༔ ཁམས་གསུམ་སྲིད་པའི་ལེགས་ཉེས་ས་ལེར་སྟོན༔ ཞབས་གཉིས་ཕྱེད་སྐྱིལ་ཁྲི་ལ་དགྱེས་པར་བཞུགས༔ ཕྱོགས་བཞིར་མཆེད་བཞིའི་ལྷ་མོ་གཙོ་དང་མཚུངས༔ ཀུན་ཀྱང་བཅུ་དྲུག་ན་ཚོད་སྒེག་མཛེས་འཛུམ༔ གཙོ་འཁོར་ཐུགས་ཀར་བཾ་དང་ནི༔ ཧ་རི་ནི་ས་གནས་གསུམ་གྱི༔ ཡིག་འབྲུ་དཀར་དམར་མཐིང་གསུམ་ལས༔ འོད་འཕྲོས་ཨོ་རྒྱན་མཁའ་སྤྱོད་ཞིང༔ གནམ་སྨན་གངས་རི་ཤེལ་གུར་ནང༔ སྤྲིན་དཀར་དག་པའི་ཕོ་བྲང་ནས༔ སྨན་བཙུན་རྡོ་རྗེ་གཡུ་ཡི་སྒྲོན༔ མཐིང་གི་ཞལ་བཟང་ཞེས་ཀྱང་བྱ༔ ཡེ་ཤེས་སེམས་དཔའ་སྤྱན་དྲངས་ནས༔ དམ་ཚིག་པ་དང་གཉིས་མེད་གྱུར༔ ཨོཾ་བཛྲ་པྲ་མོ་ཧ་བཾ་ཧ་རི་ནི་ས་ས་མ་ཡཱ་ཛ་ཛཿཕེཾ་ཕེཾ༔ ཀྱཻ༔ བཞེངས་ཤིག་ཆོས་སྐུའི་ཀློང་ཡངས་ནས༔ བསྐྱོད་ཅིག་ལོངས་སྤྱོད་རྫོགས་པའི་མ༔ དགོངས་ཤིག་སྤྲུལ་པའི་གནས་མཆོག་འདིར༔ དམ་ཚིག་གཉན་པོས་ད་ཚུར་བྱོན༔ འདའ་དཀའ་རྡོ་རྗེའི་གདན་ལ་བཞུགས༔ ཉམས་ཆགས་སྐོང་ཞིང་ཞིག་རལ་གསོ༔ སྲོག་དང་དམ་ཚིག་གཅིག་ཏུ་བསྲེ༔ བརྟན་པར་བཞུགས་ལ་དངོས་གྲུབ་སྩོལ༔ བཛྲ་ས་མ་ཡཱ་ཏིཥྛ་ལྷན༔ ཞེས༔ དད་དང་དམ་ཚིག་དབང་གིས་ནི༔ རྡོ་རྗེ་མཐིང་གི་ཞལ་བཟང་མ༔ འཁོར་བཅས་མདུན་བསྐྱེད་པྲ་རྟེན་ལ༔ མཚོ་ལ་ཁ་བ་བབ་བཞིན་བསྟིམ༔ དེ་ནས་ཀུན་བཟང་མཆོད་པའི་སྤྲིན༔ ཡེ་ཤེས་ལྷ་ཡི་ཐུགས་དམ་བསྐང༔ ནམ་མཁའ་མཛོད་ཀྱི་སྔགས་རྒྱས་སྤེལ༔ ཨོཾ་ཨཱཿཧཱུྃ༔ བདེ་ཆེན་ཀུན་ཏུ་བཟང་མོ་ཝ་ར་ཧི༔ རྗེས་ཆགས་འགྲོ་ལ་སྙིང་རྗེའི་གཟུགས་ཀྱི་སྐུ༔ བསྟན་སྲུང་དབང་མོ་གངས་ཅན་བསྟན་མའི་གཙོ༔ སྨན་བཙུན་རྡོ་རྗེ་མཐིང་གི་ཞལ་བཟང་མ༔ ཁྱེད་ལ་དགྱེས་པའི་མཆོད་རྫས་འབུལ་བ་ནི༔ དངོས་ཡིད་ལས་བྱུང་ཀུན་བཟང་ནམ་མཁའི་སྤྲིན༔ སྐུ་རྟེན་བླ་རྡོ་མེ་ལོང་དར་སྣ་ལྔ༔ སྨན་བཙུན་ལྷ་མོ་བཞུགས་པའི་རྟེན་དུ་འབུལ༔ འབྲས་བཤོས་གཙང་མ་འབྲུ་ཡི་ཚོམ་བུ་བཀོད༔ སྨན་བཙུན་ལྷ་མོ་དགྱེས་པའི་རྟེན་དུ་འབུལ༔ ཕྱིང་གདན་སྟེང་དུ་པྲ་རྟེན་བུ་མོ་གཙང༔ གཡུ་ཡི་ཐོད་བཅིང་དབང་རྫས་ལི་ཁྲི་བྱུགས༔ གཡུ་བྱང་མིག་མེད་ལྷ་གཡག་ཨ་ལོ་ཀེ༔ སྨན་བཙུན་ལྷ་མོ་དགྱེས་པའི་རྟེན་དུ་འབུལ༔ ནེའུ་སིང་མེ་ཏོག་སྐྱེད་མོས་ཚལ༔ ཤ་རྐྱང་མ་ཧེ་འདོད་འཇོའི་བ༔ རྨ་བྱ་དགའ་བའི་ཟློས་གར་བསྒྱུར༔ རླུང་གི་རྩལ་ལྡན་སྤོས་ཀྱི་གླང༔ རི་དྭགས་གཡུང་དྭགས་རྩེ་འཇོ་ངོམ༔ སྨན་བཙུན་དཀོར་གྱི་རྟེན་དུ་འབུལ༔ ཕྱི་ནང་གསང་བ་དེ་ཁོ་ནའི༔ འཕྲུལ་དང་འཕྲུལ་མེད་དག་པའི་ཆོས༔ མདོར་ན་སྨན་མོ་མཉེས་པའི་རྫས༔ མ་ཚང་མེད་པའི་འདོད་རྫས་བསྐང༔ བསྐང་བྱ་སྐོང་བྱེད་བྲལ་བས་བསྐངས༔ རྩ་བ་ཡན་ལག་དམ་ཚིག་ཀུན༔ མི་འཆབ་བཤགས་སོ་ཚང་པར་མཛོད༔ ཡི་གེ་བརྒྱ་པ་བརྒྱའམ་ཉེར་གཅིག་བཟླ༔ ཀྱེཿ རྒྱལ་དབང་མཚོ་སྐྱེས་རྡོ་རྗེ་དང༔ རྗེ་བཙུན་བཞད་པ་རྡོ་རྗེ་རྩལ༔ རིག་འཛིན་ཡབ་སྲས་སྤྱན་སྔ་རུ༔ ཁས་བླངས་ཐ་ཚིག་རྗེས་དགོངས་ལ༔ ཟབ་གསང་སྙིང་པོའི་བསྟན་པ་སྲུང༔ བསྟན་འཛིན་སྐྱེས་བུའི་ལེགས་ཚོགས་སྤེལ༔ པྲ་རྟེན་འདི་ཡི་སྙིང་ལ་ཞུགས༔ སྲིད་པ་གསུམ་གྱི་ལེགས་ཉེས་སྟོན༔ ཡིད་ལ་བསམ་པའི་འདོད་དོན་གང༔ ལྷང་ལྷང་སྒྲོགས་ལ་ཐོལ་ཐོལ་སྨྲོས༔ འདོད་པའི་དོན་དང་གཉེར་བའི་ལས༔ མ་འདའ་མྱུར་དུ་མཆིས་པར་མཛོད༔ མཐུ་རྩལ་ཅན་ལ་བདག་བསྟོད་བགྱིས༔ དེ་ནས་བཟླས་པ་བྱ་བ་ནི༔ དང་པོ་བསྙེན་པའི་རིམ་པ་འོ༔ བདག་ཉིད་ཀྱི་ཐུགས་ཀ་ནས་འོད་ཟེར་འཕྲོས༔ མདུན་བསྐྱེད་སྨན་བཙུན་ལྷ་མོའི་ཐུགས་རྒྱུད་བསྐུལ༔ ཐུགས་ཀ་ནས་འོད་ཟེར་ལྔ་ལྡན་དང༔ སྣང་གསལ་པྲ་ཡི་མེ་ལོང་རྣམས་བྱུང་ནས་བདག་དང་སྒྲུབ་རྫས་དག་ལ་བསྟིམ་ཞིང་མཆོག་ཐུན་དངོས་གྲུབ་སྣང་སྲིད་ས་ལེར་གསལ་བའི་མཐུ་ཐོབ་པར་བསམ་ལ་རྩ་སྔགས་བཟླ༔ ཨོཾ་བཛྲ་པྲ་མོ་ཧཱ་བཾ་ཧ་རི་ནི་ས་ཧྲིང་ཧྲིང་སརྦ་སིདྡྷི་སྭཱ་ཧཱ༔ ཞེས་པའི་རྩ་བའི་སྔགས་ལ་ནི༔ མདེའུ་འབྲུ་དྲུག་རྣོ་སོ་གདགས༔ འབུམ་ཕྲག་བཅུ་དགུ་བསྙེན་པ་ན༔ དངོས་ཉམས་རྨི་ལམ་རྟགས་མཚན་འབྱུང༔ དངོས་གྲུབ་ཅི་འདོད་སྨན་མོས་སྟེར༔ ཚུལ་བཞིན་བསྒྲུབ་ཀྱང་རྟགས་མེད་ན༔ ཟབ་མོ་དག་སྣང་རྫུན་དུ་ཟད༔ ལྷ་དང་བླ་མའི་ལུང་བསྟན་འཕྱུགས༔ རྒྱལ་དབང་བླ་མས་ཆོས་ལོག་བསྒྱུར༔ གང་ལ་གཏད་སོ་དབེན་པར་གདའ༔ དེ་ཕྱིར་སྔོན་སྨོན་དག་པ་ཡིས༔ སྣང་བའི་བརྡ་ཆོས་བླ་མ་དང༔ མཁའ་འགྲོ་དམ་ཅན་རྒྱ་མཚོས་གནང༔ བསླུ་བར་མི་འགྱུར་ས་མ་ཡཱ༔ དེ་ཕྱིར་ཆོས་དབང་གང་ཟག་གིས༔ ཁོག་པའི་སྙིང་དང་དཔྲལ་བའི་མིག༔ ཅི་ལྟ་བ་བཞིན་གཅེས་པས་བསྒྲུབ༔ སྒྲུབ་པ་གནད་དང་མི་ལྡན་པར༔ ཕལ་པ་སུ་ལ་མ་འཆལ་ན༔ བྱིན་རླབས་ཡེ་ཤེས་ན་བུན་འཐིབ༔ ཨ་ཙར་ཟབ་པའི་དམ་ཆོས་འདི༔ རྩ་གསུམ་རྒྱ་མཚོའི་སྙིང་ཐིག་ཡིན༔ མ་བསླུས་མི་བསླུ་བསླུ་མི་འགྱུར༔ དེ་ཕྱིར་རྟོག་པ་སྤོང་ལ་སྒྲུབ༔ ས་མ་ཡཱ༔ ཨི་དནྟ་ན་ར་ཀན༔ དེ་ནས༔ བསྙེན་གྲངས་ཐེམས་ནས་བསྒྲུབ་པ་ནི༔ རྣལ་འབྱོར་བས་སྤོས་སྣ་དང༔ ཁྱད་པར་སྤོས་དཀར་གྱི་དུད་པ་བདུག་ནས༔ དད་དང་དམ་ཚིག་གཉན་པོའི་འདུན་པས་འདི་བཞིན་གྱེར༔ ས་མ་ཡཱ༔ ཀྱེ༔ འབོད་དོ་རྡོ་རྗེ་གཡུ་སྒྲོན་མ༔ བསྐུལ་ལོ་མཐིང་གི་ཞལ་བཟང་མ༔ བཞེངས་ཤིག་པྲ་བདག་རྣོ་མཐོང་གསལ༔ དགོངས་ཤིག་གསོན་ཅིག་མཐུ་མ་ཆུང༔ མིང་པོས་འབོད་པའི་དུས་བྱུང་ན༔ སྲིང་གཅིག་འོང་བར་མ་ཆད་དམ༔ མཐིང་གི་ཞལ་བཟང་སྒེག་མཛེས་སྟོན༔ ཕྱག་གཡས་མདའ་དར་སྣ་ལྔ་གཡབ༔ སྣང་སྲིད་པྲ་ཡི་དངོས་གྲུབ་སྩོལ༔ ཕྱག་གཡོན་དངུལ་དཀར་མེ་ལོང་གིས༔ སྲིད་པ་གསུམ་གྱི་ལེགས་ཉེས་སྟོན༔ དགྱེས་སྒེག་ཆགས་པའི་ཉམས་འགྱུར་གྱིས༔ པྲ་རྟེན་འདི་ཡི་སྙིང་ལ་ཞུགས༔ དུས་གསུམ་མཁྱེན་པའི་མངོན་ཤེས་སྩོལ༔ ལྷང་ལྷང་སྟོན་ལ་ཐོལ་ཐོལ་སྟོན༔ འདོད་དོན་ལེགས་ཚོགས་ཚུལ་བཞིན་སྒྲུབ༔ བརྒྱུད་གསུམ་བླ་མའི་བཀའ་བཞིན་དུ༔ དམ་བཅའ་དགོངས་ལ་མ་འདའ་ཞིག༔ བདག་གི་ཐུགས་ཀ་ནས་འོད་ཟེར་འཕྲོས༔ མདུན་བསྐྱེད་སྨན་བཙུན་འཁོར་བཅས་ཐུགས་རྒྱུད་བསྐུལ༔ རྣོ་མཐོང་མཁྱེན་པའི་ཡེ་ཤེས་འོད་ཟེར་གྱི་ཚུལ་དུ་བྱུང་བ་རྟེན་རྫས་དང་བདག་ལ་ཐིམ་པས་དུས་གསུམ་ས་ལེར་མཁྱེན་པའི་མཐུ་ཐོབ་པར་བསམ་ལ་རྩ་སྔགས་མཐར༔ སྭཱ་ཧཱའི་གོང་དུ༔ ཀ་ར་ཀ་ར་དྭངས་ར་དྭངས་ར་ཐི་སེ་ཐེ་སེ༔ མདེའུ་དྲུག་པ་ཙཀྵུ་པྲ་བེ་ཤ་ཡ་ཕཊ༔ དེ་ལྟར་ཁྲི་ཕྲག་བཅུ་ཙམ་བཟླས་པ་མེ་ལོང་དང་པྲ་རྟེན་སོགས་ལ་བཏབ་ནས་བྱིན་དབབ་ན་ཅི་འདོད་པའི་མངོན་ཤེས་སྟོན་པར་ཐེ་ཚོམ་མེད༔ ས་མ་ཡཱ༔ དེ་ལྟར་བསྙེན་སྒྲུབ་ཚུལ་བཞིན་དུ༔ གཡེལ་དང་ཞུད་དུ་མ་བཏང་བར༔ གནད་དུ་བསྣུན་པའི་འགྲུབ་རྟགས་ནི༔ རབ་དངོས་འབྲིང་ཉམས་ཐ་མ་རུ༔ བུད་མེད་སྔོ་བསང་རིན་པོ་ཆེའི༔ རྒྱན་གྱིས་སྤུད་པས་དགྱེས་འཛུམ་སྟོན༔ ལེགས་ཉེས་བཟང་ངན་ལུང་སྟོན་འབྱུང༔ དཀར་གསུམ་མངར་གསུམ་ཟས་ལ་སྤྱོད༔ སྦ་གླིང་འབུད་དང་གཞས་སྒྲུང་འཐེན༔ གླིང་བུ་མེ་ལོང་རྙེད་པ་དང༔ མདའ་དར་གཡབ་དང་མེ་ཏོག་འཐུ༔ བུ་མོ་བག་མ་བཟང་མོ་ཡིས༔ སྒྲ་དང་སྔགས་སོགས་ཟློས་པ་སོགས༔ རྟགས་མཚན་བཟང་པོ་དུ་མ་འབྱུང༔ སྨན་མོ་འགྲུབ་ལ་ཉེ་བའི་རྟགས༔ ལར་ནི་བཟང་ངན་མཚན་མ་ཅི་བྱུང་ཡང༔ དགའ་བྲོད་ཁུ་འཕྲིག་མི་བྱེད་པར༔ རོ་སྙོམ་ལྟ་བའི་གདེང་བསྐྱེད་གཅེས༔ ཐམས་ཅད་སྒྱུ་མའི་ཚུལ་རྟོགས་ན༔ སྨན་མོ་སེམས་གྱི་རྩལ་ཏུ་ཤར༔ བསྒྲུབ་བྱ་སྒྲུབ་བྱེད་མེད་མོད་ཀྱང༔ དག་མཉམ་ཡེ་ཤེས་ཆེན་པོར་འགྱུར༔ སྣང་སེམས་གཅིག་ཏུ་འདྲེས་པ་ན༔ འཁོར་འདས་རིག་རྩལ་ཆོ་རོལ་འགྱེད༔ ཁྱབ་བྱེད་ཀུན་གཟིགས་རང་ལ་ཤར༔ ཀུན་མཁྱེན་ཡེ་ཤེས་ཨ་ལ་ལ༔ མི་མཐོང་མཐོང་བ་ཆེན་པོ་ཐོབ༔ ས་མ་ཡཱ༔ རིག་རྩལ་ཡེ་ཤེས་མཁའ་འགྲོའི་བརྡ༔ ཟབ་དགུས་བརྒྱན་པའི་དགོངས་ཀློང་ཆོས༔ རྣོ་མཐོང་གསལ་བའི་མངོན་ཤེས་ཀྱི༔ སྒྲུབ་ཐབས་དག་པའི་བློ་ལ་འཆར༔ ལས་སྐལ་ལྡན་པའི་སློབ་བུ་ལ༔ ལས་འཕྲོ་ཡོད་པའི་དཔལ་དུ་སྦྱིན༔ ཐེ་ཚོམ་ལོག་ལྟས་མ་བསླད་པར༔ ཚུལ་བཞིན་ཉམས་སུ་བླངས་པ་ན༔ འདི་ཕྱིའི་དོན་ཀུན་འདི་ཡིས་འགྲུབ༔ ཁམས་གསུམ་དབང་དུ་འདུ་བ་དང༔ མཆོག་ཐུན་དངོས་གྲུབ་འཕྲལ་དུ་འགྲུབ༔ ཕོ་རྒྱུད་མོ་རྒྱུད་སྙིང་ལ་དབང༔ གངས་ཅན་ཀ་ཆ་དཀོར་ལ་དབང༔ སྙན་པའི་བ་དན་རླུང་གིས་བསྐྱོད༔ དེ་ཕྱིར་གཅེས་པས་ཉམས་སུ་ལོངས༔ ཙིཏྟ་ལ་གུ་ཧྱ༔ ཨི་དནྟ་ན་ར་ཀན༔ ལས་སྦྱོར་པྲ་རྟེན་པྲ་ཕབ་སོགས༔ བྱིས་པ་རིགས་བཟང་ངམ་ནི་བུ་མོ་ནི༔ གྲོང་པའི་ཆོས་ཀྱིས་མ་གོས་སྐྱེ་མཆེད་གཙང༔ ཕ་མ་ཚང་བ་མིང་བཀྲ་ལེགས་པ་ལ༔ ཁྲུས་བྱ་གོས་གཙང་བསྐོན་ལ་བྱུག་བདུག་བྲབ༔ ཁོ་རང་ཡིད་ལ་འདོད་པའི་རྡོ་གཅིག་ལེན༔ བཅུག་ལ་དར་དམར་གྱིས་དྲིལ་པུས་འོག་བཅུག༔ ལི་ཁྲི་སིནྡྷུ་ར་ཡི་ཞུར་ཡང་འཐེན༔ སྟན་དཀར་གཙང་མར་ནས་ཀྱིས་གཡུང་དྲུང་བྲིས༔ དེ་སྟེང་པྲ་རྟེན་དར་གྱི་ལ་ཐོད་ཅན༔ སྒྲུབ་སྔགས་ཆང་ལ་བཏབ་པ་བཏུང་བཅུག་བཞག༔ དེ་མདུན་ཕྱིང་དཀར་གཙང་མར་མེ་ལོང་དང་༔ མར་མེ་མར་གྱི་ལྷ་གཡག་གསེར་གྱི་སྐྱེམས༔ མཆོད་རྫས་བསྐང་རྫས་མདའ་དར་མཁོ་རྫས་བཤམས༔ ཆོ་ག་གཞུང་བསྲང་བྱིན་རླབས་བྱིན་འབེབས་བྱ༔ རྟེན་དང་བྱིས་པ་སྨན་བཙུན་རོལ་བར་བསམ༔ རྩ་སྔགས་གཤམ་དུ་འབྲུ་བདུན་བཏག་པ་དང༔ ཀཾ་ཁོ་ལེ་ལ་འབྲུ་དྲུག་བཏག་པ་དང༔ བཟླས་པའི་བསྔགས་ནས་བྱིས་པ་སོགས་ལ་གཏོར༔ བྷི་ལུག་བཟླས་ལ་མེ་ལོང་དག་ལ་གཏོར༔ རྩ་སྔགས་དང་ནི་ཀ་ར་མིག་ལ་བཏབ༔ ལས་སྦྱོར་བཅོ་ལྔ་པ་ནི་ལྟག་པར་བཏབ༔ པྲ་རྟེན་གཡག་དང་མེ་ལོང་མཚོ་རུ་དམིགས༔ དེ་ལྟར་བཟླ་བྱའི་སྔགས་ཀྱི་རིམ་པ་ནི༔ ཨོཾ་འཕང་གཱ་པ་ཡེ་སྭཱཧཱ༔ ཨོཾ་ཀཾ་ཁོ་ལེ་ཀཾ་ཁོ་ལེ་ཤོ་ན་ཁོ་ལེ་ཤོ་ན་ཁོ་ལེ་ཁེ་ས་དྷ་རེ་ཁེ་ས་དྷ་རེ་ཤ་ས་ཧཾ་ཨ༔ ཆུ་བུར་མིག་གི་སྒོ་སོལ༔ ཨོཾ་བྷི་ལུག་ཀྵ་ནི་ཨ་ལོ་ཀྵ་ཀ་ཡ་སྭཱཧཱ༔ སྔགས་རེ་རེ་བཞིན་པྲ་འབེབས་ནུས་སོ༔ སྔགས་ཡོངས་རྫོགས་བཟླས་ནས་གྲངས་སོང་ན་འབེབས་ནུས་སོ༔ ཐེ་ཚོམ་མེད༔ ཟབ་པའི་སྙིང་ཐིག་ཟབ་པའི་མཐར་ཐུག་ལགས༔ ཞེས་པ་འདིའང་མཐིང་གི་ཞལ་བཟང་མ་ལ་བརྟེན་ནས་སྣང་གསལ་པྲ་ཡི་ཆོ་ག་སྲིད་གསུམ་ལེགས་ཉེས་སྟོན་པའི་མེ་ལོང་ཞེས་བྱ་བ་འདི་ཉིད་དུས་བབས་ཀྱི་གཏེར་ཆེན་རིག་འཛིན་བསམ་གཏན་ཡེ་ཤེས་གླིང་པས་རིག་པ་མཉམ་བཞག་གི་སྒྲོམ་ནས་བཏོན་ཏེ་སྤེལ་བའི་སྣོད་ཆོས་ཀྱི་བདག་པོ་ཨོ་རྒྱན་དམ་པའི་མཚན་འཆང་ཛྙཱ་ན་ཀུ་མ་ར་ཡི་ཟློས་གར་ཞབས་མཐིལ་སྨེ་བས་བརྒྱན་ཅིང་འགྲམ་གཡོན་སྨེ་བའི་ཐིག་ལེ་ཉུང་འབྲུ་ཙམ་པ༔ དམ་གྲིབ་དང་ལྷ་སྲུང་འཁྲུགས་པའི་འཁོན་གྱིས་སྤྱན་གྱི་རྣོ་ནུས་ཞན་ཅིང་རིག་རྩལ་ཤེས་རབ་གྱི་མངའ་བདག་སྒྲ་བརྒྱའི་སྙིང་པོའི་སྤྲུལ་པའི་སྐུ་མཆོག་དམ་པ་དང༔ རང་སློབ་སྔགས་ཀྱི་ཚུལ་ཅན་གསལ་སྟོང་དང་ཨ་རིག་སོགས་སྣོད་ལྡན་ལ་རྟེན་འབྲེལ་དུ་ཕུལ་བས་མཁྱེན་རབ་གསལ་བའི་སྣང་ཆ་འགགས་མེད་དུ་ལེགས་ཉེས་སྟོན་པའི་མཁྱེན་ལྡན་དུ་གྱུར་ཅིག་གུ༔