བཻ་ཡི་ཡུལ་ལྷ་བཀྲ་ཤིས་ལྷ་རྩེའི་བསང་མཆོད་འདོད་འབྱུང་དབང་སྔོན།
ཡུལ་ལྷ་བཀྲ་ཤིས་ལྷ་རྩེའི་བསང་མཆོད་འདོད་འབྱུང་དབང་སྔོན་བཞུགས༔ རིག་པ་རང་བྱུང་དབྱིངས་ཀྱི་ལྷ༔ འདུ་འབྲལ་མེད་པར་སྐྱབས་སུ་བསྟེན༔ ཡུལ་ལྷ་བཻ་ཡི་ནོར་ལྷ་མཆོག༔ བཀྲ་ཤིས་ལྷ་རྩེའི་བསང་མཆོད་ནི༔ སྟེགས་མཐོན་ཁ་རུ་ཤིང་སྣ་དང༔ ཕྱེ་མར་སྐྱེམས་རིགས་ཞུགས་སུ་སྦྱངས༔ རང་ཉིད་ལྷ་ཡི་ང་རྒྱལ་གྱིས༔ སྐྱབས་སེམས་ཚོགས་བསགས་སྔོན་སོང་ནས༔ ཀྱཻ༔ རང་བྱུང་ཡེ་ཤེས་ལས་གྲུབ་དབྱིངས་ཀྱི་མཁར༔ ལྷུན་གྲུབ་སྒོ་བརྒྱད་ཕྱི་གསལ་འཕོས་པའི་རྩལ༔ དག་དང་མ་དག་ཕན་གནོད་བྱེད་པོ་ལས༔ ཡུལ་སྐྱོང་དཔའ་བོ་བཀྲ་ཤིས་ལྷ་རྩེ་ཞེས༔ བཻ་ཡིག་ལས་སྐྱེས་མདུང་དར་ནོར་གཞོང་བསྣམས༔ དཀར་དམར་ཁྲོ་འཛུམ་བཞད་པའི་གད་རྒྱངས་ཅན༔ ཟ་འོག་ལྷབ་ལྷུབ་དར་ཐོད་རྒོད་འཕྲུ་འཕུར༔ བཙན་རྟ་དམར་པོ་གྱི་ལིང་ཁ་དཀར་ནི༔ སྒ་སྲབ་ཆས་ཅན་འགྱིང་བའི་ཚུལ་གྱིས་བཅིབས༔ འཁོར་དུ་ལྷ་ཀླུ་མི་མིན་བྱེ་བས་བསྐོར༔ མ་ཐོག་རིངས་བའི་ཚུལ་གྱིས་གཤེགས་སུ་གསོལ༔ ས་མ་ཡཱ་ཛ༔ ཀྱཻ༔ ཁྱོད་ལ་འདོད་དོན་གསོལ་བའི་གཏང་རག་ནི༔ ལྷ་ཡི་ཞལ་ཟས་རོ་བརྒྱའི་བྱེ་བྲག་འབུལ༔ དཀར་གསུམ་མངར་གྱི་གཏོར་མའི་བྱེ་བྲག་འབུལ༔ ཇ་ཆང་འོ་ཞོ་བཏུང་བ་མཚོ་ལྟར་བསྐྱིལ༔ བདུད་རྩི་ཤིང་ལྔའི་དུད་སྤྲིན་རོལ་མཚོར་སྤེལ༔ ཀུན་བཟང་མཆོད་སྤྲིན་རྒྱ་ཆེན་རབ་བསྐྲུན་པས༔ མཆོག་གསུམ་རྩ་གསུམ་དམ་ཅན་རྒྱ་མཚོ་བརྔན༔ ཁྱད་པར་ཡུལ་སྐྱོང་རྡོ་རྗེ་དབྱི་ཁྲོམ་བསང༔ སྒོས་སུ་གཞི་བདག་རྣལ་འབྱོར་གྲོགས་དན་བསང༔ བྱེ་བྲག་བཻ་ཡི་བཀྲ་ཤིས་ལྷ་རྩེ་བསང༔ དེ་འཁོར་ལྷ་ཀླུ་མི་མིན་འབྱུང་པོ་བསང༔ སྣང་ཞིང་སྲིད་པའི་ལྷ་སྲིན་སྡེ་བརྒྱད་བསང༔ རིགས་དྲུག་ཕ་མ་ལན་ཆགས་བགེགས་རིགས་བསང༔ བསང་ངོ་གསོལ་ལོ་མཆོད་དོ་ལྷ་རྒྱལ་ལོ༔ ནད་གདོན་བར་ཆད་མི་མཐུན་གཡུལ་ངོ་བཟློག༔ འཕར་སྤྱང་ཇག་རྐུན་འཚེ་བའི་གཡུལ་ངོ་ཤིགས༔ འདོད་པའི་ཡོན་ཏན་ལྷུན་གྲུབ་དཔལ་ཐོབ་མཛོད༔ ནག་ཕྱོགས་གདུག་འདྲེ་དམ་སྲི་རྨང་ནས་རློགས༔ ཁམས་གསུམ་སྲིད་པའི་ཟས་ནོར་དབང་དུ་སྡུད༔ སྙན་གྲགས་དུང་གི་རང་སྒྲ་ཕྱོགས་བརྒྱར་ངོམས༔ ཁ་དཀར་ཞེ་ནག་བསྟན་དགྲ་ཆམ་ལ་ཕོབ༔ མི་མཐུན་གཡུལ་རྒྱལ་མཐུན་པའི་གྲོགས་དན་མཛོད༔ བསྟན་འགྲོའི་དཔལ་ལ་འགོད་བའི་བཀྲ་ཤིས་ཤོག༔ ཅེས་བཻ་ལས་སྐྱེས་པའི་ཡུལ་སྐྱོང་ནོར་ལྷ་དྲག་བཙན་བཀྲ་ཤིས་ལྷ་རྩེའི་བསང་མཆོད་འདི་ནུ་བོ་རྒྱ་མཚོ་ཚེ་རིང་གིས་བསྐུལ་ངོར་སྤྲུལ་མིང་འཆོལ་སྤྱོད་པ་ས་ར་ཧི་ཏས་མཐོང་སྣང་བཞིན་བྲིས་པ་དགེ་ལེགས་འཕེལ༔