དྲི་ཟའི་རྒྱལ་པོ་ཟུར་ཕུད་ལྔ་པའི་འཛབ་ལས་བཞི་ལྷུན་གྲུབ།

ཡང་གསང་ཌཱཀྐིའི་ཐུགས་ཐིག་ལས༔ ཐུགས་ཆེན་བཀའ་སྲུང་དྲི་ཟའི་རྒྱལ་པོ་ཟུར་ཕུད་ལྔ་པའི་འཛབ་ལས་བཞི་ལྷུན་གྲུབ་ནི༔ རྩ་གསུམ་བསྙེན་སྒྲུབ་གནད་དུ་ཐང༔ དེ་ནས་སྲུང་མའི་གསོལ་མཆོད་དང༔ དམིགས་པའི་ཁ་བསྒྱུར་ལྡེ་ཁ་ནི༔ རང་ཉིད་པད་འབྱུང་ཞི་བའི་སྐུ༔ མདོག་དཀར་ཤེལ་གྱི་འོད་ཟེར་འབར༔ ཐུགས་ཀའི་ཟླ་གདན་འཁོར་ལོའི་སྟེང༔ ས་བོན་ཧཱུྃ་ཡིག་དཀར་པོ་ལས༔ འོད་འཕྲོས་དྲི་ཟའི་རྒྱལ་པོར་ཕོག༔ དེ་ལས་འོད་དཀར་ཟླ་ཞུན་ལྟར༔ བདག་དང་བསྲུང་བྱ་འགྲོ་ཀུན་ལ༔ ཕོག་པས་ལས་ཉོན་སྡིག་སྒྲིབ་དང༔ མི་ནད་ཕྱུགས་ནད་ཡོད་དོ་ཅོག༔ འོད་ཟེར་དེ་ཡིས་སྦྱངས་བར་བསམ༔ ཡི་དམ་སྔགས་ཀྱི་ཤམ་བུ་རུ༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་ཨ་མྲྀ་ཏ་སརྦ་ཛྭ་ར་དུ་ཥ་ཤནྟིཾ་ཀུ་རུ་སྭཱ་ཧཱ༔ དེས་ནི་ནད་གདོན་སྡུག་བསྔལ་དང༔ འཇིགས་བརྒྱད་དུས་མིན་འཆི་བའི་གདོན༔ མི་ཕྱུགས་གང་གི་ནད་ལ་ཡང༔ དྲན་ཆོག་ཐང་ཆོག་ཟབ་མོ་ཡིན༔ ཉིན་གཅིག་པ་དང་རྟག་པའི་རིམས༔ གང་ལ་འདི་ལས་ཟབ་པ་མེད༔ དེ་ནས་རྒྱས་པའི་བསྙེན་དམིགས་ནི༔ རང་ཉིད་པད་འབྱུང་རྒྱས་པའི་ལྷ༔ གསེར་མདོག་བཙོ་མའི་འོད་ཟེར་འབར༔ ཐུགས་ཀར་ཉི་གདན་འཁོར་ལོའི་སྟེང༔ ས་བོན་ཧཱུྃ་སེར་ལས་འཕྲོས་འོད༔ མདུན་གྱི་དྲི་ཟའི་རྒྱལ་པོར་ཕོག༔ དེ་ལས་འོད་ཟེར་སེར་པོ་འཕྲོས༔ ཕྱོགས་བཅུའི་ནོར་ལྷ་སྡེ་བརྒྱད་བསྐུལ༔ ཀུན་ཀྱང་ནོར་ལྷ་ཡབ་ཡུམ་དུ༔ སྤྲུལ་ནས་ཟས་གོས་ཡོ་བྱད་ནོར༔ རྒྱ་མཚོ་ཆར་གྱིས་བསྐྱེད་པ་ལྟར༔ བདག་གི་གནས་ཁང་བང་མཛོད་དང༔ ར་བ་ཕྱུགས་ལྷས་སྟོང་པ་ཀུན༔ མེར་མེར་ཕྱུར་ཕྱུར་གང་བར་བསམ༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་ཨ་མྲྀ་ཏ་ཨ་ཡུ་བ་སུ་རཏྣ་ན་ན་ཁ་དྷེ་ཝསྟྲ་སརྦ་པུཥྚཾ་ཀུ་རུ་སིདྡྷི་ཕ་ལ་ཧཱུྃ༔ དེས་ནི་འཇིག་རྟེན་བཟའ་བཏུང་ནོར༔ གོས་རྒྱན་རིན་ཆེན་ཚེ་བསོད་བུ༔ མི་ཟད་འཕེལ་བར་གདོན་མི་ཟ༔ དཔེར་ན་དཔག་བསམ་ཤིང་དང་མཚུངས༔ འདི་ལྡན་ལོངས་སྤྱོད་ཕོངས་པ་མེད༔ ཁྱད་པར་གནད་ཀྱི་མན་ངག་བཅུའི༔ ནང་ནས་ཆར་འབེབས་སྤྲིན་སྡུད་ཀྱི༔ དམིགས་པའི་ལྡེ་ཁ་ཟབ་མོ་ནི༔ རང་ཉིད་པདྨའི་སྐུར་གསལ་བའི༔ མདུན་དུ་ངོ་བོ་བླ་མ་ལ༔ རྣམ་པ་དྲི་ཟའི་རྒྱལ་པོར་སྤྲུལ༔ ཞལ་གཅིག་ཕྱག་གཉིས་སྐུ་མདོག་སྔོ༔ ཕྱག་གཡས་སྤྲིན་གྱི་བ་དན་དང༔ ཕྱག་གཡོན་ཆུ་ཡི་རྐྱལ་བ་བསྣམས༔ ཆིབས་སུ་སྤྲིན་གྱི་ཤུགས་ལྡན་བཅིབས༔ སྐུ་ལ་ཆུ་འཛིན་ན་བཟའ་བཀླུབས༔ དབུ་ལ་འཇའ་ཚོན་ལ་ཐོད་མཛེས༔ རྒྱ་མཚོ་རྦ་ཀླུང་འཁྲུགས་དཀྱིལ་དུ༔ ཀླུ་ཆེན་བརྒྱད་ཀྱིས་བསྐོར་བར་བསྒོམ༔ སྟེང་གི་ནམ་མཁར་རིགས་གསུམ་མགོན༔ སེམས་དཔའ་སེམས་མའི་ཚོགས་དང་བཅས༔ བར་དུ་ཡི་དམ་རྒྱུད་སྡེའི་ཚོགས༔ ཆུ་འཛིན་དྲ་བའི་ཀློང་ན་གསལ༔ མཐའ་བསྐོར་ལྷ་ཀླུ་གཞི་བདག་དང༔ མི་མིན་ཁྲོམ་ཚོགས་ལྟ་བུར་གསལ༔ བདག་གི་ཐུགས་ཀའི་ས་བོན་ལས༔ འོད་ཟེར་སྤྲིན་གྱི་ལྕུག་མ་ལྟར༔ མདུན་བསྐྱེད་ལྷ་ཡི་ཐུགས་རྒྱུད་བསྐུལ༔ བཀའ་བསྒོའི་ཚུལ་དུ་ཉན་པར་བསམ༔ རྩ་བའི་སྔགས་ཀྱི་ཤམ་བུ་རུ༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་ཨ་མྲྀ་ཏ་ནཱ་ག་ར་ཛཱ་ཕུ་ཕེཾ་ཕུ་དྲིག་མ་ཧཱ་ནཱ་ཡཱ་སྤྲིན་བསྡུས་ཆར་ཕོབ་ནཱ་ག་ཕུ་སྭཱ་ཧཱ༔ ཞེས་ཆར་བྱུང་སྔགས་འདི་སྟོང་ཕྲག་བཟླ༔ མདུན་བསྐྱེད་སྐུ་དང་ཕྱག་མཚན་ལས༔ ཆར་གྱི་རྒྱུན་ནི་དམིགས་པའི་ཡུལ༔ ཀུན་གྱི་རྩི་སྨན་ལོ་ཏོག་སོགས༔ གསོ་བའི་རྒྱུན་ཆེན་འབེབས་པར་བསམ༔ རྒྱབ་ཆོས་ཁ་ཚར་རིམ་པ་ནི༔ རིགས་གསུམ་བསྙེན་པ་སྐབས་བསྟུན་བཟླ༔ སིདྡྷི་ཏཱ་རེ་ཅི་མང་སྒྲོགས༔ མཆོག་གསུམ་རྒྱལ་བ་སྲས་བཅས་ཀུན༔ ཆར་གྱི་མངའ་བདག་ཆེན་པོར་བསྒོམས༔ ནམ་མཁའ་སྤྲིན་གྱི་ཕུང་པོར་འཁྲིགས༔ བར་སྣང་ཆར་གྱིས་ཁ་ལུད་ནས༔ ས་གཞི་རླངས་པ་ཐུལ་གྱིས་འཐིབ༔ གནོད་བྱེད་རྒྱལ་འགོང་བན་བོན་གྱིས༔ མངག་པའི་རླུང་ནི་ཡི་གེ་ཡཾ༔ ལྗང་ཁུ་གཞུ་ཡི་དབྱིབས་ཅན་དུ༔ བདག་མདུན་ཞབས་ཀྱི་འོག་ཏུ་མནན༔ གནོད་བྱེད་རླུང་རྣམས་དེར་འདུས་བསམ༔ ཡཾ་ཨོཾ་ནན༔ ཡཾ་ཨཱཿནན༔ ཡཾ་ཧཱུྃ་ནན༔ ཡཾ་སྟྭཾ་བྷ་ཡ་ནན༔ ཡཾ་མཱ་ར་ཡ་ནན༔ ཞེས་དང་གཞན་ལས་བྱུང་བའི་རླུང་ནོན་སྔགས༔ འདི་དང་སྦྲགས་ཏེ་ནན་དུ་བཟླ༔ གནོད་པའི་རླུང་ནོན་ཆར་རྒྱུན་འབེབས༔ རྒྱས་པའི་གབ་ཐིག་ལས་བྱུང་ དབང་གི་ལས་ཚོགས་རིམ་པ་ནི༔ སྤྲོ་ན་ཕོ་རྒྱུད་མོ་རྒྱུད་དང༔ ཡུལ་ཁམས་སྡུད་པ་མང་མཆིས་ཀྱང༔ བསྡུ་ན་དམིགས་པའི་འཕྲོ་འདུ་ནི༔ རང་ཉིད་པད་འབྱུང་དབང་གི་སྐུ༔ དམར་ནག་སྒེག་བཞད་ཆགས་པའི་ཉམས༔ ཐུགས་ཀར་ཉི་ཟླའི་ག་འུའི་དབུས༔ ཐུགས་སྲོག་ཧཱུྃ་ཡིག་བྱུ་རུའི་མདོག༔ དེ་ལས་འོད་དམར་ལྕགས་ཀྱུའི་དབྱིབས༔ འཕྲོས་པས་དྲེགས་ཚོགས་སྙིང་ལ་ཕོག༔ རང་དབང་མེད་པར་ལས་ལ་འགྱེད༔ ཁྱད་པར་མདུན་བསྐྱེད་དྲི་ཟའི་རྒྱལ༔ དམར་ནག་ཁྲོ་འཛུམ་ཆགས་པའི་ཞལ༔ དབུ་ལ་རཏྣའི་ཅོད་པཎ་མཛེས༔ ཕྱག་གཡས་དབང་སྡུད་ལྕགས་ཀྱུ་ཕྱར༔ གཡོན་པས་འགུག་པའི་ཞགས་པ་དང༔ རིན་ཆེན་གཏེར་གྱི་སྒྲོམ་བུ་བསྣམས༔ སྐུ་ལ་དར་དམར་རལ་ཀ་གསོལ༔ རཏྣའི་དོ་ཤལ་གསེར་གཡུའི་རྒྱན༔ ཞབས་གཉིས་རྒྱལ་པོ་རོལ་བའི་སྟབས༔ པད་ཉི་ཟླ་བའི་གདན་ལ་བཞུགས༔ ཐུགས་སྲོག་པད་དམར་ཟེའུ་འབྲུའི་སྟེང༔ ཏྲི་ཡིག་ར་གའི་མདངས་ཅན་གྱི༔ མཐའ་མར༔ ཨོཾ་བཛྲ་ཐང་ཀ་ར་མུ་ཉིད་ཁུ་ཤ་ལི་ཨ་མྲྀ་ཏ་ཨ་ཡ་མ་དུ་རུ་ཙ་ཤ་ན་སརྦ་ལོ་ཀ་བན་བོན་སྔགས་པ་རྒྱལ་པོ་བློན་པོ་བཙུན་མོ་སྐྱེས་པ་བུད་མེད་རྟ་དྲེལ་གནག་ཕྱུགས་ཀ་ཆ་དཀོར་ནོར་ལ་སོགས་བདག་གི་ཡིད་ལ་གང་འདོད་པ་ཐམས་ཅད་པ་ཤཾ་ཀུ་རུ་ཁུག་ཁུག་ཛ་ཛ༔ དུང་དུང་སློང་སློང་སིདྡྷི་ཕ་ལ་སྐྱོལ༔ ཞེས་པས་མཐའ་ལ་བསྐོར༔ བདག་གི་འོད་ཀྱིས་ཐུགས་རྒྱུད་བསྐུལ༔ ཐུགས་སྲོག་སྔགས་ལས་འོད་དམར་ནི༔ ལྕགས་ཀྱུའི་དབྱིབས་ཅན་ཕྱོགས་བཅུར་འཕྲོས༔ གང་དམིགས་མི་དང་མི་མིན་ཚོགས༔ མོས་ཚོགས་བཞི་ཡིས་སྣང་བ་བསྒྱུར༔ རང་དབང་མེད་པར་ཆམ་ལ་ཕབ༔ བློ་སེམས་བརྟན་པ་དང་བྲལ་ནས༔ བྲན་བཀོལ་ཅི་བསྒོའི་ལས་བསྒྲུབ་བསམ༔ གོང་གནོན་རྩ་བའི་སྔགས་ཤམ་དུ༔ དབང་སྡུད་བསྙེན་པ་འདི་བཞིན་བཟླ༔ ཁྲི་ཕྲག་བཟླས་པས་རྟགས་འབྱུང་ངེས༔ དམིགས་འོག་བཅུག་པའི་སྐྱེ་འགྲོ་ཀུན༔ དབང་དུ་འདུ་བར་ཐེ་ཚོམ་མེད༔ དེ་ནས་དྲག་པོའི་ལས་ཚོགས་ལ༔ བསད་བསྐྲད་དབྱེ་མནན་བསྲེག་འཕང་སོགས༔ མང་དུ་མཆིས་ཀྱང་བསྡུས་པ་ནི༔ མདུན་དུ་མེ་ཐབ་གྲུ་གསུམ་པར༔ མེ་དཔུང་དམར་ནག་འབར་བའི་ཀློང༔ དྲི་ཟའི་རྒྱལ་པོ་ཟུར་ཕུད་ལྔའི༔ སྐུ་ནི་རྔམས་ཤིང་ཁྲོས་པའི་ཚུལ༔ ཕྱག་གཡས་གསོད་པའི་རལ་གྲི་འཕྱར༔ གཡོན་པས་དམ་ཉམས་མགོ་ཕྲེང་འདྲེན༔ སྐུ་ལ་གོས་དཀར་ལྷ་མོས་འཁྱུད༔ དབུ་སྐྲ་མེ་འབར་སྟེང་གདོན་གཟའ་སྐར་བསྲེག༔ སྐུ་ལས་མེ་འཕྲོས་གཉན་དང་མི་མིན་བསྲེག༔ ཞབས་གཉིས་བདུད་རྟ་ཁམ་པའི་སྟེང་ན་འགྱིང༔ མེ་སྟག་ཚ་ཚྭས་ཀླུ་གདོན་ས་བདག་བསྲེག༔ ཞལ་གདངས་བསྐལ་པའི་མེ་དཔུང་འབར་བའི་ནང༔ བདག་ཅག་རྣལ་འབྱོར་ལ་སྡང་དམ་ཉམས་དགྲ༔ མིང་དང་གཟུགས་སུ་བྲིས་པའི་ཉམས་པ་ཅན༔ གཏོར་མ་འདི་དང་མཉམ་དུ་ཁ་རྗེ་དང༔ ཚེ་བསོད་སྟོབས་འབྱོར་ཞལ་ཧོམ་མེ་ལ་སྦྱངས༔ ལྷག་མ་མེད་པར་ཆེམ་ཆེམ་གསོལ་བར་བསམ༔ གོང་གནོན་སྔགས་ཀྱི་ཤམ་བུ་རུ༔ ལས་སྔགས་འདི་བཏགས་ཁྲི་འབུམ་བཟླ༔ ཨོཾ་བཛྲ་འབར་བ་རྩལ་བིགྷྣན་ར་ཛ་དམ་ཉམས་ཆྒཻ་མོ་ཚེ་བླ་སྲོག་གསུམ་ཁ་རྗེ་དབང་ཐང་སརྦ་ཛྭ་ལ་རཾ་ཁཱ་ཧཱི༔ མཱ་ར་ཡ་ཕཊ༔ དེ་འདྲའི་སྦྱོར་བ་ཚད་ལྡན་ན༔ ཚངས་པའི་ཚེ་དང་ལྡན་པའི་མི༔ ཟླ་གཅིག་མི་འགྱང་ཁ་ཕོང་བརླག༔ རྣལ་འབྱོར་དགྲ་སྒྲོལ་མཚོན་ཆ་ཟབ༔ སུ་ལ་མ་བསྟན་ཕག་ཏུ་སྦོས༔ འཆལ་ན་རང་ཉིད་སྲོག་ལ་འོང༔ བབ་ཅོལ་ཐོ་ཅོ་མི་བྱ་བར༔ བསྟན་པའི་དགྲ་ལ་ཐང་བར་མཛོད༔ རྗེས་ལ་བསྐུལ་བ་ཅི་མང་གདོན༔ དམར་གཏོར་དགྲ་བོའི་སྟེང་དུ་འཕངས༔ དགྲ་ཁམས་བརླག་པའི་དམིགས་འདུན་བསྒྱུར༔ རྗེས་སུ་འཁོར་གསུམ་མི་རྟོག་གཤིས༔ རང་བྱུང་ཡེ་ཤེས་ལྷ་ཞལ་མཇལ༔ དགེ་འདིས་བསྟན་དགྲ་ལས་ངན་ཀུན༔ སྡུག་བསྔལ་འཁོར་མཚོ་ལས་བསྒྲལ་ཏེ༔ གཉིས་མེད་ཆོས་སྐུའི་རྒྱལ་ས་ལ༔ འགོད་ནས་འགྲོ་ལ་ཕན་པར་ཤོག༔ ཅེས་ལས་བཞི་ལྷུན་གྲུབ་བསྙེན་དམིགས་འདི༔ རང་བྱུང་དགོངས་པའི་ཀློང་ནས་བཏོན༔ རིག་རྩལ་ཌཱཀྐིའི་བརྡ་ལས་མངོན༔ ཐུགས་ཆེན་བཀའ་སྲུང་ཆ་ལག་འདི༔ པད་འབྱུང་ཐུགས་ཐིག་ཟབ་མོའི་ཆོས༔ ལས་འཕྲོ་སད་པའི་གང་ཟག་གིས༔ རིགས་ལྡན་སྐལ་བ་ལྡན་ལ་གཏོད༔ ས་མ་ཡཱ༔ སྐུ་གསུང་ཐུགས་ཀྱི་རྒྱ་ཡོད་དོ༔ བི་ཛ་ཡནྟུ༔ སློབ་དཔོན་བློ་གྲོས་རབ་ཡངས་པ༔ ཀརྨ་ཛྙཱ་ནའི་མཚན་འཆང་ལ༔ ཟོག་པོ་ས་ར་ཧི་ཏས་ཕུལ༔ བསྟན་པ་སྲུང་བའི་མཚོན་ཆར་ཤོག༔