ཡུལ་སྐྱོང་ཤོག་ཤོག་ཟངས་ཁྲབ་དམར་པོའི་བསང་བསྡུས།
ཡུལ་སྐྱོང་ཤོག་ཤོག་ཟངས་ཁྲབ་དམར་པོའི་བསང་བསྡུས་བཞུགས༔ ཀྱཻ༔ གཞི་དབྱིངས་སྤྲོས་བྲལ་འཁོར་འདས་རོ་མཉམ་ཀྱང༔ མ་འགགས་རོལ་པ་སྒྱུ་མའི་ཆོ་འཕྲུལ་ལས༔ ཡུལ་སྐྱོང་གནོད་སྦྱིན་དྲག་པོ་རབ་འབར་རྩལ༔ ཞལ་གཅིག་ཕྱག་གཉིས་དམར་གསལ་ཁྲོ་འཛུམ་ཉམས༔ ཟངས་ཁྲབ་བསེ་རྨོག་འཁོར་གསུམ་དཔའ་བོའི་ཆས༔ རྟ་དམར་རླུང་གཤོག་སྒ་སྲབ་རྒྱན་ལྡན་ཆིབས༔ ཕྱག་གཡས་མདུང་དམར་གཡོན་པས་བཙན་ཞགས་བསྣམས༔ གྲོགས་སྟེར་ཀླུ་མོ་འོད་ལྡན་ཡུམ་དང་བཅས༔ རང་གདངས་བདུད་བཙན་ཀླུ་སོགས་དྲེགས་ཚོགས་བསྐོར༔ རྣལ་འབྱོར་བསང་གི་མགྲོན་ལ་སྤྱན་འདྲེན་གཤེགས༔ རང་མཐུན་གདན་བཞུགས་གུས་པས་མཆོད་སྤྲིན་འབུལ༔ ཁྱད་པར་བདུད་རྩི་ཤིང་ལྔའི་དུད་སྤྲིན་ལས༔ འདོད་ཡོན་མཐུན་རྫས་ལྷ་ལམ་ཁྱབ་པའི་སྤྲིན༔ དགྱེས་པར་བཞེས་ལ་རྣལ་འབྱོར་བདག་ཅག་གིས༔ ལས་བཞིའི་ཕྲིན་ལས་གང་བསམ་འབད་མེད་སྒྲུབ༔ ཀོ་ལོང་ཕྲག་ཏོག་གདུག་རྩུབ་དབྱིངས་སུ་ཞི༔ ཁྱོད་ལ་རེ་ལྟོས་བདག་སོགས་འགྲོ་བ་ཀུན༔ དགའ་བདེའི་དཔལ་གྱིས་འཚོ་བའི་ཤིས་པ་སྩོལ༔ ཞེས་ཤིང་ལུག་ཟླ་བ་དང་པོའི་ཚེས་བཅུ་ལ་ས་ར་ཧི་ཏས་སོ༔