ལྷ་ཆེན་སྒྲུབ་པ་སྣང་སྲིད་ཡིད་འགུགས།
ཡང་གསང་མཁའ་འགྲོའི་ཐུགས་ཐིག་ལས༔ ལྷ་ཆེན་སྒྲུབ་པ་སྣང་སྲིད་ཡིད་འགུགས་བཞུགས༔ བཅོམ་ལྡན་དབང་ལྷ་དམར་པོར་འདུད༔ ལྷ་ཆེན་དབང་ཕྱུག་སྒྲུབ་པའི་ཐབས༔ འདི་ལ་བརྩོན་པའི་རྣལ་འབྱོར་གྱིས༔ རི་བོ་ཟླ་གམ་ས་མདོག་དམར༔ མེ་ཏོག་དམར་པོ་སྐྱེས་པའི་སར༔ དབང་གི་བྱིན་རླབས་ཆགས་པའི་གནས༔ སྒྲུབ་རྟེན་མཆོད་པ་སྤྱི་ལྟར་བཤམས༔ འགྲོ་ཀུན་བདག་གིས་དབང་བྱས་ནས༔ སྒོ་གསུམ་དགེ་ལ་སྦྱོར་དམིགས་ཏེ༔ རང་ཉིད་ཀུ་རུ་ཀུལླེར་གསལ༔ ཐུགས་ཀའི་ཧྲཱིཿལས་འོད་དམར་པོ༔ ལྕགས་ཀྱུ་ལྟ་བུ་རབ་འཕྲོས་པས༔ ཚངས་གནས་ཏི་སེ་ལ་སོགས་ནས༔ དབང་ཕྱུག་འཁོར་བཅས་སྤྱན་དྲངས་གྱུར༔ དམིགས་ཏེ་སྤྱན་འདྲེན་སྤོས་རོལ་བྱ༔ གདུང་བའི་དབྱངས་བཅས་འདི་སྐད་དོ༔ ཧཱུྃ་ཧྲཱིཿཛཿ བྷྱོ༔ དབང་ཕྱུག་འཁོར་བཅས་གཤེགས་སུ་གསོལ༔ རང་མདུན་པད་ཉིའི་གདན་ལ་བཞུགས༔ ལུས་ངག་ཡིད་ཀྱིས་གུས་ཕྱག་འཚལ༔ ཕྱི་མཆོད་རི་རབ་གླིང་བཞི་དང༔ ནང་མཆོད་སྨན་རཀ་གཏོར་མ་དང༔ གསང་མཆོད་ཏན་གན་ལྟ་སྤྱོད་འབྲས༔ གསོལ་ལོ་མཆོད་དོ་བསྐང་གྱུར་ཅིག༔ འགལ་འཁྲུལ་ནོངས་པ་དབྱིངས་སུ་བཤགས༔ དམ་ལས་མ་འདའ་ས་མ་ཡཱ༔ ཧཱུྃ་ཧྲཱིཿ ལྷ་ཆེན་དབང་ཕྱུག་ཆེན་པོ་ནི༔ ཞལ་གཅིག་ཕྱག་གཉིས་སྤྱན་གསུམ་ལྡན༔ སྐུ་མདོག་རཱ་གའི་ལྷུན་པོ་བཞིན༔ ཆགས་པའི་ཉམས་རྒྱས་ལིང་ག་འགྲེང༔ མེ་ཏོག་ཆུན་འཕྱང་དར་དཔྱངས་སྤྲས༔ ཞབས་གཉིས་པད་ཟླ་ཉི་མའི་ཁར༔ བཞེངས་པའི་ཚུལ་གྱིས་འདོར་སྟབས་བསྒྲད༔ ལྕགས་ཀྱུ་ཞགས་པས་སྐྱེ་དགུ་དང༔ འཛམ་གླིང་ཀ་ཆ་དཀོར་ནོར་འགུག༔ དབང་གི་རྒྱལ་པོ་ཁྱོད་ལ་བསྟོད༔ གཡོན་བརྟེན་ཨུ་མ་ཆགས་པའི་ཉམས༔ མདོག་དམར་བྷ་ག་ལང་ཚོ་རྒྱས༔ ཨུཏྤལ་ལ་སོགས་རིན་ཆེན་རྒྱན༔ དར་དཔྱངས་ཅོད་པན་དུ་མས་སྤུད༔ ཞལ་གཅིག་ཕྱག་གཉིས་གཡས་པ་ཡི༔ ལྕགས་ཀྱུས་ཕོ་རྒྱུད་ཆེ་བཙན་འགུགས༔ གཡོན་པས་ཞགས་པ་ལས་ལ་མངགས༔ དཀའ་ཐུབ་གདུང་བ་བཟློག་ལ་བསྟོད༔ ཕྱོགས་བཞིར་པད་ཟླར་ཕྲ་མེན་སྡེ༔ འགུག་འཆིང་སྡོམ་མྱོས་ལྷ་མོ་བཞི༔ རང་རྟགས་ཕྱག་མཚན་ཆས་ཀྱིས་སྤྲས༔ གླིང་བཞིའི་ཕྱྭ་གཡང་དངོས་གྲུབ་ཀུན༔ མ་ལུས་སྩོལ་ལ་ཕྱག་འཚལ་བསྟོད༔ བྷ་ལིང་གཏོར་སོགས་མཆོད་པ་བཞེས༔ རྣལ་འབྱོར་འདོད་པའི་ལས་གཉེར་ནི༔ ཕོ་རྒྱུད་ཐམས་ཅད་ལས་ལ་མངག༔ མོ་རྒྱུད་ཐམས་ཅད་བྲན་དུ་ཁོལ༔ མཁོ་དགུའི་ལོངས་སྤྱོད་ཆར་དུ་ཕོབ༔ འགྲོ་ཀུན་བདག་གི་དབང་དུ་ཁུག༔ བྲེང་བྲེང་དུང་དུང་དབང་དུ་སྡུས༔ མཐུ་དང་རྩལ་གྱི་དཔུང་སྐྱེད་ཅིག༔ རྣལ་འབྱོར་འདོད་དོན་གང་ཡིན་པ༔ མ་ཚང་མེད་པ་ཡིད་བཞིན་སྒྲུབ༔ དུས་ལ་བབ་པོ་ས་མ་ཡཱ༔ དེ་ལྟར་ལྷ་ཆེན་གསོལ་མཆོད་འདི༔ ཚུལ་བཞིན་ཉམས་སུ་སུས་བླངས་ན༔ ཡིད་ཆེས་རྟགས་མཚན་འབྱུང་བར་འགྱུར༔ ཕ་རོལ་བན་བོན་བྱད་གཏད་དགྲོལ༔ བསྟན་དགྲ་གནོད་བྱེད་ཁ་ཕུང་བརླག༔ འདི་ཕྱིའི་ས་ལམ་བར་ཆད་སེལ༔ གང་དམིགས་སྣང་བ་དབང་དུ་འགྱུར༔ དུས་བབས་ཆོས་ཡིན་བྱིན་རླབས་མྱུར༔ ལས་ཅན་བུ་ལ་གཏད་དོ་རྒྱ༔ སྐལ་མེད་རྣམས་ལ་གསང་ངོ་རྒྱ༔ བཀའ་རྐུན་བྱུང་ན་དབང་པོ་སྣུབས༔ གསང་ཆེན་བཀའ་ཡི་བྱ་ར་མཛོད༔ ས་མ་ཡཱ༔ ཅེས་པ་འདི་ཡང་ལས་ལྡན་གྲོགས་པོས་བསྐུལ་ངོར༔ བྷུ་སུ་ཀུ་བ་ཕན་མིང་ནས་སུག་བྲིས་བགྱིས་པ་མངྒ་ལཾ༔