དགྲ་ལ་ཆོ་འཕྲུལ་སྟོན་པའི་མན་ངག་སྣང་སྲིད་མིག་འཕྲུལ།
དག་སྣང་ཟུར་འགེབ་མི་ཟད་རྒྱན་འཁོར་ལས༔ གཉན་ཆེན་ཐང་ལྷའི་སྒོ་ནས་དགྲ་ལ་ཆོ་འཕྲུལ་སྟོན་པའི་མན་ངག་སྣང་སྲིད་མིག་འཕྲུལ་ནི༔ ཐང་ལྷའི་བསྙེན་སྒྲུབ་ཐེམས་པའི་གང་ཟག་གིས༔ ལྷ་ལུག་དབང་པོ་མ་ཉམས་གསོབ་དེའི་མགོ་བོའི་སྒོ་ལྔ་མ་ཉམས་པ་གཅིག་གི་ཀླད་ཁུང་དུ་དགྲ་བོའི་མིང་རུས་བྲིས་པའི་ལིངྒ་སྤྱི་ལྟར་འདོད་གསོལ་ཤེས་ལྡན་བཅུག་ཅིང་དེ་ལ་ཟག་རྫས་གཅན་གཟན་དུ་མའི་སྤུ༔ བྱ་རིགས་མང་པོའི་སྒྲོ་ཕྲན༔ སྦལ་སྦྲུལ་སྡོམ་སྡིག་མང་པོའི་ཤ་ཁྲག་བླུག་ཅིང་སྐྱེར་ཕུར་སོར་བཞི་གཅིག་གིས་ཁ་ཐུར་སྤྲད༔ ཐོད་པའི་སྟེང་འོག་ཏུ་བྱ་འུག་གི་སྒྲོ་བཅིང༔ ཕྱོགས་ཀུན་རྩང་གིས་རྒྱ་གྲམ་ཏུ་སྤྲས༔ སྒྲུབ་རྟེན་གཏོར་མའི་འོག་ཏུ་ལྕགས་སམ་གྲུ་གསུམ་སྣོད་དུ་བཞག་ལ་འགུག་གཞུག་རྟགས་ཐོན་བྱ༔ སྲུང་མའི་གསོལ་ཁ་ཅི་ནུས་སུ་འདོན་ལ་དགྲ་བོ་ལ་ཐན་ལྟས་འགྱེད་པའི་ཕྲིན་ལས་བཅོལ་ཞིང་ཐང་ལྷའི་རྩ་བསྙེན་མཇུག་ཏུ་དགྲ་བོ་ཆེ་གེ་མོའི་ཡུལ་དུ་བྱ་རོག་འུག་པ་ཁ་འཐབ༔ གཅན་གཟན་ངུ་རྒྱུག༔ ཀུ་ཀུ་སྟོང་འཚོགས༔ དུད་འགྲོའི་མི་སྐད༔ ཕོ་མོ་སྨྱོ་འབོག༔ བྱིས་སྦ་ལྐུག་རེངས༔ གདུང་མ་སྐེད་འཆད༔ ཀ་བ་བསིགས་འདར༔ ཆོན་ཐག་རྒྱུག་བྲེང༔ ཡུལ་མིའི་འཁོན་འཆང༔ སྦལ་སྦྲུལ་ཁྱིམ་འགེངས༔ བཟའ་ཚང་བྱེ་བྲལ༔ ཕ་རྒྱུད་གྲི་འཐབ༔ མ་རྒྱུད་གཞོང་ཕྲུད༔ རོལ་མོ་རང་སྐད༔ ལྷ་འདྲེ་མེ་གཏོང༔ གདུག་པའི་སྒྲ་སྐད་སོགས་ཆོ་འཕྲུལ་སྣ་ཚོགས་དགྲ་བོའི་ཡུལ་ཁྱིམ་ཁོངས་ཤིག་འགུལ་འགུལ་ཤིག་ཤིག་རྒྱུག་རྒྱུག་ང་ཡི་ཀ་ཆ་ཁྱེར་ལ་ཤོག་སོགས་དགོས་གལ་བརྗོད༔ མཐར་རྟགས་མཚན་འབྱུང་བར་གསེར་སྐྱེམས་གཟུ་དཔང་བསྐུལ་བ་འདོན་ཅིང༔ མགོ་བོ་དགྲ་ཡུལ་དུ་འཕེན༔ ཡིད་ལ་དམིགས་པ་ལྟར་དམོད་བཅོལ་འདེབས༔ རྟགས་མཚན་འབྱུང་བར་གདོན་མི་ཟ༔ ས་མ་ཡཱ༔ ཞེས་པ་འདི་ཆོས་ལ་མོས་པའི་བུ༔ བསོད་ནམས་མཐུ་སྟོབས་ཀྱིས་བསྐུལ་ངོར་སྔགས་འཆང་རིག་པ་འཛིན་པའི་རྒྱལ༔ ས་ར་ཧི་ཏ་ཞེས་བྱས་བྲིས༔ བསྟན་དགྲ་སྒྲོལ་བའི་མཐུ་ཐོབ་ཤོག༔ མངྒ་ལམ༔