དྲི་ཟའི་རྒྱལ་པོ་ཟུར་ཕུད་ལྔ་པའི་གསོལ་བསྡུས་ཡིད་བཞིན་དབང་སྔོན།
ཡང་གསང་ཌཱཀྐིའི་ཐུགས་ཐིག་ལས༔ དྲི་ཟའི་རྒྱལ་པོ་ཟུར་ཕུད་ལྔ་པའི་གསོལ་བསྡུས་ཡིད་བཞིན་དབང་སྔོན་བི་ཛ་ཧ་རཾ༔ པདྨ་ཐོད་ཕྲེང་རྩལ་ལ་འདུད༔ དྲི་ཟའི་རྒྱལ་པོ་མཆོད་པའི་ཐབས༔ དཀྱིལ་འཁོར་བཀོད་ལེགས་རྩ་གསུམ་མདུན༔ མཆོད་གཏོར་བཱ་ལིང་ལུག་མགོས་མཚན༔ ཨུག་ཀྱུ་ཉེར་གཅིག་མཐའ་ལ་བསྐོར༔ མཆོད་རྫས་སྒྲུབ་རྫས་བསྐང་བའི་རྫས༔ རང་མཐུན་སྒྲུབ་གཞུང་དག་དང་བསྟུན༔ རྣལ་འབྱོར་ལྷ་ཡི་ང་རྒྱལ་གྱིས༔ བདེ་བའི་གདན་འདུག་འདི་སྐད་དོ༔ རང་ཉིད་ཡི་དམ་ལྷ་ཡི་ཐུགས་ཀ་ནས་འོད་ཟེར་ལྔ་ལྡན་སྤྲིན་གྱི་ལྕུག་མ་ལྟར་འཕྲོས་པས་ཡབ་ཞུར་གཉན་གྱི་རྗེའམ་སྐུ་ལྷ་དྲི་ཟའི་རྒྱལ་པོ་ཟུར་ཕུད་ལྔ་ལྡན་འཁོར་གསང་ཡུམ་བློན་པོ་སྐུ་གསུང་ཐུགས་ཞི་རྒྱས་དབང་དྲག་གི་ལྷ་ཚོགས་འཁོར་དང་བཅས་པ་བྱ་གཅན་ཐེད་ལ་རྔམས་པ་ལྟར་སྐད་ཅིག་གིས་རང་མདུན་དུ་བྱོན་པར་མཛོད༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་སརྦ་ས་མ་ཡཱ་ཛ་ཛ་ཕཻཾ་ཕཻཾ༔ མཆོད་རྫས་བྱིན་རླབས་དབྱངས་རོལ་བཅས༔ ཧཱུྃ་ཧཱུྃ༔ ཆོས་དབྱིངས་ངང་ལས་གཡོ་བ་མེད་མོད་ཀྱང༔ མི་སྲུན་རྒྱལ་འགོང་དམ་སྲི་བརླག་མཛད་པའི༔ བཛྲ་ཛྭ་ལ་དྲི་ཟའི་རྒྱལ་པོ་ཆེ༔ ལྷ་བརྒྱད་གངས་རིའི་ཕྲེང་བ་འཁྲིགས་པའི་ལྗོངས༔ ཤེལ་མཁར་དགུ་ཐོག་རིན་ཆེན་སྒོ་ལྕགས་འབར༔ ཕོ་བྲང་དབུས་ན་གཟི་བརྗིད་གཏུམ་རྔམ་ལྡན༔ ལྷ་ཡི་ལྷ་མཆོག་ས་བརྒྱད་གནས་པའི་སྐུ༔ མདོག་དཀར་སྦ་ལྕགས་ཤེལ་ཕྲེང་ཕྱག་ན་བསྣམས༔ ཞལ་ནི་ཁྲོ་འཛུམ་ཆགས་པའི་ཉམས་འགྱུར་ངོམ༔ དབུ་ལ་གསེར་ཞྭ་རྡོ་རྗེ་ཕྱེད་པས་བརྒྱན༔ དར་དཀར་ན་བཟའ་གསོལ་ཞིང་ལྷ་རྟ་ནི༔ ངང་དཀར་མཛེས་པ་རིན་ཆེན་ཆས་ལྡན་བཅིབས༔ དགེ་བསྙེན་ཉེར་གཅིག་ལྷ་ཀླུ་གཉན་དམག་བསྐོར༔ རྣལ་འབྱོར་རེ་སྐོང་དགྱེས་པའི་གདན་ལ་བཞུགས༔ ཕྱི་ནང་མཆོད་ཚོགས་སྨན་གཏོར་རཀྟ་བཅས༔ གསེར་འཛིན་དགའ་མའི་ཁྱོན་རྣམས་བཀང་སྟེ་འབུལ༔ མཆོད་རྫས་བསྐང་རྫས་སྒྲུབ་རྫས་བརྟེན་པའི་རྫས༔ དངོས་འབྱོར་ཡིད་ལས་སྤྲུལ་ཏེ་དྲེགས་ཚོགས་བརྔན༔ སྤྲུལ་པ་དུང་གཡག་ལྕགས་ཀྱི་སྡིག་པར་སྤྲུལ༔ བདུད་རིགས་དགེ་སློང་ཆས་སུ་འོང་བ་རྣམས༔ མི་མངོན་སྟོང་པའི་དབྱིངས་སུ་རྒྱས་ཐོབ་ཅིག༔ ལྷ་ཡི་ལྷ་མཆོག་དབུ་འཕང་དགུང་ལ་བསྟོད༔ མ་རུང་གདུག་འདྲེ་འབྱུང་པོའི་འཚེ་བའི་དགྲ༔ མཐུ་སྟོབས་གཟི་བརྗིད་ཁྲོས་པའི་ཟིལ་གྱིས་གནོན༔ དང་པོ་བྱང་ལམ་བར་མ་དང༔ བར་དུ་བསམ་ཡས་ཧས་པོ་རི༔ ཐ་མ་རི་བོ་བཀྲ་བཟང་གི༔ གནས་སུ་ཕྱག་རྡོར་པདྨ་འབྱུང༔ རིག་འཛིན་དམ་པས་བཀའ་བསྒོས་བཞིན༔ ཐ་ཚིག་དགོངས་ལ་གཉེར་བྱང་ལོངས༔ གཙང་ལུག་བཤོས་སྐྱེམས་འདི་གསོལ་ལ༔ བཅོལ་པའི་ལས་ལ་ཐོགས་མེད་མཛོད༔ དེ་ནས་ཕུད་རྒོད་དམར་གཏོར་བཤམས༔ རྔམ་པའི་སྟབས་ཀྱིས་ལས་ལ་བསྐུལ༔ ཧཱུྃ་བྷྱོ་ཛ༔ རྒྱལ་བའི་བསྟན་སྲུང་དཔའ་བོ་དྲེགས་པའི་གཙོ༔ ཕྱི་ལྟར་དྲི་ཟའི་རྒྱལ་པོ་ཟུར་ཕུད་ལྔ༔ ནང་ལྟར་གནོད་སྦྱིན་རྡོ་རྗེ་འབར་བ་རྩལ༔ གསང་བ་ལྷ་མཆོག་སྟོབས་ལྡན་ནག་པོ་ཆེ༔ ཐུགས་ཉིད་ཞི་བའི་ངང་ལས་མ་གཡོས་ཀྱང༔ བསྟན་དགྲ་དམ་ཉམས་འདུལ་ཕྱིར་སྐུར་བཞེངས་ཤིག༔ བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ༔ མཛོད་ཅིག་མཛོད་ཅིག་དྲག་པོའི་ཕྲིན་ལས་མཛོད༔ ཤ་ཁྲག་དམར་གྱི་གཏོར་མ་འདི་བཞེས་ལ༔ དཔལ་ལྡན་བླ་མའི་སྐུ་དགྲ་དང༔ སངས་རྒྱས་བསྟན་པ་བཤིགས་པ་དང༔ གསང་ཆེན་ཆོས་ལ་དམོད་པ་དང༔ དགེ་འདུན་སྡེ་ལ་བརྙས་པ་ཡིས༔ ཉམས་པ་བདུན་གྱི་དགྲ་བོ་འདི༔ མངོན་པར་མ་ཤོར་མྱུར་དུ་སོད༔ ཚེ་འདིའི་བསོད་ནམས་དབང་མ་བཏང༔ ཁུག་ཅིག་སྒྲོལ་ཅིག་ས་མ་ཡཱ༔ བྱད་མ་རྦོད་གཏོང་དུས་མཐའ་སྟུངས༔ དམ་ཉམས་དགྲ་བོ་ལས་ངན་འདི༔ ལྷ་སྲིན་སྡེ་བརྒྱད་དཔའ་ཟས་ཀྱིས༔ མེ་འབར་མཚོན་འཁྲུགས་ཆར་རྒྱུན་ཕོབ༔ ནད་དང་དུག་གིས་འགུམ་པར་མཛོད༔ དོན་སྙིང་ལྐོག་མའི་ལམ་དུ་དྲོངས༔ ཀླད་ཁྲག་ཁོང་ཁྲག་འཇིབ་པར་མཛོད༔ ཏིལ་འབྲུ་ཙམ་ཡང་མེད་པར་གྱིས༔ ལྷག་མ་རྗེས་ཤུལ་རླུང་ལ་སྐུར༔ མ་གཡེལ་མ་འགྱང་ལས་བཅོལ་སྒྲུབ༔ འདོད་དོན་ཕྲིན་ལས་མ་བསྒྲུབས་ན༔ ཁྱོད་ཀྱང་དམ་ཚིག་ཉམས་པར་འགྱུར༔ རྣལ་འབྱོར་ཡིད་ཀྱང་མི་ཆད་དམ༔ རྒྱུ་འབྲས་བདེན་པ་བསླུ་མེད་ན༔ ཁྱོད་ཀྱི་ནུས་མཐུས་ཅི་ཞིག་བྱ༔ ལོ་ཟླར་མ་བཞག་མྱུར་དུ་སོད༔ མཱ་ར་ཡ་ཡི་ལས་མཛོད་ཅིག༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་ཨ་མྲྀ་ཏ་གནོད་བྱེད་དགྲ་བགེགས་ཆེ་གེ་མོའི་མིང་རུས་གཟུགས་གསུམ་མཐའ་རྩ་སྐྱེ་རྒྱུད་ཁ་རྗེ་དབང་ཐང་དང་བཅས་པ་དྲི་ཟའི་རྒྱལ་པོའི་ཞལ་དུ་དམར་གྱི་གཏོར་མ་དང་མཉམ་དུ་བཞེས་ཤིག་རོལ་ཅིག་ཁ་རཾ་ཁཱ་ཧི༔ ཞེས་བསྐུལ་དགྲ་ཕྱོགས་གཏོར་མ་འཕང༔ བསྟན་དགྲ་འཇོམས་པར་ཐེ་ཚོམ་མེད༔ དམ་མེད་ཡོངས་ལ་གསང་ཞིང་རྒྱ༔ དམ་ལྡན་བུ་ལ་གཏད་པ་ཡིན༔ བཀའ་ཡི་སྲུང་མས་བྱ་ར་མཛོད༔ ས་མ་ཡཱ༔ སྐུ་གསུང་ཐུགས་ཀྱི་རྒྱ་ཡོད་དོ༔