དགྲ་བླ་གེ་སར་གྱི་གསོལ་བསྡུས།

ཡང་གསང་མཁའ་འགྲོའི་སྙིང་གི་ཟུར་འགེབ་ལས༔ སྒྲོལ་མའི་བཀའ་སྲུང་སྐྱེས་བུ་མི་ཐུང་ནོར་བདག་མགོ་ནག་གི་དགྲ་བླ་གསོལ་བསྡུས་བི་ཛ་ཧ་རཾ་ཏིཥྨ༔

ཨོ་རྒྱན་སློབ་དཔོན་ཆེན་པོ་ལ་ཕྱག་འཚལ་ལོ༔ འཛམ་གླིང་སྐྱེས་བུ་མཆོད་སྒྲུབ་ནི༔ གཟའ་སྐར་ལེགས་པའི་དུས་གཉན་ལ༔ གཏོར་མ་གཙོ་འཁོར་རྒྱན་དང་ལྡན༔ དཀར་དམར་ཟས་སྣ་ཚོགས་པས་བརྒྱན༔ དྲི་བཟང་སྤོས་ཀྱི་དུད་པ་གཏོང༔ རྣལ་འབྱོར་ལྷ་ཡི་ང་རྒྱལ་གྱིས༔ ཀྱཻ༔ འཛམ་གླིང་ཉི་མ་ལྷོ་ཡི་ཕྱོགས༔ གངས་ཅན་དགྲ་ལྷ་སྐྱེས་བུ་ཆེ༔ གེ་སར་ནོར་བུ་དགྲ་འདུལ་རྒྱལ༔ མི་ཐུང་ནོར་བདག་དཔའ་བོ་ནི༔ ཞལ་གཅིག་ཕྱག་གཉིས་གཟི་འོད་འབར༔ པདྨ་ར་གའི་ལྷུན་པོར་འགྲན༔ སྤྱན་གཉིས་ཁྲོ་འཛུམ་སྨ་ར་ངོམ༔ ཕྱག་གཉིས་ཤེས་རབ་རལ་གྲི་ཕྱར༔ གཡོན་པས་ནོར་བུ་ཟ་མ་ཏོག༔ དབུ་ལ་འཛོམ་ཞུ་སྒྲོ་སྣས་བརྒྱན༔ སྐུ་ལ་བེམ་དང་དར་གོས་ཀླུབས༔ མདའ་གཞུ་འཁོར་གསུམ་ཀྱི་ལི་ལི༔ གྲུ་མོ་གཡོན་ན་མདུང་དར་ཕྱར༔ ཞབས་གཉིས་སག་ལྷྭམ་དང་བཅས་པ༔ ཕྱེད་སྐྱིལ་རྐྱང་བུ་གྱི་ལིང་ཞོན༔ གསེར་སྒ་སྟག་སྟན་བསེ་ཡི་ཁྲབ༔ གཡུ་མཐུར་ཉི་ཟླའི་ཕྲ་ཚོམ་སྤྲས༔ སྤྱི་བོའི་སྟེང་གི་ནམ་མཁའ་ལ༔ སློབ་དཔོན་ཨོ་རྒྱན་བླ་མ་བཞུགས༔ གཡས་ཕྱོགས་གཉན་རྗེ་སྐུ་བླ་དང༔ གཡོན་ཕྱོགས་སྲིང་ཆུང་འོད་དཀར་ལྕམ༔ འོག་ཕྱོགས་ཀླུ་རྒྱལ་གཙུག་ན་དང༔ མཐའ་བསྐོར་དཔའ་ཐུལ་སུམ་ཅུ་དང༔ སྐུ་ལྷ་རྨ་རྒྱལ་སྤོམ་ར་སོགས༔ ལྷ་སྲིན་ཁྲོམ་ཚོགས་ལྟ་བུར་བསྐྱེད༔ ཀྱཻ་ཀྱཻ༔ དབུ་ནག་སྐྱེས་བུ་གེ་སར་རྒྱལ༔ ཨོ་རྒྱན་པདྨས་བཀའ་བསྒོས་བཞིན༔ སངས་རྒྱས་བསྟན་པ་བསྲུང་བ་དང༔ སེམས་ཅན་བདེ་ལ་འགོད་པའི་ཕྱིར༔ འཁོར་བཅས་གནས་འདིར་གཤེགས་སུ་གསོལ༔ གནས་འདིར་བཀོད་ལེགས་གདན་ལ་བཞུགས༔ སྤྲུལ་པའི་ལྷ་མོས་འདུད་པར་བགྱི༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་གཟུགས་སྒྲ་དྲི༔ རོ་དང་རེག་བྱ་ལ་སོགས་པ༔ དཀར་གསུམ་གཏོར་མ་མཐུན་རྫས་སྦགས༔ སྐྱེས་བུ་སེང་ཆེན་གསོལ་ལོ་མཆོད༔ རྟེན་རྫས་སྒྲུབ་རྫས་བསྐང་བའི་རྫས༔ མདའ་དར་གོ་མཚོན་ཡ་ལད་དང༔ རི་དྭགས་གཡུང་དྭགས་སྲོག་ཆགས་འབུམ༔ སྐུ་རྟེན་དཀོར་ཆ་མཐུན་པའི་རྒྱན༔ མི་ཐུང་ནོར་བདག་ཐུགས་དམ་བསྐང༔ ཨོ་རྒྱན་བླ་མའི་ལྷ་ཚོགས་མཉེས་གྱུར་ཅིག༔ གཉན་གྱི་དམག་ཚོགས་ཐུགས་དམ་བསྐང༔ ཇ་ཆང་རིན་ཆེན་སྐྱེམས་རིགས་ཀྱིས༔ སྲིང་ཆུང་ཐ་ལེ་འོད་དཀར་བརྔན༔ ལེགས་ཉེས་སྟངས་འཛིན་མགོན་སྐྱབས་མཛོད༔ ཀླུ་ནོར་ནེའུ་སིང་སྐྱེད་ཚལ་གྱིས༔ གཙུག་ན་རིན་ཆེན་མཆོད་དོ་བརྔན༔ ཀླུ་གཡང་དངོས་གྲུབ་བདག་ལ་སྩོལ༔ དངོས་འབྱོར་ཡིད་སྤྲུལ་རྒྱ་མཚོ་ཡིས༔ རྨ་རྒྱལ་ལྷ་འཁོར་འབུམ་ཕྲག་དང༔ གྲུབ་ཆེན་དཔའ་ཐུལ་སུམ་ཅུ་ལྔ༔ ལྷ་སྲིན་སྡེ་བརྒྱད་དམག་ཚོགས་ཀྱི༔ ཐུགས་དམ་བསྐང་ལ་ཕྲིན་ལས་སྒྲུབ༔ ཉམས་ཆག་འགལ་འཁྲུལ་བཤགས་པར་བགྱི༔ མ་འདའ་བཛྲ་ས་མ་ཡཱ༔ ཧོ་དགོངས་སུ་གསོལ་ལོ༔ གསན་དུ་གསོལ་ལོ༔ སྤྲོས་པ་མེད་པའི་དབྱིངས༔ ཡངས་པ་ཆེན་པོའི་ཀློང༔ སྟེང་ལྷ་ཡི་ཁམས༔ བར་གཉན་གྱི་ཡུལ༔ འོག་ཀླུ་ཡི་གྲོང་ཁྱེར་སོགས་ནས༔ སློབ་དཔོན་པདྨ་འབྱུང་གནས༔ རྗེ་བཙུན་འཇམ་དབྱངས་དམར་པོ༔ སློབ་དཔོན་ཀླུ་སྒྲུབ་སྙིང་པོ༔ རྒྱ་གར་གྲུབ་ཐོབ་བརྒྱད་ཅུ་སོགས་ཀྱི་སྤྱན་སྔར་ཁས་བླངས་དམ་བཅས་པ་བཞིན་དུ་འཛམ་གླིང་སེང་ཆེན་རྒྱལ་པོ༔ སྲིང་ཆུང་ཐ་ལེ་འོད་དཀར༔ སྟེང་གི་གནམ་ལྷ་དཀར་ཆེན༔ གཉན་ཆེན་སྐུ་བླ་གེར་འཛོ༔ ཀླུ་རྒྱལ་གཙུག་ན་རིན་ཆེན༔ ནུ་བོ་རྒྱ་ཚ་ཞལ་དཀར༔ གླིང་གི་དཔའ་ཐུལ་སུམ་ཅུ༔ ཡང་ཐུལ་དམ་པའི་མི་བདུན༔ ལྷ་སྲིན་དྲེགས་པའི་དམག་ཚོགས་ཁྱེད་རྣམས་ལ་བསང་གསུར་གསེར་སྐྱེམས་གཏོར་མས་བརྔན་ནོ༔ གསོལ་ལོ༔ མཆོད་དོ༔ སྔར་བཅོལ་ལེགས་པའི་གཏང་རག༔ ཕྱིས་བཅོལ་ལས་ཀྱི་ཞུ་སྐྱེམས་མཆོད་རྫས་དམ་པ་འབུལ་བ་ཡིན་པས༔ བདག་ཅག་དཔོན་སློབ་འཁོར་དང་བཅས་པའི་འཁོར་སྲུང༔ རྐྱེན་བཟློག༔ ལེགས་པ་བརྒྱ་དང་སྤྲོད༔ ཉེས་པ་སྟོང་དང་སུབ༔ ཁ་ཡི་ཟས་འདོད་ཟས་དང་སྤྲོད་ཅིག༔ ལག་པའི་ནོར་འདོད་ནོར་དང་སྤྲོད་ཅིག༔ རྒྱབ་ཀྱི་གོས་འདོད་གོས་དང་སྤྲོད་ཅིག༔ འབྲུ་ནོར་རིན་པོ་ཆེ་སྣ་ཚོགས་ཀྱི་ཆར་ཕོབ་ཅིག༔ གཞུ་གང་ལས་དཔངས་མ་མཐོ༔ མདའ་གང་ལས་རྒྱང་མ་བསྲིང༔ བདག་གི་ལུས་དང་གྲིབ་མ་ལྟར༔ གོས་དང་གོང་ང་ལྟར༔ ཉི་ཟླ་དང་ཟེར་ལྟར་དགྲ་བླའི་རྒྱལ་པོ་ཁྱེད་ཀྱིས་མི་འབྲལ་བར་དམ་ཉམས་པའི་དགྲ་འདྲེ་བསམ་པ་ངན་ཞིང་སྦྱོར་བ་རྩུབ་པ་རྐུ་ཤོམ་ཇག་ཤོམ་མགོ་གཡོག་མགོ་སྐོར་བཀའ་ལ་མི་ཉན༔ དམ་ལ་མི་གནས་པའི་རིགས་གང་ཡིན་པས་བདག་བལྟར་མེད་པར་མཛོད་ཅིག༔ གཟུང་དུ་མེད་པར་མཛོད་ཅིག༔ བཅིང་དུ་མེད་པར་མཛོད་ཅིག༔ དགག་ཏུ་མེད་པར་མཛོད་ཅིག༔ བསྒལ་དུ་མེད་པར་མཛོད་ཅིག༔ རྨོངས་པར་བྱར་མེད་པར་མཛོད་ཅིག༔ ཆད་པས་བཅད་དུ་མེད་པར་མཛོད་ཅིག༔ མགོ་བྲེག་ཏུ་མེད་པར་མཛོད་ཅིག༔ གཞུར་མེད་པར་མཛོད་ཅིག༔ ཚིག་པར་བྱར་མེད་པར་མཛོད་ཅིག༔ གནོད་བྱེད་དགྲ་བགེགས་གང་གི་དབང་དུ་མི་འགྲོ་བར་མཛོད་ཅིག༔ གཉའ་ནོན་མཛོད་ཅིག༔ ཆམ་ལ་ཕོབ་ཅིག༔ ཆུ་ཟམ་པ་མེད་པ་ལ་ཟམ་ཚུགས་ཤིག༔ བྲག་ཐེམ་པ་མེད་པ་ལ་ཐེམ་སྐས་གྱིས་ཤིག༔ ཁ་མགོན་དང་སྡོང་གྲོགས་མཛོད་ཅིག༔ ཁ་འཛིན་རྒྱབ་རྟེན་མཛོད་ཅིག༔ མི་ནོར་ཟས་གོས་ཡུལ་ཁམས་ཞིང་ཁང་དང་བཅས་པའི་སྲུང་མ་མཛོད་ཅིག༔ ཀྱཻ༔ འཛམ་གླིང་སེང་ཆེན་གེ་སར་རྒྱལ་པོ་ཆེ༔ ཡབ་ཡུམ་ལྕམ་སྲིང་ལྷ་ཀླུ་གཉན་གསུམ་དང༔ དཔའ་ཐུལ་ལ་སོགས་ལྷ་སྲིན་དྲེགས་པའི་ཚོགས༔ མ་ལུས་འཁོར་བཅས་མངའ་གསོལ་མཆོད་ཅིང་བསྟོད༔ བདག་ཅག་ལ་སྡང་དགྲ་རྐུན་ཇག་ཆོམ་སོགས༔ རྡུལ་ཕྲན་མིང་གི་ལྷག་མར་མཛད་དུ་གསོལ༔ གང་བསམ་ཡིད་བཞིན་དཔལ་གྱིས་མངོན་མཐོ་ཞིང༔ རྣལ་འབྱོར་བཅོལ་བའི་རེ་འབྲས་མཆིས་པར་མཛོད༔ ས་མ་ཡཱ༔ གཏོར་མ་འགྲོ་ཕྱོགས་སུ་ཕུལ་བའམ༔ ཡང་ན་བསང་ནང་དུ་བསྲེག༔ ཁྱི་དང་སློང་མོ་སོགས་ལ་མི་སྦྱིན༔ ཡུལ་ལྷ་དང་ཆེ་བཙན་དྲེགས་པ་ཅན་མི་དབང་དཔའ་བོ་དགྲ་བླ་ཅན་དང༔ འདི་ཡི་བཀའ་ལུང་གནང་བའི་སློབ་དཔོན་སོགས་སྨད་མི་རུང༔ མཆོད་སྒྲུབ་སོགས་ཅི་ནུས་བགྱིས་ན་རྟགས་མངོན་སུམ་འོང༔ རྗེ་བཙུན་མའི་གཏེར་གྱི་གཉེར་བྱང་ཡོད༔ ཤིན་ཏུ་ཟབ༔