ཡུལ་ལྷ་བྲག་དཀར་གྱི་བསང་མཆོད་འདོད་དོན་ལྷུན་གྲུབ།

ཡུལ་ལྷའི་བསང་མཆོད་འདོད་དོན་ལྷུན་གྲུབ་བཞུགས་སོ༔ ན་མོ་པདྨ་ཀཱ་ར་ཡེ༔ ཡུལ་ལྷའི་བསང་བྱ་བར་འདོད་པས་བསང་རྫས་གྱ་ནོམ་པ་གོས་དཀར་ལྷ་མོའི་མཁའ་ཀློང་དུ་བསྟིམ་ལ་འབྲུ་གསུམ་གྱིས་བྱིན་གྱིས་བརླབ་ལ་འདི་སྐད་དོ༔ ཨེ་མ་ཧོ༔ རིག་གསུམ་སེམས་དཔས་བྱིན་རླབས་གངས་ཅན་ལྗོངས༔ མཁན་སློབ་ཆོས་གསུམ་གདུལ་ཞིང་བོད་ཀྱི་ཡུལ༔ ཁྱད་པར་ས་ཡི་མདོ་སྨད་རྒྱལ་མོ་རོང༔ དེ་ཡི་ཉེ་ཆར་བཀྲ་ཤིས་གནས་ཀྱི་རིའི༔ སྒོ་སྲུང་དུང་གི་མི་གཟུགས་བྲག་དཀར་ཞེས༔ ཡུལ་མིའི་མཚན་གསོལ་གནས་བདག་དྲེགས་པའི་གཙོ༔ ཁྱེད་ཀྱི་སྐུ་མདོག་ཆ་ལུགས་མ་ངེས་ཤིང༔ རྣལ་འབྱོར་བསང་གི་མགྲོན་ལ་བོས་པའི་དུས༔ དཀར་གསལ་ཞལ་གཅིག་འཛུམ་མདངས་ཡ་ལ་ལ༔ ཕྱག་གཡས་ཤེལ་གྱི་ཡ་ཙ་ལྷངས་སེ་ལྷང༔ ཕྱག་གཡོན་འདོད་དགུའི་ནོར་གཞོང་སྤུངས་སེ་སྤུང༔ དར་དང་ཟ་འོག་ན་བཟའ་ལྷུབས་སེ་ལྷུབ༔ དབུ་ལ་བསེ་ཞུ་རུ་དར་ལྷབས་སེ་ལྷབ༔ སྐེད་ལ་སྟག་རལ་གཟིག་ཤུབས་ཀྱི་ལི་ལི༔ སྔོན་དུ་མི་དམར་ཤ་ར་ར༔ སྟེང་དུ་བླ་བྱ་ལྡེངས་སེ་ལྡེང༔ ལས་མཁན་འབྲེང་ཞགས་ཁྱུགས་སེ་ཁྱུག༔ རྒྱབ་ཏུ་གཅན་སྤྱང་ཁེངས་སེ་ཁེང༔ གཅོད་པ་སྟར་ཐོག་ཐ་ར་ར༔ ཆིབས་སུ་དུང་མདོག་འཕུར་ཤེས་ལ༔ སྒ་སྲབ་རིན་ཆེན་ཆས་ཀྱིས་སྤྲས༔ སྟེང་དུ་ཕྱེད་སྐྱིལ་ཚུལ་གྱིས་བཅིབས༔ མངོན་ཤེས་རྫུ་འཕྲུལ་སྟོབས་མངའ་བའི༔ ཡུལ་སྐྱོང་བྲག་དཀར་གཉན་པོ་ཁྱོད༔ མ་ཐོགས་མྱུར་དུ་འདིར་གཤེགས་ལ༔ དམ་ཚིག་དྲན་བཞིན་བརྟན་པར་བཞུགས༔ འཕྲུལ་དགའི་ཚུལ་གྱིས་འདུད་པར་བགྱི༔ ཡུམ་ལྔའི་ཀློང་ལས་ལེགས་བསྐྲུན་པའི༔ བདུད་རྩི་ཤིང་ལྔའི་དུད་སྤྲིན་དང༔ ཕྱེ་མར་སྐྱེམས་ཀྱིས་གསོལ་ལོ་མཆོད༔ བརྔན་སྦྱིན་མཆོད་པ་འདི་བཞེས་ལ༔ རྣལ་འབྱོར་འདོད་དོན་གང་ཡིན་པ༔ དོན་དེ་དེ་རིང་འགྲུབ་གྱུར་ཅིག༔ ནད་གདོན་ཆགས་ཆེ་ཉམ་ང་དང༔ མི་ཕྱུགས་རིམས་ཡམས་གཅན་སྤྱང་སོགས༔ མི་མཐུན་མཐའ་དག་ཞི་བར་མཛོད༔ ཚེ་བསོད་ལོངས་སྤྱོད་དཔལ་འབྱོར་ཀུན༔ རྒྱ་མཚོ་ཆར་གྱིས་བསྐྱེད་ལྟར་སྤེལ༔ ཁམས་གསུམ་སྐྱེ་འགྲོའི་བླ་ཡིད་སེམས༔ ཐོགས་མེད་དབང་དུ་འདུ་བར་མཛོད༔ སྡང་སེམས་འཆང་བའི་བྱད་མ་དང༔ བསྟན་འགྲོའི་བདེ་སྐྱིད་འཕྲོག་བྱེད་པའི༔ དགྲ་གདོན་མིང་གི་ལྷག་མར་མཛོད༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་པ་འདི་ནི་བྲག་དཀར་གནས་ལ་འགོ་བའི་ལྷས་འདུ་ཤེས་ཁྱད་པར་ཅན་ཡོད་པའི་རིག་འཛིན་བློ་ལྡན་གྱི་སྐྱེས་བུས་དོན་འགྲུབ་པའི་ཆ་རྐྱེན་དུ་ནན་གྱིས་བསྐུལ་བ་མི་ལྡོག་ཙམ་དུ་ཆོས་མེད་རྨོངས་རྟུལ་མཁན་ས་ར་ཧི་ཏས་གླེན་གཏམ་གྲོང་ཚིག་འདི་སྨྲས་པ་ལ་ཉེས་འགལ་མཆིས་ན་ལྷ་དང་སྲུང་མར་བཤགས༔ དགེ་བར་གྱུར་ན་མཁའ་ཁྱབ་འགྲོ་ལ་བསྔོ༔ སརྦ་མངྒ་ལཾ༔