ཡུལ་ལྷ་བསྟན་འཛིན་རི་རྒྱལ་ཟིལ་ཁྲོམ་འཕན་ཕྱུག་གི་བསང་མཆོད།
ཡུལ་ལྷ་བསྟན་འཛིན་རི་རྒྱལ་ཟིལ་ཁྲོམ་འཕན་ཕྱུག་ལ་བསང་བྱ་བར་འདོད་པས་བསང་ཁྲི་གྲུ་བཞི་ཁྲུ་གང་ལས་མི་དམན་པར་དབུས་སུ་པདྨ་འདབ་བརྒྱད་ཀྱི་དཀྱིལ་དུ་རཾ་ཡིག་གིས་མཚན་པའི་སྟེང་དུ་ཤིང་རྩི་སྣ་དགུ༔ ཕྱེ་མར༔ ཤེལ་ཚིགས༔ དཀར་མངར༔ གཟུགས་འགྲོས་སྣ་ཚོགས་ཞུགས་ལ་སྦྱར་ཏེ༔ རྣལ་འབྱོར་ཡི་དམ་ལྷའི་ཏིང་འཛིན་གྱིས་བྱིན་གྱིས་བརླབ་ལ་འདི་སྐད་དོ༔ ཨེ་མ་ཧོ༔ རྗེ་འཕགས་པ་རིགས་གསུམ་གྱི༔ ཐུགས་དགོངས་པས་བྱིན་བརླབས་པའི༔ ཡུལ་གང་གའི་མིང་ཆགས་པའི༔ གནས་ས་སྤྱོད་ཏཱ་རེ་ཡི༔ ལྷོའི་བང་མཛོད་གཏེར་གྱི་བདག༔ རི་རྩེ་རྒྱལ་འཕན་ཕྱུག་ལགས༔ སྐུ་སེར་པོ་གཟི་བརྗིད་འབར༔ ཞལ་འཛུམ་མདངས་བཞད་སྒྲ་སྒྲོག༔ གཡས་ལྕགས་ཀྱུས་སྐྱེ་འགྲོ་འགུགས༔ གཡོན་ཞགས་པས་ཟས་ནོར་སྡུད༔ ཞབས་གཉིས་པོ་བརྐྱང་བསྐུམ་གྱིས༔ གསེར་ལ་སོགས་རིན་པོ་ཆེའི༔ ཁྲི་སྟག་གཟིག་ལྤགས་པས་བཀླུབས༔ འདོད་རྒུས་བཀང་བུམ་ཁར་བཞུགས༔ སྐུ་ཟ་འོག་གསེར་ཁྲབ་དང༔ རྒྱན་རིན་ཆེན་མཛེས་པས་སྤྲས༔ དབུ་དར་གྱི་ལ་ཐོད་སྟེང༔ དབང་སྔོན་པོའི་ཏོག་གིས་མཛེས༔ མདུན་གཡས་ཕྱོགས་འབོལ་སྟེང་དུ༔ སྲས་གཡུ་རྒྱལ་འོད་ལྡན་རྩལ༔ ཕྱག་གཉིས་ཀྱིས་མདའ་དར་དང༔ འདོད་འཇོ་བའི་གཏེར་བུམ་བསྣམས༔ སྣ་ཚོགས་པའི་དར་སྣས་བརྒྱན༔ ཞབས་གཉིས་པོ་བཞེངས་སྟབས་ངང༔ བཀའ་རྟགས་ཀྱི་ཐ་ཚིག་འཆང༔ གཡོན་ཕྱོགས་ཀྱི་མཉྫུའི་ཁར༔ སྲས་མོ་བཙུན་ཀུ་ནེ་ཞེས༔ སྐུའི་སྟོད་ལ་ལྷ་གོས་གསོལ༔ སྨད་སྦྲུལ་གྱི་འཁྱིལ་འགྲོས་མཛད༔ ཕྱག་ཐལ་མོ་སྦྱར་བའི་བར༔ ནཱ་ག་ཡི་མ་ཎི་ངོམ༔ མདུན་རཏྣའི་སྟེགས་ཀྱི་ཁར༔ ཡུམ་གནོད་སྦྱིན་ནོར་འཆང་མ༔ སྐུ་ལ་ནི་འོད་སྟོང་འབར༔ གཡས་གསེར་སྐྱོགས་སྐྱེམས་ཀྱིས་བཀང༔ གཡོན་ཟོ་བ་འབྲུ་བཅུད་འཛིན༔ ནོར་བུ་ཡི་སྐ་རགས་དང༔ དར་གོས་སྤྲས་གཡུ་ཐོད་མཛེས༔ ཞབས་གཉིས་ཀྱིས་རྟ་བྲོ་འཁྲབ༔ འཁོར་དྲེགས་ཚོགས་སྡེ་དགུ་དང༔ མི་མིན་གྱི་དཔུང་ཚོགས་བཅས༔ རྣལ་འབྱོར་གྱི་བསང་མགྲོན་ལ༔ ད་ལྟ་འདིར་མྱུར་དུ་བྱོན༔ རང་རང་གི་ཡིད་མཐུན་པའི༔ ཁྲི་སྟན་ལ་བདེ་བར་བཞུགས༔ འབར་བ་ཡི་མེས་བསྲེགས་པའི༔ བསང་གསུར་གྱི་འདོད་རྒུའི་སྤྲིན༔ ཕྱི་ནང་དང་གསང་བ་ཡི༔ མཆོད་ཚོགས་ཀྱིས་ཁྱེད་ཅག་བརྔན༔ དར་སྣ་ལྔའི་འཕན་གདུགས་དང༔ ལས་ཡིད་མཐུན་རླུང་རྟ་འཕྱར༔ ཆ་བསྭོ་ཡིས་དགྱེས་པ་བསྐྱེད༔ རྔ་དུང་དང་མཆོད་དབྱངས་སྒྲས༔ རྒྱབ་བརྟེན་གྱི་ཏཱ་རེའི་ལྷ༔ གཏེར་སྲུང་བའི་དྲག་རྩལ་བརྔན༔ བང་མཛོད་དང་གཡང་གི་བདག༔ རི་རྩེ་རྒྱལ་འཕན་ཕྱུག་བརྔན༔ སྲས་མཆོག་དང་སྲས་མོ་བརྔན༔ ཡུམ་ནོར་འཆང་དྲེགས་པ་བརྔན༔ ཡང་འཁོར་གྱི་མི་མིན་བརྔན༔ ཁྱེད་ལྷ་ཚོགས་བརྔན་སྦྱིན་མཐུས༔ བདག་འདོད་པའི་ལས་བཅོལ་ནི༔ དཔལ་སངས་རྒྱས་བསྟན་པ་དང༔ དེ་འཛིན་པའི་དགེ་འདུན་སྡེ༔ དགུང་ཡར་གྱི་ཟླ་བཞིན་སྤེལ༔ བསྟན་ཆོས་ཀྱི་སྦྱིན་བདག་ཀུན༔ ཚེ་དཔལ་དང་འབྱོར་བ་སྤེལ༔ དགོན་ཆོས་གྲྭ་འདུས་པའི་སྡེ༔ ཡིད་འདོད་རྒུའི་བསམ་པ་སྒྲུབ༔ ཐོ་འཚམས་དང་མཐོ་གནོན་དགྲ༔ བར་གཅོད་དང་གེགས་བྱེད་པའི༔ མི་མིན་གྱི་ནག་ཕྱོགས་བདུད༔ འཕར་སྤྱང་དང་ཇག་རྐུན་དམག༔ ཁ་ཕོང་དང་རྗེས་མེད་དུ༔ ཆོ་འཕྲུལ་སོགས་དྲག་པོས་སྒྲོལ༔ ཁམས་གསུམ་གྱི་ཕྱྭ་གཡང་ཀུན༔ ཁབ་ལེན་གྱིས་རྡོ་བ་བཞིན༔ བདག་སོགས་ཀྱི་དཔལ་དུ་ཁུག༔ ཁྱེད་ཅག་དང་འབྲེལ་ཐོགས་ཡོངས༔ གྲོལ་བ་ནས་གྲོལ་མཆོག་གི༔ ས་ལམ་ལ་ཆགས་ཐོགས་ཀྱི༔ སྒྲིབ་པ་དང་བདག་འཛིན་ཕྲི༔ བྱང་ཆུབ་ལ་འགོད་པར་ཤོག༔ ཡུལ་ཕྱོགས་འདིར་ཕུན་ཚོགས་ཀྱི༔ སྣང་བ་ཡིས་ས་གསུམ་ཀུན༔ ཡོངས་འགེང་བའི་རྟེན་འབྲེལ་གྱིས༔ དགེ་ལེགས་ཀྱི་ཤིས་པ་སྩོལ༔ ཞེས་པ་འདི་ཏཱ་རེ་ཞེས་བྱའི་གནས་བདག་གི་ལྷོའི་བང་མཛོད་གཏེར་གྱི་མངའ་བདག་རི་རྩེ་རྒྱལ་འཕན་ཕྱུག་གི་བསང་མཆོད་འདི་གནས་སྒོ་འབྱེད་སྐབས་སྐྱེས་ཐོབ་ཀྱི་རིག་འཛིན་ཨརྠ་སིདྡྷིས་བསྐུལ་བ་ལ་བརྟེན་ནས༔ ཕྱིས་གནས་དེར་ཕུར་སྒྲུབ་སྐབས་ཉམས་ལ་ཤར་བཞིན་ལུང་རྟོགས་བསྟན་འཛིན་ལ་ས་ར་ཧི་ཏས་སྤེལ་བ་སརྦ་ཛ་གད་ཏཾ༔ མངྒ་ལཾ༔