སྣང་གསལ་པྲ་ཡི་ལས་སྦྱོར།
སྣང་གསལ་པྲ་ཡི་ལས་སྦྱོར་ནི༔ ཧཱུྃ་བྷྱོ༔ སྔོན་ཚེ་རིག་འཛིན་ཐོད་ཕྲེང་རྩལ༔ རྒྱལ་དབང་མི་ལ་ཡབ་སྲས་བརྒྱུད༔ བཀའ་བསྒོས་དམ་བསྒྲགས་དྲན་མཛོད་ལ༔ མ་གཡེལ་མ་འདའ་ས་མ་ཡཱ༔ པྲ་རྟེན་འདི་ཡི་སྙིང་ལ་ཞུགས༔ ལྷང་ལྷང་སྒྲོགས་ལ་ཐོར་ཐོར་སྨྲོས༔ འདོད་དོན་ལེགས་ཉེས་གསལ་བར་སྟོན༔ རྣལ་འབྱོར་དམ་མེད་མི་སྲིད་ཀྱི༔ ཆོས་སྐྱོང་མཐུ་མེད་མི་སྲིད་ཀྱི༔ ཅི་བཅོལ་ད་ལྟ་གསལ་བར་ཕོབ༔ བརྡ་དོན་མ་འཛོལ་དྲང་པོར་སྟོན༔ ས་མ་ཡཱ་ལ་དགོངས་པར་འཚལ༔ བསྙེན་སྒྲུབ་ལས་སྦྱོར་མདེ་འུའི་སྔགས༔ དམིགས་པ་དང་བཅས་བཟླས་པར་བྱ༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ༔ ས་ར་ཧི་ཏས་བྲིས་པ་དགེ་ལེགས་འཕེལ༔