སྣང་གསལ་པྲ་ཡི་ཆ་ལག་སྔོན་དུ་འགྲོའི་ཆོས་གསུམ་རས་པ་གསལ་སྟོབས་ཀྱི་མཛད་པ།
ཟུར་གསལ་ཡེ་ཤེས་འཁོར་ལོ་ལས༔ སྣང་གསལ་པྲ་ཡི་ཆ་ལག་ཏུ༔ སྔོན་དུ་འགྲོ་བའི་ཆོས་གསུམ་སྟོན༔ སྐུ་གསུམ་བླ་མའི་བདག་ཉིད་དཔལ༔ སྲིང་གཅིག་རྡོ་རྗེ་གཡུ་སྒྲོན་མ༔ མཁའ་འགྲོ་ཡོངས་ཀྱི་རྗེ་མོར་འདུད༔ ས་མ་ཡཱ༔ དང་པོ་རིན་ཆེན་བུམ་པ་སྤོས་ཆུས་བཀང༔ རྣམ་གཟུངས་བཟླས་པས་ནུས་ལྡན་བྱ༔ ཧཱུྃ་ཧྲཱིཿ བུམ་པ་བདེ་སྟོང་གཞལ་མེད་ཁང༔ གཉིས་མེད་བྱང་ཆུབ་སེམས་ཀྱི་ཆུས༔ སྐལ་ལྡན་བུ་ཡི་སྒོ་གསུམ་བཀྲུ༔ ནད་གདོན་སྡིག་སྒྲིབ་དམ་སྡོམ་འགལ༔ དམེ་ནལ་རོ་མཛེ་ཡུག་ཤན་གྲིབ༔ ཐེ་ཚོམ་རྫུན་དང་གཡོ་སྒྱུ་སོགས༔ མངོན་ཤེས་འགོགས་པའི་ཉེས་སྐྱོན་ཚོགས༔ མ་ལུས་བྱང་ཞིང་དག་པར་མཛོད༔ ཅེས་གཟུངས་སྔགས་དང་ཁྲུས་སྔགས་ཅི་རིགས་བྱ༔ པྲ་རྟེན་ཡན་ལག་ལྔ་ཁྲུས་དང་བྱུག་བདུག་བྲབ་གསུམ་སོགས་ཡང་དག་བྱ༔ དེ་ནས་དཀར་ཕྱོགས་སྐྱོང་བ་རྣམས་ལ་གཏོར་སྐྱེམས་འབུལ་ནས་ཕྲིན་ལས་བཅོལ༔ ནག་ཕྱོགས་རིགས་ལ་བགེགས་འབྲང་བྱིན་ལ་ཕྱིར་བསྐྲད་པ་ནི༔ ཧཱུྃ་ཧཱུྃ་ཧཱུྃ༔ རང་བྱུང་རིག་པ་སྐྱེ་མེད་དོན་གྱི་ལྷ༔ བདག་ཉིད་སྣང་སྲིད་ཟིལ་གནོན་པད་འབྱུང་ངས༔ གནས་འདིར་པྲ་ཡི་དཀྱིལ་འཁོར་ཞལ་ཕྱེས་ཚེ༔ ཐེ་ཚོམ་ལོག་ལྟ་གཉིས་སྣང་འཁྲུལ་བའི་འདྲེ༔ གཏོར་མ་འདི་ལོངས་གླིང་བཞིའི་ཕ་མཐར་དེངས༔ གནས་འདིར་མ་འདུག་ཆོས་དབྱིངས་ཀློང་དུ་དེངས༔ བཀའ་ལས་འདས་ན་རྡོ་རྗེ་ཁྲོ་བོས་གཞོམ༔ ཞེས་ཧཱུྃ་བཞིའི་སྔགས་དང་བསྡིག་བསྐྲད་ཀྱི་དགོངས་པས་ཡང་ཡང་བསྐྱར༔ སླར་བསྲུང་མཚམས་བགོ་བ་ནི༔ ཧཱུྃ་ཧྲཱིཿ རང་བྱུང་རང་ཤར་ཆེན་པོའི་དཀྱིལ་འཁོར་འདིར༔ རིག་རྩལ་རོལ་བའི་ལྷ་དང་ལྷ་མོའི་སྤྲིན༔ མི་ཤིགས་ན་དཱ་བརྗོད་མེད་ཕྱག་རྒྱར་རྫོགས༔ ཁྱབ་བརྡལ་ལྷུན་གྲུབ་ཆེན་པོའི་འཁོར་ལོར་རོལ༔ ཨཱ་ཨཱ་ཨཱཿ དྷརྨ་དྷརྟུ་ཙཀྲ་བྷྲུྃ༔ གཉིས་པ་སྐྱབས་སེམས་རིམ་པ་ནི༔ ཧཱུྃ་ཧྲཱིཿ དེང་ནས་བཟུང་སྟེ་བྱང་ཆུབ་སྙིང་པོའི་བར༔ བླ་མ་ཡི་དམ་མཁའ་འགྲོ་ཆོས་སྲུང་དང༔ སྨན་བཙུན་རྡོ་རྗེ་མཐིང་གི་ཞལ་བཟང་མར༔ སྐྱབས་སུ་མཆི་འོ་ཐུགས་རྗེས་བཟུང་དུ་གསོལ༔ ལན་གསུམ༔ ཧཱུྃ་ཧོ༔ བདེ་ཆེན་ཀུན་ཏུ་བཟང་མོ་ཝཱ་ར་ཧི༔ འགྲོ་ལ་རྗེས་ཆགས་རྡོ་རྗེ་གཡུ་སྒྲོན་མའི༔ སྣང་གསལ་པྲ་ཡི་དཀྱིལ་འཁོར་འདིར་ཞུགས་ནས༔ བསྟན་དང་འགྲོ་བའི་བདེ་སྐྱིད་སྤེལ་སླད་དུ༔ སྨན་བཙུན་ལྷ་མོ་བསྒྲུབ་པར་དམ་བཅའ་འོ༔ ལན་གསུམ༔ གསུམ་པ་མཆོད་རྫས་བྱིན་རླབས་ནི༔ ཨེ་མ་ཧོ༔ རང་སྣང་དག་པ་ངོ་མཚར་སྤྲུལ་སྐུའི་ཞིང༔ རྒྱན་དང་བཀོད་པ་ཕུན་ཚོགས་ལྔ་ལྡན་གནས༔ རང་བྱུང་ལྷུན་གྲུབ་པདྨ་རྒྱལ་པོའི་སྐུ༔ སྣང་སྲིད་ཟིལ་གནོན་བརྡ་དོན་རྟགས་ཀྱིས་སྤྲས༔ གསལ་དག་བརྟན་གསུམ་རྣམ་འགྱུར་ངོམས་བཞིན་དུ༔ གནས་གསུམ་ལས་འཕྲོས་འབྲུ་གསུམ་དབྱིངས་ནས་སྤྲོས༔ མཆོད་རྫས་མ་དག་སྦྱངས་སྤེལ་འདོད་རྒུར་བསྒྱུར༔ ལྷ་ཀླུ་མི་ཡི་མཆོད་པ་སྤྲིན་ལྟར་གཏིབས༔ མེ་ཏོག་བདུག་སྤོས་མར་མེ་དྲི་ཞལ་རོལ༔ གཟུགས་སྒྲ་དྲི་རོ་རེག་བྱ་ཆོས་ལ་སོགས༔ སྨན་རཀ་གཏོར་གསུམ་སྦྱོར་སྒྲོལ་ལྟ་སྒོམ་སྤྱོདཿ ངོ་མཚར་མཆོད་པ་བཅུ་དྲུག་རྒྱལ་སྲིད་བདུན༔ བཀྲ་ཤིས་རྫས་རྟགས་བརྒྱད་དང་ཉེ་བ་བདུན༔ རིན་ཆེན་ལྔ་དང་གསོ་བསྐྱེད་འབྲུ་དྲུག་སྨན༔ གོ་ཁྲབ་མཚོན་སོགས་ཀ་ཆ་དཀོར་ནོར་རྫས༔ སྤོས་ཆུ་ཀླུང་འབེབས་ནེའུ་གསིང་སྐྱེད་མོས་ཚལ༔ འདོད་འཇོའི་བ་དང་རྨ་བྱས་ཟློས་གར་བསྒྱུར༔ རླུང་གི་རྩལ་ལྡན་སྤོས་ཀྱི་གླང་ཆེན་དང༔ རི་དྭགས་གཡུང་དྭགས་གཅན་གཟན་ཆུ་གནས་བྱ༔ ཀུན་གྱི་རྣམ་འགྱུར་རྩེད་འཇོས་དགའ་བདེ་བསྐྱེད༔ སྐུ་རྟེན་བླ་རྡོ་མེ་ལོང་དར་སྣ་ལྔ༔ འཇའ་ཤེལ་གཡུ་བྱང་ལྷ་གཡག་ཨ་ལོ་ཀེ༔ པྲ་རྟེན་བུ་མོ་གཡུ་ཐོད་ལི་ཁྲིས་བྱུགས༔ དམ་རྫས་བརྒྱན་པའི་གཏོར་མ་གསེར་གཡུ་སྐྱེམས༔ ཇ་ཆང་འོ་ཞོ་སྤོས་དཀར་དུད་སྤྲིན་འཁྲིགས༔ ལྔ་ལྡན་དབྱངས་སྙན་རོལ་མོས་རྣ་བ་མྱོས༔ མདོར་ན་སྨན་མོ་མཉེས་པའི་མཆོད་རྫས་དང༔ བསྐང་རྫས་སྒྲུབ་རྫས་རྟེན་རྫས་མཐུན་པའི་རྫས༔ མ་ཚང་མེད་པ་དགོས་འདོད་ནོར་ལྟར་དང༔ ཀུན་བཟང་མཆོད་པའི་རྣམ་རོལ་ལྟ་བུར་གྱུར༔ ཨོཾ་ཨཱཿཧཱུྃ༔ཧ་ཧོ་ཧྲཱིཿདང་ནམ་མཁའ་མཛོད་ཀྱི་སྔགས་རྒྱས་བརླབས༔ ས་མ་ཡཱ༔ རྒྱ་རྒྱ་རྒྱ༔ མཎྜལ་གུ་ཧྱ༔ ཞེས་པའི་ཕྲིན་ལས་གཞུང་བཞིན་བསྒྲུབ༔ སྣང་གསལ་པྲ་ཡི་སྔོན་འགྲོའི་ཆོས༔ ང་ཉིད་ཇོ་མོ་མཚོ་རྒྱལ་གྱིས༔ ཨ་ཙར་གསལ་སྣང་ཐུགས་གཏེར་གྱི༔ མ་ཚང་ཁ་བསྐང་དོན་ཆེད་དུ༔ མཚོ་སྐྱེས་རྡོ་རྗེ་ཉིད་ལ་ཞུས༔ ད་ལྟ་ཡང་སྤྲུལ་སྐྱེས་བུས་སྤེལ༔ གཏེར་ཆོས་མ་བུ་ཟུང་འབྲེལ་གྱིས༔ བསྟན་དང་འགྲོ་བའི་གསོས་སུ་ཤོག༔ ཤུ་བྷཾ༔ ཅེས་སློབ་འབངས་རས་མིང་འཛིན་པས་སྤེལ་བ་དགེཿ